River Shri Yamuna Ashtakam 6 Lyrics in Telugu:
శ్రీయమునాష్టకమ్ ౬
మద-కలకల-కలబిఙ్క-కులాకుల-కోక-కుతూహల-నీరే
తరుణ-తమాల-విశాల-రసాల-పలాశ-విలాస-సుతీరే ।
తరల-తుషార-తరఙ్గ-విహార-విలోలిత-నీరజ-నాలే
మమ దురితం త్వరితం హి వినాశయ నలినానన్దక-బాలే ॥ ౧॥
లలిత-కదమ్బ-కదమ్బ-నితమ్బ-మయూర-మనోహర-నాదే
నిజ-జల-సఙ్గిత-శీతల-మారుత-సేవిత-పాదప-పాదే ।
వికసిత-సిత-శతపత్ర-లసద్-గమనాఞ్చిత-మత్త-మరాలే
మమ దురితం త్వరితం హి వినాశయ నలినానన్దక-బాలే ॥ ౨॥
రాధా-రమణ-చరణ-శరణాగతి-జీవన-జీవన-వాహే
బహుతర-సఞ్చిత-పాప-విదారణ-దూరీకృత-భవ-దాహే ।
విధి-విస్మాపక-దుర్జన-తాపక-నిజ-తేజో-జిత-కాలే
మమ దురితం త్వరితం హి వినాశయ నలినానన్దక-బాలే ॥ ౩॥
అమర-నికర-వర-వాగ్-అభినన్దిత-హరి-జల-కేలి-విలాసే
నిజ-తట-వాసి-మనోరథ-పూరణ-కృత-సురతరు-పరిహాసే ।
స్నాన-విమర్దిత-హరి-పద-కుఙ్కుమ-పఙ్క-కలఙ్కిత-భాలే
మమ దురితం త్వరితం హి వినాశయ నలినానన్దక-బాలే ॥ ౪॥
అమల-కమల-కుల-దల-చల-మధుకర-నినద-ప్రతిధ్వని-శోభే
స్వ-సలిల-శీకర-సేవక-నర-వర-సముదిత-హరి-పద-లోభే ।
స్వాఙ్గ-స్పర్శ-సుఖీ-కృత-వాయు-సముద్ధత-జన-పద-జాలే
మమ దురితం త్వరితం హి వినాశయ నలినానన్దక-బాలే ॥ ౫॥
మణి-గణ-మౌక్తిక-మఞ్జుల-మాల-నిబద్ధ-తట-ద్వయ-భాసే
ప్రకర-నికర-తను-ధారి-సురేశ్వర-మణ్డల-రచిత-నివాసే ।
విపుల-విశద-మృదు-తల-పులినావలి-కమన-గమన-బక-మాలే
మమ దురితం త్వరితం హి వినాశయ నలినానన్దక-బాలే ॥ ౬॥
అగణిత-గుణ-గణ-సాధన-సముదయ-దుర్లభ-భక్తి-తడాగే
సానన్దాత్యవగాహన-దాయిని మాధవ-సమ-తను-రాగే ।
రస-నిధి-సుఖ-విధి-కారణ-కేశవ-పాద-విముఖ-వికరాలే
మమ దురితం త్వరితం హి వినాశయ నలినానన్దక-బాలే ॥ ౭॥
వ్రజ-నవ-యువతి-విహార-విధాయక-కుఞ్జ-పుఞ్జ-కృత-సేవే
నిజ-సుషమా-నిచయేన వశీకృత-గోకుల-జీవన-దేవే ।
కృష్ణ-చన్ద్ర-కరుణా-రస-వాహిని-వృన్దావన-వన-మాలే
మమ దురితం త్వరితం హి వినాశయ నలినానన్దక-బాలే ॥ ౮॥
సార్థక-సున్దర-పద-యమకాఞ్చిత-కరణ-కుతూహల-కారం
పద్యాష్టకమిదమర్క-సుతా-మహిమామృత-వర్ణన-భారమ్ ।
కవివర-నన్ద-కిశోర-కృతం శుభ-భక్తి-యుతో నర-జాతిః
కోఽపి పఠేద్యది గోష్ఠ-పురన్దర-భక్త-గణేషు విభాతి ॥ ౯॥
ఇతి శ్రీనన్దకిశోరగోస్వామివిరచితం శ్రీయమునాష్టకం సమ్పూర్ణమ్ ।
