River Shri Yamuna Ashtakam 7 Lyrics in Malayalam:
ശ്രീയമുനാഷ്ടകം 7
ത്വയി സ്നാതാ ധ്യാതാ തവ സലിലപാതാ നമയിതാ
സ്തുതേഃ കര്‍താ ധര്‍താ തവ രജസി മര്‍താ രവിസുതേ ।
ന ചൈവാഖ്യാം വക്താ ശമനസദനേ യാതി യമുനേ
നമാമസ്ത്വാം നിത്യാം സകലഗുണയുക്താം രവിസുതാം ॥ 1॥
മുരാരാതേഃ കായപ്രതിമലലിതം വാരി ദധതീം
കലിന്ദാദ്രേഃ ശൃങ്ഗാദപി പതനശീലാം ഗതിമതീം ।
സ്വപാദാബ്ജം ധ്യാതുര്‍ജനിമരണശോകം വിതുദതീം
നമാമസ്ത്വാം നിത്യാം സകലഗുണയുക്താം രവിസുതാം ॥ 2॥
കദംബാനാം പുഷ്പാവലിഭിരനിശം രൂഷിതജലാം
വിധീന്ദ്രാദ്യൈര്‍ദേവൈര്‍മുനിജനകുലൈഃ പൂജിതപദാം ।
ഭ്രമദ്ഗോഗോധുഗ്ഭിര്‍വിഹഗനികരൈര്‍ഭൂഷിതതടാം
നമാമസ്ത്വാം നിത്യാം സകലഗുണയുക്താം രവിസുതാം ॥ 3॥
രണദ്ഭൃങ്ഗശ്രേണീവികസിതസരോജആവലിയുതാം
തരങ്ഗാന്തര്‍ഭ്രാംയന്‍മകരസഫരീകച്ഛപകുലാം ।
ജലക്രീഡദ്രാമാനുജചരണസംശ്ലേഷരസികാം
നമാമസ്ത്വാം നിത്യാം സകലഗുണയുക്താം രവിസുതാം ॥ 4॥
തരുശ്രേണീകുഞ്ജാവലിഭിരഭിതഃ ശോഭിതതടാം
മഹോക്ഷാണാം ശൃങ്ഗാവലിഭിരഭിതോ മര്‍ദിതതടാം ।
സ്ഥിതാം വൃന്ദാടവ്യാം സതതമഭിതഃ പുഷ്പിതവനാം
നമാമസ്ത്വാം നിത്യാം സകലഗുണയുക്താം രവിസുതാം ॥ 5॥
നിശായാം യസ്യാം ബിംബിതമമലതാരാഗണമഹോ
വിലോക്യോത്കണ്ഠന്തേ സകലസഫരാ അത്തുമനിശം ।
വികീര്‍ണം ലാജാനാം നികരമിതി മത്വാ സരഭസം
നമാമസ്ത്വാം നിത്യാം സകലഗുണയുക്താം രവിസുതാം ॥ 6॥
ശരന്‍മേഘച്ഛായാ സകലമനുജൈര്യത്സലിലഗാ
ഹരേഃ സ്വസ്യാമാപ്തും സ്നപനമിതി ബുദ്ധ്യാ സരഭസം ।
കിമായാതാ ഗര്‍ഭേ സുരസരിദഹോ തര്‍ക്യത ഇതി
നമാമസ്ത്വാം നിത്യാം സകലഗുണയുക്താം രവിസുതാം ॥ 7॥
നൃണാമീക്ഷാമാത്രാദപി സകലസൌഖ്യം വിദധതീ-
മനായാസേനൈവാഖിലഭുവനഭോഗ്യം പ്രദദതീം ।
സ്വകാന്തീനാം വ്യൂഹൈര്‍ബലഭിദുപലം ചാപി തുദതീം
നമാമസ്ത്വാം നിത്യാം സകലഗുണയുക്താം രവിസുതാം ॥ 8॥
മമൈഷാ വിജ്ഞപ്തിഃ പദകമലയോസ്തേ തരണിജേ
ബടേ ഹാ ഭാണ്ഡീരേ തവ വിമലതീരേ നിവസതഃ ।
ഹരേ കൃഷ്ണേത്യുച്ചൈരപി ച തവ നാമാനി ഗദതഃ
സദാ വൃന്ദാരണ്യേ ജനനി ജനനം യാതു മമ വൈ ॥ 9॥
കിമായാതാ കാലഃ സ ഇഹ ജനനേ മേ ഹതവിധേ-
ര്യദായാതഃ കൃഷ്ണോ മധുമധുരവാങ്നിര്‍ഝരജലൈഃ ।
ശ്രുതേര്‍മാര്‍ഗം സിഞ്ചന്‍കരകമലയുഗ്മേന സഹസാ
മദങ്ഗം സ്വാങ്ഗേ ഹാ വ്രതതിമിവ വൃക്ഷോ ഗമയിതാ ॥ 10॥
ഇദം സ്തോത്രം പ്രാതഃ പഠതി യമുനായാഃ പ്രതിദിനം
ശരീരീ യസ്തസ്യോപരി ഭവതി പ്രീതാ രവിസുതാ ।
ഹരേഃ പ്രേഷ്ഠോ ഭൂത്വാ ഹരിചരണഭക്തിം ച ലഭതേ
ഭുവോ ഭോഗാന്‍മുക്ത്വാ വ്രജതി മരണാന്തേ ഹരിപദം ॥ 11॥
ഇതി ശ്രീവനമാലിശാസ്ത്രിവിരചിതം ശ്രീയമുനാഷ്ടകം ।