1000 Names of Umasahasram | Sahasranama Lyrics in Oriya

Umasahasram Sahasranama Stotram Lyrics in Oriya:

॥ ଉମାସହସ୍ରମ୍ ॥

%c01-q1/Nalini.Kalavacharla/uma\_sahasram1-25।txt medskip
ପ୍ରଥମଂ ଶତକମ୍

ପ୍ରଥମଃ ସ୍ତବକଃ
ଵ୍ୟୋମଶରୀରା, ସ୍ତ୍ରୀରୂପା ଚ (ଆର୍ୟାଵୃତ୍ତମ୍)

ଅଖିଲଜଗନ୍ମାତୋମା ତମସା ତାପେନ ଚାକୁଲାନସ୍ମାନ୍ ।
ଅନୁଗୃହ୍ଣାତ୍ଵନୁକମ୍ପାସୁଧାର୍ଦ୍ରୟା ହସିତଚନ୍ଦ୍ରିକୟା ॥ ୧.୧ ॥

ନିଖିଲେଷୁ ପ୍ରଵହନ୍ତୀଂ ନିରୁପାଧିଵିମର୍ଶୟୋଗଦୃଶ୍ୟୋର୍ମିମ୍ ।
ଅଜରାମଜାମମେୟାଂ କାମପି ଵନ୍ଦେ ମହାଶକ୍ତିମ୍ ॥ ୧.୨ ॥

ସା ତତ୍ତ୍ଵତଃ ସମନ୍ତାତ୍ସତ୍ୟସ୍ୟ ଵିଭୋସ୍ତତା ତପଶ୍ଶକ୍ତିଃ ।
ଲୀଲାମହିଲାଵପୁଷା ହୈମଵତୀ ତନୁଷୁ କୁଣ୍ଡଲିନୀ ॥ ୧.୩ ॥

ପରମଃ ପୁରୁଷୋ ନାଭିର୍ଲୋକାନାଂ ସତ୍ୟ ଉଚ୍ୟତେ ଲୋକଃ ।
ପରିତସ୍ତତଃ ସରନ୍ତୀ ସୂକ୍ଷ୍ମା ଶକ୍ତିସ୍ତପୋ ଲୋକଃ ॥ ୧.୪ ॥

ଅନ୍ତର୍ଗୂଢାର୍ଥାନାଂ ପୁରୁଷାଗ୍ନେର୍ଧୂମକଲ୍ପ ଉଦ୍ଗାରଃ ।
ଶକ୍ତିଜ୍ଵାଲାଃ ପରିତଃ ପ୍ରାନ୍ତେଷ୍ଵଭଵଜ୍ଜନୋ ଲୋକଃ ॥ ୧.୫ ॥

ଅତିସୂକ୍ଷ୍ମଧୂମକଲ୍ପଂ ଲୋକଂ ତତମାଖ़୍ୟୟାଽନ୍ୟୟା ନାକମ୍ ।
ଏତଂ ତତୋଽପି ସୂକ୍ଷ୍ମା ଵ୍ୟାପ୍ତାଽନ୍ତରତଃ ପରା ଶକ୍ତିଃ ॥ ୧.୬ ॥

ଧୂମାନ୍ତରୋଷ୍ମକଲ୍ପା ଶୁଦ୍ଧଜ୍ଵାଲୋପମା ଚ ୟା ଶକ୍ତିଃ ।
ତାଂ ଦିଵମାହୁଃ କେଚନ ପରମଂ ଵ୍ୟୋମାପରେ ପ୍ରାହୁଃ ॥ ୧.୭ ॥

ଉଦ୍ଗୀର୍ଣଧୂମକଲ୍ପୋ ୟୋଽୟମପାରୋ ମହାଞ୍ଜନୋ ଲୋକଃ ।
ଵ୍ୟୋମାନ୍ତରିକ୍ଷଗଗନପ୍ରଭୃତିଭିରଭିଧାଭିରାହୁସ୍ତମ୍ ॥ ୧.୮ ॥

ପ୍ରାନ୍ତେଷୁ କୋଽପି ଶକ୍ତେଃ ପୃଥଗାତ୍ମା ଵିୟଦୁପାଧିସଙ୍ଗେନ ।
ପରମାତ୍ମନୋ ଵିଭକ୍ତଃ ସ୍ଵୟମଭିମନ୍ତା ଵିନିଷ୍ପେଦେ ॥ ୧.୯ ॥

ଦକ୍ଷଃ ପରୋକ୍ଷମୁଦିତଃ ପନ୍ଥା ଏଷ ତ୍ଵିଷାଂ ଜନୋ ଲୋକଃ ।
ତଦ୍ଗର୍ଭେ ଲବ୍ଧାତ୍ମା କଥିତା ଦାକ୍ଷାୟଣୀ ଶକ୍ତିଃ ॥ ୧.୧୦ ॥

ସତ୍ୟାଃ ପ୍ରାଗପି ଶକ୍ତେଃ ପ୍ରାଦୁର୍ଭାଵଃ ସ କୀର୍ତ୍ୟତେ ପ୍ରଥମଃ ।
ଈଶାଭିମାନମୟ୍ୟାଃ ପୃଥଗଭିମାନିତ୍ଵନିଷ୍ପତ୍ତ୍ୟା ॥ ୧.୧୧ ॥

ଆକାଶସ୍ୟ ସୁତୈଵଂ ଲକ୍ଷଣୟା ଵସ୍ତୁତଃ ପ୍ରସୂଃ ଶକ୍ତିଃ ।
ଅଦିତେର୍ଦକ୍ଷୋ ଦକ୍ଷାଦଦିତିରିତି ଶ୍ରୁତିରବାଧୈଵମ୍ ॥ ୧.୧୨ ॥

ଜଗତାଂ ମାତାପିତରୌ ସତୀଭଵୌ କେଽପି ପଣ୍ଡିତାଃ ପ୍ରାହୁଃ ।
ଅଦିତିପ୍ରଜାପତୀ ତାଵପରେଷାଂ ଭାଷୟା ଵିଦୁଷାମ୍ ॥ ୧.୧୩ ॥

ଦିଵ୍ୟପୁମାକୃତିମୀଶେ ବିଭ୍ରତି ଲୀଲାର୍ଥମସ୍ୟ ରମଣାୟ ।
ଦିଵ୍ୟଵନିତାକୃତିଂ ସା ବଭାର ମାତା ଚ ଭୁଵନାନାମ୍ ॥ ୧.୧୪ ॥

ଭାସୁରହେମାଭରଣାଂ ବହୁଶୋଭାମୀଶ୍ଵରପ୍ରମୋଦକଲାମ୍ ।
ମୂର୍ତିଂ ପାଵନକୀର୍ତିଂ ତାଂ ହୈମଵତୀମୁମାମାହୁଃ ॥ ୧.୧୫ ॥

ତସ୍ୟ ପ୍ରଥମଃ ସାକ୍ଷୀ ଭୁଵନଜୁଷାଂ ନୟନଶାଲିନାଂ ମଧ୍ୟେ ।
ଵପୁଷଃ କୀଲାଦିସୁଦୃଶୋ ନିରୁପମପୁଣ୍ୟୋ ନିଲିମ୍ପପତିଃ ॥ ୧.୧୬ ॥

ପଲ୍ଲଵମୃଦୁ ଵେଦିଗତଜ୍ଵଲନପଵିତ୍ରଂ ମହାର୍ଘମଣିକାନ୍ତମ୍ ।
ନଵଚନ୍ଦ୍ରଖଣ୍ଡସୌମ୍ୟଂ ଶିଵସୁଦୃଶସ୍ତତ୍ସ୍ମରାମି ଵପୁଃ ॥ ୧.୧୭ ॥

କେଚନ ଗୌରୀଂ ଦେଵୀଂ ଶୀତାଦ୍ରେର୍ଦେଵତାତ୍ମନୋ ଜାତାମ୍ ।
କଥୟନ୍ତି ସ୍ତ୍ରିୟମୁତ୍ତମଲାଵଣ୍ୟାସ୍ଵାଦିତୋ ଗଣ୍ୟାମ୍ ॥ ୧.୧୮ ॥

ସତ୍ୟୈଵ ଭଵତୁ ସେୟଂ କଥା ତଥାଽପି ପ୍ରଭାଷିତାଂ ଭକ୍ତୈଃ ।
ତାଂ ମୂର୍ତିମାଦିସୁଦୃଶୋ ଜାନୀୟାତ୍କମପି ତେଜୋଂଶମ୍ ॥ ୧.୧୯ ॥

ମନ୍ୟନ୍ତେ କେଽପି ଘନଂ ପର୍ଵତମୁକ୍ତଂ ନିଗୂଢୟା ଵାଚା ।
ପ୍ରାଦୁର୍ଭଵତି ଗଭୀରଧ୍ଵନିରଵିଷହ୍ୟା ୟତଃ ଶକ୍ତିଃ ॥ ୧.୨୦ ॥

ଆକାଶୋ ଗୋଲେଭ୍ୟୋ ୟଦ୍ଵିତରତି ନିଜରଜଶ୍ଚୟାଦନ୍ନମ୍ ।
ନେଶାୟ କୀର୍ତ୍ୟତେ ସା ସଂସାରେ ଦକ୍ଷୟାଗକଥା ॥ ୧.୨୧ ॥

ଵ୍ୟାପ୍ତାଽପି ୟନ୍ନିଗୂଢା ବହିରୀକ୍ଷକବୁଦ୍ଧ୍ୟପେକ୍ଷୟା ନଷ୍ଟା ।
ଶକ୍ତିର୍ୟାଗେ ତସ୍ମିନ୍ନଵସାନଂ ତଦୁଦିତଂ ସତ୍ୟାଃ ॥ ୧.୨୨ ॥

ପର୍ଵତନାମ୍ନୋ ଵୈଦିକଭାଷାୟାଂ ୟଦିୟମତିବଲା ଶକ୍ତିଃ ।
ଘନତୋ ଭଵତି ଵ୍ୟକ୍ତା ତଦଭିହିତଂ ପାର୍ଵତୀଜନନମ୍ ॥ ୧.୨୩ ॥

ତେଜୋଂଶତଃ ଶିଵାଵିହ ହିମାଚଲେଽନୁଗ୍ରହାୟ ଭୂମିଜୁଷାମ୍ ।
ଦତ୍ତୋ ୟତ୍ସାନ୍ନିଧ୍ୟଂ ଲୀଲାଚାରିତ୍ରମନ୍ୟଦିଦମ୍ ॥ ୧.୨୪ ॥

ଏତାସାମାର୍ୟାଣାଂ ଜାନନ୍ତଃ ଶାସ୍ତ୍ରସମ୍ମତଂ ଭାଵମ୍ ।
ଜାନୀୟୁର୍ଭଵମହିଷୀଂ ଭୁଵନାନାମମ୍ବିକାଂ ଦେଵୀମ୍ ॥ ୧.୨୫ ॥ 25

%c01-q2/Nandini.Kuppa/uma-c01-q2।txt medskip

ଦ୍ଵିତୀୟଃ ସ୍ତବକଃ
ସର୍ଗାଦିଵର୍ଣନମ୍ (ପଞ୍ଚଚାମରଵୃତ୍ତମ୍)

ସହାଦରେଣ ୟୋ ଵଲକ୍ଷପାରିଜାତମାଲୟା
ଗଲସ୍ଥଲୀଵିଭୂଷୟା ଧ୍ଵନିଂ ଵିନୈଵ ଭାଷତେ ।
ମହେଶପୁଣ୍ୟୟୋଷିତୋ ମନୋଜ୍ଞହାସ ଏଷ ମେ
ଵିଭୂତୟେ ପ୍ରକଲ୍ପତାଂ ଵିଧୂତୟେ ଚ ପାପ୍ମନାମ୍ ॥ ୨.୧ ॥

ନିରନ୍ତରଶ୍ରିତେ ସଦା କୃପାରସପ୍ରଵାହିନୀ
ଵିଲାସିନୀତନୁର୍ଵିଭୋଃ ପୁମାକୃତେର୍ଵିମୋହିନୀ ।
ସୁଧାତରଙ୍ଗକଲ୍ପହାସଭାସୁରାନନା ଶିଵା
ପଦାବ୍ଜଲମ୍ବିନୋ ଧୁନୋତୁ ପାପ୍ମନଃ ଫଲଂ ମମ ॥ ୨.୨ ॥

କରୋତି ୟା ବିଭର୍ତି ୟା ନିହନ୍ତି ୟା ଜଗତ୍ତ୍ରୟଂ
ସମନ୍ତତୋ ଵିଭାତି ୟା ନ ଦୃଶ୍ୟତେ କ୍ଵଚିଚ୍ଚ ୟା ।
ଅତୀଵ ଗୁପ୍ତରୂପିଣୀ ଗୁରୂପଦେଶମନ୍ତରା
ନ ଶକ୍ୟତେ ବୁଧୈଶ୍ଚ ବୋଦ୍ଧୁମନ୍ଧକାରିସୁନ୍ଦରୀ ॥ ୨.୩ ॥

ମହାନ୍ଧକାରବନ୍ଧୁରସ୍ୟ ଭୂତସଞ୍ଚୟସ୍ୟ ୟା
ଵିନିଦ୍ରିତସ୍ୟ ସର୍ଵବୀଜଧାମ୍ନି ମୌନମୁଦ୍ରିତେ ।
ସମନ୍ତତୋ ଵିଜୃମ୍ଭଣାୟ ଭାସନାୟ ଚାଭଵନ୍
ମହଦ୍ଵିଧାୟ ଚେଷ୍ଟିତଂ ମମେୟମିଷ୍ଟଦେଵତା ॥ ୨.୪ ॥

ମହେଶଗର୍ଭତଃ ସମସ୍ତଭୂତବୀଜକୋଶତଃ
କିରନ୍ତ୍ୟଶେଷଵିଶ୍ଵମପ୍ୟପାରଦିଵ୍ୟଵୈଭଵା ।
ଵିଚିତ୍ରଚେଷ୍ଟୟାଽଽଦ୍ୟୟା ଵିଧୂତନାଥନିଦ୍ରୟା
ଜଗନ୍ନୁତା ଜୟତ୍ୟସାଵନାଦିଶକ୍ତିରଦ୍ଭୁତା ॥ ୨.୫ ॥

ଭଵଂ ଭଣନ୍ତି ତାନ୍ତ୍ରିକାସ୍ତ୍ଵଦାଶ୍ରୟଂ ତମଵ୍ୟୟଂ
ସମାମନନ୍ତି ଵୈଦିକାଃ ସଦର୍ଚିତେ ସଦାହ୍ଵୟମ୍ ।
ନ କଶ୍ଚିଦର୍ଥଭେଦ ଏତଦାଖ୍ୟୟୋର୍ଦ୍ଵୟୋର୍ଭଵେ-
ଦ୍ଭିଦେୟମାଦିମଂ ପଦଂ ପୁମାନ୍ପରଂ ନପୁଂସକମ୍ ॥ ୨.୬ ॥

ସ ଚେଦ୍ଭଵୋଽଭିଧାନତୋ ଭଵାନ୍ୟସି ତ୍ଵମଵ୍ୟୟେ
ସମୀର୍ୟତେ ସ ସଦ୍ୟଦି ତ୍ଵମମ୍ବ ଭଣ୍ୟସେ ସତୀ ।
ନ ତେଽସ୍ତି ଭାଵତା ନ ଶକ୍ତିରୂପିଣୀ ହି ଵିଦ୍ୟସେ
ନ ଵେଦ୍ମି କାଲିକେ କଥଂ ସତୋଽସତଶ୍ଚ ଭିଦ୍ୟସେ ॥ ୨.୭ ॥

ଜଗଦ୍ଵିଧାନକାର୍ୟତଃ ପୁରା ସୁରାସୁରସ୍ତୁତେ
ତ୍ଵମମ୍ବ ଜୀଵିତଂ ଭଵସ୍ୟଭାଵମୂଲଵାଦିନାମ୍ ।
ଵିକଲ୍ପଵର୍ଜିତା ମତିଃ ପ୍ରବୋଧମୂଲଵାଦିନାଂ
ରସୋଽନପେକ୍ଷ ଉତ୍ତମଃ ପ୍ରମୋଦମୂଲଵାଦିନାମ୍ ॥ ୨.୮ ॥

ଭଵତ୍ୟସାଵତୋ ଭଵାନ୍ୟନାଦିରନ୍ତଵର୍ଜିତା
ଜଗନ୍ତି ମାତି ନିତ୍ୟମୋରସୌ ତଦଭ୍ୟୁଧାୟ୍ୟୁମା ।
ରସାତ୍ମିକୋଶ୍ୟତେଽଖିଲୈରସୌ ତତଃ ଶିଵୋଚ୍ୟତେ
ପରୈଵମୀଶିତୁଶ୍ଚିତିସ୍ତ୍ରିଧା ବୁଧୈରୁଦୀର୍ୟତେ ॥ ୨.୯ ॥

ଚିତିଃ ପରୈଵ କାମନା ରସେନ କେନଚିଦ୍ୟୁତା
ଚିତିଃ ପରୈଵ ସର୍ଵଦାଽପ୍ୟନସ୍ତ୍ୟଜସ୍ୟ ତୁ କ୍ରିୟା ।
ଚିତିଃ ପରୈଵ ଗୋଚରାଵଭାସିକା ମତିଃ ସ୍ମୃତା
ତ୍ରିତୈଵମନ୍ୟଥା ଚିତେଶ୍ଚିରନ୍ତନୈରୁଦୀର୍ୟତେ ॥ ୨.୧୦ ॥

ଚିକୀର୍ଷତି ପ୍ରଭୌ ଜ୍ଵଲତ୍ତ୍ଵଦୀୟକୀଲସନ୍ତତେର୍-
ଵିକୀର୍ଣଧୂମଜାଲମେତଦମ୍ବରସ୍ଥଲଂ ତତମ୍ ।
ଵିସୃଷ୍ଟିତଃ ପୁରାଽସି ୟା ଶିଵପ୍ରଭୁତ୍ଵରୂପିଣୀ
ପୃଥକ୍ପ୍ରଭୁଶ୍ଚ ଲକ୍ଷିତାଽସି ସା ସଵିତ୍ରି ପୁଷ୍କରେ ॥ ୨.୧୧ ॥

ପୁନର୍ଵିପାକତୋ ଘନୀଭଵଦ୍ଭିରକ୍ଷିଗୋଚରୈ-
ସ୍ତତସ୍ତତଃ ସମୁଜ୍ଜ୍ଵଲୈଃ ଖସୂକ୍ଷ୍ମରେଣୁଗୋଲକୈଃ ।
ଅଜାଣ୍ଡଵୃକ୍ଷକୋଟିକନ୍ଦବୃନ୍ଦଵଦ୍ଵ୍ୟଧାଃ ପୁରା
ମହେଶଦୃଷ୍ଟିମୟ୍ୟୁମେଽମ୍ବ ମଣ୍ଡଲାନି ଭାସ୍ଵତାମ୍ ॥ ୨.୧୨ ॥

ତପୋଽଗ୍ନିଧୂମଜାଲକେ ଭଵନ୍ତି ତୈଜସାଣଵୋ
ଭଵନ୍ତି ଜୀଵନାଣଵୋ ଭଵନ୍ତି ପାର୍ଥିଵାଣଵଃ ।
କ୍ରମେଣ ତଦ୍ଵିସୃଷ୍ଟିରୀଶଶକ୍ତିପାକଵୈଭଵେ
ସହସ୍ରଭାନୁମଣ୍ଡଲଂ ତୁ ଗୋଚରାଦି ଗୃହ୍ୟତାମ୍ ॥ ୨.୧୩ ॥

ମୟୂଖମାଲିମଣ୍ଡଲେ ନିଧାୟ ପାଦମୁଗ୍ରୟା
ମୟୂଖଶକ୍ତିରୂପୟା ତ୍ଵୟାଽମ୍ବ ଚେଷ୍ଟମାନୟା ।
ଖକୋଶତଃ ସମାହୃତୈଃ ପୁନସ୍ତ୍ରିରୂପରେଣୁଭିର୍-
ଵ୍ୟଧାୟି ମଙ୍ଗଲାଦିଭିଃ ସହ ଗ୍ରହୈରିୟଂ ମହୀ ॥ ୨.୧୪ ॥

ଵିସର୍ଜନେନ ଭୂୟସାଽପି ଦେଵ୍ୟତୃପ୍ତୟେୟତା
ଵିଚେଷ୍ଟିତଂ ଵିଲକ୍ଷଣଂ ପୁନର୍ଵ୍ୟଧୀୟତ ତ୍ଵୟା ।
ଇହାନ୍ତରେ ଵସୁନ୍ଧରାମୟୂଖମାଲିବିମ୍ବୟୋର୍-
ଅମୁଷ୍ୟ କର୍ମଣଃ ସଵିତ୍ରି ଚନ୍ଦ୍ରମଣ୍ଡଲଂ ଫଲମ୍ ॥ ୨.୧୫ ॥

ଵଧୂପୁମାକୃତୀ ତତୋ ବଭୂଵଥୁର୍ୟୁଵାଂ ଶିଵେ
ତ୍ଵମୀଶ୍ଵରଶ୍ଚ ଲୀଲୟା ଵିହର୍ତୁମତ୍ର ଵିଷ୍ଟପେ ।
ଅହୋ ପ୍ରଭୁଂ ନଭସ୍ତନୁଂ ତ୍ଵଦୀୟଗର୍ଭସମ୍ଭଵା-
ଦ୍ଭଣନ୍ତି କାଲି ତତ୍ର ଚିତ୍ରଭାଷଣାସ୍ତ୍ଵଦାତ୍ମଜମ୍ ॥ ୨.୧୬ ॥

ପୁମାନଥୋ ସ ବିମ୍ବତୋ ହିରଣ୍ମୟୋ ଦିଵାକରେ
ଧିୟାଽପି ନୈଵ କେଵଲଂ ହିରଣ୍ମୟେନ ଵର୍ଷ୍ମଣା ।
ଇଦଂ ତୁ କାର୍ୟରୂପମନ୍ୟଦୁଚ୍ୟତେ ବୁଧୈଃ ପ୍ରଭୋ-
ରିହାନ୍ତରେ ନୃଣାଂ ପୁନର୍ଵପୁସ୍ତଦମ୍ବ ବିମ୍ବିତମ୍ ॥ ୨.୧୭ ॥

ସ୍ଵୟଂ ଚ କାଞ୍ଚନପ୍ରକାଶଵର୍ଷ୍ମଣା ପ୍ରଭାକରେ
ତଥାଽନ୍ତରେ ନୃଣାଂ ଚ ତସ୍ୟ ବିମ୍ବିତାଽସି ସନ୍ନିଧୌ ।
ରସସ୍ୟ ଦେଵତାଽସି ଦେଵି ପୁଷ୍କରେ ଦିଵାକରେ
ମୟୂଖଦେଵତାଽସି ଭୋଗଦେଵତାଽସି ଦେହିଷୁ ॥ ୨.୧୮ ॥

ଵିସର୍ଜନେନ ଭୂୟସା ନଭସ୍ୟମୁତ୍ର ଭାସ୍କରେ
ମହୀଷୁ ଚାମ୍ବିକେ ୟୁଵାଂ ଵିଧାୟ ଦେହିନୋ ବହୂନ୍ ।
କ୍ଷିତେଃ ସୁଧାକରଂ ଗତାନ୍ ପିତୄନ୍ ଵିନେତୁମଵ୍ୟୟେ
ତନୂ ଚ ତତ୍ର ବଭ୍ରଥୁଃ ପ୍ରପଞ୍ଚରାଜ୍ଞି ମାୟୟା ॥ ୨.୧୯ ॥

ନଭୋଽନ୍ତରେ ହିରଣ୍ମୟଂ ଵିଭୁଂ ପ୍ରଚକ୍ଷତେ ହରଂ
ଦିନେଶବିମ୍ବବିମ୍ବିତଂ ଭଣନ୍ତି ପଙ୍କଜାସନମ୍ ।
ଇହାସ୍ମଦନ୍ତରାଲୟଂ ଵଦନ୍ତି ଵିଷ୍ଣୁମଚ୍ୟୁତଂ
ସଵିତ୍ରି ଜନ୍ମିନାମିୟଂ ତ୍ରିମୂର୍ତିଵାଦିଧୋରଣି ॥ ୨.୨୦ ॥

ନଭୋଽନ୍ତରେ ପ୍ରଚକ୍ଷତେ ହିରଣ୍ମୟାଙ୍ଗମୀଶ୍ଵରଂ
ଦିନେଶବିମ୍ବପୂରୁଷଂ ହିରଣ୍ୟଗର୍ଭମାଖ୍ୟୟା ।
ଵିରାଜମାନମକ୍ଷରଂ ଵିରାଜମନ୍ତରେ ନୃଣାଂ
ସଵିତ୍ରି ତତ୍ତ୍ଵଵେଦିନାମିୟଂ ତୁ ନାମକଲ୍ପନା ॥ ୨.୨୧ ॥

ହିରଣ୍ମୟାଙ୍ଗମମ୍ବରେ ଵଦନ୍ତି ସୋମମମ୍ବିକେ
ଦିଵାକରସ୍ୟ ମଣ୍ଡଲେ ତୁ ବିମ୍ବିତଂ ପୁରନ୍ଦରମ୍ ।
ଶରୀରିଣାମିହାନ୍ତରେଽଗ୍ନିମାଲପନ୍ତି ଭାସୁରଂ
ଚିରନ୍ତନୋକ୍ତିଦର୍ଶିନାମିୟଂ ଶିଵେ ପ୍ରଣାଲିକା ॥ ୨.୨୨ ॥

ସରୋରୁହାକ୍ଷଵାଗ୍ଵଧୂମନୋହରୌ ତୁ ପୂର୍ଵଵ-
ତ୍ସୁଧାଂଶୁବିମ୍ବପୂରୁଷସ୍ତୁ ରୁଦ୍ରସଂଜ୍ଞକଃ ଶିଵେ ।
ହିରଣ୍ମୟୋଽନ୍ତରିକ୍ଷଜାତ ଈଶ୍ଵରଃ ସଦାଶିଵଃ
ସଦେଵ ଵସ୍ତୁ କାଞ୍ଚନାଙ୍ଗି ପଞ୍ଚମୂର୍ତିଵାଦିନାମ୍ ॥ ୨.୨୩ ॥

ପ୍ରଭୋଃ ପ୍ରମାଽଽଦିତସ୍ତତଃ ପ୍ରମାଵତୀ ସ୍ଵୟଂ ପୃଥଗ୍
ଵିହାୟସା ଶରୀରିଣୀ ପ୍ରଭୌ ତତୋ ହିରଣ୍ମୟେ
ହିରଣ୍ମୟାଙ୍ଗନାକୃତିର୍ନଭୋଽନ୍ତରେ ଚ ଭାସ୍କରେ
ତଥାଽନ୍ତରେଷୁ ଦେହିନାଂ ମହେଶ୍ଵରୀ ଜୟତ୍ୟୁମା ॥ ୨.୨୪ ॥

ମଦୀୟମମ୍ବିକାଽଖିଲସ୍ୟ ଵିଷ୍ଟପସ୍ୟ ଦୁଷ୍ଟଧୀ-
ଦଵିଷ୍ଠପାଦପଙ୍କଜା ଧୁନୋତୁ କଷ୍ଟଜାଲକମ୍ ।
ଇମେ ଚ କୋମଲୈଃ ପଦୈରମୂଲ୍ୟତଲ୍ପଶାଲିନ-
ସ୍ତଦୀୟମଞ୍ଚରୂପତାଂ ଭଜନ୍ତୁ ପଞ୍ଚଚାମରାଃ ॥ ୨.୨୫ ॥ 50

%c01-q3/Sarada.Susarla/uma-c01-q3-itrans.txt medskip

ତୃତୀୟଃ ସ୍ତବକଃ
ସଶରୀରାୟାଶ୍ଚ ସାଧନମ୍ (ତନୁମଧ୍ୟାଵୃତ୍ତମ୍)

ଶୁଭ୍ରସ୍ମିତଲେଶୋ ମାତୁର୍ମରୁତାନ୍ନଃ ।
ଅନ୍ତସ୍ତିମିରାଣାମନ୍ତଂ ଵିଦଧାତୁ ॥ ୩.୧ ॥

ଆଦ୍ୟୌ ଭୁଵନାନାଂ ମାତାପିତରୌ ତୌ ।
ଦେଵାସୁରମର୍ତ୍ୟୈର୍ଵନ୍ଦ୍ୟାଵଵିନିନ୍ଦ୍ୟୌ ॥ ୩.୨ ॥

ବ୍ରୂତେ ପୃଥଗେକସ୍ତୌ ଵିଗ୍ରହଵନ୍ତୌ ।
ଆହୈକଶରୀରଂ ଦ୍ଵନ୍ଦ୍ଵଂ କଵିରନ୍ୟଃ ॥ ୩.୩ ॥

ଶକ୍ତିଂ ତନୁଶୂନ୍ୟାମୀଶଂ ଚ ପୁମାଂସମ୍ ।
ଵକ୍ତି ପ୍ରମଦାୟାଂ ସନ୍ଦେହୟୁତୋଽନ୍ୟଃ ॥ ୩.୪ ॥

ଈଶଂ ଚ ତମେକେ ସନ୍ମାତ୍ରମୁଶନ୍ତି ।
ବ୍ରହ୍ମୈକମଥାନ୍ୟେ ଗାୟନ୍ତି ନ ଶକ୍ତିମ୍ ॥ ୩.୫ ॥

କେଚିତ୍ତନୁହୀନଂ ପ୍ରଜ୍ଞାୟୁତମୀଶମ୍ ।
ଶକ୍ତିଂ ଵିଦୁରସ୍ୟ ପ୍ରଜ୍ଞାମଵିକୁଣ୍ଠାମ୍ ॥ ୩.୬ ॥

ଉକ୍ତଂ ଦଧତସ୍ତୈଃ କେଚିତ୍ ପୁନରାହୁଃ ।
ମାୟାତନୁବନ୍ଧଂ ନାଥସ୍ୟ ନ ଶକ୍ତେଃ ॥ ୩.୭ ॥

ନିତ୍ୟଂ ସଶରୀରୌ ୟେଷାଂ ପିତରୌ ତୌ ।
ଏକୋଽପ୍ୟଥଵା ତାନ୍ ପ୍ରତ୍ୟାହ ନିସର୍ଗଃ ॥ ୩.୮ ॥

ମାତାପିତରୌ ୟତ୍ ତାଵେକଶରୀରୌ ।
ଚିତ୍ରପ୍ରଥନାର୍ଥା ସା କାଚନ ଲୀଲା ॥ ୩.୯ ॥

ସନ୍ମାତ୍ରକଥାନାଂ କାର୍ୟେ ମନୁଜାଦୌ
ଧୀସ୍ଵାନ୍ତଵିକାସଃ ସ୍ୟାତ୍କାରଣହୀନଃ ॥ ୩.୧୦ ॥

ଅଦ୍ଵୈତିଭିରନ୍ୟା ମାୟାଽଽଶ୍ରୟଣୀୟା ।
ଶକ୍ତେରତିରିକ୍ତା ସା କିଂ କିମୁ ଵାଦୈଃ ॥ ୩.୧୧ ॥

ନ ସ୍ୟାତ୍ ପୃଥଗାତ୍ମା ଶକ୍ତେଃ କିମୁପାଧେଃ ।
ଚକ୍ଷୁଃ ଶ୍ରିତଚିତ୍ତେର୍ଵିଶ୍ଵାକୃତିତା ଵା ॥ ୩.୧୨ ॥

ଏକାନ୍ତଵିଦେହୌ ତୌ ଚେଦତିସୂକ୍ଷ୍ମୌ ।
ଲୀଲାତନୁବନ୍ଧାଶକ୍ତାଵଭିଧେୟୌ ॥ ୩.୧୩ ॥

ଭକ୍ତାନନୁଗୃହ୍ଣନ୍ ଦିଵ୍ୟାଦ୍ଭୁତଲୀଲଃ ।
ତଦ୍ଵିଗ୍ରହବନ୍ଧୋ ବୋଧ୍ୟୋ ଲସଦର୍ଥଃ ॥ ୩.୧୪ ॥

ସ୍ତ୍ରୀତ୍ଵଂ ୟଦି ନେଷ୍ଟଂ ପୁଂସ୍ତ୍ଵଂ କୁତ ଇଷ୍ଟମ୍ ।
ନା ଵା କିମୁ ନାରୀ ନ ସ୍ୟାଦନୁମେୟା ॥ ୩.୧୫ ॥

ତସ୍ମାତ୍ ପିତରୌ ତୌ ଵାଚ୍ୟୌ ମତିମନ୍ତୌ ।
ସୂକ୍ଷ୍ମାଵପି ଭୂୟୋ ଲୀଲାତନୁମନ୍ତୌ ॥ ୩.୧୬ ॥

ନାସ୍ମତ୍ତନୁଵତ୍ତେ ଶକ୍ତୀଶ୍ଵରମୂର୍ତୀ ।
ଏକାଽମୃତରୂପା ତ୍ଵନ୍ୟା ପ୍ରଣଵାତ୍ମା ॥ ୩.୧୭ ॥

ଦିଵ୍ୟଂ ଘନତେଜଃ କୁର୍ଵଦ୍ ଧ୍ଵନିମନ୍ତଃ ।
ସମ୍ପଶ୍ୟଦଶେଷଂ ମୂର୍ତିଃ ପ୍ରଣଵାତ୍ମା ॥ ୩.୧୮ ॥

ଦିଵ୍ୟୋ ଘନସୋମଃ ସ୍ୟଂଦନ୍ ରସମନ୍ତଃ ।
ଭୁଞ୍ଜନ୍ ଭୁଵନୌଘଂ ପୀୟୂଷଶରୀରମ୍ ॥ ୩.୧୯ ॥

ବୋଧୋଽନଵଲମ୍ବୋ ଦିଵ୍ୟଂ ଖଲୁ ତେଜଃ ।
ମୋଦଃ ପରିଶୁଦ୍ଧୋ ଦିଵ୍ୟଃ ଖଲୁ ସୋମଃ ॥ ୩.୨୦ ॥

ସୋମାଂଶମହୋଂଶୌ ୟାତୋ ଘନଭାଵମ୍ ।
ପିତ୍ରୋର୍ଭୁଵନାନାଂ ସଙ୍କଲ୍ପମହିମ୍ନା ॥ ୩.୨୧ ॥

ଆରାଧୟସୀଶଂ ତଂ ଚିନ୍ମୟକାୟମ୍ ।
ଆନନ୍ଦମୟାଙ୍ଗୀ ତ୍ଵମ୍ ଦେଵି କିଲେୟମ୍ ॥ ୩.୨୨ ॥

ଦିଵ୍ୟଂ ତଵ କାୟଂ ଦିଵ୍ୟେ ତଵ ଵସ୍ତ୍ରେ ।
ଦିଵ୍ୟାନି ତଵାମ୍ବ ସ୍ଵର୍ଣାଭରଣାନି ॥ ୩.୨୩ ॥

ୟଦ୍ଦେଵି ଵିଲୋକ୍ୟାଽସ୍ୟପ୍ରାକୃତକାୟା ।
ୟୁକ୍ତୀଃ ସମତୀତା ସେୟଂ ତଵ ମାୟା ॥ ୩.୨୪ ॥

ନଵ୍ୟାସ୍ତନୁମଧ୍ୟାଃ ପ୍ରତ୍ନାଂ ତନୁମଧ୍ୟାମ୍ ।
ଵିଦ୍ଵତ୍ସଦସୀମାଃ ସମ୍ୟକ୍ପ୍ରଥୟନ୍ତୁ ॥ ୩.୨୫ ॥ 75

%c01-q4/Prasad.Kuppa/c01-q4।txt medskip

ଚତୁର୍ଥଃ ସ୍ତବକଃ
ଆଧ୍ୟାତ୍ମିକଵିଭୂତୟଃ (ଗୀତିଵୃତ୍ତମ୍)

ଅମୃତାଂଶୁବିଂବସାରାଦ୍ ଭୂୟୋଽପି ଵିନିର୍ଗତୋ ଭୃଶଂ ସୂକ୍ଷ୍ମଃ ।
ସାରୋ ଗୌରୀଵଦନାଦ୍ ଦରହାସୋ ହରତୁ ଦୁଃଖଜାଲଂ ନଃ ॥ ୪.୧ ॥

କୁଲକୁଣ୍ଡେ ପ୍ରାଣୁଵନ୍ତୀ ଚେତନ୍ତୀ ହୃଦି ସମସ୍ତଜନ୍ତୂନାମ୍ ।
ମୂର୍ଧନି ଵିଚିନ୍ତୟନ୍ତୀ ମୃତ୍ୟୁଞ୍ଜୟମହିଷି ଵିଜୟତେ ଭଵତୀ ॥ ୪.୨ ॥

ତେଜୋଜଲାନ୍ନସାରୈସ୍ତ୍ରୟୋଽଣଵୋ ମୂଲହୃଦୟମସ୍ତେଷୁ
ପାକାତ୍ତେ ନିଷ୍ପନ୍ନାସ୍ତ୍ରୈଲୋକ୍ୟଵ୍ୟାପିକେଽଂବ ଦେହଵତାମ୍ ॥ ୪.୩ ॥

ପୂର୍ଣେ ଶରୀରଶିଲ୍ପେ ଦ୍ଵାରେଣ ବ୍ରହ୍ମରନ୍ଧ୍ରସଂଜ୍ଞେନ ।
ନାଡୀପଥେନ ଗତ୍ଵା ତୈଜସମଣୁମାଵିଶସ୍ୟମେୟବଲେ ॥ ୪.୪ ॥

ଅଂଶେନାଵିଶ୍ୟାଦୌ ୟାସି ପୁନସ୍ତଂ ତତଶ୍ଚ ନିର୍ୟାସି ।
ମାର୍ଗାଭ୍ୟାଂ ଦ୍ଵାଭ୍ୟାଂ ତ୍ଵଂ ନାଡ୍ୟାଃ ପଶ୍ଚାତ୍ ପୁରଶ୍ଚ ସିଦ୍ଧାଭ୍ୟାମ୍ ॥ ୪.୫ ॥

ୟାତାୟାତଵିହାରେ ମାତସ୍ତସ୍ମିନ୍ ଭଵତ୍ୟୁପାଧିସ୍ତେ
ଆରଭ୍ୟ ମସ୍ତକସ୍ଥଲମାମୂଲାଧାରମସ୍ଥିପଞ୍ଜରିକା ॥ ୪.୬ ॥

ନୃତନୁଷୁ ଵିହରନ୍ତୀଂ ତ୍ଵାମ୍ ଉପାଧିଵୀଣାକୃତେର୍ଜଗନ୍ମାତଃ ।
ସାଦୃଶ୍ୟାତ୍ କୁଣ୍ଡଲିନୀଂ ପରୋକ୍ଷଵାଦପ୍ରିୟାଃ ପ୍ରଭାଷନ୍ତେ ॥ ୪.୭ ॥

ନଭସଃ ଶୀର୍ଷଦ୍ଵାରା ପ୍ରଵହନ୍ତୀଂ ୟ ଇହ ଵିଗ୍ରହେ ଶକ୍ତିମ୍ ।
ଅନୁସନ୍ଦଧାତି ନିତ୍ୟଂ କୃତିନସ୍ତସ୍ୟେତରୈରଲଂ ୟୋଗୈଃ ॥ ୪.୮ ॥

ସର୍ଵେଷୁ ଵିଶସି ତୁଲ୍ୟଂ ନିର୍ଗଚ୍ଛସି ତୁଲ୍ୟମମ୍ବ ଭୁଵନାନାମ୍ ।
ଜ୍ଞାତା ଚେଦସି ଶକ୍ତ୍ୟୈ ନ ଜ୍ଞାତା ଚେଦ୍ଭଵସ୍ୟହଙ୍କୃତ୍ୟୈ ॥ ୪.୯ ॥

ଅଵତରଣଂ ଧ୍ୟାତଂ ଚେଦ୍ ଆରୋହଣମଦ୍ଭୁତଂ ଭଵେଚ୍ଛକ୍ତେଃ ।
ୟସ୍ମିନ୍ନିଦଂ ଶରୀରଂ ଭଵତି ମହଦ୍ଵୈଦ୍ୟୁତାଗ୍ନିୟନ୍ତ୍ରମିଵ ॥ ୪.୧୦ ॥

ଆରୋହଣମଧ୍ୟାତୃଷୁ ହୃଦୟେଽହଙ୍କାରମାତ୍ରନିଷ୍ପତ୍ୟୈ ।
ତଦନୁ ଶରୀରମିଦଂ ସ୍ୟାତ୍ ସୁଖାୟ ଦୁଃଖାୟ ଵା ୟଥାଭୋଗମ୍ ॥ ୪.୧୧ ॥

ୟା ଵ୍ୟକ୍ତିତା ଜନିମତାମହଙ୍କୃତିଃ ସକଲଭେଦଧୀଭୂମିଃ ।
ପୃଥଗିଵ ତଵାମ୍ବିକେ ସା ସତ୍ତୈଵୋପାଧିସଂଶ୍ରୟାଦ୍ ଭାନ୍ତୀ ॥ ୪.୧୨ ॥

ଏତାମାହୁରଵିଦ୍ୟାଂ ବୀଜଂ ସଂସାରଵୃକ୍ଷରାଜସ୍ୟ ।
ସର୍ଵରସଫଲୟୁତସ୍ୟ ପ୍ରାରବ୍ଧଜଲେନ ଦେଵି ଦୋହଦିନଃ ॥ ୪.୧୩ ॥

ଵ୍ୟକ୍ତିତ୍ଵାର୍ପକଦେହେ ନିମ୍ନେ କୁଲ୍ୟେଵ ଜନିମତାଂ ମାତଃ ।
ପ୍ରଵହତ୍ୟନାରତଂ ତେ ଶକ୍ତିଶ୍ଚିତ୍ରାଣି ଦେଵି ତନ୍ଵାନା ॥ ୪.୧୪ ॥

ସାରମପାମଣୁଭୂତଂ ହୃଦୟସ୍ଥଂ ସୂରୟୋ ଵିଦୁଶ୍ଚିତ୍ତମ୍ ।
ଶ୍ରେଷ୍ଠଂ ପ୍ରାଣଂ କେଚନ ପଞ୍ଚାନିଲମୂଲଭୂତମାହୁରିମମ୍ ॥ ୪.୧୫ ॥

ମନ ଏଵ ଚିତ୍ତସଂଜ୍ଞଂ ଵ୍ୟଵହରତାଂ ଵିଭଜନାନଭିଜ୍ଞାନାମ୍ ।
କଵିଲୋକଵ୍ୟଵହାରସ୍ତଦଧୀନସ୍ତତ୍ତ୍ଵଧୀର୍ଭଵତ୍ୟନ୍ୟା ॥ ୪.୧୬ ॥

ତଦନାହତସ୍ୟ ଵିଲସଦ୍ ଦକ୍ଷିଣତୋ ଦହରନାମକଗୁହାୟାମ୍ ।
ଚିତ୍ତଂ କୁଲକୁଣ୍ଡାତ୍ତେ କାଽପ୍ୟନୁଗୃହ୍ଣାତି ଦେଵି ରଶ୍ମିକଲା ॥ ୪.୧୭ ॥

ଚିତ୍ତମଣୁ ଶ୍ଲିଷ୍ଟଂ ତେ କଲୟାଽଙ୍ଗୁଷ୍ଠପ୍ରମାଣମିଵ ଭାସା ।
ଦର୍ପଣମମଲବ୍ରହ୍ମପ୍ରତିବିମ୍ବାକର୍ଷକଂ ଶିଵେ ଭଵତି ॥ ୪.୧୮ ॥

ଅନ୍ତରମାଵର୍ତାଭଂ ପ୍ରତିବିମ୍ବମକାୟମେତଦୀଶସ୍ୟ ।
ଅଂଗୁଷ୍ଠାଭଂ ପ୍ରାହୁର୍ମାନେନୋପାଧିଚୈତ୍ତଭାସସ୍ତେ ॥ ୪.୧୯ ॥

ଦମ୍ପତ୍ୟୋର୍ଵାଂ ରୂପପ୍ରତିବିମ୍ବୌ ଚକ୍ଷୁଷୋଃ ଶିଵେ ଭଵତଃ ।
କୁଲକୁଣ୍ଡେ ହୃଦୟେ ଚାପ୍ୟରୂପୟୋରେଵ କଶ୍ଚିଦୁଲ୍ଲାସଃ ॥ ୪.୨୦ ॥

ଚିତ୍ତମଣୀୟୋ ଵିତ୍ତଂ ୟ ଇଦଂ ମୂଲ୍ୟେ ପ୍ରପଞ୍ଚତୋଽପ୍ୟଧିକମ୍ ।
ହୃଦୟଗୁହାୟାଂ ନିହିତଂ ଜାନୀତେ ସ ଵିଜହାତି ବହିରାଶାଃ ॥ ୪.୨୧ ॥

ଅପ୍ରାପ୍ତା ମୂର୍ଧାନଂ ହୃଦୟାତ୍ ସମ୍ପ୍ରସ୍ଥିତା ଧୃତା ନାଡ୍ୟା ।
ତ୍ଵଦ୍ରୁଚିରୁକ୍ତା ବୁଦ୍ଧିସ୍ତ୍ଵୟି ନିଷ୍ଠା ଭଵତି ଦେଵି ତନ୍ନିଷ୍ଠା ॥ ୪.୨୨ ॥

ଅନ୍ନମୟାଣୁଂ ପ୍ରାପ୍ତଂ ଧୀଜ୍ୟୋତିଶ୍ଚନ୍ଦ୍ରମାର୍କମିଵ ତେଜଃ ।
ପରିଭାଷ୍ୟତେ ମହେଶ୍ଵରି ମନ ଇତି ସଙ୍କଲ୍ପସମ୍ଭଵସ୍ଥାନମ୍ ॥ ୪.୨୩ ॥

ସଙ୍କଲ୍ପେ ସଙ୍କଲ୍ପେ ଚିଚ୍ଛକ୍ତିଂ ମନସି ଵିସ୍ଫୁରନ୍ତୀଂ ତ୍ଵାମ୍ ।
ୟ ଉପାସ୍ତେ ସ ଜନସ୍ତେ ଗୃହ୍ଣାତି ମହେଶଵଲ୍ଲଭେ ଚରଣମ୍ ॥ ୪.୨୪ ॥

ଆଧାରଚକ୍ରଶୟନେ ମମେହ ନିଦ୍ରାଂ ଵିହାୟ ଵିଚଲନ୍ତୀମ୍ ।
ଗୀତୟ ଏତାଃ ପରମାମୁପତିଷ୍ଠନ୍ତାଂ ଜଗଦ୍ଵିଭୋଃ କାନ୍ତାମ୍ ॥ ୪.୨୫ ॥ 100

॥ ସମାପ୍ତଂ ଚ ପ୍ରଥମଂ ଶତକମ୍ ॥

%c02-q1/Ravi.Shamavedam/uma-c02-q1।txt medskip

ଦ୍ଵିତୀୟଂ ଶତକମ୍
ପଞ୍ଚମଃ ସ୍ତବକଃ
ପରିଣୟଃ (ଉପଜାତିଵୃତ୍ତମ୍)

ଶ୍ରୀଖଣ୍ଡଚର୍ଚାମିଵ କଲ୍ପୟନ୍ତ୍ୟୋ
ମୁହୁଃ କପୋଲେଷୁ ସଖୀଜନସ୍ୟ ।
ଶ୍ରୀକଣ୍ଠକାନ୍ତାହସିତାଙ୍କୁରାଣାଂ
ଶ୍ରୀମନ୍ତି କୁର୍ଵନ୍ତୁ ଜଗନ୍ତି ଭାସଃ ॥ ୫.୧ ॥

କୀର୍ତିର୍ଵଲକ୍ଷା କୁସୁମାୟୁଧସ୍ୟ
ସ୍ଵର୍ଣାଦ୍ରିକୋଦଣ୍ଡଜୟୋନ୍ନତସ୍ୟ ।
ଦରସ୍ମିତଶ୍ରୀର୍ଦ୍ଵିରଦାସ୍ୟମାତୁର୍-
ଦ୍ରାଘୀୟସୀଂ ଵୋ ଵିତନୋତୁ ଭୂତିମ୍ ॥ ୫.୨ ॥

ପ୍ରମଥ୍ୟମାନାମୃତରାଶିଵୀଚି-
ପ୍ରୋଦ୍ଗଚ୍ଛଦଚ୍ଛାଚ୍ଛତୁଷାରକଲ୍ପାଃ ।
ୟୁଷ୍ମାକମିଚ୍ଛାଂ ଵିଦଧତ୍ଵମୋଘାଂ
ଵିଘ୍ନେଶମାତୁର୍ଦରହାସଲେଶାଃ ॥ ୫.୩ ॥

ଚନ୍ଦ୍ରାତପଃ କଶ୍ଚନ ସମ୍ପ୍ରସନ୍ନୋ
ମହେଶନେତ୍ରାତିଥିତର୍ପଣୋ ନଃ ।
ମନୋଭିଲାଷଂ ସଫଲୀକରୋତୁ
ମହେଶ୍ଵରୀହାସଲଵପ୍ରକାଶଃ ॥ ୫.୪ ॥

ଵଲକ୍ଷଵକ୍ଷୋଜପଟାଞ୍ଚଲେନ
ଚଲେନ ସାର୍ଧଂ କୃତକେଲୟୋ ନଃ ।
ପୁରତ୍ରୟାରାତିକଲତ୍ରହାସ-
ଭାସୋ ନିରାସଂ ଵିପଦାଂ କ୍ରିୟାସୁଃ ॥ ୫.୫ ॥

ଭୂୟାସୁରାୟାସହରାଣି ତାନି
ସ୍ମିତାନି ଭୂତେଶମୃଗୀଦୃଶୋ ନଃ ।
ୟେଷାଂ ତ୍ଵିଷୋ ବିଭ୍ରତି ଦିଗ୍ଵଧୂଟୀ-
ଗଣ୍ଡେଷୁ କର୍ପୂରପରାଗଲୀଲାମ୍ ॥ ୫.୬ ॥

କୁର୍ଵନ୍ତୁ କାମଂ ସଫଲଂ (ତ୍ଵ) ମଦୀୟଂ
କୁଲାଦ୍ରିକନ୍ୟାହସିତାନି ତାନି ।
ୟେଷାଂ ମୟୂଖୈଃ କ୍ରିୟତେ ସିତାଦ୍ରେର୍-
ଉଦ୍ୟାନଵାଟୀଷୁ ନଵୋ ଵସନ୍ତଃ ॥ ୫.୭ ॥

ଆମ୍ରେଡିତଂ ଭୂଷଣଚନ୍ଦ୍ରଭାସାଂ
ନାସାଵିଭୂଷାମହସାଂ ଦ୍ଵିରୁକ୍ତିଃ ।
ପୁରାରିନାରୀସ୍ମିତକାନ୍ତୟୋ ମେ
ପୂର୍ଣାନି କୁର୍ଵନ୍ତୁ ସମୀହିତାନି ॥ ୫.୮ ॥

ନିର୍ମାୟ ଵିଶ୍ଵାଲୟମମ୍ବ ଶର୍ଵ-
ସ୍ତ୍ଵୟା ସମଂ ଶିଲ୍ପଵିଦା ସ ଶିଲ୍ପୀ ।
ଵିହର୍ତୁମିଚ୍ଛନ୍ନୟି ଵୋଢୁମୈଚ୍ଛ-
ନ୍ନାରୀଂ ଭଵନ୍ତୀଂ ପୁରୁଷୋ ଭଵଂସ୍ତ୍ଵାମ୍ ॥ ୫.୯ ॥

ଦିଵ୍ୟଂ ଦୁକୂଲଂ ଧଵଲଂ ଦଧାନା
ଵେଣ୍ୟା ଫଣୀନ୍ଦ୍ରୋପମୟା ଲସନ୍ତୀ ।
ପ୍ରଫୁଲ୍ଲରାଜୀଵଵିଲୋଚନା ତ୍ଵଂ
ପ୍ରପଞ୍ଚଭର୍ତୁର୍ନୟନାନ୍ୟହାର୍ଷୀଃ ॥ ୫.୧୦ ॥

ପ୍ରତ୍ୟଙ୍ଗବନ୍ଧଂ ଜ୍ଵଲଦୁତ୍ତମଂ ତେ
ଭୁଜଙ୍ଗରାଜୋପମଵେଣିରୂପମ୍ ।
ଆତ୍ମୈକନିଷ୍ଠସ୍ୟ ଚ ଵିଶ୍ଵଭର୍ତୁର୍-
ଆରାଧୟାମାସ ଵିଲୋଚନାନି ॥ ୫.୧୧ ॥

ଅଭୂସ୍ତ୍ଵମାଦ୍ୟସ୍ୟ ମନୋମଦାୟ
ସ ଚାପି ତେ ପ୍ରୀତିପଦଂ ବଭୂଵ ।
ନ କେଵଲଂ ଵାଂ ସକଲସ୍ୟ ଚାସୀ-
ଦ୍ଦାମ୍ପତ୍ୟବନ୍ଧସ୍ୟ ତଦମ୍ବ ବୀଜମ୍ ॥ ୫.୧୨ ॥

ତଵାତିକାନ୍ତା ନୟାନାନ୍ତଵୃତ୍ତି-
ର୍ହାସଃ ପୁରାରେଶ୍ଚ ନଵେନ୍ଦୁହାରୀ ।
ଉଭୌ ଵିଵାହୋତ୍ସଵପୂର୍ଵରଙ୍ଗଂ
ନିର୍ଵର୍ତୟାମାସତୁରାଦିରାମେ ॥ ୫.୧୩ ॥

ଦାତୁଂ ପ୍ରଭୁଃ ସାନ୍ତ୍ଵୟିତୁଂ ସମର୍ଥଃ
କର୍ତୁଂ କ୍ଷମସ୍ତର୍ଜୟିତୁଂ ଚ ଶକ୍ତଃ ।
ସଂରକ୍ଷତାନ୍ମାଂ ତଵ ସର୍ଵଵନ୍ଦ୍ୟେ
କରସ୍ତୁଷାରାଂଶୁଭୃତା ଗୃହୀତଃ ॥ ୫.୧୪ ॥

ସ୍ପ୍ରଷ୍ଟୁଂ ନ ଶକ୍ୟା ପରମେ ପରୈସ୍ତ୍ଵଂ
ସ ଚାନ୍ୟୟା ଚିନ୍ତୟିତୁଂ ନ ଶକ୍ୟଃ ।
ତ୍ଵମେଵ ଶର୍ଵସ୍ୟ ସ ଏଵ ତେଽମ୍ବ
ଦାମ୍ପତ୍ୟମେଵଂ ୟୁଵୟୋସ୍ତୁ ସତ୍ୟମ୍ ॥ ୫.୧୫ ॥

ନିଜାଦ୍ଵତଂସେନ୍ଦୁତ ଇନ୍ଦୁମନ୍ୟ-
ମୁତ୍ପାଦ୍ୟ ତେ ଶମ୍ଭୁରଦାଦ୍ଵତଂସମ୍ ।
ମୂର୍ତାମିଵାସୌ ଶୁଭଗାତ୍ରି ରାତ୍ରିଂ
ପ୍ରାପ୍ୟ ତ୍ଵଦୀୟାଂ କବରୀଂ ଚକାସେ ॥ ୫.୧୬ ॥

ବଭୂଵିଥାଗେନ୍ଦ୍ରଗୃହେ ୟଦା ତ୍ଵଂ
ସ ଚେଶ୍ଵରସ୍ତତ୍ର ଚକାର ଵାସମ୍ ।
ଵିଲୋକମାନସ୍ତଵ ଦେଵି ଵିଦ୍ୟୁତ୍
ପାଞ୍ଚାଲିକାୟାଃ କମନୀୟଭାଵମ୍ ॥ ୫.୧୭ ॥

ସିଦ୍ଧଂ ସ ଵାଂ ସାଧୟିତୁଂ ପ୍ରଵୃତ୍ତୋ
ୟୋଗଂ ପ୍ରଦଗ୍ଧୋ ମଦନଶ୍ଚ କଲ୍ପେ ।
ଵଶୀତି କୀର୍ତିଂ ଗିରିଶସ୍ୟ ଭର୍ତୁଂ
ତୁଭ୍ୟଂ ତ୍ଵପର୍ଣେତି ୟଶଶ୍ଚ କର୍ତୁମ୍ ॥ ୫.୧୮ ॥

ଘୋରଂ ତପଶ୍ଚେଦ୍ରଚିତଂ ତ୍ଵୟାଽପି
ପ୍ରାଗ୍ରୂପଭର୍ତୁଃ ସମନୁଗ୍ରହାୟ ।
ଵିହାୟ ୟତ୍ନଂ କ ଇହାଖିଲାଽମ୍ବ
ସମ୍ବଦ୍ଧମପ୍ୟର୍ଥମୁପୈତୁ ଜନ୍ତୁଃ ॥ ୫.୧୯ ॥

ଜ୍ଵଲତ୍କପର୍ଦୋ ଦହନାଙ୍କଭାଲଃ
କପାଲମାଲୀ କରିକୃତ୍ତିଵାସାଃ ।
ଭୁଜଙ୍ଗଭୂଷୋ ଭସିତାଙ୍ଗରାଗଃ
ପୁଷ୍ପେଷୁ ଵୈରୀ ପରୁଷାଟ୍ଟହାସଃ ॥ ୫.୨୦ ॥

ଶ୍ମଶାନଵାସୀ ପୁରୁଷସ୍ତ୍ରିଶୂଲୀ
ଜହାର ତେ ଚେଦନଘାଙ୍ଗି ଚେତଃ ।
ଦୃଷ୍ଟାନ୍ତମର୍ଥୋଽୟମଵାପ ନୈଵ
ପ୍ରୀତିର୍ବହିଃକାରଣମାଶ୍ରିତେତି ॥ ୫.୨୧ ॥

ରୂପଂ ପୁରାରେରଥଵା ତଦେତତ୍
ସେୟଂ ଚ ଚେଷ୍ଟା ସମୟାନ୍ତରେଷୁ ।
କାନ୍ତଂ ଵପୁଃ କାନ୍ତତରାଶ୍ଚ ଲୀଲା-
ସ୍ତ୍ଵୟା ସମଂ ଖେଲିତୁମେଷ ଧତ୍ତେ ॥ ୫.୨୨ ॥

ପ୍ରହୃଷ୍ଟୟକ୍ଷଃ ସମଵେତସିଦ୍ଧୋ
ନୃତ୍ୟଦ୍ଗଣେନ୍ଦ୍ରୋ ଵିକସନ୍ମୁନୀନ୍ଦ୍ରଃ ।
ଭୂୟୋଽପି ୟୋଗୋ ୟୁଵୟୋର୍ହିମାଦ୍ରୌ
ବଭାର ମାତର୍ମହମଦ୍ଵିତୀୟମ୍ ॥ ୫.୨୩ ॥

ମହେଶ୍ଵରସ୍ତ୍ଵାଂ ପରିଣୀୟ ଲେଭେ
ୟାଵାତ୍ମଜୌ ଦ୍ଵାଵନଘାଙ୍ଗି ମୁଖ୍ୟୌ ।
ଏକସ୍ତୟୋର୍ଭ୍ରାମ୍ୟତି ଵିଶ୍ଵମତ୍ତୁଂ
ଭୂଭୃତ୍ତଟୀରାଶ୍ରୟତେ ବତାନ୍ୟଃ ॥ ୫.୨୪ ॥

ସଙ୍କୀର୍ତୟନ୍ତ୍ୟୋ ଜଗତାଂ ଜନନ୍ୟାଃ
କଲ୍ୟାଣଵାର୍ତାଃ କମନୀୟକୀର୍ତେଃ ।
ଇମାଃ ପ୍ରମୋଦାୟ ସତାଂ ଭଵନ୍ତୁ
ସନ୍ଦର୍ଭଶୁଦ୍ଧା ଉପଜାତୟୋ ନଃ ॥ ୫.୨୫ ॥ 125

%c02-q2/Bhoga.Pappu/uma-02-q2-itrans.txt medskip

ଷଷ୍ଠଃ ସ୍ତବକଃ
ମାହାଭାଗ୍ୟମ୍ (ମଦଲେଖାଵୃତ୍ତମ୍)

ହର୍ତାରଃ ଶଶିକୀର୍ତେଃ କର୍ତାରୋ ନଵଭାସାମ୍ ।
ଭର୍ତାରୋ ମମ ସନ୍ତୁ ସ୍କନ୍ଦାମ୍ବାଦରହାସାଃ ॥ ୬.୧ ॥

ଦିଗ୍ଵଲ୍ଲୀଷ୍ଵତିଶୁଭ୍ରାଂ କୁର୍ଵନ୍ତଃ କୁସୁମର୍ଦ୍ଧିମ୍ ।
ଭୂୟାସୁସ୍ତଵ ଭୂତ୍ୟୈ ମନ୍ମାତୁଃ ସ୍ମିତଲେଶାଃ ॥ ୬.୨ ॥

ଏକଶ୍ଚେତ୍ତଵ ଶକ୍ତୋ ବ୍ରହ୍ମାଣ୍ଡସ୍ୟ ଭଵାୟ ।
ଭର୍ଗପ୍ରେୟସି ହାସଃ କିଂ ସ୍ତୋତ୍ରଂ ତଵ ଭୂୟଃ ॥ ୬.୩ ॥

ଉଦ୍ୟାନେ ଵିୟଦାଖ୍ୟେ କାଲି ତ୍ଵାଂ ଵିହରନ୍ତୀମ୍ ।
ଗୋଲୈଃ କନ୍ଦୁକକଲ୍ପୈରଲ୍ପା ଵାକ୍କିମୁ ମାତି ॥ ୬.୪ ॥

ଖଂ କ୍ରୀଡାଭଵନଂ ତେ କଃ କାର୍ୟାଲୟ ଏଷଃ ।
ପୃଥ୍ଵୀୟଂ ବହୁଲାନ୍ନା ମାତର୍ଭୋଜନଶାଲା ॥ ୬.୫ ॥

ବୁଦ୍ଧୀନାମସି ଦାତ୍ରୀ ସିଦ୍ଧୀନାମସି ନେତ୍ରୀ ।
ଵୀର୍ୟାଣାମସି ପେଟୀ କାର୍ୟାଣାମସି ଧାଟୀ ॥ ୬.୬ ॥

ଵିଦ୍ୟାନାମସି ଭାଵୋ ହୃଦ୍ୟାନାମସି ହାଵଃ ।
ଦେଵାନାମସି ଲୀଲା ଦୈତ୍ୟାନାମସି ହେଲା ॥ ୬.୭ ॥

ଗନ୍ତୄଣାମସି ଚେଷ୍ଟା ସ୍ଥାଣୂନାମସି ନିଷ୍ଠା ।
ଲୋକାନାମସି ମୂଲଂ ଲୋକାଦେରସି ଜାଲମ୍ ॥ ୬.୮ ॥

ଦେଵୀ ଵ୍ୟାପକତେଜଃ ଶକ୍ତିସ୍ତତ୍ତ୍ଵଵିଚାରେ ।
ଅତ୍ୟନ୍ତଂ ସୁକୁମାରୀ ନାରୀ ମୂର୍ତିଵିଚାରେ ॥ ୬.୯ ॥

କ୍ଵ ଜ୍ୟୋତିର୍ମହତୋଽସ୍ମାଦାକାଶାଦପି ଭୂୟଃ ।
ତତ୍ସର୍ଵଂ ଵିନୟନ୍ତୀ ତନ୍ଵଙ୍ଗୀ କ୍ଵ ନୁ ନାରୀ ॥ ୬.୧୦ ॥

ଦେଵେନ୍ଦ୍ରାୟ ଵିଭୁତ୍ଵଂ ସୂର୍ୟାୟୋସ୍ରସହସ୍ରମ୍ ।
ଊଷ୍ମାଣଂ ଦହନାୟ ଜ୍ୟୋତ୍ସ୍ନାମୋଷଧିରାଜେ ॥ ୬.୧୧ ॥

ଵାତାୟାମିତଵୀର୍ୟଂ ଵିସ୍ତାରଂ ଗଗନାୟ ।
ସାନ୍ଦ୍ରତ୍ଵଂ ଵସୁଧାୟୈ ତୋୟାୟ ଦ୍ରଵଭାଵମ୍ ॥ ୬.୧୨ ॥

ମାହାଭାଗ୍ୟମପାରଂ କୋଟିଭ୍ୟୋ ଵିବୁଧାନାମ୍ ।
ଚିତ୍ରାଃ କାଶ୍ଚନ ସିଦ୍ଧୀର୍ଲକ୍ଷେଭ୍ୟୋ ମନୁଜାନାମ୍ ॥ ୬.୧୩ ॥

ସ୍ଥାଣୁଭ୍ୟୋ ଧୃତିଶକ୍ତିଂ ଗନ୍ତୃଭ୍ୟୋ ଗତିଶକ୍ତିମ୍ ।
କସ୍ମାଚ୍ଚିନ୍ନିଜକୋଶାଦେକା ଦେଵି ଦଦାନା ॥ ୬.୧୪ ॥

ଆଶ୍ଚର୍ୟଂ ଵିଦଧାନା ସର୍ଵଂ ଵସ୍ତୁ ଦଧାନା ।
ହନ୍ତ ତ୍ଵଂ ମମ ମାତଃ କାଚିତ୍କୋମଲଗାତ୍ରୀ ॥ ୬.୧୫ ॥

ଶ୍ରୋଣୀଭାରନତାୟାଂ କସ୍ୟାଞ୍ଚିତ୍ତନୁଗାତ୍ର୍ୟାମ୍ ।
ଈଦୃକ୍ଷା ୟଦି ଶକ୍ତିଃ କାଵେତୋ ନନୁ ମାୟା ॥ ୬.୧୬ ॥

ରୂପଂ ତେ ତନୁଗାତ୍ରଂ ଵାଣୀ ତେ ମୃଦୁନାଦା ।
ଚାପଂ ତେ ମଧୁରେକ୍ଷୁଃ ପାଣିସ୍ତେ ସୁକୁମାରଃ ॥ ୬.୧୭ ॥

ଲୋଲେ ଲୋଚନୟୁଗ୍ମେ ଭୀରୁତ୍ଵଂ ପ୍ରକଟଂ ତେ ।
ବ୍ରହ୍ମାଣ୍ଡଂ ତ୍ଵଦଧୀନଂ ଶ୍ରଦ୍ଧତ୍ତାମିହ କୋ ଵା ॥ ୬.୧୮ ॥

ଭ୍ରୂଭଙ୍ଗଂ କୁରୁଷେ ଚେନ୍ମୁଗ୍ଧେ ଗୌରି ମୁଖାବ୍ଜେ ।
ଭୂତାନ୍ୟପ୍ୟୟି ବିଭ୍ୟତ୍ୟେଜେରନ୍ନପି ତାରାଃ ॥ ୬.୧୯ ॥

ଶୁଦ୍ଧାନ୍ତେଶ୍ଵରି ଶମ୍ଭୋରିଚ୍ଛା ଚେତ୍ତଵ କାଽପି ।
ଘୋରୋଽଗ୍ନିସ୍ତୃଣଗର୍ଭାଦ୍ଘୋରାଗ୍ନେରପି ଶୈତ୍ୟମ୍ ॥ ୬.୨୦ ॥

ଦ୍ରଷ୍ଟୁଂ ଵିଶ୍ଵମପାରଂ ଭାରସ୍ତେ ଦୟିତସ୍ୟ ।
କର୍ତୁଂ କାର୍ୟମଶେଷଂ ଶ୍ରୀମାତସ୍ତଵ ଭାରଃ ॥ ୬.୨୧ ॥

ସାକ୍ଷୀ କେଵଲମୀଶଃ କର୍ତୁଂ ଭର୍ତୁମୁତାହୋ ।
ହର୍ତୁଂ ଵାଽଖିଲମମ୍ବ ତ୍ଵଂ ସାକ୍ଷାଦ୍ଧୃତଦୀକ୍ଷା ॥ ୬.୨୨ ॥

କାରଙ୍କାରମୁମେ ୟଦ୍ ବ୍ରହ୍ମାଣ୍ଡାନି ନିହଂସି ।
ତନ୍ମନ୍ୟେ ସୁରମାନ୍ୟେ ବାଲୈଵାଽମ୍ବ ସଦା ତ୍ଵମ୍ ॥ ୬.୨୩ ॥

ଲୀଲୋଜ୍ଜୀଵିତକାମେ ରାମେ ଶଙ୍କରସକ୍ତେ ।
ତ୍ଵତ୍ପାଦାର୍ଚନସକ୍ତଂ ଭକ୍ତଂ ମାଂ କୁରୁ ଶକ୍ତମ୍ ॥ ୬.୨୪ ॥

ଏତାଃ ପାଵନଗନ୍ଧାଃ ସର୍ଵେଶପ୍ରମଦେ ତେ ।
ହୈରମ୍ବ୍ୟୋ ମଦଲେଖାଃ ସନ୍ତୋଷାୟ ଭଵନ୍ତୁ ॥ ୬.୨୫ ॥ 150

%c02-q3/Amrutha.Kuppa/c02-q3-b.txt medskip

ସପ୍ତମଃ ସ୍ତବକଃ
ଵ୍ୟୋମଶରୀରା, ମାତୃକାଦିଵିଭୂତୟଶ୍ଚ (ଵସନ୍ତତିଲକାଵୃତ୍ତମ୍)

ଵାଣୀସରୋରୁହଦୃଶୋ ହୟରାଜହଂସୋ
ଵକ୍ତ୍ରାରଵିନ୍ଦନିଲୟାଦ୍ବହିରାଗତାୟାଃ ।
ଆଲାପକାଲଦରହାସ ଇହ ସ୍ଥିତାନାଂ
କ୍ଷେମଂ କରୋତୁ ସୁତରାଂ ହରସୁନ୍ଦରୀୟଃ ॥ ୭.୧ ॥

ନାଦୋଽସି ଵାଗସି ଵିଭାଽସି ଚିଦସ୍ୟଖଣ୍ଡା
ଖଣ୍ଡୀଭଵନ୍ତ୍ୟପି ଚିଦସ୍ୟଖିଲେନ୍ଦ୍ରକାନ୍ତେ ।
ତତ୍ତାଦୃଶୀଂ ନିଖିଲଶକ୍ତିସମଷ୍ଟିମୀଶେ
ତ୍ଵାମନ୍ତରିକ୍ଷପରିକୢପ୍ତତନୁଂ ନମାମି ॥ ୭.୨ ॥

ଵିଶ୍ଵପ୍ରସିଦ୍ଧଵିଭଵାସ୍ତ୍ରିଷୁ ଵିଷ୍ଟପେଷୁ
ୟାଃ ଶକ୍ତୟଃ ପ୍ରଵିଲସନ୍ତି ପରଃସହସ୍ରାଃ ।
ତାସାଂ ସମଷ୍ଟିରତିଚିତ୍ରନିଧାନଦୃଷ୍ଟିଃ
ସୃଷ୍ଟିସ୍ଥିତିପ୍ରଲୟକୃଦ୍ ଭୁଵନେଶ୍ଵରି ତ୍ଵମ୍ ॥ ୭.୩ ॥

ଜାନେ ନ ୟତ୍ତଵ ଜଗଜ୍ଜନୟିତ୍ରି ରୂପଂ
ସଙ୍କଲ୍ପ୍ୟତେ କିମପି ତନ୍ମନସୋ ବଲେନ ।
ସଙ୍କଲ୍ପିତସ୍ୟ ଵପୁଷଃ ଶ୍ରିତଶୋକହନ୍ତ୍ରି
ଵିନ୍ୟସ୍ୟତେ ତଵ ଵଚୋତିଗଧାମ ନାମ ॥ ୭.୪ ॥

କାମଂ ଵଦନ୍ତୁ ଵନିତାମିତିହାସଦକ୍ଷା-
ସ୍ତ୍ଵାଂ ସର୍ଵଲୋକଜନୟିତ୍ରି ସଦେହବନ୍ଧାମ୍ ।
ସତ୍ୟଂ ଚ ତଦ୍ଭଵତୁ ସା ତଵ କାଽପି ଲୀଲା
ଦିଵ୍ୟଂ ରଜସ୍ତୁ ତଵ ଵାସ୍ତଵିକଂ ଶରୀରମ୍ ॥ ୭.୫ ॥

ଭୂଜନ୍ମପାଂସୁଭିରଗର୍ହିତଶୁଦ୍ଧରୂପା
ୟା କାଽପି ପାଂସୁପଟଲୀ ଵିପୁଲେଽନ୍ତରିକ୍ଷେ ।
ସା ତେ ତନୁଃ ସୁମହତୀ ଵରଦେ ସୁସୂକ୍ଷ୍ମା
ତାମେଵ ଦେଵସରଣିଂ କଥୟନ୍ତି ଧୀରାଃ ॥ ୭.୬ ॥

ୟା ଦେଵି ଦେଵସରଣିର୍ଭଵମଗ୍ନଦୁର୍ଗା
ଵୈରୋଚନୀତି କଥିତା ତପସା ଜ୍ଵଲନ୍ତୀ ।
ରାଜୀଵବନ୍ଧୁମହସା ଵିହିତାଙ୍ଗରାଗା
ସା ତେ ତନୁର୍ଭଵତି ସର୍ଵସୁପର୍ଵଵର୍ଣ୍ୟେ ॥ ୭.୭ ॥

ପ୍ରାଣାସ୍ତଵାତ୍ର ହୃଦୟଂ ଚ ଵିରାଜତେଽତ୍ର
ନେତ୍ରାଣି ଚାତ୍ର ଶତଶଃ ଶ୍ରଵଣାନି ଚାତ୍ର ।
ଘ୍ରାଣାନି ଚାତ୍ର ରସନାନି ତଥା ତ୍ଵଚଶ୍ଚ
ଵାଚୋଽତ୍ର ଦେଵି ଚରଣାନି ଚ ପାଣୟୋଽତ୍ର ॥ ୭.୮ ॥

ସର୍ଵତ୍ର ପଶ୍ୟସି ଶୃଣୋଷି ଚ ସର୍ଵତୋଽମ୍ବ
ସର୍ଵତ୍ର ଖାଦସି ଵିଜିଘ୍ରସି ସର୍ଵତୋଽପି ।
ସର୍ଵତ୍ର ଚ ସ୍ପୃଶସି ମାତରଭିନ୍ନକାଲେ
କଃ ଶକ୍ନୁୟାନ୍ନିଗଦିତୁଂ ତଵ ଦେଵି ଭାଗ୍ୟମ୍ ॥ ୭.୯ ॥

ସର୍ଵତ୍ର ନନ୍ଦସି ଵିମୁଞ୍ଚସି ସର୍ଵତୋଽମ୍ବ
ସର୍ଵତ୍ର ସଂସରସି ଗର୍ଜସି ସର୍ଵତୋଽପି ।
ସର୍ଵତ୍ରଦେଵି କୁରୁଷେ ତଵ କର୍ମଜାଲ-
ଵୈଚିତ୍ର୍ୟମୀଶ୍ଵରି ନିରୂପୟିତୁଂ କ୍ଷମଃ କଃ ॥ ୭.୧୦ ॥

ଵିଶ୍ଵାମ୍ବିକେ ତ୍ଵୟି ରୁଚାଂ ପତୟଃ କିୟନ୍ତୋ
ନାନାଵିଧାବ୍ଧିକଲିତା କ୍ଷିତୟଃ କିୟତ୍ୟଃ ।
ବିମ୍ବାନି ଶୀତମହସାଂ ଲସତାଂ କିୟନ୍ତି
ନୈତଚ୍ଚ ଵେଦ ୟଦି କୋ ଵିବୁଧୋ ବହୁଜ୍ଞଃ ॥ ୭.୧୧ ॥

ଅଵ୍ୟକ୍ତଶବ୍ଦକଲୟାଽଖିଲମନ୍ତରିକ୍ଷଂ
ତ୍ଵଂ ଵ୍ୟାପ୍ୟ ଦେଵି ସକଲାଗମସମ୍ପ୍ରଗୀତେ ।
ନାଦୋଽସ୍ୟୁପାଧିଵଶତୋଽଥ ଵଚାଂସି ଚାସି
ବ୍ରାହ୍ମୀଂ ଵଦନ୍ତି କଵୟୋଽମୁକଵୈଭଵାଂ ତ୍ଵାମ୍ ॥ ୭.୧୨ ॥

ନାନାଵିଧୈର୍ଭୁଵନଜାଲସଵିତ୍ରି ରୂପୈର୍-
ଵ୍ୟାପ୍ତୈକନିଷ୍କଲଗଭୀରମହସ୍ତରଙ୍ଗୈଃ ।
ଵ୍ୟକ୍ତଂ ଵିଚିତ୍ରୟସି ସର୍ଵମଖର୍ଵଶକ୍ତେ
ସା ଵୈଷ୍ଣଵୀ ତଵ କଲା କଥିତା ମୁନୀନ୍ଦ୍ରୈଃ ॥ ୭.୧୩ ॥

ଵ୍ୟକ୍ତିତ୍ଵମମ୍ବ ହୃଦୟେ ହୃଦୟେ ଦଧାସି
ୟେନ ପ୍ରଭିନ୍ନ ଇଵ ବଦ୍ଧ ଇଵାନ୍ତରାତ୍ମା ।
ସେୟଂ କଲା ଭୁଵନନାଟକସୂତ୍ରଭର୍ତ୍ରି
ମାହେଶ୍ଵରୀତି କଥିତା ତଵ ଚିଦ୍ଵିଭୂତିଃ ॥ ୭.୧୪ ॥

ଆହାରଶୁଦ୍ଧିଵଶତଃ ପରିଶୁଦ୍ଧସତ୍ତ୍ଵେ
ନିତ୍ୟସ୍ଥିରସ୍ମୃତିଧରେ ଵିକସତ୍ସରୋଜେ ।
ପ୍ରାଦୁର୍ଭଵସ୍ୟମଲତତ୍ତ୍ଵଵିଭାସିକା ୟା
ସା ତ୍ଵଂ ସ୍ମୃତା ଗୁରୁଗୁହସ୍ୟ ସଵିତ୍ରି ଶକ୍ତିଃ ॥ ୭.୧୫ ॥

ହଵ୍ୟଂ ୟୟା ଦିଵିଷଦୋ ମଧୁରଂ ଲଭନ୍ତେ
କଵ୍ୟଂ ୟୟା ରୁଚିକରଂ ପିତରୋ ଭଜନ୍ତେ ।
ଅଶ୍ନାତି ଚାନ୍ନମଖିଲୋଽପି ଜନୋ ୟୟୈଵ
ସା ତେ ଵରାହଵଦନେତି କଲାଽମ୍ବ ଗୀତା ॥ ୭.୧୬ ॥

ଦୁଷ୍ଟାନ୍ନିହଂସି ଜଗତାମଵନାୟ ସାକ୍ଷା-
ଦନ୍ୟୈଶ୍ଚ ଘାତୟସି ତପ୍ତବଲୈର୍ମହଦ୍ଭିଃ ।
ଦମ୍ଭୋଲିଚେଷ୍ଟିତପରୀକ୍ଷ୍ୟବଲା ବଲାରେଃ
ଶକ୍ତିର୍ନ୍ୟଗାଦି ତଵ ଦେଵି ଵିଭୂତିରେଷା ॥ ୭.୧୭ ॥

ସଙ୍କଲ୍ପରକ୍ତକଣପାନଵିଵୃଦ୍ଧଶକ୍ତ୍ୟା
ଜାଗ୍ରତ୍ସମାଧିକଲୟେଶ୍ଵରି ତେ ଵିଭୂତ୍ୟା ।
ମୂଲାଗ୍ନିଚଣ୍ଡଶଶିମୁଣ୍ଡତନୁତ୍ରଭେତ୍ର୍ୟା
ଚାମୁଣ୍ଡୟା ତନୁଷୁ ଦେଵି ନ କିଂ କୃତଂ ସ୍ୟାତ୍ ॥ ୭.୧୮ ॥

ତ୍ଵଂ ଲୋକରାଜ୍ଞି ପରମାତ୍ମନି ମୂଲମାୟା
ଶକ୍ରେ ସମସ୍ତସୁରଭର୍ତରି ଜାଲମାୟା ।
ଛାୟେଶ୍ଵରାନ୍ତରପୁମାତ୍ମନି ୟୋଗମାୟା
ସଂସାରସକ୍ତହୃଦୟେଷ୍ଵସି ପାଶମାୟା ॥ ୭.୧୯ ॥

ତ୍ଵଂ ଭୂତଭର୍ତରି ଭଵସ୍ୟନୁଭୂତିନିଦ୍ରା
ସୋମସ୍ୟପାତରି ବିଡୌଜସି ମୋଦନିଦ୍ରା ।
ସପ୍ତାଶ୍ଵବିମ୍ବପୁରୁଷାତ୍ମନି ୟୋଗନିଦ୍ରା
ସଂସାରମଗ୍ନହୃଦୟେଷ୍ଵସି ମୋହନିଦ୍ରା ॥ ୭.୨୦ ॥

ଵିଷ୍ଣୁଶ୍ଚକାର ମଧୁକୈଟଭନାଶନଂ ୟନ୍-
ମୁକ୍ତଃ ସହସ୍ରଦଲସମ୍ଭଵସଂସ୍ତୁତା ସା ।
କାଲୀ ଘନାଞ୍ଜନନିଭପ୍ରଭଦେହଶାଲି-
ନ୍ୟୁଗ୍ରା ତଵାମ୍ବ ଭୁଵନେଶ୍ଵରି କୋଽପି ଭାଗଃ ॥ ୭.୨୧ ॥

ଵିଦ୍ୟୁତ୍ପ୍ରଭାମୟମଧୃଷ୍ୟତମଂ ଦ୍ଵିଷଦ୍ଭି-
ଶ୍ଚଣ୍ଡପ୍ରଚଣ୍ଡମଖିଲକ୍ଷୟକାର୍ୟଶକ୍ତମ୍ ।
ୟତ୍ତେ ସଵିତ୍ରି ମହିଷସ୍ୟ ଵଧେ ସ୍ଵରୂପଂ
ତଚ୍ଚିନ୍ତନାଦିହ ନରସ୍ୟ ନ ପାପଭୀତିଃ ॥ ୭.୨୨ ॥

ଶୁମ୍ଭଂ ନିଶୁମ୍ଭମପି ୟା ଜଗଦେକଵୀରୌ
ଶୂଲାଗ୍ରଶାନ୍ତମହସୌ ମହତୀ ଚକାର ।
ସା କୌଶିକୀ ଭଵତି କାଶୟଶାଃ କୃଶୋଦ-
ର୍ୟାତ୍ମାଙ୍ଗଜା ତଵ ମହେଶ୍ଵରି କଶ୍ଚିଦଂଶଃ ॥ ୭.୨୩ ॥

ମାୟେ ଶିଵେ ଶ୍ରିତଵିପଦ୍ଵିନିହନ୍ତ୍ରି ମାତଃ
ପଶ୍ୟ ପ୍ରସାଦଭରଶୀତଲୟା ଦୃଶା ମାମ୍ ।
ଏଷୋଽହମାତ୍ମଜକଲତ୍ରସୁହୃତ୍ସମେତୋ
ଦେଵି ତ୍ଵଦୀୟଚରଣଂ ଶରଣଂ ଗତୋଽସ୍ମି ॥ ୭.୨୪ ॥

ଧିନ୍ଵନ୍ତୁ କୋମଲପଦାଃ ଶିଵଵଲ୍ଲଭାୟା-
ଶ୍ଚେତୋ ଵସନ୍ତତିଲକାଃ କଵିକୁଞ୍ଜରସ୍ୟ ।
ଆନନ୍ଦୟନ୍ତୁ ଚ ପଦାଶ୍ରିତସାଧୁସଙ୍ଘଂ
କଷ୍ଟଂ ଵିଧୂୟ ସକଲଂ ଚ ଵିଧାୟ ଚେଷ୍ଟମ୍ ॥ ୭.୨୫ ॥ 175

%c02-q4/Shailaja.Dhulipala/umasahasram\_ashtamasthabakam.txt medskip

ଅଷ୍ଟମଃ ସ୍ତବକଃ
ଚରିତ୍ରତ୍ରୟମ୍ (ଅନୁଷ୍ଟୁବ୍ଵୃତ୍ତମ୍)

ତମସାମଭିତୋ ହନ୍ତା ଚଣ୍ଡିକାହାସଵାସରଃ ।
ସତାଂ ହୃଦୟରାଜୀଵଵିକାସାୟ ପ୍ରକଲ୍ପତାମ୍ ॥ ୮.୧ ॥

ୟା ନିଦ୍ରା ସର୍ଵଭୂତାନାଂ ୟୋଗନିଦ୍ରା ରମାପତେଃ ।
ଈଡ୍ୟତାଂ ସା ମହାକାଲୀ ମହାକାଲସଖୀ ସଖେ ॥ ୮.୨ ॥

ଵିରିଞ୍ଚିନା ସ୍ତୁତେ ମାତଃ କାଲି ତ୍ଵଂ ଚେନ୍ନ ମୁଞ୍ଚସି ।
ମଧୁକୈଟଭସଂହାରଂ କରୋତୁ କଥମଚ୍ୟୁତଃ ॥ ୮.୩ ॥

ଵାସଵଃ କାଶନୀକାଶୟଶୋଲଙ୍କୃତଦିଙ୍ମୁଖଃ ।
ମହୋଗ୍ରଵିକ୍ରମାଦ୍ୟସ୍ମାଦାସୀଦାଜୌ ପରାଙ୍ମୁଖଃ ॥ ୮.୪ ॥

ୟତ୍ପ୍ରତାପେନ ସନ୍ତପ୍ତୋ ମନ୍ୟେ ବାଡବରୂପଭୃତ୍ ।
ଭଗଵାନନଲୋଽଦ୍ୟାପି ସିନ୍ଧୁଵାସଂ ନ ମୁଞ୍ଚତି ॥ ୮.୫ ॥

କୁର୍ଵାଣେ ଭୂତକଦନଂ ୟସ୍ମିନ୍ଵିସ୍ମିତଚେତସଃ ।
ଏଷ ଏଵାନ୍ତକୋ ନାହମିତ୍ୟାସୀଦନ୍ତକସ୍ୟ ଧୀଃ ॥ ୮.୬ ॥

ରଣେ ୟେନାତିରସ୍କୃତ୍ୟ ତ୍ୟକ୍ତୋ ରାକ୍ଷସ ଇତ୍ୟତଃ ।
ଚିରାୟ ହରିଦୀଶେଷୁ କୋଣେଶଃ ପ୍ରାପ୍ତଵାନ୍ୟଶଃ ॥ ୮.୭ ॥

ୟନ୍ନିୟନ୍ତୁମଶକ୍ତସ୍ୟ କୁର୍ଵାଣମସତୀଃ କ୍ରିୟାଃ ।
ନିୟନ୍ତୁରସତାମାସୀତ୍ପାଶିନୋ ମଲିନଂ ୟଶଃ ॥ ୮.୮ ॥

ବାହୁଵୀର୍ୟପରାଭୂତୋ ୟସ୍ୟ ପ୍ରାୟେଣ ମାରୁତଃ ।
ବଭୂଵ କ୍ଷଣଦାନ୍ତେଷୁ ରତାନ୍ତପରିଚାରକଃ ॥ ୮.୯ ॥

ନିଧୀନ୍ୟେନ ଜିତୋ ହିତ୍ଵା ରାଜରାଜଃ ପଲାୟିତଃ ।
ସ୍ପଷ୍ଟଂ ବଭାଣ ମାଧୁର୍ୟଂ ପ୍ରାଣାନାମଖିଲାଦପି ॥ ୮.୧୦ ॥

ୟସ୍ମିନ୍ନୁତ୍ତରପୂର୍ଵସ୍ୟା ଦିଶ ଏକାଦଶାଧିପାଃ ।
କୁଣ୍ଠା ବଭୂଵୁରାତ୍ମୀୟକଣ୍ଠୋପମିତକୀର୍ତୟଃ ॥ ୮.୧୧ ॥

ନିଜଶୁଦ୍ଧାନ୍ତକାନ୍ତାନାମାନନୈରେଵ ନିର୍ଜିତମ୍ ।
ଲଲଜ୍ଜେ ୟଃ ପୁନର୍ଜିତ୍ଵା ଶୂରମାନୀ ସୁଧାକରମ୍ ॥ ୮.୧୨ ॥

ବାଲସ୍ୟେଵ କ୍ରୀଡନକୈଃ ପ୍ରଵୀରୈର୍ୟସ୍ୟ ଖେଲତଃ ।
ଲୀଲାକନ୍ଦୁକଧୀରାସୀଦ୍ଦେଵେ ଦୀଧିତିମାଲିନି ॥ ୮.୧୩ ॥

ତ୍ରିୟାମାଚରଶୁଦ୍ଧାନ୍ତଭ୍ରୂଵିଲାସନିଵାରଣମ୍ ।
ଵିଷ୍ଣୋଃ ସୁଦର୍ଶନଂ ଚକ୍ରଂ ୟସ୍ୟ ନାପଶ୍ୟଦନ୍ତରମ୍ ॥ ୮.୧୪ ॥

ମହିଷଂ ତଂ ମହାଵୀର୍ୟଂ ୟା ସର୍ଵସୁରଦେହଜା ।
ଅଵଧୀଦ୍ଦାନଵଂ ତସ୍ୟୈ ଚଣ୍ଡିକାୟୈ ନମୋ ନମଃ ॥ ୮.୧୫ ॥

ମୁଖଂ ତଵାସେଚନକଂ ଧ୍ୟାୟଂ ଧ୍ୟାୟଂ ନିରନ୍ତରମ୍ ।
ମୃଗେନ୍ଦ୍ରଵାହେ କାଲେନ ମୃଡସ୍ତ୍ଵନ୍ମୁଖତାଂ ଗତଃ ॥ ୮.୧୬ ॥

କାର୍ତିକୀଚନ୍ଦ୍ରଵଦନା କାଲିନ୍ଦୀଵୀଚିଦୋର୍ଲତା ।
ଅରୁଣାମ୍ଭୋଜଚରଣା ଜୟତି ତ୍ରିରୁଚିଃ ଶିଵା ॥ ୮.୧୭ ॥

ୟତ୍ତେ କଚଭରଃ କାଲୋ ୟଦ୍ବାହୁର୍ଲୋକରକ୍ଷକଃ ।
ୟୁକ୍ତଂ ଦ୍ଵୟଂ ଶିଵେ ମଧ୍ୟସ୍ତ୍ଵସନ୍ନାକୋ ନ ନାକରାଟ୍ ॥ ୮.୧୮ ॥

ସ୍ଵଦେହାଦେଵ ୟା ଦେଵୀ ପ୍ରଦୀପାଦିଵ ଦୀପିକା ।
ଆଵିର୍ଭଭୂଵ ଦେଵାନାଂ ସ୍ତୁଵତାଂ ହର୍ତୁମାପଦଃ ॥ ୮.୧୯ ॥

ଧୈର୍ୟଚାତୁର୍ୟଗାମ୍ଭୀର୍ୟଵୀର୍ୟସୌନ୍ଦର୍ୟଶାଲିନୀମ୍ ।
ରତ୍ନଂ ନିତମ୍ବିନୀଜାତୌ ମେନିରେ ୟାଂ ସୁରାସୁରାଃ ॥ ୮.୨୦ ॥

ୟଦୀୟହୁଙ୍କୃତ୍ୟନଲେ ଧୂମ୍ରାକ୍ଷୋଽଭଵଦାହୁତିଃ ।
ସମାପ୍ତିଂ ଭୀଷଣଂ ୟାଵନ୍ନୈଵାଵାପ ଵିକତ୍ଥନମ୍ ॥ ୮.୨୧ ॥

ଚାମୁଂଡାଶିଵଦୂତ୍ୟୌ ୟତ୍ କଲେ ଦାରୁଣଵିକ୍ରମେ ।
ଭକ୍ଷୟାମାସତୁର୍ମୂର୍ତୀଃ କୀର୍ତିଭିଃ ସହ ରକ୍ଷସାମ୍ ॥ ୮.୨୨ ॥

ୟସ୍ୟାଃ ଶୂଲେ ଜଗାମାସ୍ତଂ ୟଶଃ ଶୁମ୍ଭନିଶୁମ୍ଭୟୋଃ ।
ନମାମି ଵିମଲଶ୍ଲୋକାଂ କୌଶିକୀଂ ନାମ ତାମୁମାମ୍ ॥ ୮.୨୩ ॥

ୟଶୋଦାଗର୍ଭଜନନାଦ୍ ୟଶୋଦାଂ ଗୋକୁଲସ୍ୟ ତାମ୍ ।
ଵନ୍ଦେ ଭଗଵତୀଂ ନନ୍ଦାଂ ଵିନ୍ଧ୍ୟାଚଲନିଵାସିନୀମ୍ ॥ ୮.୨୪ ॥

ଅମ୍ବିକାମୁପତିଷ୍ଠନ୍ତାମେତାଶ୍ଚଣ୍ଡୀମନୁଷ୍ଟୁଭଃ ।
ପ୍ରସନ୍ନାଃ ସାଧ୍ଵଲଙ୍କାରାଃ ସିଦ୍ଧପଦ୍ମେକ୍ଷଣା ଇଵ ॥ ୮.୨୫ ॥ 200

॥ ସମାପ୍ତଂ ଚ ଦ୍ଵିତୀୟଂ ଶତକମ୍ ॥

% c03-q1/Vijay.Sai.Reddy/c03-q1।txt medskip

ତୃତୀୟଂ ଶତକମ୍
ନଵମଃ ସ୍ତବକଃ
ମନ୍ଦହାସଃ (ଆର୍ୟାଵୃତ୍ତମ୍)

ଶାରଦଵଲକ୍ଷପକ୍ଷକ୍ଷଣଦାଵୈମଲ୍ୟଶିକ୍ଷକୋଽସ୍ମାକମ୍ ।
ଜାଗର୍ତୁ ରକ୍ଷଣାୟ ସ୍ଥାଣୁପୁରନ୍ଧ୍ରୀମୁଖଵିକାସଃ ॥ ୯.୧ ॥

ଵ୍ୟାଖ୍ୟାନଂ ହର୍ଷସ୍ୟ ପ୍ରତ୍ୟାଖ୍ୟାନଂ ଶରତ୍ସୁଧାଭାନୋଃ ।
ଦିଶତୁ ହୃଦୟପ୍ରସାଦଂ ଗୌରୀଵଦନପ୍ରସାଦୋ ନଃ ॥ ୯.୨ ॥

ଅନ୍ତର୍ଗତସ୍ୟ ହର୍ଷକ୍ଷୀରସମୁଦ୍ରସ୍ୟ କଶ୍ଚନ ତରଙ୍ଗଃ ।
ହାସୋ ହରହରିଣଦୃଶୋ ଗତପଙ୍କଂ ମମ କରୋତୁ ମନଃ ॥ ୯.୩ ॥

ଦିଶି ଦିଶି ଵିସର୍ପଦଂଶୁପ୍ରଶମିତତାପଂ ପରାସ୍ତମାଲିନ୍ୟମ୍ ।
କୁଶଲାନି ପ୍ରଦିଶତୁ ନଃ ପଶୁପତିହୃଦୟେଶ୍ଵରୀହସିତମ୍ ॥ ୯.୪ ॥

ଅନ୍ତର୍ଗତଂ ଚ ତିମିରଂ ହରନ୍ତି ଵିହସନ୍ତି ରୋହିଣୀକାନ୍ତମ୍ ।
ହସିତାନି ଗିରିଶସୁଦୃଷୋ ମମ ପ୍ରବୋଧାୟ କଲ୍ପନ୍ତାମ୍ ॥ ୯.୫ ॥

ଭାଷାତୁଷାରଦୀଧିତିଦୀଧିତ୍ୟା ସହ ଵିହାୟସୋ ରଙ୍ଗେ ।
ଵିଚରନ୍ ପୁରହରତରୁଣୀଦରହାସୋ ମେ ହରତ୍ଵେନଃ ॥ ୯.୬ ॥

ରୁଦ୍ରାଣୀଦରହସିତାନ୍ୟସ୍ମାକଂ ସଂହରନ୍ତୁ ଦୁରିତାନି ।
ୟେଷାମୁଦୟୋ ଦିଵସୋ ଭୂଷାପୀୟୂଷକିରଣସ୍ୟ ॥ ୯.୭ ॥

ସ୍କନ୍ଦଜନନୀମୁଖେନ୍ଦୋରସ୍ମାନ୍ ପୁଷ୍ଣାତୁ ସୁସ୍ମିତଜ୍ୟୋତ୍ସ୍ନା ।
ମୁନିମତିକୈରଵିଣୀନାମୁଲ୍ଲାସକଥା ୟଦାୟତ୍ତା ॥ ୯.୮ ॥

କମନୀୟକଣ୍ଠମାଲାମୁକ୍ତାମଣିତାରକାଵୟସ୍ୟୋ ନଃ ।
କାମାନ୍ ଵିତରତୁ ଗୌରୀଦରହାସୋ ନାମ ଧଵଲାଂଶୁଃ ॥ ୯.୯ ॥

ଅନଵଦ୍ୟକଣ୍ଠମାଲାମୁକ୍ତାଵଲିକିରଣନିଵହସହଵାସୀ ।
ହରଦୟିତାଦରହାସୋ ହରତୁ ମମାଶେଷମଜ୍ଞାନମ୍ ॥ ୯.୧୦ ॥

ଞ ଇଵ ଜ୍ଞଦୃଶ୍ୟ ଉତ୍ତମ ଇଲାଧରାଧୀଶନନ୍ଦିନୀହାସଃ ।
ପୂର୍ଣଂ କରୋତୁ ମାନସମଭିଲାଷଂ ସର୍ଵମସ୍ମାକମ୍ ॥ ୯.୧୧ ॥

ଆଲୋକମାତ୍ରତୋ ୟଃ ଶଙ୍କରମସମାସ୍ତ୍ରକିଙ୍କରଂ ଚକ୍ରେ ।
ଅଲ୍ପୋଽପ୍ୟନଲ୍ପକର୍ମା ହାସୋ ନଃ ପାତୁ ସ ଶିଵାୟାଃ ॥ ୯.୧୨ ॥

ସ୍ମରମତରତମୀଶଂ ୟଃ କରୋତି ଭାଵପ୍ରସଙ୍ଗଚାତୁର୍ୟା ।
ଦ୍ଵିଜଗଣପୁରସ୍କୃତୋଽଵ୍ୟାତ୍ ସ ଶିଵାହାସପ୍ରଵକ୍ତା ନଃ ॥ ୯.୧୩ ॥

ରଦଵାସସା ରଥୀ ମାଂ ଶରୀ କରୈଃ ପାତୁ ପାର୍ଵତୀହାସଃ ।
ପାଵକଦୃଶଂ ଜିଗୀଷୋଃ ପଞ୍ଚପୃଷତ୍କସ୍ୟ ସେନାନୀଃ ॥ ୯.୧୪ ॥

ଶିଵହୃଦୟମର୍ମଭେଦି ସ୍ମିତଂ ତଦଦ୍ରୀଶଵଂଶମୁକ୍ତାୟାଃ ।
ଦଶନଦ୍ୟୁତିଦ୍ଵିଗୁଣିତଶ୍ରୀକଂ ଶୋକଂ ଧୁନୋତୁ ମମ ॥ ୯.୧୫ ॥

ବ୍ରହ୍ମାଣ୍ଡରଙ୍ଗଭାଜୋ ନଟ୍ୟାଃ ଶିଵସୂତ୍ରଧାରସହଚର୍ୟାଃ ।
ଶ୍ରୀଵର୍ଧନୋଽନୁଲେପୋ ମୁଖସ୍ୟ ହାସଃ ପୁନାତ୍ଵସ୍ମାନ୍ ॥ ୯.୧୬ ॥

ଅଧରପ୍ରଵାଲଶୟନେ ନାସାଭରଣପ୍ରଭାଵିଲାସିନ୍ୟା ।
ରମମାଣୋ ହରରମଣୀହାସୟୁଵା ହରତୁ ନଃ ଶୋକମ୍ ॥ ୯.୧୭ ॥

ଅଧରୋଷ୍ଠଵେଦିକାୟାଂ ନାସାଭରଣାଂଶୁଶାବକୈଃ ସାକମ୍ ।
କୁଲମଖିଲମଵତୁ ଖେଲନ୍ନଦ୍ରିସୁତାହାସବାଲୋ ନଃ ॥ ୯.୧୮ ॥

ଅନୁଲେପନସ୍ୟ ଵୀପ୍ସା ଦ୍ଵିର୍ଭାଵଃ କୁଚତଟୀଦୁକୂଲସ୍ୟ ।
ହରତୁ ହୃଦୟଵ୍ୟଥାଂ ମେ ହସିତଂ ହରଜୀଵିତେଶ୍ଵର୍ୟାଃ ॥ ୯.୧୯ ॥

ଗିରିଶାଙ୍ଗରାଗଭସିତଂ ସ୍ଵାଗତଵଚସାଽଭିନନ୍ଦଦାଦରତଃ ।
ଗିରିଜାଲୀଲାହସିତଂ ଗରୀୟସୀଂ ମେ ତନୋତୁ ଧିୟମ୍ ॥ ୯.୨୦ ॥

ଦୟିତେନ ସଁଲ୍ଲପନ୍ତ୍ୟାଃ ସହ ତୁହିନମରୀଚିଶିଶୁକିରୀଟେନ ।
ଵାଗମୃତବୁଦ୍ବୁଦୋଽଵ୍ୟାଦଲସୋ ମାମଗଭୁଵୋ ହାସଃ ॥ ୯.୨୧ ॥

ଶୁଦ୍ଧଃ କୁଚାଦ୍ରିନିଲୟାଦପି ମୁକ୍ତାହାରତୋ ହରପୁରନ୍ଧ୍ର୍ୟାଃ ।
ଵଦନଶ୍ରୀପ୍ରାସାଦେ ଵିଲସନ୍ ହାସୋଽଲସୋଽଵତୁ ମାମ୍ ॥ ୯.୨୨ ॥

ଵ୍ୟର୍ଥୀଭୂତେ ଚୂତେ ଗତଵତି ପରିଭୂତିମସିତଜଲଜାତେ ।
ଅନିତେ ସିଦ୍ଧିମଶୋକେ କମଲେଽପି ଗଲଜ୍ଜୟଶ୍ରୀକେ ॥ ୯.୨୩ ॥

ବହୁଧା ବିଭେଦ ହୃଦୟଂ ହରସ୍ୟ ବାଣେନ ୟେନ ସୁମବାଣଃ ।
ତଦୁମାଲୀଲାହସିତଂ ମଲ୍ଲୀସୁମମସ୍ତୁ ମେ ଭୂତ୍ୟୈ ॥ ୯.୨୪ ॥

ଅମଲଦରସ୍ମିତଚିହ୍ନାସ୍ତା ଏତାଃ ସର୍ଵମଙ୍ଗଲା ଆର୍ୟାଃ ।
କମନୀୟତମାସ୍ଵସମାମୁପତିଷ୍ଠନ୍ତାମୁମାଂ ଦେଵୀମ୍ ॥ ୯.୨୫ ॥ 225

%c03-q2/Sriarsha.Pvss/Umashahasram-c03-q02।txt medskip

ଦଶମଃ ସ୍ତବକଃ
କେଶାଦିପାଦାନ୍ତଵର୍ଣନମ୍ (ଲଲିତାଵୃତ୍ତମ୍)

ସଙ୍କ୍ଷାଲନାୟ ହରିତାଂ ଵିଭୂତୟେ
ଲୋକତ୍ରୟସ୍ୟ ମଦନାୟ ଧୂର୍ଜଟେଃ ।
କାତ୍ୟାୟନୀଵଦନତଃ ଶନୈଃ ଶନୈର୍-
ନିର୍ୟନ୍ତି ଶୁଭ୍ରହସିତାନି ପାନ୍ତୁ ନଃ ॥ ୧୦.୧ ॥

ସ୍ଵଲ୍ପୋଽପି ଦିକ୍ଷୁ କିରଣାନ୍ ପ୍ରସାରୟନ୍
ମନ୍ଦୋଽପି ବୋଧମମଲଂ ଦଧତ୍ସତାମ୍ ।
ଶୁଭ୍ରୋଽପି ରାଗକୃଦନଙ୍ଗଵୈରିଣୋ
ହାସଃ ପୁରାଣସୁଦୃଶଃ ପୁନାତୁ ନଃ ॥ ୧୦.୨ ॥

ଚେତୋହରୋଽପ୍ୟତିଜୁଗୁପ୍ସିତୋ ଭଵେତ୍
ସର୍ଵୋଽପି ଜୀଵକଲୟା ୟୟା ଵିନା ।
ସା ଵର୍ଣ୍ୟତାଂ କଥମପାରଚାରୁତା
ପୀୟୂଷସିନ୍ଧୁରଖିଲେନ୍ଦ୍ରସୁନ୍ଦରୀ ॥ ୧୦.୩ ॥

ଅତ୍ୟଲ୍ପଦେଵଵନିତାଂ ଚ ପାର୍ଥିଵୈର୍-
ଭାଵୈର୍ଵୟଂ ତୁଲୟିତୁଂ ନ ଶକ୍ନୁମଃ
ତାଂ କିଂ ପୁନଃ ସକଲଦେଵସୁନ୍ଦରୀ ।
ଲୋକାକ୍ଷିପାରଣତନୁପ୍ରଭାମୁମାମ୍ ॥ ୧୦.୪ ॥

ଵର୍ଷାପୟୋଦପଟଲସ୍ୟ ସାନ୍ଦ୍ରତା
ସୂର୍ୟାତ୍ମଜୋର୍ମିଚୟନିମ୍ନତୁଙ୍ଗତା ।
କାଲାହିଭୂମିପତିଦୀର୍ଘତା ଚ ତେ
କେଶେଷୁ ଭର୍ଗଭଵନେଶ୍ଵରି ତ୍ରୟମ୍ ॥ ୧୦.୫ ॥

ଈଶାନସୁନ୍ଦରି ତଵାସ୍ୟମଣ୍ଡଲା-
ନ୍ନୀଚୈର୍ନିତାନ୍ତମମୃତାଂଶୁମଣ୍ଡଲମ୍ ।
କୋ ଵା ନ କୀର୍ତୟତି ଲୋଷ୍ଟପିଣ୍ଡକଂ
ଲୋକେ ନିକୃଷ୍ଟମିହ ମାନଵୀମୁଖାତ୍ ॥ ୧୦.୬ ॥

ବିଭ୍ରତ୍ୟମର୍ତ୍ୟଭୁଵନସ୍ଥଦୀର୍ଘିକା
ପଙ୍କେରୁହାଣି ଵଦନାୟ ତେ ବଲିମ୍ ।
ନୋ ଚେତ୍ କଥଂ ଭଵତି ସୌରଭଂ ମହ-
ଦ୍ଭିନ୍ନେ ସୁମେଭ୍ୟ ଉରୁକେଶି ତେ ମୁଖେ ॥ ୧୦.୭ ॥

ଗୀର୍ଵାଣଲୋକତଟିନୀଜଲେରୁହାଂ
ଗନ୍ଧେ ଶୁଭେ ଭଵତୁ ତେ ମନୋରତିଃ ।
ଲୋକାଧିରାଜ୍ଞି ତଵ ଵକ୍ତ୍ରସୌରଭେ
ଲୋକାଧିରାଜମନସସ୍ତୁ ସମ୍ମଦଃ ॥ ୧୦.୮ ॥

କୋ ଭାଷତାଂ ତଵ ସଵିତ୍ରି ଚାରୁତାଂ
ୟସ୍ୟାଃ ସ୍ମିତସ୍ୟ ଧଵଲଦ୍ୟୁତିର୍ଲଵଃ ।
ୟସ୍ୟାଃ ଶରୀରରୁଚିସିନ୍ଧୁଵୀଚୟଃ
ଶମ୍ପାଲତାଃ ପୃଥୁଲଦୀପ୍ତିଭୂମୟଃ ॥ ୧୦.୯ ॥

ଲୋକାମ୍ବିକେ ନ ଵିଲସନ୍ତି କେ ପୁରୋ
ମନ୍ଦସ୍ମିତସ୍ୟ ତଵ ରୋଚିଷାଂ ନିଧେଃ ।
ୟେ ତୁ ଵ୍ୟଧାୟିଷତ ତେନ ପୃଷ୍ଠତୋ
ହନ୍ତୈଷୁ କାଽପି ତିମିରଚ୍ଛଟା ଭଵେତ୍ ॥ ୧୦.୧୦ ॥

କିଂ ଵା ରଦାଵଲିରୁଚିର୍ମୁଖସ୍ୟ କିଂ
ସମ୍ଫୁଲ୍ଲତା ଵରଧିୟଃ କିମୂର୍ମିକା ।
ସନ୍ତୋଷପାଦପସୁମଂ ନୁ ଶଙ୍କର-
ପ୍ରେମସ୍ଵରୂପମୁତ ଦେଵି ତେ ସ୍ମିତମ୍ ॥ ୧୦.୧୧ ॥

ଦିକ୍ଷୁ ପ୍ରକାଶପଟଲଂ ଵିତନ୍ଵତା
କୋଟିପ୍ରଭାକରଵିଭକ୍ତତେଜସା ।
ନେତ୍ରେଣ ତେ ଵିଷମନେତ୍ରଵଲ୍ଲଭେ
ପଙ୍କେରୁହଂ କ ଉପମାତି ପଣ୍ଡିତଃ ॥ ୧୦.୧୨ ॥

ଶ୍ରୀକର୍ଣ ଏଷ ତଵ ଲୋଚନାଞ୍ଚଲେ
ଭାନ୍ତ୍ୟା ଦୟାଦୟିତୟା ପ୍ରବୋଧିତଃ ।
ଏତଂ ସଵିତ୍ରି ମମ କଞ୍ଚନ ସ୍ତଵଂ
ଶ୍ରୁତ୍ଵା ତନୋତୁ ଭରତାଵନେଃ ଶ୍ରିୟମ୍ ॥ ୧୦.୧୩ ॥

ସ୍ଵା ନାସିକା ଭଵତି ୟୁଞ୍ଜତାଂ ସତାଂ
ସଂସ୍ତମ୍ଭିନୀ ଚଲତମସ୍ୟ ଚକ୍ଷୁଷଃ ।
ତ୍ଵନ୍ନାସିକା ପୁରହରସ୍ୟ ଚକ୍ଷୁଷଃ
ସଂସ୍ତମ୍ଭିନୀ ଭଵତି ଚିତ୍ରମମ୍ବିକେ ॥ ୧୦.୧୪ ॥

ବିମ୍ବପ୍ରଵାଲନଵପଲ୍ଲଵାଦିତଃ
ପୀୟୂଷସାରଭରଣାଦ୍ ଗୁଣାଧିକଃ ।
ଗୋତ୍ରସ୍ୟ ପୁତ୍ରି ଶିଵଚିତ୍ତରଞ୍ଜକଃ
ଶ୍ରେଷ୍ଠୋ ନିତାନ୍ତମଧରାଧରୋଽପି ତେ ॥ ୧୦.୧୫ ॥

ଦୋର୍ଵଲ୍ଲିକେ ଜନନି ତେ ତଟିତ୍ପ୍ରଭା-
ମନ୍ଦାରମାଲ୍ୟମୃଦୁତାପହାରିକେ ।
ନିଶ୍ଶେଷବନ୍ଧଦମନସ୍ୟ ଧୂର୍ଜଟେର୍-
ବନ୍ଧାୟ ଭଦ୍ରଚରିତେ ବଭୂଵତୁଃ ॥ ୧୦.୧୬ ॥

ହସ୍ତାବ୍ଜୟୋସ୍ତଵ ମୃଦୁତ୍ଵମଦ୍ଭୁତଂ
ଗୃହ୍ଣାତି ୟେ ସଦୟମେଵ ଧୂର୍ଜଟିଃ
ଅତ୍ୟଦ୍ଭୁତଂ ଜନନି ଦାଢର୍ୟମେତୟୋଃ
ଶୁମ୍ଭାଦିଦର୍ପଵିଲୟୋ ୟୟୋରଭୂତ୍ ॥ ୧୦.୧୭ ॥

ରାଜନ୍ତୁ ତେ କୁଚସୁଧାପ୍ରପାୟିନୋ
ଲୋକସ୍ୟ ମାତରନଘାଃ ସହସ୍ରଶଃ ।
ଏତେଷୁ କଶ୍ଚନ ଗଜାନନଃ କୃତୀ
ଗାୟନ୍ତି ୟଂ ସକଲଦାୟିସତ୍କରମ୍ ॥ ୧୦.୧୮ ॥

ତ୍ଵନ୍ନାଭିକୂପପତିତାଂ ଦୃଶଂ ପ୍ରଭୋର୍-
ନେତୁଂ ଵିନିର୍ମଲଗୁଣେ ପୁନସ୍ତଟମ୍ ।
ସୌମ୍ୟତ୍ଵଦୀୟହୃଦୟପ୍ରସାରିତଃ
ପାଶଃ ସଵିତ୍ରି ତଵ ରୋମରାଜିକା ॥ ୧୦.୧୯ ॥

ତ୍ଵନ୍ମଧ୍ୟମୋ ଗଗନଲୋକ ଏଵ ଚେତ୍
ତ୍ଵଦ୍ଦିଵ୍ୟଵୈଭଵଵିଦୋ ନ ଵିସ୍ମୟଃ ।
ପ୍ରାଜ୍ଞୈର୍ହି ସୁନ୍ଦରି ପୁରତ୍ରୟଦ୍ଵିଷ-
ସ୍ତ୍ଵଂ ଦେହିନୀ ତ୍ରିଭୁଵନେନ ଗୀୟସେ ॥ ୧୦.୨୦ ॥

ନାଭିହୃଦାଦ୍ଵିଗଲିତଃ କଟୀଶିଲା-
ଭଙ୍ଗାତ୍ ପୁନଃ ପତତି କିଂ ଦ୍ଵିଧାକୃତଃ ।
କାନ୍ତୋରୁୟୁଗ୍ମମିଷତଃ ସଵିତ୍ରି ତେ
ଭାଵାରିପୂର ଇଭଶୁଣ୍ଡୟୋଃ ସମଃ ॥ ୧୦.୨୧ ॥

ଜଙ୍ଘାୟୁଗଂ ତଵ ମହେଶନାୟିକେ
ଲାଵଣ୍ୟନିର୍ଝରି ଜଗଦ୍ଵିଧାୟିକେ ।
ଅନ୍ତଃପରିସ୍ଫୁରଦଗୁପ୍ତସୁପ୍ରଭା-
ବାଣାଢ୍ୟତୂଣୟୁଗଲଂ ରତୀଶିତୁଃ ॥ ୧୦.୨୨ ॥

ପୁଷ୍ପାସ୍ତ୍ରଶାସନନିଶାନ୍ତରାଜ୍ଞି ତେ
ଲୋକତ୍ରୟସ୍ଥଖଲକମ୍ପନଂ ବଲମ୍ ।
ଶ୍ରୋଣୀଭରେଣ ଗମନେ କିଲ ଶ୍ରମଂ
ପ୍ରାପ୍ନୋଷି କେନ ତଵ ତତ୍ତ୍ଵମୁଚ୍ୟତାମ୍ ॥ ୧୦.୨୩ ॥

ୟତ୍ରୈଵ ନିତ୍ୟଵିହୃତେରଭୂଦ୍ରମା
ରାଜୀଵମନ୍ଦିରଚରୀତି ନାମତଃ ।
ତନ୍ମେ ସଦା ଭଣତୁ ମଙ୍ଗଲଂ ଶିଵା
ପାଦାମ୍ବୁସମ୍ଭଵମମେୟଵୈଭଵମ୍ ॥ ୧୦.୨୪ ॥

କେଶାଦିପାଦକମଲାନ୍ତଗାୟିନୀଃ
କନ୍ତୁପ୍ରଶାସନନିଶାନ୍ତନାୟିକା ।
ଅଙ୍ଗୀକରୋତୁ ଲଲିତା ଇମାଃ କୃତୀର୍-
ଗୌରୀ କଵେଶ୍ଚରଣକଞ୍ଜସେଵିନଃ ॥ ୧୦.୨୫ ॥ 250

%c03-q3/Ravi.Shamavedam/uma-c03-q3।txt medskip

ଏକାଦଶଃ ସ୍ତବକଃ
ପାଦାଦିକେଶାନ୍ତଵର୍ଣନମ୍ (ଆର୍ୟାଵୃତ୍ତମ୍)

ଝଷକେତୁନା ପ୍ରୟୁକ୍ତଃ ସମ୍ମୋହନଚୂର୍ଣମୁଷ୍ଟିରୀଶାନେ ।
ଦରହାସୋ ଧରଦୁହିତୁଃ କରୋତୁ ଭୁଵନଂ ଵଶେଽସ୍ମାକମ୍ ॥ ୧୧.୧ ॥

ଉପଜୀଵଦ୍ଭିଃ କାନ୍ତେର୍ଲେଶାଂସ୍ତେ ଜଗତି ସୁନ୍ଦରୈର୍ଭାଵୈଃ ।
ଉପମିତୁମଙ୍ଗାନି ତଵ ପ୍ରାୟୋ ଲଜ୍ଜେଽମ୍ବ ୟତମାନଃ ॥ ୧୧.୨ ॥

ଅଵତଂସପଲ୍ଲଵତୁଲାଂ ବିଭ୍ରାଣଂ ଶ୍ରୁତିନତଭ୍ରୁଵଃ ଶିରସି ।
ଚରଣଂ ଵ୍ରଜାମି ଶରଣଂ ଵାମଂ କାମାରିଲଲନାୟାଃ ॥ ୧୧.୩ ॥

ଶଙ୍କରନୟନୋନ୍ମାଦନମତିମଧୁରଂ ଭାତି ମତିମତା ଵର୍ଣ୍ୟେ ।
ଜଙ୍ଘାୟୁଗଂ ଭଵତ୍ୟାଃ କୁସୁମପୃଷତ୍କସ୍ୟ ସର୍ଵସ୍ଵମ୍ ॥ ୧୧.୪ ॥

ଏକୈକଲୋକନେ ଦ୍ଵୟମନ୍ୟୋନ୍ୟସ୍ମରଣହେତୁତାମେତି ।
ଦେଵି ଭଵସ୍ୟ ତଵୋରୁଃ ଶୁଣ୍ଡା ଚ ଗଜେନ୍ଦ୍ରଵଦନସ୍ୟ ॥ ୧୧.୫ ॥

ନାକୋଽଵଲଗ୍ନମୀଶ୍ଵରି କଟିରଵନିର୍ଭୋଗିନାଂ ଜଗନ୍ନାଭିଃ ।
କୁକ୍ଷୌ ନ କେଵଲଂ ତେ ବହିରପି ଵପୁଷି ତ୍ରୟୋ ଲୋକାଃ ॥ ୧୧.୬ ॥

ମନ୍ୟେ ମହାକୃପାଣଂ ତଵ ଵେଣୀମଚଲପୁତ୍ରି ମଦନସ୍ୟ ।
ଅସିଧେନୁକାଂ ଵିଶଙ୍କେ ନିଶିତତରାଗ୍ରାଂ ତୁ ରୋମାଲିମ୍ ॥ ୧୧.୭ ॥

ଦ୍ଵିରଦଵଦନେନ ପୀତଂ ଷଡ୍ଵଦନେନାଥ ସକଲଭୁଵନେନ ।
ଅକ୍ଷୟ୍ୟକ୍ଷୀରାମୃତମମ୍ବାୟାଃ କୁଚୟୁଗଂ ଜୟତି ॥ ୧୧.୮ ॥

ଜଗଦମ୍ବ ଲମ୍ବମାନା ପାର୍ଶ୍ଵଦ୍ଵିତୟେ ତଵାଗଲାଦ୍ଭାତି ।
ସାନ୍ଦ୍ରଗ୍ରଥିତମନୋଜ୍ଞପ୍ରସୂନମାଲେଵ ଭୁଜୟୁଗଲୀ ॥ ୧୧.୯ ॥

ଜାନନ୍ତି ଶକ୍ତିମସୁରାଃ ସୁଷମାଂ ସଖ୍ୟୋ ଵଦାନ୍ୟତାମୃଷୟଃ ।
ମୃଦୁତାଂ ତଵାମ୍ବ ପାଣେର୍ଵେଦ ସ ଦେଵଃ ପୁରାଂ ଭେତ୍ତା ॥ ୧୧.୧୦ ॥

କମ୍ବୁସଦୃଗମ୍ବ ଜଗତାଂ ମଣିଵେଷୋଡୁସ୍ରଜାକୃତାକଲ୍ପଃ ।
କଣ୍ଠୋଽନଘସ୍ଵରସ୍ତେ ଧୂର୍ଜଟିଦୋର୍ନୟନକର୍ଣହିତଃ ॥ ୧୧.୧୧ ॥

ହରକାନ୍ତେ ଵଦନଂ ତେ ଦର୍ଶଂ ଦର୍ଶଂ ଵତଂସଶୀତାଂଶୁଃ ।
ପୂର୍ଣୋଽପ୍ୟଵାପ କୃଶତାଂ ପ୍ରାୟେଣାସୂୟୟା ଶୁଷ୍କଃ ॥ ୧୧.୧୨ ॥

ଚନ୍ଦ୍ରଂ ରଣାୟ ସକଲା ଚପଲାକ୍ଷୀଵଦନଜାତିରାହ୍ଵୟତାମ୍ ।
ତଂ ତୁ ମହସା ମୁଖଂ ତେ ମହେଶକାନ୍ତେ ଜିଗାୟୈକମ୍ ॥ ୧୧.୧୩ ॥

ଵଦନକମଲଂ ତଵେଶ୍ଵରି କମଲଜୟାଦ୍ଦର୍ପିତଂ ସୁଧାଭାନୁମ୍ ।
ନିର୍ଜିତ୍ୟ କମଲଜାତେରମଲଂ ମହଦାଜହାର ୟଶଃ ॥ ୧୧.୧୪ ॥

ଲାଵଣ୍ୟମରନ୍ଦାଶା ଭ୍ରମଦ୍ଭଵାଲୋକବମ୍ଭରଂ ପରିତଃ ।
ମୁଗ୍ଧଂ ମୁଖାରଵିନ୍ଦଂ ଜୟତି ନଗାଧୀଶନନ୍ଦିନ୍ୟାଃ ॥ ୧୧.୧୫ ॥

ଶୁଦ୍ଧେନ୍ଦୁସାରନିର୍ମିତମାସ୍ୟାର୍ଧଂ ତେ ଭଵାନି ଭାଲମୟମ୍ ।
ସକଲରମଣୀୟସାରୈର୍ନିର୍ମିତମର୍ଧାନ୍ତରଂ ଵିଧିନା ॥ ୧୧.୧୬ ॥

ଵଦନଂ ତଵାଦ୍ରିଦୁହିତର୍ଵିଜିତାୟ ନତାୟ ଶୀତକିରଣାୟ ।
ଦ୍ଵାରପପଦଵୀଂ ପ୍ରଦଦା ଵୟମିହ ଦରହାସନାମଧରଃ ॥ ୧୧.୧୭ ॥

ତେ ତେ ଵଦନ୍ତୁ ସନ୍ତୋ ନୟନଂ ତାଟଙ୍କମାଲୟଂ ମୁକୁଟମ୍ ।
କଵୟୋ ଵୟଂ ଵଦାମଃ ସିତମହସଂ ଦେଵି ତେ ହାସମ୍ ॥ ୧୧.୧୮ ॥

ବିମ୍ବାଧରସ୍ୟ ଶୋଭାମମ୍ବାୟାଃ କୋ ନୁ ଵର୍ଣୟିତୁମୀଷ୍ଟେ ।
ଅନ୍ତରପି ୟା ପ୍ରଵିଶ୍ୟ ପ୍ରମଥପତେର୍ଵିତନୁତେ ରାଗମ୍ ॥ ୧୧.୧୯ ॥

ଗଣପତୟେ ସ୍ତନଘଟୟୋଃ ପଦକମଲେ ସପ୍ତଲୋକଭକ୍ତେଭ୍ୟଃ ।
ଅଧରପୁଟେ ତ୍ରିପୁରଜିତେ ଦଧାସି ପିୟୂଷମମ୍ବ ତ୍ଵମ୍ ॥ ୧୧.୨୦ ॥

ଦୃକ୍ପୀୟୂଷତଟିନ୍ୟାଂ ନାସାସେତୌ ଵିନିର୍ମିତେ ଵିଧିନା ।
ଭାସାଂ ଭଵତି ଶିଵେ ତେ ମୁଖେ ଵିହାରୋ ନିରାତଙ୍କଃ ॥ ୧୧.୨୧ ॥

କମଲାଵିଲାସଭଵନଂ କରୁଣାକେଲୀଗୃହଂ ଚ କମନୀୟେ ।
ହରଦୟିତେ ତେ ଵିନିତହିତେ ନୟନେ ତେ ଜନନି ଵିଜୟେତେ ॥ ୧୧.୨୨ ॥

ସର୍ଵାଣ୍ୟପ୍ୟଙ୍ଗାନି ଶ୍ରୀମନ୍ତି ତଵେନ୍ଦୁଚୂଡକୁଲକାନ୍ତେ ।
କଵିନିଵହଵିନୁତିପାତ୍ରେ ଶ୍ରୋତ୍ରେ ଦେଵି ଶ୍ରିୟାଵେଵ ॥ ୧୧.୨୩ ॥

ଅପି କୁଟିଲମଲିନମୁଗ୍ଧସ୍ତଵ କେଶଃ ପୁତ୍ରି ଗୋତ୍ରସୁତ୍ରାମ୍ଣଃ ।
ବିଭ୍ରତ୍ସୁମାନି କାନ୍ୟପି ହୃଦୟଂ ଭୁଵନପ୍ରଭୋର୍ହରତି ॥ ୧୧.୨୪ ॥

ଚରଣାଦିକୁନ୍ତଲାନ୍ତପ୍ରକୃଷ୍ଟସୌନ୍ଦର୍ୟଗାୟିନୀରେତାଃ ।
ଅଙ୍ଗୀକରୋତୁ ଶମ୍ଭୋରମ୍ଭୋଜଦୃଗାତ୍ମଜସ୍ୟାର୍ୟାଃ ॥ ୧୧.୨୫ ॥ 275

%c03-q4/Jayanth.Ganapathiraju/transliteration.txt medskip

ଦ୍ଵାଦଶଃ ସ୍ତବକଃ
ଶୃଙ୍ଗାରଵର୍ଣନମ୍ (ରଥୋଦ୍ଧତାଵୃତ୍ତମ୍)

ଶର୍ଵଧୈର୍ୟଗୁଣଶାତଶସ୍ତ୍ରିକା ଶମ୍ବରାରିଜୟକେତୁପଟ୍ଟିକା ।
ମନ୍ଦହାସିକଲିକା ମଦାପଦଂ ପର୍ଵତେନ୍ଦ୍ରଦୁହିତୁର୍ଵ୍ୟପୋହତୁ ॥ ୧୨.୧ ॥

ମୁକ୍ତଭୋଗିକଟକେନ ପାଣିନା ମୁଗ୍ଧଗାତ୍ରି ପରିଗୃହ୍ୟ ତେ କରମ୍ ।
ଏକଦା ଶଶିକିଶୋରଶେଖରଃ ସଞ୍ଚଚାର ରଜତାଦ୍ରିଭୂମିଷୁ ॥ ୧୨.୨ ॥

ତସ୍ୟ ତତ୍ର ପରିତଃ ପରିଭ୍ରମନ୍ ଵଲ୍ଲଭାଂ ଵକୁଲପୁଷ୍ପଚୁମ୍ବିନୀମ୍ ।
ପାର୍ଵତି ତ୍ଵଦଲକୋପମଦ୍ୟୁତିଃ ଚ୍ଞ୍ଚରୀକତରୁଣୋ ମନୋଽଧୁନୋତ୍ ॥ ୧୨.୩ ॥

ପ୍ରେୟସୀଂ ଚପଲଚାରୁଲୋଚନାମୁଲ୍ଲିଖନ୍ ଵପୁଷି ଶୃଙ୍ଗକୋଟିନା ।
ତ୍ଵଦ୍ଵିଲୋକିତନିଭୈର୍ଵିଲୋକିତୈଃ ଧୂର୍ଜଟେରମଦୟନ୍ମନୋ ମୃଗଃ ॥ ୧୨.୪ ॥

ମଞ୍ଜୁକୁଞ୍ଜଭଵନାନି ମାଲତୀପୁଷ୍ପରେଣୁସୁରଭିଃ ସମୀରଣଃ ।
ପେଶଲା ଚ ପିକବାଲକାକଲୀ ମୋହମୀଶ୍ଵରି ହରସ୍ୟ ତେନିରେ ॥ ୧୨.୫ ॥

ଅଗ୍ରତଃ କୁସୁମଶୋଭିତା ଲତାଃ ପାର୍ଶ୍ଵତସ୍ତ୍ଵମଗପାଲବାଲିକେ ।
ସର୍ଵତୋ ମଦନଶିଞ୍ଜିନୀଧ୍ଵନିର୍ଧୀରତା କଥମିଵାସ୍ୟ ଵର୍ତତାମ୍ ॥ ୧୨.୬ ॥

କୀରକୂଜିତସମାକୁଲେ ଵନେ ଶମ୍ଭୁମମ୍ବ ତଵ ପାର୍ଶ୍ଵଵର୍ତିନମ୍ ।
ଆଜଘାନ ମକରଧ୍ଵଜଶ୍ଶରୈରର୍ଦୟନ୍ତ୍ୟଵସରେ ହି ଶତ୍ରଵଃ ॥ ୧୨.୭ ॥

ତାଡିତୋ ମକରକେତୁନା ଶରୈରଂସଦେଶମଵଲମ୍ବ୍ୟ ପଣିନା ।
ଏକହାୟନକୁରଙ୍ଗଲୋଚନା ତ୍ଵାମିଦଂ କିଲ ଜଗାଦ ଶଙ୍କରଃ ॥ ୧୨.୮ ॥

କାକଲୀକଲକଲଂ କରୋତ୍ୟସୌ ବାଲଚୂତମଧିରୁହ୍ୟ କୋକିଲା ।
ଵାଚମୁଦ୍ଗିର ସରୋଜଲୋଚନେ ଗର୍ଵମୁନ୍ନତମିୟଂ ଵିମୁଞ୍ଚତୁ ॥ ୧୨.୯ ॥

ଫୁଲ୍ଲକୁନ୍ଦମକରନ୍ଦଵାହିନୋ ମଲ୍ଲିକାମୁକୁଲଧୂଲିଧାରିଣଃ ।
କମ୍ପୟନ୍ତି ଶିଶଵଃ ସମୀରଣାଃ ପଲ୍ଲଵାନି ହୃଦୟଂ ଚ ତନ୍ଵି ମେ ॥ ୧୨.୧୦ ॥

ଵର୍ଣନେନ ହୃତଚକ୍ଷୁଷଃ ଶ୍ରିୟଃ ସୁପ୍ରସନ୍ନମଧୁରାକୃତୀନି ତେ ।
ଅଙ୍ଗକାନି ଦୟିତେ ଭଜେଽର୍ଭକଃ ସ୍ଵେଦବିନ୍ଦୁହରଣେନ ଵାଽନିଲଃ ॥ ୧୨.୧୧ ॥

ତାଵଦେଵ ମମ ଚେତସୋ ମୁଦେ ବର୍ହମେତଦନଘାଙ୍ଗି ବର୍ହିଣଃ ।
ୟାଵଦକ୍ଷିପଥମେଷ ଵିଶ୍ଲଥୋ ଗାହତେ ନ କବରୀଭରସ୍ତଵ ॥ ୧୨.୧୨ ॥

ରାଗଵାନଧର ଏଷ ସନ୍ତତଂ ନିର୍ମଲଦ୍ଵିଜସମୀପଵର୍ତ୍ୟପି ।
ଏଭିରସ୍ୟ ସହଵାସତଃ ପ୍ରିୟେ ନେଷଦପ୍ୟପଗତୋ ନିଜୋ ଗୁଣଃ ॥ ୧୨.୧୩ ॥

ଚକ୍ଷୁଷଃ ସୁଦତି ତେ ସଗୋତ୍ରତା କୈରଵୈର୍ନିଶି ଦିନେ କୁଶେଶୟୈଃ ।
କଶ୍ୟପୈରପି ଵସିଷ୍ଠବାନ୍ଧଵୈର୍ଭୂସୁପର୍ଵଣ ଇଵ ଦ୍ଵିଗୋତ୍ରିଣଃ ॥ ୧୨.୧୪ ॥

ଅଲ୍ପୟାଽପ୍ୟତିସମର୍ଥୟା ସ୍ମିତଜ୍ୟୋତ୍ସ୍ନୟା ଗଗନଗଂ ହରତ୍ତମଃ ।
କେଵଲଂ ସୁଵଚନାମୃତଂ କିରଚ୍ଚନ୍ଦ୍ରବିମ୍ବମତୁଷାରମାନନମ୍ ॥ ୧୨.୧୫ ॥

ନିତ୍ୟମବ୍ଜମୁଖି ତେ ପରସ୍ପରଶ୍ଲିଷ୍ଟମଶ୍ଲଥପଟୀକୁଟୀରଗମ୍ ।
ଶର୍ଵରୀଭୟଵିଵର୍ଜିତଂ ସ୍ଥଲୀଚକ୍ରଵାକମିଥୁନଂ କୁଚଦ୍ଵୟମ୍ ॥ ୧୨.୧୬ ॥

ଲାଲନୀୟମୟି ଦେଵମୌଲିଭିଃ କୋମଲଂ ଚରଣପଲ୍ଲଵଦ୍ଵୟମ୍ ।
କଚ୍ଚିଦଦ୍ରିପୁରୁହୂତପୁତ୍ରିକେ ନ ସ୍ଥଲୀ ତୁଦତି କର୍କଶା ତଵ ॥ ୧୨.୧୭ ॥

ଏଵମାଦି ଵଦତି ତ୍ରିଲୋଚନେ ତ୍ଵନ୍ମୁଖେ ଲସତି ମୌନମୁଦ୍ରୟା ।
ଆତତାନ ଜଲଚାରିକେତନୋ ନର୍ତନଂ ନଗମହେନ୍ଦ୍ରବାଲିକେ ॥ ୧୨.୧୮ ॥

ଦେଵି ତେ ପୁରଜିତାଵତଂସିତଃ ପାରିଜାତକୁସୁମସ୍ରଜା କଚଃ ।
ମାନସଂ ପୁରଜିତୋଽମୁନା ହୃତଂ ସ୍ମର୍ୟତେ କ୍ଵ ମଲିନାତ୍ମନା କୃତମ୍ ॥ ୧୨.୧୯ ॥

ବ୍ରହ୍ମଚର୍ୟନିୟମାଦଚଞ୍ଚଲା ନାୟିକା ୟଦି ଲୁଲାୟମର୍ଦିନୀ ।
ନାୟକଶ୍ଚ ସୁମବାଣସୂଦନୋ ଵେଦ କୋ ରତିରହସ୍ୟମାଵୟୋଃ ॥ ୧୨.୨୦ ॥

ଲୋଚନୋତ୍ସଵଵିଧୌ ଵିଶାରଦେ ଵାରିଦାଵରଣଦୋଷଵର୍ଜିତେ ।
ମର୍ଦୟତ୍ୟପି ନଭୋଗତଂ ତମଃ ଶ୍ୟାମିକାରହିତସୁନ୍ଦରାକୃତୌ ॥ ୧୨.୨୧ ॥

ଭାତି ଶୀତକିରଣସ୍ତନନ୍ଧୟେ ପ୍ରାଣନାୟକଜଟାକୁଟୀଜୁଷି ।
ଶୁଭ୍ରପର୍ଵତତଟେ ଶୁଭାଙ୍ଗି ତେ ସମ୍ମଦାୟ ନ ବଭୂଵ କା ନିଶା ॥ ୧୨.୨୨ ॥

ସନ୍ତୁ ଭୂଷଣସୁଧାଂଶୁଦୀଧିତି ଵ୍ୟକ୍ତମୁଗ୍ଧମୁଖଶୋଭୟୋର୍ମିଥଃ ।
ତାନି ତାନି ଗିରିଜାଗିରୀଶୟୋଃ କ୍ରୀଡିତାନି ଜଗତୋ ଵିଭୂତୟେ ॥ ୧୨.୨୩ ॥

ମୋଦକାଦନପରସ୍ୟ ସୃଷ୍ଟୟେ କ୍ରୀଡିତଂ ଜନନି ଵାଂ କିମପ୍ୟଭୂତ୍ ।
ଶକ୍ତିଭୃତ୍ତନୟରତ୍ନଜନ୍ମନେ କିଞ୍ଚିଦୀଶ୍ଵରି ବଭୂଵ ଖେଲନମ୍ ॥ ୧୨.୨୪ ॥

ମାଧୁରୀରସପରିପ୍ଲୁତା ଇମାଃ କାଵ୍ୟକଣ୍ଠଵିଦୁଷୋ ରଥୋଦ୍ଧତାଃ ।
ଆଦଧତ୍ଵଚଲନାଥନନ୍ଦିନୀ ମାନସେ କମପି ମୋଦମୁତ୍ତମମ୍ ॥ ୧୨.୨୫ ॥ 300

॥ ସମାପ୍ତଂ ଚ ତୃତୀୟଂ ଶତକମ୍ ॥

%c04-q1/Prabhanjan.Pandalaneni/umasahasramu\_301-325।txt medskip

ଚତୁର୍ଥଂ ଶତକମ୍
ତ୍ରୟୋଦଶଃ ସ୍ତବକଃ
କଟାକ୍ଷଃ (ଉପଜାତିଵୃତ୍ତମ୍)

ଭଵାମ୍ବୁଧିଂ ତାରୟତାଦ୍ଭଵନ୍ତଂ
ହାସୋଽଦ୍ଭୁତଃ କୁଞ୍ଜରଵକ୍ତ୍ରମାତୁଃ ।
ୟୋ ହନ୍ତି ବିମ୍ବାଧରଲଙ୍ଘନେଽପି
ଵ୍ୟକ୍ତାଲସତ୍ଵୋ ହରିତାଂ ତମାଂସି ॥ ୧୩.୧ ॥

ସକ୍ତଃ ସଦା ଚନ୍ଦ୍ରକଲାକଲାପେ
ସର୍ଵେଷୁ ଭୂତେଷୁ ଦୟାଂ ଦଧାନଃ ।
ଗୌରୀକଟାକ୍ଷୋ ରମଣୋ ମୁନିର୍ଵା
ମଦୀୟମଜ୍ଞାନମପାକରୋତୁ ॥ ୧୩.୨ ॥

କୃପାଵଲୋକୋ ନଗକନ୍ୟକାୟାଃ
କରୋତୁ ମେ ନିର୍ମଲମନ୍ତରଙ୍ଗମ୍ ।
ୟେନାଙ୍କିତଃ ଶଙ୍କର ଏକତତ୍ତ୍ଵଂ
ଵିଶ୍ଵଂ ଲୁଲୋକେ ଜଗତେ ଜଗୌ ଚ ॥ ୧୩.୩ ॥

କାଲୀକଟାକ୍ଷୋ ଵଚନାନି ମହ୍ୟଂ
ଦଦାତୁ ମୋଚାମଦମୋଚନାନି ।
ୟତ୍ପାତପୂତଂ ରଘୁଵଂଶକାରଂ
ନରାକୃତିଂ ପ୍ରାହୁରଜସ୍ୟ ନାରୀମ୍ ॥ ୧୩.୪ ॥

ୟୁଷ୍ମାକମଗ୍ର୍ୟାଂ ଵିତନୋତୁ ଵାଣୀ-
ମେଣୀଦୃଗେଷା ଗିରିଶସ୍ୟ ୟୋଷା ।
ୟସ୍ୟାଃ କଟାକ୍ଷସ୍ୟ ଵିସାରି ଵୀର୍ୟଂ
ଗିରାମୟଂ ମେ ଵିଵିଧୋ ଵିଲାସଃ ॥ ୧୩.୫ ॥

ନଗାତ୍ମଜାୟାଃ କରୁଣୋର୍ମିଶାଲୀ
ଦୃଗନ୍ତସନ୍ତାନଧୁନୀପ୍ରଵାହଃ ।
ଭୀଷ୍ମେଣ ତପ୍ତାନ୍ଭଵନାମକେନ
ଗ୍ରୀଷ୍ମେଣ ୟୁଷ୍ମାଁଚ୍ଛିଶିରୀକରୋତୁ ॥ ୧୩.୬ ॥

ଅଜସ୍ରମାର୍ଦ୍ରା ଦର୍ୟୟାଽନ୍ତରଙ୍ଗେ
ୟଥା ଭଵୋ ନିମ୍ନଗୟୋତ୍ତମାଙ୍ଗେ ।
ସନ୍ତାପଶାନ୍ତିଂ ଭଵସୁନ୍ଦରୀ ମେ
କରୋତୁ ଶୀତେନ ଵିଲୋକିତେନ ॥ ୧୩.୭ ॥

ପୁଣ୍ୟା ସଦାଽପୀଶ୍ଵର ଏଵ ସକ୍ତା
ପତିଵ୍ରତାସାମ୍ୟମିତା ତଵେକ୍ଷା ।
କୁଲାଚଲାଧୀଶ୍ଵରକନ୍ୟକେ ମେ
ସଂହରମଂହୋଵିତତେର୍ଵିଧତ୍ତାମ୍ ॥ ୧୩.୮ ॥

ଶର୍ଵସ୍ୟ ରାମେ ନିୟମେନ ହୀନା
ଶ୍ୟାମା ତଵେକ୍ଷା ଗଣିକାଙ୍ଗନେଵ ।
ନୀଚେଽପି ମର୍ତ୍ୟେ ନିପତତ୍ୟନର୍ଘା
ବିଭର୍ତି ନା ଷୋଡଶ ୟଃ ସୁଵର୍ଣାନ୍ ॥ ୧୩.୯ ॥

ପଦ୍ମାୟତାକ୍ଷି କ୍ଷିତିଧାରିକନ୍ୟେ
କଟାକ୍ଷନାମା ତଵ କାଲସର୍ପଃ ।
ୟଂ ସନ୍ଦଶତ୍ୟେଷ ଜଗତ୍ସମସ୍ତଂ
ଵିସ୍ମୃତ୍ୟ ଚାହୋ ନ ଦଧାତି ମୋହମ୍ ॥ ୧୩.୧୦ ॥

ଈଶଦ୍ଵିଷା ଶୈଲମହେନ୍ଦ୍ରକନ୍ୟେ
କରୋତି ମୈତ୍ରୀଂ ଵିଷମାୟୁଧେନ ।
ପ୍ରଭାଷତେ ପାତକିନଶ୍ଚ ପକ୍ଷେ
କୁତଃ କଟାକ୍ଷୋ ନ ତଵାମ୍ବ ମୁଗ୍ଧଃ ॥ ୧୩.୧୧ ॥

କୃପାନ୍ଵିତଃ କର୍ଣସମୀପଚାରୀ
ଶ୍ରୀମାନ୍ସଦା ପୁଣ୍ୟଜନାନୁକୂଲଃ ।
ସାମ୍ୟଂ କୁରୁଣାମଧିପସ୍ୟ ଶମ୍ଭୋଃ
ପ୍ରାଣପ୍ରିୟେ ତେ ଭଜତେ କଟାକ୍ଷଃ ॥ ୧୩.୧୨ ॥

କର୍ଣାନ୍ତିକସ୍ଥୋଽପି ନ ଧର୍ମଵୈରୀ
କୃଷ୍ଣୋଽପି ମତାର୍ନକୁଲଂ ନ ପାତି ।
ଶୀତୋଽପି ସନ୍ଦୀପୟତି ସ୍ମରାଗ୍ନିଂ
ହରସ୍ୟ ତେ ଶୈଲସୁତେ କଟାକ୍ଷଃ ॥ ୧୩.୧୩ ॥

ଅୟଂ କଟାକ୍ଷସ୍ତଵ ତୋୟଵାହଃ
କାରୁଣ୍ୟକାଲେ ପରିଜୃମ୍ଭମାଣଃ ।
ଗୃହେଷୁ ଲୀନାନ୍ ସୁଖିନୋ ଵିହାୟ
ନିରାଶ୍ରୟାନ୍ ସିଞ୍ଚତି ଵିଶ୍ଵମାତଃ ॥ ୧୩.୧୪ ॥

କସ୍ୟାପି ଵାଚା ଵପୁଷା ବଲେନ
ସମସ୍ୟ ସର୍ଵୈରପି ୟନ୍ନିଦେଶାଃ ।
ଅମ୍ଭୋଧିଵେଲାସ୍ଵପି ନ ସ୍ଖଲନ୍ତି
ଶମ୍ଭୋଃ ପ୍ରିୟେଽୟଂ ତଵ ଦୃକ୍ପ୍ରସାଦଃ ॥ ୧୩.୧୫ ॥

ଦ୍ଵାରେଷୁ ତେଷାଂ ଵିଚରନ୍ତି ଶୂରାଃ
ସୌଧେଷୁ ସାରଙ୍ଗଦୃଶସ୍ତରୁଣ୍ୟଃ ।
ପ୍ରଗଲ୍ଭଵାଚଃ କଵୟଃ ସଭାସୁ
ଶର୍ଵାଣି ତେ ୟେଷୁ କୃପାକଟାକ୍ଷଃ ॥ ୧୩.୧୬ ॥

ୟତ୍ରାମ୍ବ ତେ କୋଽପି କଟାକ୍ଷଲେଶଃ
ସ ଦୁର୍ଜୟଃ ସଙ୍ଗରସୀମ୍ନି ଶୂରଃ ।
ପୂର୍ଵଂ ଦିଵଂ ପୂରୟତି ଦ୍ଵିଷଦ୍ଭି-
ସ୍ତତୋ ୟଶୋଭିର୍ଭୁଵମିନ୍ଦୁଗୌରୈଃ ॥ ୧୩.୧୭ ॥

ୟଂ ତାରକାକାନ୍ତକଲାପକାନ୍ତେ
ନ ଲୋକସେ କୋଽପି ନ ଲୋକତେ ତମ୍ ।
ୟଂ ଲୋକସେ ତେନ ଵିଲୋକିତୋଽପି
ଶ୍ରିୟଂ ସମୃଦ୍ଧାଂ ସମୁପୈତି ଲୋକଃ ॥ ୧୩.୧୮ ॥

ସୁଧାଂ ହସନ୍ତୀ ମଧୁ ଚାକ୍ଷିପନ୍ତୀ
ୟଶୋ ହରନ୍ତୀ ଵନିତାଧରସ୍ୟ ।
ପରିଷ୍କରୋତ୍ୟସ୍ୟ କଵିତ୍ଵଧାରା
ମୁଖଂ ହରପ୍ରେୟସି ଲୋକସେ ୟମ୍ ॥ ୧୩.୧୯ ॥

ସର୍ଵେନ୍ଦ୍ରିୟାନନ୍ଦକରୀ ପୁରନ୍ଧ୍ରୀ
ଵିଦ୍ୟାଽନଵଦ୍ୟା ଵିପୁଲା ଚ ଲକ୍ଷ୍ମୀଃ ।
ଇୟଂ ତ୍ରିରତ୍ନୀ ପୁରୁଷସ୍ୟ ୟସ୍ୟ
ଦୁର୍ଗେ ତ୍ଵୟା ଦୃଷ୍ଟମିମଂ ତୁ ଵିଦ୍ମଃ ॥ ୧୩.୨୦ ॥

ମୁଧା କ୍ଷିପସ୍ୟଦ୍ରିସୁତେ କଟାକ୍ଷାନ୍
କୈଲାସକାନ୍ତାରମହୀରୁହେଷୁ ।
ଇତଃ କିରେଷତ୍ତଵ ନାସ୍ତି ହାନିଃ
ସିଦ୍ଧ୍ୟତ୍ୟଭୀଷ୍ଟଂ ଚ ସମସ୍ତମସ୍ୟ ॥ ୧୩.୨୧ ॥

ଶୀତାଚଲାଧୀଶକୁମାରି ଶୀତଃ
ସଂରକ୍ଷଣେ ସଂଶ୍ରିତମାନଵାନାମ୍ ।
ଦୁର୍ଧର୍ଷଦୁଷ୍ଟାସୁରମର୍ଦନେଷୁ
ନିତାନ୍ତମୁଷ୍ଣଶ୍ଚ ତଵାଵଲୋକଃ ॥ ୧୩.୨୨ ॥

ରୁଷା ସମେତଂ ଵିଦଧାତି ନାଶଂ
କରୋତି ପୋଷଂ କୃପୟା ସନାଥମ୍ ।
ଅମ୍ବୌଷଧସ୍ୟେଵ ତଵେକ୍ଷିତସ୍ୟ
ୟୋଗସ୍ୟ ଭେଦେନ ଗୁଣସ୍ୟ ଭେଦଃ ॥ ୧୩.୨୩ ॥

ନାଶାୟ ତୁଲ୍ୟୋଦ୍ଧତକାମଲୋଭ-
କ୍ରୋଧତ୍ରିଦୋଷସ୍ୟ ଭଵାମୟସ୍ୟ ।
ଶିଵପ୍ରିୟେ ଵୀକ୍ଷିତଭେଷଜଂ ତେ
କ୍ରୀଣାନି ଭକ୍ତ୍ୟା ଵଦ ଭୋଃ କିୟତ୍ୟା ॥ ୧୩.୨୪ ॥

ଅଭିଷ୍ଟୁତାଂ ଚାରଣସିଦ୍ଧସଙ୍ଘୈ-
ସ୍ତ୍ରିଷ୍ଟୁବ୍ଵିଶେଷା ଅପି ମର୍ତ୍ୟସୂନୋଃ
କୃପାକଟାକ୍ଷୈର୍ଵିନତାନ୍ପୁନାନାଂ
କପର୍ଦିନଃ ସମ୍ମଦୟନ୍ତୁ କାନ୍ତାମ୍ ॥ ୧୩.୨୫ ॥ 325

%c04-q2/eama.krishnan.Dadibhatla/c04-q2।txt medskip

ଚତୁର୍ଦଶଃ ସ୍ତବକଃ
କାଲୀ ଗୌରୀ କୁଣ୍ଡଲିନୀ ଚ (ଉପଗୀତିଵୃତ୍ତମ୍)

କାରଣମଖିଲମତୀନାଂ ଵାରଣମନ୍ତର୍ଲସତ୍ତମସଃ ।
ମନ୍ଦସ୍ମିତଂ ମହେଶ୍ଵରସୁଦୃଶୋ ମେ ଶ୍ରେୟସେ ଭଵତୁ ॥ ୧୪.୧ ॥

ଵିଶ୍ଵତନୁସ୍ତନୁଗାତ୍ରୀ ଵଜ୍ରମୟୀ ପୁଷ୍ପସୁକୁମାରୀ ।
ସର୍ଵସ୍ୟ ଶକ୍ତିରବଲା କାଲୀ ଗୌର୍ୟମ୍ବିକା ଜୟତି ॥ ୧୪.୨ ॥

ତାମାହୁର୍ଜଗଦଂବାଂ ଗୌରୀଂ କେଚିତ୍ ପରେ କାଲୀମ୍ ।
ସା ଗୌରୀ ମହିଲାତନୁରମ୍ବରତନୁରୁଚ୍ୟତେ କାଲୀ ॥ ୧୪.୩ ॥

ପାଚକଶକ୍ତେଃ କାଲ୍ୟାଃ କେଵଲଲିଙ୍ଗେନ ଭିଦ୍ୟତେ କାଲଃ ।
ୟତ୍ପାକତୋ ଗଭୀରାଦ୍ଭୁଵନେ ସର୍ଵେଽପି ପରିଣାମାଃ ॥ ୧୪.୪ ॥

ସର୍ଵଭୁଵନାଶ୍ରୟତ୍ଵାତ୍ କାଲୀ ନାମ୍ନା ଦିଗନ୍ୟେନ ।
ଲୋକେ ତୁ ଵ୍ୟଵହରଣଂ ଵିଦୁଷାଂ ଦିକ୍କାଲୟୋର୍ଭାକ୍ତମ୍ ॥ ୧୪.୫ ॥

ଦିଗଦିତିରଗାଦ୍ୟଖଣ୍ଦା ପରିଣମୟିତ୍ରୀ ସ୍ମୃତା କାଲୀ ।
ଦକ୍ଷସ୍ୟୈକା ଦୁହିତା ସା ଦ୍ଵେ ଗୁଣଭେଦମୁଗ୍ଧଦୃଶାମ୍ ॥ ୧୪.୬ ॥

ଦେହେ ଦେହେ ସେୟଂ କୁଣ୍ଡଲିନୀ ନାମ ଜଗଦମ୍ବା ।
ସା ସ୍ଵପିତି ସଂସୃତିମତାଂ ୟୁଞ୍ଜାନାନାଂ ପ୍ରବୁଦ୍ଧା ସ୍ୟାତ୍ ॥ ୧୪.୭ ॥

ମୂଲାଧାରାଦଗ୍ନିର୍ଜ୍ଵଲତି ଶିରସ୍ତଃ ଶଶୀ ଦ୍ରଵତି ।
କୁଣ୍ଡଲିନୀମୟି ମନ୍ୟେ ଵୀଣାଶୟନାତ୍ପ୍ରବୁଦ୍ଧେୟମ୍ ॥ ୧୪.୮ ॥

ୟଦ୍ଦ୍ରଵତି ତତ୍ର କିଂ ତ୍ଵଂ କିଂ ତତ୍ର ତ୍ଵମସି ୟଜ୍ଜ୍ଵଲତି ।
କିମୁ ତତ୍ରାସି ମହେଶ୍ଵରି ୟଦୁଭୟମେତଦ୍ଵିଜାନାତି ॥ ୧୪.୯ ॥

ଏତାଵଗ୍ନୀଷୋମୌ ଜ୍ଵାଲଭିଶ୍ଚନ୍ଦ୍ରିକାଭିରପି ।
ଆଵୃଣୁତସ୍ତନୁମନୟୋର୍ଵ୍ୟକ୍ତିତ୍ଵଂ ମେ ପଶୁର୍ଭଵତୁ ॥ ୧୪.୧୦ ॥

ଅଗ୍ନିସ୍ତ୍ଵଂ ସୋମସ୍ତ୍ଵଂ ତ୍ଵମଧୋ ଜ୍ଵଲସି ଦ୍ର୍ଵସ୍ୟୂର୍ଧ୍ଵମ୍ ।
ଅମୃତମନୟୋଃ ଫଲଂ ତ୍ଵଂ ତସ୍ୟ ଚ ଭୋକ୍ତ୍ରୀ ଚିଦମ୍ବ ତ୍ଵମ୍ ॥ ୧୪.୧୧ ॥

କିନ୍ନୁ ସୁକୃତଂ ମୟା କୃତମଖିଲେଶ୍ଵରି କିଂ ତପସ୍ତପ୍ତମ୍ ।
କ୍ରୀଡୟସି ମାଂ ପ୍ରତିକ୍ଷଣମାନନ୍ଦସୁଧାନିଧାଵନ୍ତଃ ॥ ୧୪.୧୨ ॥

କ୍ଷାନ୍ତଂ କିଂ ମମ ଦୁରିତଂ ଶାନ୍ତଂ କିଂ ଦେଵି ତେ ସ୍ଵାନ୍ତମ୍ ।
ଅନୁଗୃହ୍ଣାସି ଵିଚିତ୍ରଂ ମାମପ୍ୟପରାଧିନାଂ ପ୍ରଥମମ୍ ॥ ୧୪.୧୩ ॥

କାଲେ କାଲେ ସନ୍ଧ୍ୟାରୂପା ନୋପାସିତା ଭଵତୀ ।
ଵିଚ୍ଛିନ୍ନଃ ସ୍ମାର୍ତାଗ୍ନିସ୍ତ୍ରେତା କୁତ ଏଵ ଵହ୍ନୀନାମ୍ ॥ ୧୪.୧୪ ॥

ଦାତୁଂ ନାର୍ଜିତମନ୍ନଂ ବହୁ ଦେଵେଭ୍ୟଶ୍ଚ ଭୂତେଭ୍ୟଃ ।
ୟତ୍କିଞ୍ଚିଦାର୍ଜିତଂ ଵା କଲତ୍ରପୁତ୍ରାନ୍ଵିତୋଽଶ୍ନାମି ॥ ୧୪.୧୫ ॥

କଶ୍ଚିଦପି ପାପହାରୀ ନ ପୁରଶ୍ଚରିତଶ୍ଚ ତେ ମନ୍ତ୍ରଃ ।
କଂ ଗୁଣମଭିଲକ୍ଷ୍ୟ ମମ ପ୍ରବୁଦ୍ଧ୍ୟସେଽନ୍ତର୍ଜଗନ୍ମାତଃ ॥ ୧୪.୧୬ ॥

ତଵ ମୟି ପୃଥକ୍ତନୂଜପ୍ରେମା ଚେତ୍ପକ୍ଷପାତୋଽୟମ୍ ।
ଅଥଵା ସତାଂ ନିସର୍ଗଃ ସୋଽୟଂ ତ୍ଵୟି ଚାଂବ ସମ୍ଭାଵ୍ୟଃ ॥ ୧୪.୧୭ ॥

ଲକ୍ଷ୍ୟଂ ଵିନୈଵ ମନ୍ତ୍ରଃ କିଂ ସିଦ୍ଧ୍ୟତି କୋଟିଶୋଽପ୍ୟୁକ୍ତଃ ।
ଦଧ୍ମସ୍ତଦ୍ୟଦି ଲକ୍ଷ୍ୟଂ ତଵ ରୂପଂ ଗଲତି ହା ମନ୍ତ୍ରଃ ॥ ୧୪.୧୮ ॥

ସଙ୍କଲ୍ପାନାଂ ଵାଚାମନୁଭୂତୀନାଂ ଚ ୟନ୍ମୂଲମ୍ ।
ୟତ୍ର ପ୍ରାଣୋ ବଦ୍ଧସ୍ତଲ୍ଲକ୍ଷ୍ୟଂ ଦେଵି ତେ ରୂପମ୍ ॥ ୧୪.୧୯ ॥ ॥ ୩୪୪।

ନୈସର୍ଗିକସ୍ଵଵୃତ୍ତେରହଙ୍କୃତେର୍ମୂଲମନ୍ଵିଷ୍ୟ ।
ତ୍ଵାଂ କିଲ ସାକ୍ଷାତ୍କୁରୁତେ ରମଣମହର୍ଷେରିୟଂ ଦୃଷ୍ଟିଃ ॥ ୧୪.୨୦ ॥

ମନ୍ୟେ ପର୍ଵତକନ୍ୟେ ମମ ସେୟମହଙ୍କୃତିର୍ମହତୀ ।
ଅଵତରତା ଵର୍ଷଗଣୈରପି ତନ୍ମୂଲଂ ନ ଲବ୍ଧମହୋ ॥ ୧୪.୨୧ ॥

ଏଷ ପ୍ରୌଢୋ ଭଗଵତି ବହୁଲଂ ଗର୍ଜତ୍ୟହଙ୍କାରଃ ।
ଏତସ୍ମିନ୍ନୟି କାଲେ ଭଵତୀ ଚାବୋଧି କୁଣ୍ଡଲିନୀ ॥ ୧୪.୨୨ ॥

ତଵ ପଶ୍ଚାତ୍ସମ୍ଭୂତିଂ ଜାନାତି ନ ସୋଽୟମଦ୍ୟାପି ।
ପ୍ରାଗିଵ ଗର୍ଜତି ଧୀରଂ ବିଭେତି ମୃତ୍ୟୋର୍ନ ନେଦିଷ୍ଠାତ୍ ॥ ୧୪.୨୩ ॥

ଅତିପୁଷ୍ଟମହଙ୍କାରଂ ପଶୁମେତଂ ତୁଭ୍ୟମର୍ପୟତେ ।
ପ୍ରମଥପତିପ୍ରାଣେଶ୍ଵରି ଗଣପତିରେକାନ୍ତଭକ୍ତୋଽୟମ୍ ॥ ୧୪.୨୪ ॥

ଉପଗୀତୟୋ ଗଣପତେରୁପତିଷ୍ଠନ୍ତାମିମାଃ ପ୍ରୀତ୍ୟା ।
ଉତ୍ସଵସହସ୍ରଲୋଲାମୁକାରଵାଚ୍ୟସ୍ୟ ଗୃହନାଥାମ୍ ॥ ୧୪.୨୫ ॥ 350

%c04-q3/Sarada.Susarla/uma-c04-q3-itrans.txt medskip

ପଞ୍ଚଦଶଃ ସ୍ତବକଃ
ଶକ୍ତେଃ ସ୍ଵାଗତମ୍ (ସ୍ଵାଗତାଵୃତ୍ତମ୍)

ଆପଦାମପହରନ୍ତୁ ତତିଂ ନଃ
ସମ୍ପଦାମପି ଦିଶନ୍ତୁ ସମୃଦ୍ଧିମ୍ ।
ଦନ୍ତକୁନ୍ଦରୁଚିଦତ୍ତବଲାନି
ଵ୍ୟୋମକେଶସୁଦୃଶୋ ହସିତାନି ॥ ୧୫.୧ ॥

ଅଲ୍ପମପ୍ୟଧିକଶକ୍ତିସମୃଦ୍ଧଂ
ମନ୍ଦମପ୍ୟଧିକସୂକ୍ଷ୍ମଵିସାରମ୍ ।
ସୁସ୍ମିତଂ ସ୍ମରଵିରୋଧିରମଣ୍ୟାଃ
କଲ୍ପତାଂ ମମ କୁଲସ୍ୟ ଶୁଭାୟ ॥ ୧୫.୨ ॥

ପୁଷ୍କରାଦ୍ରଵିମତୋ ଭୁଵମେତାଂ
ଭୂମିତଶ୍ଶଶଧରଂ କ୍ରମମାଣା ।
ନୈଵ ମୁଞ୍ଚତି ପଦଂ ବତ ପୂର୍ଵଂ
ନୋତ୍ତରଂ ଵ୍ରଜତି ନେଶପୁରନ୍ଧ୍ରୀ ॥ ୧୫.୩ ॥

ଭୂଷଣେଷ୍ଵିଵ ସଵିତ୍ରି ସୁଵର୍ଣଂ
ମୃତ୍ତିକାମିଵ ଘଟେଷ୍ଵଖିଲେଷୁ ।
ଵିଶ୍ଵଵସ୍ତୁଷୁ ନିରସ୍ତଵିଶେଷାଂ
ଦେଵି ପଶ୍ୟତି ସତୀଂ ଵିବୁଧସ୍ତ୍ଵାମ୍ ॥ ୧୫.୪ ॥

କିଟ୍ଟଭୂତମଖିଲେଶ୍ଵରଜାୟେ
ଦୃଶ୍ୟଜାତମଖିଲଂ ନିଜପାକେ ।
ପ୍ରାଣବୁଦ୍ଧିମନସାମିହ ଵର୍ଗଃ
ସାରଭୂତ ଇତି ସୂରିଜନୋକ୍ତିଃ ॥ ୧୫.୫ ॥

ସାରମୀଶ୍ଵରି ତିଲେଷ୍ଵିଵ ତୈଲଂ
ଵିଗ୍ରହେଷୁ ନିଖିଲେଷୁ ନିଗୂଢମ୍ ।
ୟେ ଧିୟା ମଥନତୋ ଵିଦୁରେକଂ
ତେ ଭଵନ୍ତି ଵିବୁଧାସ୍ତ୍ଵୟି ଲୀନାଃ ॥ ୧୫.୬ ॥

ଆୟସଂ ତ୍ରିଭୁଵନେଶ୍ଵରି ପିଣ୍ଡଂ
ଵହ୍ନିନେଵ ତପସା ତନୁପିଣ୍ଡମ୍ ।
ୟସ୍ୟ ଚିଜ୍ଜ୍ଵଲନଜାଲମୟଂ ସ୍ୟାତ୍
ତପ୍ତମମ୍ବ ସ ତଵାଲୟଭୂତଃ ॥ ୧୫.୭ ॥

ୟୋଽରଣେର୍ମଥନତୋଽତିପଵିତ୍ରଂ
ଵୀତିହୋତ୍ରମିଵ ଵୀତକଲଙ୍କଃ ।
ପ୍ରାଣମୁଜ୍ଜ୍ଵଲୟତି ସ୍ଵଶରୀରାତ୍
ତ୍ଵାମସାଵଭୟଦେଽର୍ହତି ୟଷ୍ଟୁମ୍ ॥ ୧୫.୮ ॥

ପ୍ରାଣତା ଶ୍ଵସିତମେଵ ଵିଚାର୍ୟଂ
କୁର୍ଵତା କରଣମେଵ ନିଭାଲ୍ୟମ୍ ।
ଗଚ୍ଛତା ଗମନମେଵ ଵିଶୋଧ୍ୟଂ
ତତ୍ତନୌ ମଥନମାଗମବୋଧ୍ୟମ୍ ॥ ୧୫.୯ ॥

ୟୋ ରସଂ ପିବତି ମୂର୍ଧସରୋଜାତ୍
ସୋମପୋଽୟମନଘଃ ପ୍ରୟତାତ୍ମା ।
ଅଗ୍ନିହୋତ୍ରମଖିଲେଶ୍ଵରି ନିତ୍ୟଂ
ମୂଲକୁଣ୍ଡଦହନସ୍ଥିତିରସ୍ୟ ॥ ୧୫.୧୦ ॥

ଚିନ୍ମୟୀ ପିବସି ସୋମମିମଂ କିଂ
ସୋମ ଏଵ କିମସାଵସି ମାତଃ ।
ପୀୟସେ ପିବସି ଚ ସ୍ଵୟମେକା
ପେୟପାତୃୟୁଗଲଂ କିମୁ ଭୂତ୍ଵା ॥ ୧୫.୧୧ ॥

ତୈଜସଂ କନକମଗ୍ନିଵିତପ୍ତଂ
ତେଜ ଏଵ କନକାଙ୍ଗି ୟଥା ସ୍ୟାତ୍ ।
ମୋଦରୂପକଲୟା ତଵ ତପ୍ତଂ
ତନ୍ମୟଂ ଭଵତି ମୋଦଜପିଣ୍ଡମ୍ ॥ ୧୫.୧୨ ॥

କାଽପି ମୋଦଲହରୀ ତଵ ଵୀଚିର୍-
ନିର୍ଗତା ଦଶଶତାରସୁଧାବ୍ଧେଃ ।
ପୂରୟତ୍ୟଖିଲମମ୍ବ ଶରୀରଂ
ନେହ ଵେଦ୍ମି ପରମେ ଜଡଭାଗମ୍ ॥ ୧୫.୧୩ ॥

ସେୟମୁତ୍ତମତମା ନିପତନ୍ତୀ
ଶୀତଲାଦ୍ଦଶଶତାରପୟୋଦାତ୍ ।
ପ୍ରେରିତାଦଖିଲରାଜ୍ଞି ଭଵତ୍ୟା
ବୁଦ୍ଧିସସ୍ୟମଵତାଦ୍ରସଵୃଷ୍ଟିଃ ॥ ୧୫.୧୪ ॥

ଦୁଗ୍ଧସିନ୍ଧୁମଥନାଦମୃତଂ ଵା
ଶବ୍ଦସିନ୍ଧୁମଥନାତ୍ପ୍ରଣଵୋ ଵା ।
ଲଭ୍ୟତେ ସୁକୃତିଭିସ୍ତଵ ଵୀଚିର୍-
ମୂର୍ଧକଞ୍ଜମଥନାଦ୍ରସ ଏଷଃ ॥ ୧୫.୧୫ ॥

ଅସ୍ଥିଷୁ ପ୍ରଵହତି ପ୍ରତିଵେଗଂ
ମଜ୍ଜସାରମମୃତଂ ଵିଦଧାନା ।
ବିଭ୍ରତୀ ମଦମନୁଷ୍ଣମଦୋଷଂ
ମୂର୍ଧକଞ୍ଜନିଲୟେ ତଵ ଧାରା ॥ ୧୫.୧୬ ॥

ତୈତ୍ତିରୀୟକଥିତୋ ରସଲାଭଃ
ସୋଽୟମେଵ ସକଲାଗମଵର୍ଣ୍ୟେ
ଏତଦେଵ ଶଶିମଣ୍ଡଲନାଥେ
ତନ୍ତ୍ରଭାଷିତପରାମୃତପାନମ୍ ॥ ୧୫.୧୭ ॥

ମୂର୍ଧସୋମମଜରାମରରୂପେ
ୟୁକ୍ତଵୀକ୍ଷଣକରେଣ ନିପୀଡ୍ୟ ।
ଶମ୍ଭୁସୁନ୍ଦରି ସୁନୋମି ଧିନୋମି
ତ୍ଵାଂ ପ୍ରଦୀପ୍ତକୁଲକୁଣ୍ଡନିଶାନ୍ତାମ୍ ॥ ୧୫.୧୮ ॥

ଦୃଷ୍ଟିରେଵ ରଵିଦୀଧିତିରୁଗ୍ରା
ଶୀର୍ଷକଞ୍ଜଶଶିନଂ ପ୍ରଵିଶନ୍ତୀ ।
ଶୀତଲାମୃତମୟୀ ଖଲୁ ଭୂତ୍ଵା
ୟୋଗିନୋ ଦ୍ରଵତି ମୋଦକଲା ତେ ॥ ୧୫.୧୯ ॥

ମୂର୍ଧନି ଦ୍ରଵସି ୟୋଗୟୁତାନାଂ
ଚକ୍ଷୁଷି ଜ୍ଵଲସି ଶଙ୍କରଭାମେ
ତିଷ୍ଠସି ସ୍ଥିରପଦା କୁଲକୁଣ୍ଡେ
ବାହ୍ୟତଃ ସ୍ଖଲସି ନୈଵ କଦାଽପି ॥ ୧୫.୨୦ ॥

ସା ୟଦି ଦ୍ରଵତି ମୋଦକଲା ସ୍ୟାତ୍
ସା ୟଦି ଜ୍ଵଲତି ଚିତ୍କଲିକା ସ୍ୟାତ୍ ।
ସା ପରା ସ୍ଥିରପଦା ୟଦି ତିଷ୍ଠ-
ତ୍ୟକ୍ଷରା ଭଵତି କାଚନ ସତ୍ତା ॥ ୧୫.୨୧ ॥

ପଶ୍ୟତା ନୟନମଣ୍ଡଲଵୃତ୍ତିଂ
ଗୃହ୍ୟସେ ତ୍ଵମଚଲାଧିପକନ୍ୟେ ।
ଜାନତା ଦଶଶତାରଵିଲାସଂ
ସ୍ପୃଶ୍ୟସେ ଵିଦିତମମ୍ବ ରହସ୍ୟମ୍ ॥ ୧୫.୨୨ ॥

ଵ୍ୟାପ୍ତଶକ୍ତ୍ୟସୁବଲେନ ଲସନ୍ତୀ
ଭାନୁବିମ୍ବନୟନେନ ତପନ୍ତୀ ।
ଚନ୍ଦ୍ରବିମ୍ବମନସା ଵିହରନ୍ତୀ
ସା ପୁନର୍ଜୟତି ମୂର୍ଧ୍ନି ଵସନ୍ତୀ ॥ ୧୫.୨୩ ॥

ସ୍ଵାଗତଂ ସକଲଲୋକନୁତାୟୈ
ସ୍ଵାଗତଂ ଭୁଵନରାଜମହିଷ୍ୟୈ ।
ସ୍ଵାଗତଂ ମୟି ଭୃଶଂ ସଦୟାୟୈ
ସ୍ଵାଗତଂ ଦଶଶତାରମିତାୟୈ ॥ ୧୫.୨୪ ॥

ସତ୍କଵିକ୍ଷିତିଭୁଜୋ ଲଲିତାଭିଃ
ସ୍ଵାଗତାଭିରନଘାଭିରିମାଭିଃ ।
ସ୍ଵାଗତଂ ଭଣିତମସ୍ତୁ ଭଵାନ୍ୟୈ
ଖେଲନାୟ ଶିର ଏତଦିତାୟୈ ॥ ୧୫.୨୫ ॥ 375

%c04-q4/Kamesvararao.Tata/c04-q4।txt medskip

ଷୋଡଶଃ ସ୍ତବକଃ
ଅଧ୍ୟାତ୍ମଂ ଶକ୍ତିଵୈଭଵମ୍ (କୁମାରଲଲିତାଵୃତ୍ତମ୍)

ମହୋଵିହତମୋହଂ ମହେଶମହିଲାୟାଃ ।
ସ୍ମିତଂ ଵିତନୁତାନ୍ମେ ଗୃହେଷୁ ମହମଗ୍ର୍ୟମ୍ ॥ ୧୬.୧ ॥

ଇୟଦ୍ବହୁଲଗୋଲଂ ଜଗଲ୍ଲଘୁ ଦଧାନା ।
ପିତାମହମୁଖୈରପ୍ୟଖଣ୍ଡିତଵିଧାନା ॥ ୧୬.୨ ॥

ଅଦୁଷ୍ଟଚରିତେଭ୍ୟଃ ଶୁଭାନ୍ୟଭିଦଧାନା ।
କୁଲାନି ମଲିନାନାଂ ହତାନି ଵିଦଧାନା ॥ ୧୬.୩ ॥

ଦୁକୂଲମରୁଣାଂଶୁପ୍ରଭଂ ପରିଦଧାନା
ହରସ୍ୟ ରଜତାଦ୍ରିକ୍ଷିତୀଶିତୁରଧୀନା ॥ ୧୬.୪ ॥

ମୁନୀନ୍ଦ୍ରକୃତତନ୍ତ୍ରପ୍ରସିଦ୍ଧବହୁଦାନା
ଉମା ବଲମଲଂ ନସ୍ତନୋତ୍ଵତୁଲମାନା ॥ ୧୬.୫ ॥

ନିରସ୍ତଵିଷୟାଂ ୟଦ୍ ଦଧାତି ମତିକୀଲାମ୍ ।
ସମସ୍ତଜଗଦୀଶେ ଧୃତିସ୍ତଵ ମତେୟମ୍ ॥ ୧୬.୬ ॥

ଶ୍ରୁତା ପ୍ରଵଣଚିତ୍ତଂ ସ୍ମୃତା ନରମପାପମ୍ ।
ଧୃତା ହୃଦି ଵିଧତ୍ସେ ଗତସ୍ଵପରଭାଵମ୍ ॥ ୧୬.୭ ॥

ଅହଂମତିତଟିନ୍ୟାଃ ସତାମଵନିମୂଲମ୍ ।
ତ୍ଵମେଵ କିଲ ସେୟଂ ମହର୍ଷିରମଣୋକ୍ତିଃ ॥ ୧୬.୮ ॥

ଅହଂମତିଲତାୟାସ୍ତ୍ଵୟୀଶଵଧୁ କନ୍ଦେ ।
ସ୍ଥିତୋଽମ୍ବ ଭୁଵନସ୍ୟ ପ୍ରଵିନ୍ଦତି ରହସ୍ୟମ୍ ॥ ୧୬.୯ ॥

ୟଦେତଦଖିଲାମ୍ବ ପ୍ରସିଦ୍ଧମିଵ ଦୃଶ୍ୟମ୍ ।
ତଵୈଵ କିଲ ଜାଲଂ ଗତୋ ଭଣତି ମୂଲମ୍ ॥ ୧୬.୧୦ ॥

ପ୍ରପଶ୍ୟସି ପରାଚୀ ଜଗଦ୍ଵିଵିଧଭେଦମ୍ ।
ସ୍ଵତଃ କିମପି ନାନ୍ୟତ୍ପ୍ରତୀଚି ପୁରତସ୍ତେ ॥ ୧୬.୧୧ ॥

ସ୍ତୁତା ଭଵସି ଶଶ୍ଵତ୍ ସ୍ମୃତା ଚ ଭଜନେ ତ୍ଵମ୍ ।
ଧୃତା ଭଵସି ୟୋଗେ ତତା ଭଵସି ବୋଧେ ॥ ୧୬.୧୨ ॥

ସ୍ତୁତା ଦିଶସି କାମଂ ସ୍ମୃତା ହରସି ପାପମ୍ ।
ଧୃତାଽସ୍ୟଧିକଶକ୍ତ୍ୟୈ ତତା ଭଵସି ମୁକ୍ତ୍ୟୈ ॥ ୧୬.୧୩ ॥

ଵିଶୁଧ୍ୟତି ୟତାଶୀ ପ୍ରମାଦ୍ୟତି ନ ଶୁଦ୍ଧଃ ।
ପ୍ରମାଦରହିତସ୍ୟ ସ୍ଫୁଟେ ଲସସି କଞ୍ଜେ ॥ ୧୬.୧୪ ॥

ସ୍ଫୁଟଂ ୟଦି ସରୋଜଂ ନଟୀଵ ପଟୁ ନାଟ୍ୟମ୍ ।
କରୋଷି ୟତବୁଦ୍ଧେର୍ଜଗଜ୍ଜନନି ଶୀର୍ଷେ ॥ ୧୬.୧୫ ॥

ଶିରୋଗତମିଦଂ ନଃ ପ୍ରଫୁଲ୍ଲମୟି ପଦ୍ମମ୍ ।
ଅନଲ୍ପମକରନ୍ଦଂ ତ୍ଵମମ୍ବ ଭଵ ଭୃଙ୍ଗୀ ॥ ୧୬.୧୬ ॥

ସରୋଜମତୁଦନ୍ତୀ ପିବାମ୍ବ ମକରନ୍ଦମ୍ ।
ମହାମଧୁକରି ତ୍ଵଂ ଭଜେର୍ମଦମମନ୍ଦମ୍ ॥ ୧୬.୧୭ ॥

ଅମଙ୍ଗଲମିତଃ ପ୍ରାଙ୍ ମୟେଶଵଧୁ ଭୁକ୍ତମ୍ ।
ଇତଃ ପରମମେୟେ ସୁଖାନ୍ୟନୁଭଵ ତ୍ଵମ୍ ॥ ୧୬.୧୮ ॥

ଅହଙ୍କୃତିଵଶାନ୍ମେ ଚିଦୀଶ୍ଵରି ପୁରାଽଭୂତ୍ ।
ତଵାଭଵଦିଦାନୀଂ ମମାସ୍ତି ନ ଵିଭୁତ୍ଵମ୍ ॥ ୧୬.୧୯ ॥

ୟଦାଽଭଵଦିୟଂ ମେ ତଦାଽନ୍ଵଭଵଦାର୍ତିମ୍ ।
ତଵେଶ୍ଵରି ଭଵନ୍ତୀ ଭୁନକ୍ତୁ ଶମିଦାନୀମ୍ ॥ ୧୬.୨୦ ॥

କରୋତ୍ଵିୟମହନ୍ତା ଵିଵାଦମଧୁନାଽପି ।
ତଥାଽପି ପୁରତସ୍ତେ ମହେଶ୍ଵରି ଵିଵୀର୍ୟା ॥ ୧୬.୨୧ ॥

ଇୟଂ ଚ ତଵ ବୁଦ୍ଧେର୍ୟତୋ ଭଵତି ଵୃତ୍ତିଃ
ଇମାମପି କୁରୁ ସ୍ଵାଂ କ୍ଷମାଵତି ଵିରୋଷା ॥ ୧୬.୨୨ ॥

ସୁଧାବ୍ଧିରିହ ମାତସ୍ତରଙ୍ଗଶତମାଲୀ ।
ଚିଦଭ୍ରପୁରମତ୍ର ପ୍ରଭାପଦମଦଭ୍ରମ୍ ॥ ୧୬.୨୩ ॥

କୁରୁ ତ୍ଵମିଦମେକଂ ନିଜାଲୟଶତେଷୁ ।
ସଵିତ୍ରି ଵିହରାସ୍ମିନ୍ ୟଥେଷ୍ଟମୟି ଦେହେ ॥ ୧୬.୨୪ ॥

କୁମାରଲଲିତାନାଂ କୃତିର୍ଗଣପତୀୟା ।
କରୋତୁ ମୁଦମେଷା କପର୍ଦିଦୟିତାୟାଃ ॥ ୧୬.୨୫ ॥ 400

॥ ସମାପ୍ତଂ ଚ ଚତୁର୍ଥଂ ଶତକମ୍ ॥

%c05-q1/Mohana.Rao/us-ch5-q1।TXT medskip

ପଞ୍ଚମଂ ଶତକମ୍
ସପ୍ତଦଶଃ ସ୍ତବକଃ
ମଦକରୀଶକ୍ତିଃ (ଚମ୍ପକମାଲାଵୃତ୍ତମ୍)

ପାପଵିଧୂତୌ ନିର୍ମଲଗଙ୍ଗା ତାପନିରାସେ ଚନ୍ଦ୍ରମରୀଚିଃ ।
ଭର୍ଗପୁରନ୍ଧ୍ରୀହାସକଲା ମେ ଭଦ୍ରମମିଶ୍ରଂ କାଽପି କରୋତୁ ॥ ୧୭.୧ ॥

ଶିଷ୍ଟକୁଲାନାଂ ସମ୍ମଦୟିତ୍ରୀ ଦୁଷ୍ଟଜନାନାଂ ସଂଶମୟିତ୍ରୀ ।
କଷ୍ଟମପାରଂ ପାଦଜୁଷୋ ମେ ଵିଷ୍ଟପରାଜ୍ଞୀ ସା ଵିଧୁନୋତୁ ॥ ୧୭.୨ ॥

ନୂତନଭାସ୍ଵଦ୍ବିମ୍ବନିଭାଙ୍ଘ୍ରିଂ ଶୀତଲରଶ୍ମିଦ୍ଵେଷିମୁଖାବ୍ଜାମ୍ ।
ଖ୍ୟାତଵିଭୂତିଂ ପୁଷ୍ପଶରାରେଃ ପୂତଚରିତ୍ରାଂ ୟୋଷିତମୀଡେ ॥ ୧୭.୩ ॥

ଉଜ୍ଜ୍ଵଲତାରେ ଵ୍ୟୋମ୍ନି ଲସନ୍ତୀ ସାରସବନ୍ଧୌ ଭାତି ତପନ୍ତୀ ।
ଶୀତଲଭାସା ଚିନ୍ତନକର୍ତ୍ରୀ ପାତୁ କୁଲଂ ମେ ଵିଷ୍ଟପଭର୍ତ୍ରୀ ॥ ୧୭.୪ ॥

ପ୍ରାଣମନୋଵାଗ୍ଵ୍ୟସ୍ତଵିଭୂତିର୍ଲୋକଵିଧାତୁଃ କାଚନ ଭୂତିଃ ।
ପୁଷ୍କରପୃଥ୍ଵୀପାଵକରୂପା ଶୁଷ୍କମଘଂ ନଃ ସା ଵିଦଧାତୁ ॥ ୧୭.୫ ॥

ଇଷ୍ଟଫଲାନାମମ୍ବ ସମୃଦ୍ଧ୍ୟୈ କଷ୍ଟଫଲାନାଂ ତତ୍କ୍ଷଣଧୂତ୍ୟୈ ।
ଚେଷ୍ଟିତଲେଶୋଦ୍ଦୀପିତଶକ୍ତିଂ ଵିଷ୍ଟପଭର୍ତ୍ରି ତ୍ଵାମହମୀଡେ ॥ ୧୭.୬ ॥

ଭୂମିରୁହାଗ୍ରସ୍ଥାପିତଭଣ୍ଡାଦ୍ୟୋ ମଧୁ ପାୟଂ ପାୟମଜସ୍ରମ୍ ।
ଵିସ୍ମୃତଵିଶ୍ଵୋ ନନ୍ଦତି ମାତସ୍ତତ୍ର କିଲ ତ୍ଵଂ ଧାମ ଦଧାସି ॥ ୧୭.୭ ॥

କୋଽପି ସହସ୍ରୈରେଷ ମୁଖାନାଂ ଶେଷ ଇତୀଡ୍ୟଃ ପନ୍ନଗରାଜଃ ।
ଉଦ୍ଗିରତୀଦଂ ୟଦ୍ଵଦନେଭ୍ୟୋ ଦେଵି ତନୌ ମେ ତଦ୍ଵତ ପାସି ॥ ୧୭.୮ ॥

ସାକମମେୟେ ଦେଵି ଭଵତ୍ୟା ପ୍ରାତୁମହନ୍ତା ୟାଵଦୁଦାସ୍ୟା ।
ତାଵଦିୟଂ ତାଂ ମୂର୍ଛୟତୀଶେ ପନ୍ନଗରାଜୋଦ୍ଗାରଜଧାରା ॥ ୧୭.୯ ॥

ଶାମ୍ୟତିଚିନ୍ତାଜୀଵିତମସ୍ୟାମିନ୍ଦ୍ରିୟସତ୍ତାଽପ୍ୟସ୍ତମୁପୈତି ।
ୟାତି ନିରୁଦ୍ଧା ହା ଗଲଦେଶେ ସଂଶୟମେଷା ମାତରହନ୍ତା ॥ ୧୭.୧୦ ॥

ଗୌରି ମହେଶପ୍ରାଣସଖୀ ମାଂ ପାହି ଵିପନ୍ନାଂ ମାତରହନ୍ତାମ୍ ।
ସା ୟଦି ଜୀଵେଦୀଶ୍ଵରି ତୁଭ୍ୟଂ ଦାସଜନସ୍ତାମର୍ପୟତେଽୟମ୍ ॥ ୧୭.୧୧ ॥

ତ୍ଵତ୍ସ୍ମୃତିଵୀର୍ୟାଚ୍ଛାନ୍ତିସମୃଦ୍ଧାଂ ମାତରହନ୍ତାଂ ଶୁଦ୍ଧତମାଂ ମେ ।
ଆତ୍ମଭୁଜିଷ୍ୟାଂ କର୍ତୁମିଦାନୀଂ ଶାଂତଧିୟସ୍ତେ କୋଽସ୍ତି ଵିକଲ୍ପଃ ॥ ୧୭.୧୨ ॥

ମନ୍ଦରଧାରୀ ନାମୃତହେତୁର୍ଵାସୁକିରଜ୍ଜୁର୍ନାମୃତହେତୁଃ ।
ମନ୍ଥନହେତୁସ୍ସାଽମୃତହେତୁଃ ସର୍ଵବଲାତ୍ମା ଶର୍ଵପୁରନ୍ଧ୍ରୀ ॥ ୧୭.୧୩ ॥

ପ୍ରାଣିଶରୀରଂ ମନ୍ଦରଶୈଲୋ ମୂଲସରୋଜଂ କଚ୍ଛପରାଜଃ ।
ପୂର୍ଣମନନ୍ତଂ କ୍ଷୀରସମୁଦ୍ରଃ ପୃଷ୍ଠଗଵୀଣା ଵାସୁକିରଜ୍ଜୁଃ ॥ ୧୭.୧୪ ॥

ଦକ୍ଷିଣନାଡୀ ନିର୍ଜରସେନା ଵାମଗନାଡୀ ଦାନଵସେନା ।
ଶକ୍ତିଵିଲାସୋ ମନ୍ଥନକୃତ୍ୟଂ ଶୀର୍ଷଜଧାରା କାଽପି ସୁଧୋକ୍ତା ॥ ୧୭.୧୫ ॥

କଣ୍ଠନିରୁଦ୍ଧେ ଭୂରିଵିଷାଗ୍ନୌ ତୈଜସଲିଙ୍ଗାଵାସିହରେଣ ।
ତ୍ଵଦ୍ବଲଜାତଂ ସ୍ଵାଦ୍ଵମୃତ୍ତଂ କୋ ଦେଵି ନିପୀୟ ପ୍ରେତ ଇହ ସ୍ୟାତ୍ ॥ ୧୭.୧୬ ॥

ୟେନ ଵିଭୁସ୍ତେ ମାଦ୍ୟତି ଶର୍ଵୋ ୟତ୍ର ଶିଵେ ତ୍ଵଂ କ୍ରୀଡସି ହୃଷ୍ଟା ।
ସମ୍ମଦମୂଲଂ ତଂ ମଦମାଦ୍ୟେ ଵର୍ଧୟ ପୁତ୍ରେଽନୁଗ୍ରହପାତ୍ରେ ॥ ୧୭.୧୭ ॥

ୟୋ ମଦମୀଦୃଙ୍ମାର୍ଗମୁପେକ୍ଷ୍ୟ ସ୍ଵର୍ଵିଭୁପୂଜ୍ୟେ ଗର୍ଵସମେତଃ ।
ଆହରତି ଶ୍ରୀବାହ୍ୟସମୃଦ୍ଧ୍ୟା ନା ସୁରୟା ଵା ସୋଽସୁର ଉକ୍ତଃ ॥ ୧୭.୧୮ ॥

ତାମ୍ୟତି ତୀଵ୍ରାଫେନନିଷେଵୀ କ୍ଲାମ୍ୟତି ସଂଵିତ୍ପତ୍ରନିଷେଵୀ ।
ଭ୍ରାମ୍ୟତି ହାଲାଭାଣ୍ଡନିଷେଵୀ ଶାମ୍ୟତି ଶୀର୍ଷଦ୍ରାଵନିଷେଵୀ ॥ ୧୭.୧୯ ॥

ଅସ୍ତୁ ଵିରେକେ ପଥ୍ୟମଫେନଂ ପତ୍ରମଜୀର୍ଣେଷ୍ଵସ୍ତୁ ନିଷେଵ୍ୟମ୍ ।
ଅସ୍ତୁ ହିତଂ ତଦ୍ୟକ୍ଷ୍ମଣି ମଦ୍ୟଂ ସଂସୃତିହାରୀ ଦେଵି ରସସ୍ତେ ॥ ୧୭.୨୦ ॥

ନୈଵ ମହାନ୍ତସ୍ସତ୍ତ୍ଵସମୃଦ୍ଧାଃ ସର୍ଵମଦେଷ୍ଵପ୍ୟମ୍ବ ଚଲନ୍ତୁ ।
ଅଲ୍ପଜନାନାଂ ମାଦକଵସ୍ତୁପ୍ରାଶନମୀଶେ ନାଶନମୁକ୍ତମ୍ ॥ ୧୭.୪୨୧ ॥

କେଽପି ୟଜନ୍ତେ ୟନ୍ମଧୁମାଂସୈସ୍ତ୍ଵାଂ ତ୍ରିପୁରାରେର୍ଜୀଵିତନାଥେ ।
ଅତ୍ର ନ ୟାଗୋ ଦୂଷଣଭାଗୀ ଦ୍ରଵ୍ୟସସଙ୍ଗୋ ଦୁଷ୍ୟତି ୟଷ୍ଟା ॥ ୧୭.୨୨ ॥

ଦକ୍ଷିଣମାର୍ଗେ ସିଦ୍ଧ୍ୟତି ଭକ୍ତଃ ସଵ୍ୟସରଣ୍ୟାଂ ସିଦ୍ଧ୍ୟତି ଵୀରଃ ।
ନେଶ୍ଵରି ସଵ୍ୟେ ନାପ୍ୟପସଵ୍ୟେ ସିଦ୍ଧ୍ୟତି ଦିଵ୍ୟେ ତ୍ଵଧ୍ଵନି ମୌନୀ ॥ ୧୭.୨୩ ॥

ନାର୍ଚନଭାରୋ ନାପି ଜପୋଽସ୍ୟାଂ ଦିଵ୍ୟସରଣ୍ୟାଂ ଭଵ୍ୟତମାୟାମ୍ ।
କେଵଲମମ୍ବାପାଦସରୋଜଂ ନିଶ୍ଚଲମତ୍ୟା ମୃଗ୍ୟମଜସ୍ରମ୍ ॥ ୧୭.୨୪ ॥

କାଚିଦମୂଲ୍ୟା ଚଂପକମାଲା ଵୃତ୍ତନିବଦ୍ଧା ମଞ୍ଜୁଲମାଲା ।
ଅସ୍ତୁ ଗଣେଶସ୍ୟେଶ୍ଵରକାନ୍ତା କଣ୍ଠଵିଲୋଲା ଚଂପକମାଲା ॥ ୧୭.୨୫ ॥ 425

%c05-q2/Subhadra.bala.Venuturupalli/c05-q2।txt medskip

ଅଷ୍ଟାଦଶଃ ସ୍ତବକଃ
ରୂପଵିଶେଷାଃ କୁଣ୍ଡଲିନୀସମୁଲ୍ଲାସଶ୍ଚ (ପ୍ରହର୍ଷିଣୀଵୃତ୍ତମ୍)

ଧୁନ୍ଵନ୍ତ୍ୟସ୍ତିମିରତତିଂ ହରିତ୍ତଟୀନାଂ
ଧିନ୍ଵନ୍ତ୍ୟଃ ପୁରମଥନସ୍ୟ ଲୋଚନାନି ।
ସ୍କନ୍ଦାମ୍ବାହସିତରୁଚୋ ହରନ୍ତୁ ମୋହଂ
ସାନ୍ଦ୍ରଂ ମେ ହୃଦୟଗତଂ ପ୍ରସହ୍ୟ ସଦ୍ୟଃ ॥ ୧୮.୧ ॥

ତନ୍ଵାନା ଵିନତହିତଂ ଵିରୋଧିଵର୍ଗଂ
ଧୁନ୍ଵାନା ବୁଧଜନମୋଦମାଦଧାନା ।
ସମ୍ରାଜ୍ଞୀ ତ୍ରିଦିଵଧରାରସାତଲାନାଂ
ରୁଦ୍ରାଣୀ ଭଣତୁ ଶିଵାନୀ ମତ୍କୁଲସ୍ୟ ॥ ୧୮.୨ ॥

ୟୋଽମ୍ବ ତ୍ଵାଂ ହୃଦି ଵିଦଧତ୍ତଟିତ୍ପ୍ରକାଶାଂ
ପୀୟୂଷଦ୍ୟୁତିମଦହୃନ୍ମୁଖାରଵିନ୍ଦାମ୍ ।
ଅନ୍ୟତ୍ତୁ ସ୍ମୃତିପଥତୋ ଧୁନୋତି ସର୍ଵଂ
କାମାରେଃ ସୁଦତି ନତସ୍ୟ ଭୁଵ୍ୟସାଧ୍ୟମ୍ ॥ ୧୮.୩ ॥

କାଲାଭ୍ରଦ୍ୟୁତିମସମାନଵୀର୍ୟସାରାଂ
ଶକ୍ତ୍ୟୂର୍ମିଭ୍ରମକରଶୁକ୍ଲଘୋରଦଂଷ୍ଟ୍ରାମ୍ ।
ୟୋ ଧୀରୋ ମନସି ଦଧାତି ଭର୍ଗପତ୍ନି
ତ୍ଵାମସ୍ୟ ପ୍ରଭଵତି ସଙ୍ଗରେଷୁ ଶସ୍ତ୍ରମ୍ ॥ ୧୮.୪ ॥

ୟଃ ପ୍ରାଜ୍ଞସ୍ତରୁଣଦିଵାକରୋଜ୍ଜ୍ଵଲାଙ୍ଗୀଂ
ତନ୍ଵଙ୍ଗି ତ୍ରିପୁରଜିତୋ ଵିଚିନ୍ତୟେତ୍ତ୍ଵାମ୍ ।
ତସ୍ୟାଜ୍ଞାଂ ଦଧତି ଶିରସ୍ସୁ ଫୁଲ୍ଲଜାଜୀ-
ମାଲାଂ ଵା ଧରଣିଜୁଷୋ ଵଶେ ଭଵନ୍ତଃ ॥ ୧୮.୫ ॥

ୟୋ ରାକାଶଶଧରକାନ୍ତିସାରଶୁଭ୍ରାଂ
ବିଭ୍ରାଣାଂ କରକମଲେନ ପୁସ୍ତକଂ ତ୍ଵାମ୍ ।
ଭୂତେଶଂ ପ୍ରଭୁମସ୍କୃତ୍ପ୍ରବୋଧୟନ୍ତୀଂ
ଧ୍ୟାୟେଦ୍ଵାଗ୍ଭଵତି ଵଶେଽସ୍ୟ ନାକଦୂତୀ ॥ ୧୮.୬ ॥

ଜାନୀମୋ ଭଗଵତି ଭକ୍ତଚିତ୍ତଵୃତ୍ତେ-
ସ୍ତୁଲ୍ୟଂ ତ୍ଵଂ ସପଦି ଦଧାସି ରୂପମଗ୍ର୍ୟମ୍ ।
ପ୍ରଶ୍ନୋଽୟଂ ଭଵତି ନଗାଧିନାଥକନ୍ୟେ
ରୂପଂ ତେ ମଦୟତି କୀଦୃଶଂ ସ୍ମରାରିମ୍ ॥ ୧୮.୭ ॥

ଚାରୁ ସ୍ୟାଦଲମିତି ଵକ୍ତୁମମ୍ବ ଶକ୍ୟଂ
ରୂପଂ ତେ ନ ଵଦତି କୋଽପି କୀଦୃଶଂ ଵା ।
ସମ୍ମୋହଂ ପରମୁପୟାନ୍ତି କାନ୍ତିଭାଣ୍ଡେ
କାମାରେରପି ନୟନାନି ୟତ୍ର ଦୃଷ୍ଟେ ॥ ୧୮.୮ ॥

ସଙ୍କଲ୍ପୈଃ କିମୁ ତଵ ଭୂଷଣାନ୍ୟଭୂଵଁ-
ଚ୍ଛିଲ୍ପୀନ୍ଦ୍ରାଃ କିମୁ ଵିଦଧୁର୍ୟଥାଽତ୍ର ଲୋକେ ।
ତତ୍ସ୍ଵର୍ଣଂ ଭଗଵତି କୀଦୃଶଂ ମଣୀନାଂ
କିଂ ରୂପଂ ଭଵତି ଚ ତତ୍ର ୟୋଜିତାନାମ୍ ॥ ୧୮.୯ ॥

ୟାନ୍ୟଙ୍ଗାନ୍ୟଖିଲମନୋଜ୍ଞସାରଭୂତା-
ନ୍ୟେତେଷାମପି କିମୁ ଭୂଷଣୈରୁମେ ତେ ।
ଆହୋସ୍ଵିଲ୍ଲଲିତତମାନି ଭାନ୍ତି ଭୂୟୋ
ଭୂଷାଭିର୍ଵିକୃତତମାଭିରପ୍ୟମୂନି ॥ ୧୮.୧୦ ॥

ମୁକ୍ତାଭିର୍ଭଵତି ତଵାମ୍ବ କିନ୍ନୁ ହାରଃ
ପୀୟୂଷଦ୍ୟୁତିକରସାରନିର୍ମଲାଭିଃ ।
ମୁଣ୍ଡୈର୍ର୍ଵା ଘଲଘଲଶବ୍ଦମାଦଧଦ୍ଭିଃ
ସଙ୍ଘର୍ଷାତ୍ ତ୍ରିଭୁଵନସାର୍ଵଭୌମଭାମେ ॥ ୧୮.୧୧ ॥

ଵସ୍ତ୍ରଂ ସ୍ୟାଦ୍ୟଦି ତଵ ସର୍ଵଶାସ୍ତ୍ରଗମ୍ୟେ
କାର୍ପାସଂ ଦିଵି ଚ ତଦୁଦ୍ଭଵୋଽନୁମେୟଃ ।
କ୍ଷୌମଂ ଚେଦ୍ଭଗଵତି ତସ୍ୟ ହେତୁଭୂତାଃ
କୀଟାଃ ସ୍ୟୁର୍ଗଗନଜଗତ୍ୟପୀତି ଵାଚ୍ୟମ୍ ॥ ୧୮.୧୨ ॥

ରୁଦ୍ରସ୍ୟ ପ୍ରିୟଦୟିତେଽଥଵା ସୁରଦ୍ରୁର୍-
ଭୂଷାଣାଂ ମଣିକନକପ୍ରକଲ୍ପିତାନାମ୍ ।
ଵସ୍ତ୍ରାଣାମପି ମନସେ ପରଂ ହିତାନାଂ
କାମଂ ତେ ଭଵତି ସମର୍ପକଃ ସମର୍ଥଃ ॥ ୧୮.୧୩ ॥

ସୁସ୍କନ୍ଧୋ ବହୁଵିଟପଃ ପ୍ରଵାଲଶୋଭୀ
ସମ୍ଫୁଲ୍ଲପ୍ରସଵସୁଗନ୍ଧଵାସିତାଶଃ ।
ଵୃକ୍ଷଃ କିଂ ଭଗଵତି କଲ୍ପନାମକୋଽୟଂ
ସଙ୍କଲ୍ପଃ କିମୁ ତଵ କୋଽପି ଦେଵି ସତ୍ୟଃ ॥ ୧୮.୧୪ ॥

ସଙ୍କଲ୍ପାନ୍ନ ଭଵତି କଲ୍ପପାଦପୋଽନ୍ୟଃ
ସ୍ଵର୍ଦୋଗ୍ଧ୍ରୀ ପୁନରିତରା ନ କୁଣ୍ଡଲିନ୍ୟାଃ ।
ୟଃ କୁର୍ୟାଦ୍ ଦ୍ଵୟମିଦମୁଦ୍ଗତାତ୍ମଵୀର୍ୟଂ
କାରୁଣ୍ୟାତ୍ତଵ ଭୁଵି ଚାସ୍ୟ ନାକଭାଗ୍ୟମ୍ ॥ ୧୮.୧୫ ॥

ଆପୀନଂ ଭଵତି ସହସ୍ରପତ୍ରକଞ୍ଜଂ
ଵତ୍ସୋଽସ୍ୟାଃ ପଟୁତରମୂଲକୁଣ୍ଡଵହ୍ନିଃ ।
ଦୋଗ୍ଧାଽଽତ୍ମା ଦହରସରୋରୁହୋପଵିଷ୍ଟୋ
ମୌନଂ ସ୍ୟାତ୍ସୁରସୁରଭେସ୍ତନୂଷୁ ଦୋହଃ ॥ ୧୮.୧୬ ॥

ଦୋଗ୍ଧ୍ର୍ୟାସ୍ତେ ଭଗଵତି ଦୋହନେନ ଲବ୍ଧଂ
ଵତ୍ସାଗ୍ନିପ୍ରଥମନିପାନସଦ୍ରଵାୟାଃ ।
ଦୁଗ୍ଧଂ ସ୍ଵାଦ୍ଵମୃତମୟଂ ପିବନ୍ମମାତ୍ମା
ସନ୍ତୃପ୍ତୋ ନ ଭଵତି ଦୁର୍ଭରୋଽସ୍ୟ କୁକ୍ଷିଃ ॥ ୧୮.୧୭ ॥

ଵତ୍ସୋଽଗ୍ନିଃ ପିବତି ଦୃଢାଙ୍ଘ୍ରିରମ୍ବ ପଶ୍ଚା-
ଦଶ୍ରାନ୍ତଂ ପିବତି ଦୁହନ୍ ପୁରୋଽନ୍ତରାତ୍ମା ।
ଵୃଦ୍ଧିଂ ଚ ଵ୍ରଜତି ପୟଃ ପ୍ରତିପ୍ରଦ୍ରୋହଂ
ଦୋଗ୍ଧ୍ର୍ୟାସ୍ତେ ଦ୍ରଵ ଇହ କୁଣ୍ଡଲିନ୍ୟପାରଃ ॥ ୧୮.୧୮ ॥

ସୋମସ୍ୟ ଦ୍ରଵମିମମାହୁରମ୍ବ କେଚିଦ୍
ଦୁଗ୍ଧାବ୍ଧେରମୃତରସଂ ଗଦନ୍ତି କେଽପି ।
ବାଷ୍ପଂ କେଽପ୍ୟଭିଦଧତେ ତୁ କୌଲକୁଣ୍ଡଂ
ପୀନୋଧସ୍ସ୍ରଵମିତରେ ଭଣନ୍ତି ଧେନୋଃ ॥ ୧୮.୧୯ ॥

ମୂଲେ ତ୍ଵଂ ଜ୍ଵଲଦଲନପ୍ରକାଶରୂପା
ଵୀଣାୟାଂ ପ୍ରବଲମହାମଦୋଷ୍ମରୂପା ।
ଶୀର୍ଷାବ୍ଜେ ସତତଗଲଦ୍ରସସ୍ଵରୂପା
ଭ୍ରୂମଧ୍ୟେ ଭଵସି ଲସତ୍ତଟିତ୍ସ୍ଵରୂପା ॥ ୧୮.୨୦ ॥

ହାର୍ଦେ ଚେଦଵତରସୀହ ପୁଣ୍ଡରୀକେ
ଛାୟାଵତ୍ସକଲମପି ପ୍ରପଶ୍ୟସି ତ୍ଵମ୍ ।
ଆରୂଢା ଦଶଶତପତ୍ରମଦ୍ରିପୁତ୍ରି
ସ୍ୟାଶ୍ଚେତ୍ତ୍ଵଂ ଭଣସି ଜଗତ୍ସୁଧାସମୁଦ୍ରମ୍ ॥ ୧୮.୨୧ ॥

ନେତ୍ରାଭ୍ୟାଂ ସରସିରୁହଚ୍ଛଦାୟତାଭ୍ୟାଂ
ଵକ୍ତ୍ରେଣ ପ୍ରଵିମଲହାସଭାସୁରେଣ ।
ପ୍ରତ୍ୟକ୍ଷା ମମ ମନସଃ ପୁରଃ ପୁରନ୍ଧ୍ରୀ
କାମାରେଃ ପରଣିତମସ୍ମଦୀୟଭାଗ୍ୟମ୍ ॥ ୧୮.୨୨ ॥

ପୁଣ୍ୟାନାଂ ପରିଣତିରେଵ ଭୂତଭର୍ତୁଃ
ସିଦ୍ଧାନାଂ ବଲନିଧିରେଵ କୋଽପି ଗୂଢଃ ।
ଭକ୍ତାନାଂ ଦୃଢତରିରେଵ ଶୋକସିନ୍ଧୌ
ମଗ୍ନାନାଂ ମମ ଜନନୀ ମହୀଧ୍ରପୁତ୍ରୀ ॥ ୧୮.୨୩ ॥

ଉଦ୍ଧର୍ତୁଂ ଵିନତଜନଂ ଵିଷାଦଗର୍ତାତ୍
ସଂସ୍କର୍ତୁଂ ଭୁଵନହିତାୟ ୟୋଗୟୁକ୍ତମ୍ ।
ସଂହର୍ତୁଂ ଖଲକୁଲମୁଦ୍ଧତଂ ଚ ଦର୍ପାଦ୍
ଭର୍ଗସ୍ୟ ପ୍ରିୟତରୁଣୀ ସଦା ସଦୀକ୍ଷା ॥ ୧୮.୨୪ ॥

ମୃଦ୍ଵୀକାଂ ମଧୁରତୟା ସୁଧାଂ ମହିମ୍ନା
ଗାମ୍ଭୀର୍ୟାତ୍ସୁରତଟିନୀଂ ଚ ନିର୍ଜୟନ୍ତୀ ।
ଶର୍ଵାଣୀଚରିତପରା ପ୍ରହର୍ଷିଣୀନାଂ
ଶ୍ରେଣୀୟଂ ଜୟତୁ ଗଣେଶ୍ଵରେଣ ବଦ୍ଧା ॥ ୧୮.୨୫ ॥ 450

%c05-q3/Syam.Sunder.Vinjamuri/umAsahasram\_c05-q3।txt medskip

ଏକୋନଵିଂଶଃ ସ୍ତବକଃ
ଧ୍ୟେୟଲଲିତାରୂପମ୍ (ପ୍ରମାଣିକାଵୃତ୍ତମ୍)

ପ୍ରଫୁଲ୍ଲକଲ୍ପପାଦପପ୍ରସୂନସଦ୍ୟଶୋହରମ୍ ।
ମହାରୁଜଂ ଧୁନୋତୁ ତେ ମହେଶସୁନ୍ଦରୀସ୍ମିତମ୍ ॥ ୧୯.୧ ॥

ମୁନୀନ୍ଦ୍ରମୂଲଵେଦିଭୂଧନଞ୍ଜୟପ୍ରବୋଧନମ୍ ।
ୟତୀନ୍ଦ୍ରହାର୍ଦପେଟିକା କଵାଟବନ୍ଧଭେଦନମ୍ ॥ ୧୯.୨ ॥

ୟଥାଵିଧିକ୍ରିୟାପରଦ୍ଵିଜାତିଚିତ୍ତଶୋଧନମ୍ ।
ମମାମ୍ବିକାସ୍ମିତଂ ଭଵତ୍ଵଘପ୍ରତାପରୋଧନମ୍ ॥ ୧୯.୩ ॥

ସୁଵର୍ଣସାଲଭଞ୍ଜିକା ଚରେଵ ଶୋଭୟାଽଧିକା ।
ଅତୀଵ ମାର୍ଦଵାନ୍ଵିତା ନଵେଵ ପୁଷ୍ପିତା ଲତା ॥ ୧୯.୪ ॥

ସୁପର୍ଵମୌଲିରତ୍ନଭା ଵିରାଜିହେମପାଦୁକା ।
ମରାଲିକାନିମନ୍ତ୍ରକପ୍ରଶସ୍ତରତ୍ନନୂପୁରା ॥ ୧୯.୫ ॥

ଵଲକ୍ଷଦୀଧିତିପ୍ରଭାଵିଶେଷହୃନ୍ନଖାଵଲୀ ।
ମୁନୀନ୍ଦ୍ରଶୁଦ୍ଧମାନସପ୍ରମେୟପାଦସୌଷ୍ଠଵା ॥ ୧୯.୬ ॥

ଘନୀଭଵତ୍ତଟିତ୍ପ୍ରଭାପ୍ରଵାହକଲ୍ପଜଙ୍ଘିକା ।
ମତଙ୍ଗଜେନ୍ଦ୍ରନାସିକା ମନୋଜ୍ଞସକ୍ଥିଶୋଭିନୀ ॥ ୧୯.୭ ॥

ପ୍ରସୂନସାୟକାଗମପ୍ରଵାଦଚୁଞ୍ଚୁକାଞ୍ଚିକା ।
ଵିଶାଲକେଶଚୁମ୍ବିତୋଲ୍ଲସନ୍ନିତମ୍ବମଣ୍ଡଲା ॥ ୧୯.୮ ॥

ଅଜାଣ୍ଡପିଣ୍ଡସଂହତିପ୍ରପୂର୍ଣକୁକ୍ଷିଶାଲିନୀ ।
ଅପାରଦିଵ୍ୟକାନ୍ତିଵାର୍ନିଧାନନାଭିଦୀର୍ଘିକା ॥ ୧୯.୯ ॥

ବିସପ୍ରସୂନସାୟକଚ୍ଛୁରାଭରୋମରାଜିକା ।
ଜଗତ୍ତ୍ରୟୀଵସଜ୍ଜନୋପଜୀଵ୍ୟଦୁଗ୍ଧଭୃତ୍କୁଚା ॥ ୧୯.୧୦ ॥

ମହେଶକଣ୍ଠବନ୍ଧକପ୍ରଶସ୍ତବାହୁଵଲ୍ଲରୀ ।
ସମସ୍ତଵିଷ୍ଟପାଭୟପ୍ରଦାୟିପାଣିପଙ୍କଜା ॥ ୧୯.୧୧ ॥

ଵିଲୋଲହାରମୌକ୍ତିକପ୍ରତାନସଂଵଦତ୍ସ୍ମିତା ।
ଵିଶୁଦ୍ଧସୁନ୍ଦରସ୍ମିତପ୍ରକାଶଭାସିତାମ୍ବରା ॥ ୧୯.୧୨ ॥

ସୁକୋମଲୋଷ୍ଠକମ୍ପନପ୍ରଭୀତଦୁର୍ଜୟାସୁରା ।
ସୁୟୁକ୍ତକୁନ୍ଦକୁଟ୍ମଲପ୍ରକାଶଦନ୍ତପଙ୍କ୍ତିକା ॥ ୧୯.୧୩ ॥

ଶରତ୍ସୁଧାଂଶୁମଣ୍ଡଲପ୍ରଭାଵିଗର୍ହଣାନନା ।
ସୁଧାମରନ୍ଦଵଜ୍ଜପାସୁମୋପମାଧରାଧରା ॥ ୧୯.୧୪ ॥

ତିଲପ୍ରସୂନଚାରୁତାଽପହାସିଭାସିନାସିକା ।
ନଵୀନଭାଭନାସିକାଵିଲମ୍ବିଦିଵ୍ୟମୌକ୍ତିକା ॥ ୧୯.୧୫ ॥

ଵିଶୁଦ୍ଧଗଣ୍ଡବିମ୍ବିତସ୍ଵରୂପରତ୍ନକୁଣ୍ଡଲା ।
ମହାମହସ୍ତରଙ୍ଗିତପ୍ରଭାଵଶାଲିଲୋଚନା ॥ ୧୯.୧୬ ॥

ଦଲାନ୍ତରସ୍ଥୟାମିନୀପ୍ରଭୁପ୍ରଭାଲିକସ୍ଥଲୀ ।
ମୟୂରବର୍ହଗର୍ହଣପ୍ରକୃଷ୍ଟକେଶଭାସିନୀ ॥ ୧୯.୧୭ ॥

ଦିଵାକରାୟୁତୋଜ୍ଜ୍ଵଲା ହିମାଂଶୁଲକ୍ଷଶୀତଲା ।
ତଟିତ୍ସହସ୍ରଭାସୁରା ନିରଙ୍କଚନ୍ଦ୍ରଶେଖରା ॥ ୧୯.୧୮ ॥

ନଭୋନ୍ତରାଲଚାରିଣୀ ମହାଵିଚିତ୍ରକାରିଣୀ ।
କୁଲାଗ୍ନିକୁଣ୍ଡଶାୟିନୀ ଜଗତ୍କଥାଵିଧାୟିନୀ ॥ ୧୯.୧୯ ॥

ନଭସ୍ତଲେ ବଲେଶ୍ଵରୀ ଧରାତଲେ କ୍ରିୟେଶ୍ଵରୀ ।
ଦିଵାକରେ ଵିଭେଶ୍ଵରୀ ସୁଧାକରେ ରସେଶ୍ଵରୀ ॥ ୧୯.୨୦ ॥

ମହେଶଵେଶ୍ମଦୀପିକା ଜଗତ୍ତ୍ରୟପ୍ରମାପିକା ।
ଅଶେଷଶୀର୍ଷଶାସିନୀ ସମସ୍ତହୃନ୍ନିଵାସିନୀ ॥ ୧୯.୨୧ ॥

ଗୁଣସ୍ତଵେ ଗୁଣସ୍ତଵେ ଗୁଣପ୍ରକର୍ଷଦାୟିନୀ ।
ଵିଚିନ୍ତନେ ଵିଚିନ୍ତନେ ଵିଶିଷ୍ଟଶକ୍ତିଧାୟିନୀ ॥ ୧୯.୨୨ ॥

ଭ୍ରମାକୁଲେନ ଦୁସ୍ତରା ଭଵାଲସେନ ଦୁର୍ଗମା ।
ଅମନ୍ତ୍ରକେଣ ଦୁର୍ଭରା ଜଗତ୍ତ୍ରୟେଣ ଦୁର୍ଜୟା ॥ ୧୯.୨୩ ॥

ସୁଵର୍ଣଚେଲଧାରିଣୀ ସମସ୍ତମୋଦକାରିଣୀ ।
ଵିଲାସିନୀ ନିରାମୟା ଵିଚିନ୍ତ୍ୟତାଂ ମନସ୍ତ୍ଵୟା ॥ ୧୯.୨୪ ॥

ପଦାବ୍ଜଵନ୍ଦିନଃ କଵେରିୟଂ ପ୍ରମାଣିକାଵଲୀ ।
ମହେଶମାନସେଶ୍ଵରୀ ଗୃହେ ମହାୟ କଲ୍ପତାମ୍ ॥ ୧୯.୨୫ ॥ 475

%c05-q4/Rekha.Venuturupalli/uma-c05-q4।txt medskip

ଵିଂଶଃ ସ୍ତବକଃ
ସର୍ଵସାରମୟୀ (ମଣିବନ୍ଧଵୃତ୍ତମ୍)

ପ୍ରୀତିଵିକାସେ ସ୍ଵଲ୍ପତମୋ ରୋଷଵିଶେଷେ ଭୂରିତରଃ ।
ଅଦ୍ଭୁତହାସୋ ଵିଶ୍ଵସୁଵୋ ରକ୍ଷତୁ ସାଧୁଂ ହନ୍ତୁ ଖଲମ୍ ॥ ୨୦.୧ ॥

ସଜ୍ଜନଚିତ୍ତାନନ୍ଦକରୀ ସଂଶ୍ରିତପାପଵ୍ରାତହରୀ ।
ଲୋକସଵିତ୍ରୀ ନାକଚରୀ ସ୍ତାନ୍ମମ ଭୂୟୋ ଭଦ୍ରକରୀ ॥ ୨୦.୨ ॥

ଅର୍ଚନକାଲେ ରୂପଗତା ସଂସ୍ତୁତିକାଲେ ଶବ୍ଦଗତା ।
ଚିନ୍ତନକାଲେ ପ୍ରାଣଗତା ତତ୍ତ୍ଵଵିଚାରେ ସର୍ଵଗତା ॥ ୨୦.୩ ॥

ଉଜ୍ଜ୍ଵଲରୂପେ ନୃତ୍ୟକରୀ ନିଷ୍ପ୍ରଭରୂପେ ସୁପ୍ତିକରୀ ।
ଗୋପିତରୁପେ ସିଦ୍ଧିକରୀ ଗୋଚରରୂପେ ବନ୍ଧକରୀ ॥ ୨୦.୪ ॥

ଅମ୍ବରଦେଶେ ଶବ୍ଦଵତୀ ପାଵକତାତେ ସ୍ପର୍ଶଵତୀ ।
କାଞ୍ଚନଵୀର୍ୟେ ରୂପଵତୀ ସାଗରକାଞ୍ଚ୍ୟାଂ ଗନ୍ଧଵତୀ ॥ ୨୦.୫ ॥

ଅପ୍ସ୍ଵମଲାସୁ ସ୍ପଷ୍ଟରସା ଚନ୍ଦ୍ରଵିଭାୟାଂ ଗୁପ୍ତରସା ।
ସଂସୃତିଭୋଗେ ସର୍ଵରସା ପୂର୍ଣସମାଧାଵେକରସା ॥ ୨୦.୬ ॥

ଚକ୍ଷୁଷି ଦୃଷ୍ଟିଶ୍ଶାତତମା ଚେତସି ଦୃଷ୍ଟିଶ୍ଚିତ୍ରତମା ।
ଆତ୍ମନି ଦୃଷ୍ଟିଶ୍ଶୁଦ୍ଧତମା ବ୍ରହ୍ମଣି ଦୃଷ୍ଟିଃ ପୂର୍ଣତମା ॥ ୨୦.୭ ॥

ଶୀର୍ଷସରୋଜେ ସୋମକଲା ଭାଲସରୋଜେ ଶକ୍ରକଲା ।
ହାର୍ଦସରୋଜେ ସୂର୍ୟକଲା ମୂଲସରୋଜେ ଵହ୍ନିକଲା ॥ ୨୦.୮ ॥

ସ୍ଥୂଲଶରୀରେ କାନ୍ତିମତୀ ପ୍ରାଣଶରୀରେ ଶକ୍ତିମତୀ ।
ସ୍ଵାନ୍ତଶରୀରେ ଭୋଗଵତୀ ବୁଦ୍ଧିଶରୀରେ ୟୋଗଵତୀ ॥ ୨୦.୯ ॥

ସାରସବନ୍ଧୋରୁଜ୍ଜ୍ଵଲଭା କୈରଵବନ୍ଧୋଃ ସୁନଦରଭା ।
ଵୈଦ୍ୟୁତଵହ୍ନେରଦ୍ଭୁତଭା ଭୌମକୃଶାନୋର୍ଦୀପକଭା ॥ ୨୦.୧୦ ॥

ୟୋଧଵରାଣାମାୟୁଧଭା ୟୋଗିଵରାଣାମୀକ୍ଷଣଭା ।
ଭୂମିପତୀନାମାସନଭା ପ୍ରେମଵତୀନାମାନନଭା ॥ ୨୦.୧୧ ॥

ଶସ୍ତ୍ରଧରାଣାଂ ଭୀକରତା ଶାସ୍ତ୍ରଧରାଣାଂ ବୋଧକତା ।
ୟନ୍ତ୍ରଧରାଣାଂ ଚାଲକତା ମନ୍ତ୍ରଧରାଣାଂ ସାଧକତା ॥ ୨୦.୧୨ ॥

ଗାନପଟୂନାଂ ରଞ୍ଜକତା ଧ୍ୟାନପଟୂନାଂ ମାପକତା ।
ନୀତିପଟୂନାଂ ଭେଦକତା ଧୂତିପଟୂନାଂ କ୍ଷେପକତା ॥ ୨୦.୧୩ ॥

ଦୀଧିତିଧାରା ଲୋକୟତାଂ ଜୀଵିତଧାରା ଵର୍ତୟତାମ୍ ।
ଜ୍ଞାପକଧାରା ଚିନ୍ତୟତାଂ ମାଦକଧାରା ଦ୍ରାଵୟତାମ୍ ॥ ୨୦.୧୪ ॥

ମନ୍ତ୍ରପରାଣାଂ ଵାକ୍ୟବଲଂ ୟୋଗପରାଣାଂ ପ୍ରାଣବଲମ୍ ।
ଆତ୍ମପରାଣାଂ ଶାନ୍ତିବଲଂ ଧର୍ମପରାଣାଂ ତ୍ୟାଗବଲମ୍ ॥ ୨୦.୧୫ ॥

ସୂରିଵରାଣାଂ ଵାଦବଲଂ ଵୀରଵରାଣାଂ ବାହୁବଲମ୍ ।
ମର୍ତ୍ୟପତୀନାଂ ସୈନ୍ୟବଲଂ ରାଗଵତୀନାଂ ହାସବଲମ୍ ॥ ୨୦.୧୬ ॥

ଵୈଦିକମନ୍ତ୍ରେ ଭାଵଵତୀ ତାନ୍ତ୍ରିକମନ୍ତ୍ରେ ନାଦଵତୀ ।
ଶାବରମନ୍ତ୍ରେ କଲ୍ପଵତୀ ସନ୍ତତମନ୍ତ୍ରେ ସାରଵତୀ ॥ ୨୦.୧୭ ॥

ବ୍ରହ୍ମମୁଖାବ୍ଜେ ଵାଗ୍ଵନିତା ଵକ୍ଷସି ଵିଷ୍ଣୋଃ ଶ୍ରୀର୍ଲଲିତା ।
ଶମ୍ଭୁଶରୀରେ ଭାଗମିତା ଵିଶ୍ଵଶରୀରେ ଵ୍ୟୋମ୍ନି ତତା ॥ ୨୦.୧୮ ॥

ଭୂଗ୍ରହଗୋଲୈଃ କନ୍ଦୁକିନୀ ଵିଷ୍ଟପଧାନେ କୌତୁକିନୀ ।
ୟାଵଦନନ୍ତଂ ଵୈଭଵିନୀ ପ୍ରାଣିଷୁ ଭୂୟସ୍ସମ୍ଭଵିନୀ ॥ ୨୦.୧୯ ॥

କଞ୍ଜଭଵାଣ୍ଡେ ମଣ୍ଡଲିନୀ ପ୍ରାଣିଶରୀରେ କୁଣ୍ଡଲିନୀ ।
ପାମରଭାଵେ ସଲ୍ଲଲନା ପଣ୍ଡିତଭାଵେ ମୋଦଘନା ॥ ୨୦.୨୦ ॥

ନାର୍ୟପି ପୁଂସା ମୂଲଵତୀ ତନ୍ଵ୍ୟପି ଶକ୍ତ୍ୟା ଵ୍ୟାପ୍ତିମତୀ ।
ଵ୍ୟାପ୍ତିମତୀତ୍ଵେ ଗୁପ୍ତିମତୀ ଚିତ୍ରଵିଚିତ୍ରା କାଽପି ସତୀ ॥ ୨୦.୨୧ ॥

ଦୀଧିତିରୂପା ଚିତ୍ତମୟୀ ପ୍ରାଣଶରୀରାଽପ୍ୟଦ୍ଵିତୟୀ ।
ବ୍ରହ୍ମଶରୀରଂ ବ୍ରହ୍ମଵିଭା ବ୍ରହ୍ମଵିଭୂତିର୍ବ୍ରହ୍ମପରମ୍ ॥ ୨୦.୨୨ ॥

ଵିଷ୍ଟପମାତା ଭୂରିକୃପା ଵିଷ୍ଟପରାଜ୍ଞୀ ଭୂରିବଲା ।
ଵିଷ୍ଟପରୂପା ଶିଷ୍ଟନୁତା ଵିଷ୍ଟପପାରେ ଶିଷ୍ଟମିତା ॥ ୨୦.୨୩ ॥

ଦୁର୍ଜନମୂଲୋଚ୍ଛେଦକରୀ ଦୀନଜନାର୍ତିଧ୍ଵଂସକରୀ ।
ଧୀବଲଲକ୍ଷ୍ମୀନାଶକୃଶଂ ପୁଣ୍ୟକୁଲଂ ନଃ ପାତୁ ଶିଵା ॥ ୨୦.୨୪ ॥

ଚନ୍ଦ୍ରକିରୀଟାମ୍ଭୋଜଦୃଶଃ ଶାନ୍ତିସମୃଦ୍ଧଂ ସ୍ଵାନ୍ତମିମେ ।
ସମ୍ମଦୟନ୍ତୁ ଶ୍ରୋତ୍ରସୁଖାଃ ସନ୍ମଣିବନ୍ଧାଃ ସୂରିପତେଃ ॥ ୨୦.୨୫ ॥ 500

॥ ସମାପ୍ତଂ ଚ ପଞ୍ଚମଂ ଶତକମ୍ ॥

Shloka hailaja Dhulipala/umasahasram\_ch\_06\_q1।txt medskip

ଷଷ୍ଠଂ ଶତକମ୍
ଏକଵିଂଶଃ ସ୍ତବକଃ
ଅର୍ଧନାରୀଶ୍ଵରଃ (ଅନୁଷ୍ଟୁବ୍ଵୃତ୍ତମ୍)

ଇତଃ ପୀତ୍ଵା କୁଚଂ ସ୍କନ୍ଦେ ପ୍ରସାରିତକରେ ତତଃ ।
ଜୟତି ସ୍ମିତମୁଦ୍ଭୂତଂ ଶିଵୟୋରେକଦେହୟୋଃ ॥ ୨୧.୧ ॥

ଏକତୋ ମଣିମଞ୍ଜୀରକ୍ଵାଣାହୂତସିତଚ୍ଛଦମ୍ ।
ଅନ୍ୟତୋ ନୂପୁରାହୀନ୍ଦ୍ରଫୂତ୍କାରକୃତତଦ୍ଭୟମ୍ ॥ ୨୧.୨ ॥

ଗୀର୍ଵାଣପୃତନାପାଲଂ ବାଲଂ ଲାଲୟଦେକତଃ ।
ଉତ୍ସଙ୍ଗେ ଗଣସମ୍ରାଜମର୍ଭକଂ ବିଭ୍ରଦନ୍ୟତଃ ॥ ୨୧.୩ ॥

ଵିଡମ୍ବିତବ୍ରହ୍ମଚାରିକୋକୈକସ୍ତନମେକତଃ ।
କଵାଟାର୍ଧନିଭଂ ବିଭ୍ରଦ୍ଵକ୍ଷଃ କେଵଲମନ୍ୟତଃ ॥ ୨୧.୪ ॥

ସେନାନ୍ୟାଽଽସ୍ଵାଦିତସ୍ତନ୍ୟମନୁଫୂତ୍କୁର୍ଵତୈକତଃ ।
ଫୂତ୍କାରମୁଖରଂ ନାଗମୁଗ୍ରଂ ଜାଗ୍ରତମନ୍ୟତଃ ॥ ୨୧.୫ ॥

ଏକତୋ ଦୋର୍ଲତାଂ ବିଭ୍ରନ୍ ମୃଣାଲଶ୍ରୀଵିଡମ୍ବିନୀମ୍ ।
ଶୁକ୍ରଶୁଣ୍ଡାଲଶୁଣ୍ଡାଭଂ ଚଣ୍ଡଂ ଦୋର୍ଦଣ୍ଡମନ୍ୟତଃ ॥ ୨୧.୬ ॥

କୁତ୍ରାପ୍ୟଵିଦ୍ୟମାନେଽପି ଵନ୍ଦନୀୟେ ତଦା ତଦା ।
ପରସ୍ପରକରସ୍ପର୍ଶଲୋଭତୋ ଵିହିତାଞ୍ଜଲି ॥ ୨୧.୭ ॥

ଶକ୍ରନୀଲସଵର୍ଣତ୍ଵାଦ୍ ଭାଗୟୋରୁଭୟୋରପି ।
ଊର୍ଧ୍ଵାଧରାଙ୍ଗସାପେକ୍ଷସନ୍ଧିଜ୍ଞାନଗଲସ୍ଥଲମ୍ ॥ ୨୧.୮ ॥

ଏକତଃ କୈରଵଶ୍ରେଣୀନିଦ୍ରାମୋଚନଲୋଚନମ୍ ।
ଅନ୍ୟତଃ କମଲାଵାସକ୍ଷଣାଧାୟକଵୀକ୍ଷଣମ୍ ॥ ୨୧.୯ ॥

ଏକତଶ୍ଚକ୍ଷୁଷା ଚାରୁତାରେଣାଧୀତଵିଭ୍ରମମ୍ ।
ଅନ୍ୟତଃ ପାଣିପାଥୋଜେ ଖେଲତୋ ମୃଗବାଲତଃ ॥ ୨୧.୧୦ ॥

ଏକତୋ ଭାଲଫଲକେ କାଶ୍ମୀରେଣ ଵିଶେଷିତମ୍ ।
ଅନ୍ୟତୋଽର୍ଧେକ୍ଷଣେନୈଵ ରତିଭ୍ରୂଵିଭ୍ରମଦ୍ରୁହାଃ ॥ ୨୧.୧୧ ॥

ଏକତଃ ଶୀତଲାଲୋକଂ ସାଧୁଲୋକଶିଵଙ୍କରମ୍ ।
ଅନ୍ୟତଃ ପ୍ରଜ୍ଵଲତ୍ପ୍ରେକ୍ଷଂ ଦୁଷ୍ଟଗୋଷ୍ଠୀଭୟଙ୍କରମ୍ ॥ ୨୧.୧୨ ॥

ଏକତୋ ମଣିତାଟଙ୍କପ୍ରଭାଧୌତକପୋଲକମ୍ ।
ଅନ୍ୟତଃ କୁଣ୍ଡଲୀଭୂତକୁଣ୍ଡଲୀଭୂତକୁଣ୍ଡଲି ॥ ୨୧.୧୩ ॥

ଏକତଃ କୁନ୍ତଲାନ୍ ବିଭ୍ରଦିନ୍ଦ୍ରନୀଲୋପମଦ୍ୟୁତୀନ୍ ।
ଅନ୍ୟତଃ ପାଵକଜ୍ଵାଲାପାଟଲାଂଶୁଚ୍ଛଟା ଜଟାଃ ॥ ୨୧.୧୪ ॥

ଏକତଃ କେଶପାଶେନ କୀର୍ଣେନୋରସି ଭାସୁରମ୍ ।
ଅନ୍ୟତୋ ଲମ୍ବମାନସ୍ୟ ଭୋଗିନୋ ହରତା ଶ୍ରିୟମ୍ ॥ ୨୧.୧୫ ॥

ଅଵତଂସିତମମ୍ଲାନପାରିଜାତସ୍ରଜୈକତଃ ।
ଵିମଲୋଲ୍ଲୋଲମାଲିନ୍ୟା ଵିଭୁଧାପଗୟାଽନ୍ୟତଃ ॥ ୨୧.୧୬ ॥

ରୌପ୍ୟାଚଲକୃତାଵାସଂ ପ୍ରାପ୍ୟଂ ୟୁକ୍ତେନ ଚେତସା ।
ଵସ୍ତୁ ରାମାପୁମାକାରଂ ହୃଦି ସନ୍ନିଦଧାତୁ ମେ ॥ ୨୧.୧୭ ॥

କାନ୍ତାର୍ଧଵିଗ୍ରହେ ମାତର୍ଜଟାର୍ଧାଶ୍ଚିକୁରାସ୍ତଵ ।
ଦଧତ୍ୟଦଭ୍ରସନ୍ଧ୍ୟାଭ୍ରୟୁକ୍ତକାଲାଭ୍ରଵିଭ୍ରମମ୍ ॥ ୨୧.୧୮ ॥

ଦମ୍ପତ୍ୟୋର୍ୟୁଵୟୋରେଷ ଲୋପୋ ୟନ୍ନାସ୍ତି ଶୈଲଜେ ।
ଵାମଂ ପାର୍ଶ୍ଵଂ ଵିଭୋଃ ଶେତୁଂ ଦାତୁଂ ତେ ଦକ୍ଷିଣଃ କରଃ ॥ ୨୧.୧୯ ॥

ଲୋକେ ସ୍ତ୍ରୀ ସ୍ତନୟୁଗ୍ମେନ ପୁଷ୍ଣାତ୍ୟେକଂ ସୁତଂ ନ ଵା ।
ସ୍ତନେନୈକେନ ଶର୍ଵାଣି ପୁଷ୍ଣାସି ତ୍ଵଂ ଜଗତ୍ତ୍ରୟମ୍ ॥ ୨୧.୨୦ ॥

ଖିଦ୍ୟନ୍ତି ୟୋଷିତଃ କୁକ୍ଷୌ ଵହନ୍ତ୍ୟୋଽର୍ଭକମେକକମ୍ ।
ଅର୍ଧକୁକ୍ଷୌ ଦଧାସି ତ୍ଵଂ ତ୍ରିଲୋକୀମମ୍ବ ଲୀଲୟା ॥ ୨୧.୨୧ ॥

ଅନୁରୂପା ଶିଵସ୍ୟ ତ୍ଵମନୁରୂପଃ ଶିଵସ୍ତଵ ।
ଅଲଙ୍କାରୋଽନୁରୂପୋ ଵାମକଲଙ୍କୋଽର୍ଭକଃ ଶଶୀ ॥ ୨୧.୨୨ ॥

ତଵୈଵ ତଵ ଦେହାଂଶୋ ହରସ୍ୟୈଵ ହରସ୍ୟ ୟଃ ।
ପ୍ରାଣାସ୍ତୁ ଜଗତାଂ ଧାତ୍ରି ହରସ୍ୟ ତ୍ଵଂ ହରସ୍ତଵ ॥ ୨୧.୨୩ ॥

ଅଵିଭକ୍ତଂ ଭଵାନି ସ୍ଵଂ ଭଵସ୍ୟ ତଵ ଚୋଭୟୋଃ ।
ସକୃତ୍ସକରୁଣଂ ଚେତଃ ସଙ୍କଲ୍ପୟତୁ ନଶ୍ଶିଵମ୍ ॥ ୨୧.୨୪ ॥

ଭଵସ୍ୟ ଭାଗମୁତ୍ସୃଜ୍ୟ ଭଵାନୀ ଭାଗମାତ୍ମନଃ ।
ଭଜତ୍ଵନୁଷ୍ଟୁଭାମାସାଂ ସୃଷ୍ଟାନାଂ ନାରସିଂହିନା ॥ ୨୧.୨୫ ॥ 525

%c06-q2/Karthik.Sitaram.Tenneti/c06-q2।txt medskip

ଦ୍ଵାଵିଂଶଃ ସ୍ତବକଃ
ହରକୁଟୁମ୍ବକମ୍ (ଵିୟୋଗିନୀଵୃତ୍ତମ୍)

ଅଖିଲସ୍ୟ ଵିକାସକାରଣଂ ଵ୍ୟସନିଜ୍ଞାନିଜନାଵନେଷୁ ନଃ ।
ଵିତନୋତୁ ଵିଶେଷତଃ ଶିଵଂ ଶିଵରାଜୀଵଦୃଶୋ ଦରସ୍ମିତମ୍ ॥ ୨୨.୧ ॥

ଵିକଲେ ସକଲେ ସୁରଵ୍ରଜେ ଵ୍ରଜତି ଶ୍ୟାମଲିମାନମଚ୍ୟୁତେ ।
ଜଗତସ୍ସଦୟୋ ହଲାହଲଂ ଚୁଲୁକୀକୃତ୍ୟ ଭୟଂ ନୁନୋଦ ୟଃ ॥ ୨୨.୨ ॥

ନିଗମୈସ୍ତୁରଗୀ ଭୁଵା ରଥୀ ଵିଧିନା ସାରଥିମାନ୍ ବିଭେଦ ୟଃ ।
କନକାଦ୍ରିଵରେଣ କାର୍ମୁକୀ କମଲାକ୍ଷେଣ ଶରୀ ପୁରତ୍ରୟମ୍ ॥ ୨୨.୩ ॥

ଅଜିତସ୍ୟ ଚ ଗାଢମତ୍ସରୈଃ କମଲାକାନ୍ତପୁରସ୍ସରୈସ୍ସୁରୈଃ ।
ପଦଜାୟୁଧଧାରୟା ରୟାଦ୍ଵଧମାଧତ୍ତ ଜଲନ୍ଧରସ୍ୟ ୟଃ ॥ ୨୨.୪ ॥

କମଲାସନକଞ୍ଜଲୋଚନୌ ଛଲଲିଙ୍ଗସ୍ୟ ଶିରୋଙ୍ଘ୍ରି ଵୀକ୍ଷିତୁମ୍ ।
ବତ ହଂସଵରାହଭୂମିକୌ ୟତମାନାଵପି ୟସ୍ୟ ନ ପ୍ରଭୂ ॥ ୨୨.୫ ॥

ନୟନଂ ନିଟଲାନ୍ତରସ୍ଥିତଂ ଵିଘଟୟ୍ୟେଷଦିଵାନ୍ଵିତୋ ରୁଷା ।
ଭୁଵନତ୍ରୟନିର୍ଜୟୋନ୍ନତଂ ମଦନଂ ଗାଢମଦଂ ଦଦାହ ୟଃ ॥ ୨୨.୬ ॥

ସକଲେ ଧଵଲଃ କଲେବରେ ହରିନୀଲୋପଲମଞ୍ଜୁଲଃ କ୍ଵଚିତ୍ ।
ଅମୃତାଂଶୁରିଵାଦଧାତି ୟଃ ପରମାମକ୍ଷିମୁଦଂ ପ୍ରପଶ୍ୟତାମ୍ ॥ ୨୨.୭ ॥

ଅଵତଂସତୁଷାରଦୀଧିତିଦ୍ୟୁତିଭିର୍ୟସ୍ୟ ୟଶୋଭରୈରପି ।
ସମମଚ୍ଛତରୀକୃତୋ ଦିଶାମଵକାଶସ୍ସୁତରାଂ ପ୍ରକାଶତେ ॥ ୨୨.୮ ॥

ଗଗନାନଲଜୀଵନାନିଲକ୍ଷିତିସୋମାରୁଣସୋମୟାଜିଭିଃ ।
ମହତୋ ବତ ୟସ୍ୟ ମୂର୍ତିଭିର୍ଭୁଵନଂ କ୍ରାନ୍ତମିଦଂ ସମନ୍ତତଃ ॥ ୨୨.୯ ॥

ସହ ତେନ ଧଵେନ ରାଜତେ ଵସୁଧାଧାରିଣି କାଽପି ରାଜତେ ।
ଵନିତା ଭଵତାପନାଶିନୀ ଚରଣପ୍ରେଷ୍ୟନିଵେଦିତାଶିନୀ ॥ ୨୨.୧୦ ॥

ଵନିତାପୁରୁଷୌ ପୁରାତନୌ ଵିମଲେ ଵ୍ୟୋମନି ଦେଵଦମ୍ପତୀ ।
ଭୁଵନତ୍ରିତୟସ୍ୟ ତୌ ଵିଭୂ ରଜତାଦ୍ରାଵିହ ସିଦ୍ଧଦମ୍ପତୀ ॥ ୨୨.୧୧ ॥

ଗଜଚର୍ମଧରଃ କପାଲଭୃଦ୍ ଗୃହନାଥୋ ଗୃହିଣୀ ତୁ କାଲିକା ।
ରୁଧିରାଵିଲମୁଣ୍ଡମାଲିନୀ କଥିତୌ ତୌ ବତ ପଣ୍ଡିତୈଃ ଶିଵୌ ॥ ୨୨.୧୨ ॥

ସ କିମିନ୍ଦୁକଲାଶିରୋମଣିଃ କିମୁତାଶ୍ଲୀଲକପାଲଭୂଷଣଃ ।
କିମୁମେ ଭଵତୀ କପାଲିନୀ କିମୁ ଵିଭ୍ରାଜିତରତ୍ନମାଲିନୀ ॥ ୨୨.୧୩ ॥

ରମସେଽମ୍ବ କପାଲମାଲିନୀ କ୍ଵଚିଦୀଶେନ କପାଲମାଲିନା ।
ଅତୁଲପ୍ରଭନିଷ୍କମାଲିନା କ୍ଵଚିଦତ୍ୟୁତ୍ତମରତ୍ନମାଲିନୀ ॥ ୨୨.୧୪ ॥

ୟୁଵୟୋର୍ମରୁତସ୍ତନୂଭୁଵୋ ବଲଵନ୍ତୋ ଭୁଵନପ୍ରକମ୍ପନାଃ ।
ଶଶିଦୀଧିତିହାରି ୟଦ୍ୟଶୋ ନିଗମେ ପାଵନମମ୍ବ ଗୀୟତେ ॥ ୨୨.୧୫ ॥

ଗୁରୁମୁତ୍ତମମଭ୍ରଚାରିଣାମସମବ୍ରହ୍ମନିଧାନନାୟକମ୍ ।
ତଵ ଦେଵି ଶିଵେ ତନୂଭୁଵାଂ ମରୁତାମନ୍ୟତମଂ ପ୍ରଚକ୍ଷତେ ॥ ୨୨.୧୬ ॥

ଦ୍ଵିରଦଂ ଵଦନେ ମହାମଦଂ ସିତଦନ୍ତଚ୍ଛଵିଧୌତଦିକ୍ତଟମ୍ ।
ଇତରତ୍ର ମୁଖାନ୍ନରାକୃତିଂ ଵିଦୁରସ୍ୟୈଵ ଵିଵର୍ତମଦ୍ଭୁତମ୍ ॥ ୨୨.୧୭ ॥

ଅଖିଲାମରନିର୍ଜୟୋନ୍ନତଃ ପ୍ରଥନେ ତାରକଦାନଵୋ ବଲୀ ।
ହୃତଵୀର୍ୟମଦୋ ବଭୂଵ ୟଦ୍ଘନଶକ୍ତ୍ୟାୟୁଧତେଜସାଽଞ୍ଜସା ॥ ୨୨.୧୮ ॥

ଅମଲେ ହୃଦି ନିର୍ମଲାଶନାଚ୍ଛିଥିଲେ ଗ୍ରନ୍ଥିଚୟେ ନରାୟ ୟଃ ।
ପରିପକ୍ଵଧିୟେ ପ୍ରଦର୍ଶୟେତ୍ ତମସଃ ପାରମପାରଵୈଭଵଃ ॥ ୨୨.୧୯ ॥

ଦ୍ରଵିଡେଷୁ ଶିଶୁତ୍ଵମେତ୍ୟ ୟୋ ଗିରିଶଶ୍ଲୋକଵିଶେଷଗାୟିନୀମ୍ ।
ଅମୃତଦ୍ରଵସାରହାରିଣୀଂ ନିଗମାଭାଂ ନିବବନ୍ଧ ସଂସ୍ତୁତିମ୍ ॥ ୨୨.୨୦ ॥

ଭୁଵି ଭଟ୍ଟକୁମାରିଲାଖ୍ୟୟା ଭଵମେତ୍ୟାଧ୍ଵରରକ୍ଷଣାୟ ୟଃ ।
ଵରଜୈମିନିଭାଷିତାଶୟଂ ବହୁଲାଭିଃ ଖଲୁ ୟୁକ୍ତିଭିର୍ଦଧୌ ॥ ୨୨.୨୧ ॥

ଅଧୁନା ଵିଧୁନୋତି ୟସ୍ତମୋ ଵିବୁଧପ୍ରେକ୍ଷିତମାର୍ଗରୋଧକମ୍ ।
ରମଣାଖ୍ୟମହର୍ଷିଵେଷଭୃତ୍ଶ୍ରିତଶୋଣାଚଲଚାରୁକନ୍ଦରଃ ॥ ୨୨.୨୨ ॥

ସ ଗୁହୋଽତିମହୋ ମହାମହାସ୍ରିଦଶାନାଂ ପ୍ରଥିତଶ୍ଚମୂପତିଃ ।
ଜଗତାମଧିରାଜ୍ଞି କୋଽପି ତେ ସୁତରାଂ ପ୍ରୀତିପଦଂ କୁମାରକଃ ॥ ୨୨.୨୩ ॥

ଜୟତି ତ୍ରିପୁରାରିଭାମିନୀ ଗଣପତ୍ୟାଦିମରୁତ୍ପ୍ରସୂରୁମା ।
ତମସୂତ ସୁରାରିଧୂତୟେ ତ୍ରିଦଶାନାମପି ୟା ଚମୂପତିମ୍ ॥ ୨୨.୨୪ ॥

ସ୍ଵକୁଟୁମ୍ବକଥାଭିଧାୟିନୀର୍ଗଣନାଥସ୍ୟ ଵିୟୋଗିନୀରିମାଃ ।
ଅଵଧାରୟତୁ ପ୍ରସନ୍ନୟା ନଗନାଥପ୍ରିୟନନ୍ଦିନୀ ଧିୟା ॥ ୨୨.୨୫ ॥ 550

%c06-q3/Mohana Rao/us-ch6-q3।TXT medskip

ତ୍ରୟୋଵିଂଶଃ ସ୍ତବକଃ
ପ୍ରକୀର୍ଣକମ୍ (ନରମନୋରମାଵୃତ୍ତମ୍)

(ଅସ୍ମିନ୍ ସ୍ତବକେ ତତ୍ସଵିତୁରିତି ଗାୟତ୍ରୀମନ୍ତ୍ରସ୍ୟ
ଚତୁର୍ଵିଂଶତିଵର୍ଣାଃ କ୍ରମଶଃ ପଦ୍ୟାନାଂ
ତୃତୀୟପାଦସ୍ୟ ଚତୁର୍ଥଵର୍ଣେ ଦୃଶ୍ୟନ୍ତେ ) ।

କିରଦିଵାମୃତଂ କିରଣମାଲୟା ।
ଜୟତି ତତ୍ସିତଂ ଶିଵଵଧୂସ୍ମିତମ୍ ॥ ୨୩.୧ ॥

ତଵ ପଦଂ ପରେ ମମ ଗୁହାନ୍ତରେ ।
ସ୍ଫୁରତୁ ସର୍ଵଦା ଵିକସିତଂ ମୁଦା ॥ ୨୩.୨ ॥

ପଦମଧୋଽମ୍ବୁଜାନ୍ନ କିଲ ଭିଦ୍ୟତେ ।
ମଦନଵିଦ୍ଵିଷଃ ସଦନରାଜ୍ଞି ତେ ॥ ୨୩.୩ ॥

ଵିଭୁତୟୋରରୀକୃତବହୂଦ୍ଭଵୌ ।
ଵିଦଧତୁର୍ଜଗତ୍ତ୍ରୟମିଦଂ ଶିଵୌ ॥ ୨୩.୪ ॥

ତଵ ତୁ ଖେଲନେ ନଲିନଜାଣ୍ଡକମ୍ ।
ଗିରିଶଵଲ୍ଲଭେ ଭଵତି କନ୍ଦୁକମ୍ ॥ ୨୩.୫ ॥

ସକଲମସ୍ତ୍ୟୁମେ ସଦଭୟଙ୍କରେ ।
ତଵ କରେ ପରେ କିମପି ନୋ ନରେ ॥ ୨୩.୬ ॥

କିମିଵ ଵର୍ଣ୍ୟତାଂ କଶଶିକୁଣ୍ଡଲା ।
ଉଡୁମଣିସ୍ରଜାପ୍ରଵିଲସଦ୍ଗଲା ॥ ୨୩.୭ ॥

ଭଣ ନିରନ୍ତରଂ ବହୁଗୁଣାମୁମାମ୍ ।
ଗତଭୟଂ ଵିଧେହ୍ୟମଲଵାଣି ମାମ୍ ॥ ୨୩.୮ ॥

ଅଵ ଜହୀହି ଵା ନନୁ ଭଜାମ୍ୟହମ୍ ।
ଭୁଵନଭର୍ତ୍ରି ତେ ଚରଣମନ୍ଵହମ୍ ॥ ୨୩.୯ ॥

ଗଣପତେଃ ଶିରଃକମଲଚୁମ୍ବିନୀ ।
ଭଵତୁ ଗୋପତିଧ୍ଵଜକୁଟୁମ୍ବିନୀ ॥ ୨୩.୧୦ ॥

ଦହରମଜ୍ଜନଂ ଵିଦଧତଂ ଜନମ୍ ।
ପରମଦେଵତେ ନୟସି ଧାମ ତେ ॥ ୨୩.୧୧ ॥

ଜନନି ଵିଜ୍ଞତା ଭଵତୁ ଧୀମତାମ୍ ।
ଅନୁଭଵସ୍ତୁ ତେ କରୁଣୟା ସତାମ୍ ॥ ୨୩.୧୨ ॥

ଅଚଲୟା ଧିୟା ହୃଦି ଗଵେଷଣମ୍ ।
ଵୃଷହୟପ୍ରିୟାନଗରଶୋଧନମ୍ ॥ ୨୩.୧୩ ॥

ନ ଵିଜହାମି ତେ ଚରଣନୀରଜମ୍ ।
ଅଵନି ଧୀମତାମଵ ନ ଵା ନିଜମ୍ ॥ ୨୩.୧୪ ॥

ପଦମୁମେଽମ୍ବ ତେ ହୃଦି ଵିଚିନ୍ଵତେ ।
ପଲିତମସ୍ତକାଃ ପରମଦେଵତେ ॥ ୨୩.୧୫ ॥

ସ୍ଵୟମନାମୟେ ସକଲଧାତ୍ର୍ୟସି ।
ନିଜମହିମ୍ନି ସା ତ୍ଵମୟି ତିଷ୍ଠସି ॥ ୨୩.୧୬ ॥

ସ୍ଥିତିମସାଦୟଁସ୍ତଵ ପଦାମ୍ବୁଜେ ।
ଵିଧିମଧିକ୍ଷିପତ୍ୟଲସନୀରଜେ ॥ ୨୩.୧୭ ॥

ସ୍ୟତୁ ମଦାପଦଂ ଶିଵଵଧୂପଦମ୍ ।
ୟଦୃଷୟୋ ଵିଧୁସ୍ତ୍ରିଭୁଵନାସ୍ପଦମ୍ ॥ ୨୩.୧୮ ॥

ଗୁଣଗଣଂ ଗୃଣଁସ୍ତଵ ଶିଵେ ଶିଵମ୍ ।
ଗତଭୟୋଽଭଵଂ ମଦମିତୋ ନଵମ୍ ॥ ୨୩.୧୯ ॥

ତଵକୃପାଵଶାତ୍ ତଦିଦମଵ୍ୟୟେ ।
ଜନନି ନଃ ପ୍ଲୁତିସ୍ତଵ ୟଦଙ୍ଘ୍ରୟେ ॥ ୨୩.୨୦ ॥

ନୟନଦୃଶ୍ୟୟୋରୟି ୟଦନ୍ତରମ୍ ।
ତଦମରସ୍ତୁତେ ତଵ ଵପୁଃ ପରମ୍ ॥ ୨୩.୨୧ ॥

ଅହମିତି ସ୍ମୃତିଃ କ୍ଵ ନୁ ଵିଭାସତେ ।
ଇତି ଵିଚୋଦୟନ୍ ମହତି ଲୀୟତେ ॥ ୨୩.୨୨ ॥

ଅମୃତସଂଜ୍ଞକେ ସୁଖଚିଦାତ୍ମକେ ।
ମତିମଦର୍ଥିତେ ଜନନି ଧାମ୍ନି ତେ ॥ ୨୩.୨୩ ॥

ଅୟି ମୁଦାସ୍ପଦଂ ସ୍ପୃଶତି ତେ ପଦମ୍ ।
ଶ୍ଵସିତୟାତ୍ରୟା ସତତଦୃଷ୍ଟୟା ॥ ୨୩.୨୪ ॥

ଦଧତୁ ସତ୍କଵେର୍ଗଣପତେରିମାଃ ।
ନଗଭୁଵୋ ମୁଦଂ ନରମନୋରମାଃ ॥ ୨୩.୨୫ ॥ 575

%c06-q4/Pattabhi Nadimpally/Arava \_satakamu \_chaturtha \_stabakamu \_576 \_600txt medskip

ଚତୁର୍ଵିଂଶଃ ସ୍ତବକଃ
ପ୍ରକୀର୍ଣକମ୍ (ସୁପ୍ରତିଷ୍ଠାଵୃତ୍ତମ୍)

ଚନ୍ଦ୍ରିକାସିତଂ ଚଣ୍ଡିକାସ୍ମିତମ୍ ।
ଭୂତଲେ ସତାଂ ଭାତୁ ଭୂତୟେ ॥ ୨୪.୧ ॥

ଭାଲଚକ୍ଷୁଷଶ୍ଚକ୍ଷୁଷାଂ ଧନମ୍ ।
କିଞ୍ଚିଦସ୍ତୁ ମେ ଶସ୍ତଵର୍ଧନମ୍ ॥ ୨୪.୨ ॥

ସାଧୁସନ୍ତତିକ୍ଷେମକାରିଣୀ ।
ଘୋରଦାନଵାନୀକଦାରିଣୀ ॥ ୨୪.୩ ॥

ୟୋଗୟୁକ୍ତସଚ୍ଚିତ୍ତଚାରିଣୀ ।
ପାଦସେଵକପ୍ରାଜ୍ଞତାରିଣୀ ॥ ୨୪.୪ ॥

ପୁଷ୍ପବାଣଜିନ୍ନେତ୍ରହାରିଣୀ ।
ପାତୁ ମାଂ ଜଗଚ୍ଚକ୍ରଧାରିଣୀ ॥ ୨୪.୫ ॥

ଦ୍ଵାଦଶାନ୍ତଭୂଜାତଶାରିକା ।
ସର୍ଵଵାଙ୍ମୟସ୍ୟୈକକାରିକା ॥ ୨୪.୬ ॥

ପୁଣ୍ୟକର୍ମସୁ ସ୍ଵଚ୍ଛମସ୍ତକା ।
ୟୋଗଶାଲିଷୁ ଛିନ୍ନମସ୍ତକା ॥ ୨୪.୭ ॥

ଆତ୍ମନି ସ୍ଥିତେଃ ସମ୍ପ୍ରଦାୟିକା ।
ସର୍ଵଜନ୍ମିନାଂ ସମ୍ପ୍ରଵର୍ତିକା ॥ ୨୪.୮ ॥

ମାଂ ପୁନାତୁ ସତ୍ପୂଜ୍ୟପାଦୁକା ।
ଭାଲଲୋଚନପ୍ରାଣନାୟିକା ॥ ୨୪.୯ ॥

ଦାନତୋ ୟଶଃ ପୌରୁଷାଦ୍ରମା ।
ସମ୍ପଦୋ ମଦଃ ଶୀଲତଃ କ୍ଷମା ॥ ୨୪.୧୦ ॥

ସତ୍ୟତୋ ଜଗତ୍ୟତ୍ର ଗୌରଵମ୍ ।
ୟଜ୍ଞତୋ ଦିଵି ସ୍ଥାନମୁଜ୍ଜ୍ଵଲମ୍ ॥ ୨୪.୧୧ ॥

ସଂୟମାଦଘଵ୍ରାତଵୀତତା ।
ୟୋଗତୋ ମହାସିଦ୍ଧିଶାଲିତା ॥ ୨୪.୧୨ ॥

ଶର୍ଵନାରି ତେ ପାଦସେଵୟା ।
ସର୍ଵସତ୍ଫଲାଵାପ୍ତିରଗ୍ର୍ୟୟା ॥ ୨୪.୧୩ ॥

ନୋଦ୍ୟମେନ ୟା ସିଦ୍ଧିରୁତ୍ତମା ।
ଵିଶ୍ଵନାୟିକାଵୀକ୍ଷିତେନ ସା ॥ ୨୪.୧୪ ॥

ସମ୍ପଦାଂ ରମା ଭାରତୀ ଗିରାମ୍ ।
ତ୍ଵଂ ଶିଵେ ପ୍ରଭୁଃ ପ୍ରାଣସଂଵିଦାମ୍ ॥ ୨୪.୧୫ ॥

ଚକ୍ଷୁଷା ନଭୋଲକ୍ଷ୍ୟଧାରିଣା ।
ସିଦ୍ଧ୍ୟତୀଵ ତେ ଦେଵି ଧାରଣା ॥ ୨୪.୧୬ ॥

ଆଶିରୋ ଦଧନ୍ନାଭିତୋଽନିଲମ୍ ।
ଦେଵି ଵିନ୍ଦତି ତ୍ଵନ୍ମୁନିର୍ବଲମ୍ ॥ ୨୪.୧୭ ॥

ହୃଦ୍ଗୃହାନ୍ତରେ ୟଦ୍ଵିଶୋଧନମ୍ ।
ତତ୍ସଵିତ୍ରି ତେ ସ୍ୟାଦୁପାସନମ୍ ॥ ୨୪.୧୮ ॥

କାଽପ୍ୟହମ୍ମତିର୍ଗୋଚରଂ ଵିନା ।
ଲୋକଧାତ୍ରି ତେ ରୂପଭାଵନା ॥ ୨୪.୧୯ ॥

ଅସ୍ୟମଣ୍ଡନଂ କୋଽପି ଵିଦ୍ୟୟା ।
ଖଣ୍ଡନଂ ପରଃ ପ୍ରାହ ନା ୟୟା ॥ ୨୪.୨୦ ॥

ମାତରେତୟା ଜୀୟତେ ତ୍ଵୟା ।
ଏକୟା ତନୂଭିନ୍ନୟା ଧିୟା ॥ ୨୪.୨୧ ॥

ବାହ୍ୟଦର୍ଶନେ ଵିଶ୍ଵପଙ୍କିଲା ।
ଅନ୍ୟଥା ଭଵସ୍ୟମ୍ବ କେଵଲା ॥ ୨୪.୨୨ ॥

ଖଣ୍ଡଵନ୍ନୃଣାଂ ଭାସି ଭୋଗିନାମ୍ ।
ଅସ୍ୟଭିନ୍ନଚିତ୍ କାଽପି ୟୋଗିନାମ୍ ॥ ୨୪.୨୩ ॥

ବନ୍ଧ ଏଷ ୟଦ୍ଭାସି ଖଣ୍ଡିତା ।
ମୋକ୍ଷ ଏଷ ୟଦ୍ଭାସ୍ୟଖଣ୍ଡିତା ॥ ୨୪.୨୪ ॥

ଏତଦୀଶିତୁଃ ପତ୍ନି ହୃନ୍ମୁଦେ ।
ସୌପ୍ରତିଷ୍ଠସଦ୍ଗୀତମସ୍ତୁ ତେ ॥ ୨୪.୨୫ ॥ 600

॥ ସମାପ୍ତଂ ଚ ଷଷ୍ଠଂ ଶତକମ୍ ॥

%c07-q1/Madhusudhan.Reddy/uma\_c07-q1\_itrans.txt medskip

ସପ୍ତମଂ ଶତକମ୍
ପଞ୍ଚଵିଂଶଃ ସ୍ତବକଃ
କ୍ଷେତ୍ରମାଲା (ଇନ୍ଦ୍ରଵଜ୍ରାଵୃତ୍ତମ୍)

କନ୍ୟାକୁମାରୀ ସୁତରାଂ ଵଦାନ୍ୟା
ମାନ୍ୟା ସମସ୍ତୈଃ ପ୍ରକୃତେରନନ୍ୟା ।
ଆକ୍ଷେପକଂ ସାଗରବୁଦ୍ବୁଦାନାଂ
ହାସଂ ଵିଧତ୍ତାଂ ଜଗତଃ ସୁଖାୟ ॥ ୨୫.୧ ॥

ରକ୍ଷ ସ୍ଵଚେତୋ ମଦମତ୍ସରାଦେର୍-
ଭିକ୍ଷସ୍ଵ କାଲେ ତନୁରକ୍ଷଣାୟ ।
ଵୀକ୍ଷସ୍ଵ ରାମେଶଵଧୂପଦାବ୍ଜଂ
ମୋକ୍ଷସ୍ଵଲାଭେ ୟଦି ତେଭିଽଲାଷଃ ॥ ୨୫.୨ ॥

ଲୋକସ୍ଵ ଦୂରୀକୃତଭକ୍ତଶୋକଂ
ହାଲାସ୍ୟନାଥେକ୍ଷଣପୁଣ୍ୟପାକମ୍ ।
ଭୀତିଃ ସଖେ ଚେଦ୍ଭଵତଃ ପଵିତ୍ରଂ
ଜ୍ୟୋତିର୍ଵିଶେଷଂ ଜଲଚାରିନେତ୍ରମ୍ ॥ ୨୫.୩ ॥

ୟୋ ଲୋକତେ ତାମଖିଲାଣ୍ଡରାଜ୍ଞୀ-
ମଜ୍ଞାନଵିଧ୍ଵଂସଵିଧାନଵିଜ୍ଞାମ୍ ।
ଅମ୍ବାଂ ପରାଂ ଜୀଵନଲିଙ୍ଗଶକ୍ତିଂ
ଭୂୟଃ ସ କାୟଂ ନ ଭଵେ ଲଭେତ ॥ ୨୫.୪ ॥

ବିଭ୍ରତ୍ସହସ୍ରଂ ଚ ମୁଖାନି ଶକ୍ତୋ
ଵକ୍ତୁଂ ଗୁଣାନ୍ କଃ କମଲାଲୟସ୍ୟ ।
ଜନ୍ମାପି ୟତ୍ର ପ୍ରଭଵେଜ୍ଜନାନାଂ
ମୁକ୍ତ୍ୟୈ ମୁନୀନାମପି ଦୁର୍ଲଭାୟୈ ॥ ୨୫.୫ ॥

ଵ୍ୟାଘ୍ରାଙ୍ଘ୍ରିଵାତାଶନପୂଜିତସ୍ୟ
ନାଟ୍ୟସ୍ଥଲୀନାୟିକୟା ଶିଵସ୍ୟ ।
ନେତ୍ରାଧ୍ଵଭାଜା ଶିଵକାମୟା ଵୋ
ମିତ୍ରାଣି କାମାଃ ଫଲିନୋ ଭଵନ୍ତୁ ॥ ୨୫.୬ ॥

ଆଲୋକତେଽପୀତକୁଚାମୟି ତ୍ଵା-
ମାଲୋଲଚିତ୍ତାମରୁଣାଚଲେ ୟଃ ।
ନିର୍ଵେଦଵାନ୍ ପର୍ଵସୁଧାଂଶୁଵକ୍ତ୍ରେ
ସର୍ଵେ ଵଶେ ତସ୍ୟ ଭଵନ୍ତି କାମାଃ ॥ ୨୫.୭ ॥

ୟଃ କୁଣ୍ଡଲୀପଟ୍ଟଣରାଜଧାନୀ-
ମାଲୋକତେ କାମପି କୃତ୍ତମସ୍ତାମ୍ ।
ନିସ୍ସାରମାନନ୍ଦକଥାଵିହୀନଂ
ସଂସାରମେତଂ ସ ଜହାତି ବୁଦ୍ଧ୍ୟା ॥ ୨୫.୮ ॥

ଦୃଷ୍ଟ୍ଵା ଵଧୂମାଦିପୁରୀଶ୍ଵରସ୍ୟ
ୟୋ ଲୋଚନାରୋଚକମାଧୁନୋତି ।
ତସ୍ୟାନ୍ତରଙ୍ଗଂ ଧୁତସର୍ଵସଙ୍ଗଂ
ଭୂୟୋ ଭଵାରୋଚକମାଵୃଣୋତି ॥ ୨୫.୯ ॥

କାଞ୍ଚୀ ରମଣ୍ୟାଃ କୁରୁତାଂ ଗୃହସ୍ଥେ
କ୍ଵାଣୈର୍ମୁଦଂ କାମପି କିଙ୍କିଣୀନାମ୍ ।
କାଞ୍ଚୀ ଭୁଵଃ ପୁଣ୍ୟପୁରୀ ୟତୀନ୍ଦ୍ର
ତ୍ଵାମମ୍ବିକାନାମରଵୈର୍ଧିନୋତୁ ॥ ୨୫.୧୦ ॥

ଶ୍ରୀକାଲହସ୍ତିସ୍ଥଲଦର୍ଶନସ୍ୟ
କୈଲାସଵୀକ୍ଷାଂ ପୁନରୁକ୍ତିମାହୁଃ ।
ଜ୍ଞାନଂ ପ୍ରଦାତୁଂ ଚରଣାଶ୍ରିତେଭ୍ୟୋ
ଜ୍ଞାନାମ୍ବିକା ୟତ୍ର ନିବଦ୍ଧଦୀକ୍ଷା ॥ ୨୫.୧୧ ॥

ଶ୍ରୀଶୈଲଶୃଙ୍ଗସ୍ୟ ଵିଲୋକନେନ
ସଙ୍ଗେନ ହୀନୋ ଭଵିତା ମନୁଷ୍ୟଃ ।
ଧାମାସ୍ତି ୟତ୍ର ଭ୍ରମରାଲକାୟାଃ
ଶାନ୍ତଭ୍ରମଂ ତଦ୍ଭ୍ରମରାମ୍ବିକାୟାଃ ॥ ୨୫.୧୨ ॥

ତୀରେ ଵିପଶ୍ଚିଦ୍ଵର ପଶ୍ଚିମାବ୍ଧେର୍-
ଗୋକର୍ଣଗାଂ ଲୋକୟ ଭଦ୍ରକର୍ଣୀମ୍ ।
ବୁଦ୍ଧିଂ ଶିଵାଂ ସର୍ଵମନୋରଥାନାଂ
ସିଦ୍ଧିଂ ଚ ୟଦ୍ୟସ୍ତି ମନୋଽଧିଗନ୍ତୁମ୍ ॥ ୨୫.୧୩ ॥

ଧାମ୍ନି ପ୍ରସିଦ୍ଧେ କରଵୀରନାମ୍ନି
ପୁଣ୍ୟାଭିଧାନାଂ କୃତସନ୍ନିଧାନାମ୍ ।
ଦେଵୀଂ ପରାଂ ପଶ୍ୟତି ୟୋ ଵିରକ୍ତୋ
ମୁକ୍ତେଃ ସ ପାଣିଗ୍ରହଣାୟ ଶକ୍ତଃ ॥ ୨୫.୧୪ ॥

ଜ୍ଞାନେ ଦୃଢା ତେ ୟଦି କାପି କାଙ୍କ୍ଷା
ନାନେହସଂ ମିତ୍ର ମୁଧା କ୍ଷିପେମମ୍ ।
ସେଵସ୍ଵ ଦେଵୀଂ ତୁଲଜାପୁରସ୍ଥାଂ
ନୈଵ ସ୍ଵରୂପାଦିତରା କିଲେୟମ୍ ॥ ୨୫.୧୫ ॥

ଗୋପାଲିନୀଵେଷଭୃତଂ ଭଜସ୍ଵ
ଲୀଲାସଖୀଂ ତାଂ ଭୁଵନେଶ୍ଵରସ୍ୟ ।
ଇଷ୍ଟଂ ହୃଦିସ୍ଥଂ ତଵ ହସ୍ତଗଂ ସ୍ୟାତ୍
କଷ୍ଟଂ ଚ ସଂସାରଭଵଂ ନ ଭୂୟଃ ॥ ୨୫.୧୬ ॥

ଆରାଧ୍ୟତେ ଵୈତରଣୀତଟସ୍ଥା
ୟେନେୟମମ୍ବା ଵିରଜୋଽଭିଧାନା ।
ଆରାଧିତଂ ତେନ ସମସ୍ତମନ୍ୟତ୍
ସାରୋ ଧରାୟାମୟମାର୍ୟଗୀତଃ ॥ ୨୫.୧୭ ॥

ସଙ୍ଗୀୟମାନଂ ସ୍ଥଲମାର୍ୟବୃନ୍ଦୈର୍-
ବୃନ୍ଦାରକାଣାଂ ସରିତସ୍ତଟେଽସ୍ତି ।
ୟଃ କାଲିକାଂ ପଶ୍ୟତି କାଲକେଶୀଂ
ତତ୍ରାସ୍ୟ କାଲାଦପି ନୈଵ ଭୀତିଃ ॥ ୨୫.୧୮ ॥

ନୀଲାଚଲଂ ସିଦ୍ଧସମୂହସେଵ୍ୟଂ
ଲୀଲାନିକେତଂ ପ୍ରଵଦନ୍ତି ୟସ୍ୟାଃ ।
ଭଦ୍ରା ପରା କାଚନ ଗୁହ୍ୟମୁଦ୍ରା
କାମେଶ୍ଵରୀ ସା ଭୁଵନସ୍ୟ ମୂଲମ୍ ॥ ୨୫.୧୯ ॥

ମାଙ୍ଗଲ୍ୟଗୌରୀପଦଦର୍ଶନସ୍ୟ
କର୍ତା ତୁ ଭୂତ୍ଵା ସୁକୃତସ୍ୟ ଭର୍ତା ।
ଆଚାରପୂତୈରଧିଗମ୍ୟମଗ୍ର୍ୟଂ
ସ୍ଥାନଂ ପ୍ରପଦ୍ୟେତ ୟତୋ ନ ପାତଃ ॥ ୨୫.୨୦ ॥

ଵାରାଣସୀ ଶୁଭ୍ରଗିରେରନୂନଂ
କ୍ଷେତ୍ରଂ ପଵିତ୍ରଂ ଭୁଵନତ୍ରୟେଽପି ।
ଅର୍ଥେ ପ୍ରଜାନାଂ ଵିଧୃତାନ୍ନପାତ୍ରା
ଗୌରୀ ସ୍ଵୟଂ ୟତ୍ର ଵିଶାଲନେତ୍ରା ॥ ୨୫.୨୧ ॥

ବୃନ୍ଦାରକାରାଧିତପାଦପଦ୍ମାଂ
ନନ୍ଦାମିମାମିନ୍ଦୁସମାନଵକ୍ତ୍ରାମ୍ ।
ଆଲୋକ୍ୟ ଵିନ୍ଧ୍ୟାଚଲଵାସିନୀଂ ନା
ନାଲୋଚୟେତ୍ସଂସୃତିତୋ ଭୟାନି ॥ ୨୫.୨୨ ॥

ଆନନ୍ଦଦେହାମିହ ମୁକ୍ତିସଂଜ୍ଞାଂ
ନାରୀଂ ପରୀରବ୍ଧୁମନା ମନୁଷ୍ୟଃ ।
ଦୂତୀଂ ଵୃଣୋତୁ ପ୍ରମଥେଶ୍ଵରସ୍ୟ
କାନ୍ତାମଵନ୍ତୀପୁରନାୟିକାଂ ତାମ୍ ॥ ୨୫.୨୩ ॥

ୟତ୍ରାଚଲଚ୍ଛିଦ୍ରକୃତା ସହାହଂ
ଭ୍ରାତ୍ରା ମୁହୁଃ ଖେଲିତଵାନ୍ ଵନେଷୁ ।
ତଂ ସିଦ୍ଧଦେଵର୍ଷିନୁତଂ ସ୍ମରାମି
କୈଲାସମାଵାସଗିରିଂ ଜନନ୍ୟାଃ ॥ ୨୫.୨୪ ॥

ପୂର୍ଣାଽମ୍ବରେ ଶୀତକରେଽଧିକାରଂ
ବିଭ୍ରତ୍ୟଗେନ୍ଦ୍ରେ ଧଵଲେ ସଲୀଲା ।
କ୍ଷେତ୍ରେଷୁ କାଶ୍ୟାଦିଷୁ ଗୁପ୍ତଶକ୍ତିର୍-
ଗୌରୀନ୍ଦ୍ରଵଜ୍ରାସୁ ଚ ସନ୍ନିଧତ୍ତାମ୍ ॥ ୨୫.୨୫ ॥ 625

%c07-q2/Jayanth.Ganapathiraju/c07-q2।txt medskip

ଷଡ୍ଵିଂଶଃ ସ୍ତବକଃ
ଅପୀତକୁଚାମ୍ବା (ଦୋଧକଵୃତ୍ତମ୍)

ଆଗମଵିନ୍ମତିକୈରଵିଣୀନାଂ
ବୋଧମଜସ୍ରମସୌ ଵିଦଧାନଃ ।
ପାତୁ ମହେଶଵଧୂଵଦନାଂଶୋ
ହାସଶଶୀ ସକଲାନି କୁଲାନି ॥ ୨୬.୧ ॥

ଆୟତଲୋଚନଚୁମ୍ବିତକର୍ଣା
ଦାନୟଶୋଜିତତୋୟଦକର୍ଣା ।
ଶୋଣନଗେଶମନଃ ପ୍ରିୟଵର୍ଣା
ନାଶୟତାଜ୍ଜଗଦାର୍ତିମପର୍ଣା ॥ ୨୬.୨ ॥

ଵେଦତୁରଙ୍ଗଵିଲୋଚନଭାଗ୍ୟଂ
ଵେଦଶିରୋନିଚୟୈରପି ମୃଗ୍ୟମ୍ ।
ଶୋକଵିଦାରିସୁଧାକିରଣାସ୍ୟଂ
ଶୋଣଗିରୌ ସମଲୋକି ରହସ୍ୟମ୍ ॥ ୨୬.୩ ॥

ମୁଞ୍ଚ ସମସ୍ତମନୋରଥଲାଭେ
ସଂଶୟମଦ୍ୟ କରାମଲକାଭେ ।
ଦୃକ୍ପଥମାପ ନଗେନ୍ଦ୍ରତନୂଜା
ସୋଽହମିତଃ ପରମନ୍ତରରାଜା ॥ ୨୬.୪ ॥

ଶିଲ୍ପଵିଦଃ ପ୍ରତିମାଂ ପ୍ରଵିଶନ୍ତୀ
ସ୍ଵଲ୍ପଵିଦାଂ ତରଣାୟ ଚକାସ୍ତି ।
ଶୋଣଧରାଭୃତି ସମ୍ପ୍ରତି ଲବ୍ଧା
ହନ୍ତ ଚିରାଦିୟମେଵ ମମାମ୍ବା ॥ ୨୬.୫ ॥

ଭାରତଭୂଵଲୟେଽତ୍ର ଵିଶାଲେ
ସନ୍ତ୍ଵନଘାନି ବହୂନି ଗୃହାଣି ।
ଆସ୍ୟଵିଗୀତସୁଧାକରବିମ୍ବା
ଶୋଣଗିରୌ ରମତେଽତ୍ର ମଦମ୍ବା ॥ ୨୬.୬ ॥

ଵାରିତସଂଶ୍ରିତପାତକଜାଲା
ଵାରିଧିଵୀଚିନିରଙ୍କୁଶଲୀଲା ।
ଵାରିଜପତ୍ରଵିଡମ୍ବନନେତ୍ରା
ଵାରଣରାଜମୁଖେନ ସପୁତ୍ରା ॥ ୨୬.୭ ॥

ଆୟତଵକ୍ରଘନାସିତକେଶୀ
ତୋୟଜବାଣରିପୋର୍ହୃଦୟେଶୀ ।
କାଶସୁମାଚ୍ଛୟଶାଃ ପରମୈଷା
ପାଶଭିଦସ୍ତୁ ତଵେନ୍ଦୁଵିଭୂଷା ॥ ୨୬.୮ ॥

ପଙ୍କଜସମ୍ଭଵପୂଜିତପାଦା
ପଙ୍କଵିନାଶନପାଵନନାମା ।
କିଙ୍କରକଲ୍ପଲତା ପରମେୟଂ
ଶଙ୍କରନେତ୍ରସୁଧା ଶରଣଂ ନଃ ॥ ୨୬.୯ ॥

ଚଞ୍ଚଲଦୃଗ୍ଵିନତାମରଵଲ୍ଲୀ
ପଞ୍ଚପୃଷତ୍କଶରାସନଝିଲ୍ଲୀ ।
କାଞ୍ଚନଗର୍ଭମୁଖପ୍ରଣୁତେୟଂ
ପଞ୍ଚମୁଖପ୍ରମଦା ଶରଣଂ ନଃ ॥ ୨୬.୧୦ ॥

ଅମ୍ବ ଵିଧୂୟ ଭଟାନ୍ମଦନାଦୀନ୍
ନୂପୁରନାଦବିଭୀଷିକୟୈଷଃ ।
ହନ୍ତ ଜହାର ବଲେନ ମନୋ ମେ
ଶୋଣନଗାଙ୍ଘ୍ରିନିଵାସିନି ତେଽଙ୍ଘ୍ରିଃ ॥ ୨୬.୧୧ ॥

କର୍ଣପୁଟେ କୁରୁ ମୁଗ୍ଧ ମମୋକ୍ତିଂ
ମୁଞ୍ଚ ଧନାଦିଷୁ ମାନସସକ୍ତିମ୍ ।
ଶୋଣଗିରୀନ୍ଦ୍ରଵଧୂପଦଭକ୍ତିଂ
ଶୀଲୟ ଶୀଲୟ ୟାସ୍ୟସି ମୁକ୍ତିମ୍ ॥ ୨୬.୧୨ ॥

ଜୀର୍ଣତରେ ଜରୟାଽଖିଲଦେହେ
ବୁଦ୍ଧିବଲଂ ଚ ଵିଲୁମ୍ପତି ମୋହେ ।
ହନ୍ତ ସଵିତ୍ରି ତପନ୍ମତିରନ୍ତେ
ସେଵିତୁମିଚ୍ଛତି ନା ଚରଣଂ ତେ ॥ ୨୬.୧୩ ॥

ତନ୍ତ୍ରଵିଦୋ ନଵୟୋନି ତୁ ଚକ୍ରଂ
ଶୋଣଧରାଧରରୂପମୁଶନ୍ତି ।
ଅର୍ଧମମୁଷ୍ୟ ଵପୁର୍ମଦନାରେ-
ରର୍ଧମଗେନ୍ଦ୍ରସୁତେ ତଵ ଗାତ୍ରମ୍ ॥ ୨୬.୧୪ ॥

ଅସ୍ତୁ ନଗେଶ୍ଵରନନ୍ଦିନି ଲିଙ୍ଗଂ
ତୈଜସମେତଦିହାପି ତଵାଂଶଃ ।
ଵୀତଗୁଣସ୍ୟ ଵିନା ତଵ ୟୋଗଂ
ଦେଵି ଶିଵସ୍ୟ କୁତଃ ଖଲୁ ତେଜଃ ॥ ୨୬.୧୫ ॥

ସ୍ଥାପିତମୂର୍ତିରିୟଂ ତଵ ନମ୍ୟା
ପୂଜୟିତୁଂ ଜଗଦୀଶ୍ଵରି ରମ୍ୟା ।
ଶୋଣନଗାର୍ଧମିଦଂ ତଵ ରୂପଂ
କୀର୍ତୟିତୁଂ ନଗଜେ ଧୁତପାପମ୍ ॥ ୨୬.୧୬ ॥

ଶୋଣନଗାର୍ଧତନୋଽନିଶମଙ୍କେ
ଧାରୟସେଽୟି ଗୁହଂ ରମଣାଖ୍ୟମ୍ ।
ଆଗତମପ୍ୟୟି ହା ମୁହୁରମ୍ବୋ-
ଚ୍ଚାଟୟସେ ଗଣପଂ ନନୁ କସ୍ମାତ୍ ॥ ୨୬.୧୭ ॥

ଅଙ୍କଜୁଷେ ରମଣାୟ ନୁ ଦାତୁଂ
ମାନଵଵେଷଧରାୟ ଗୁହାୟ ।
ଶୋଣନଗାର୍ଧତନୋ ବହୁ ଦୁଗ୍ଧଂ
ମାତରପୀତକୁଚେହ ଵିଭାସି ॥ ୨୬.୧୮ ॥

ପୂର୍ଣସମାଧିଵଶାତ୍ ସ୍ଵପିଷି ତ୍ଵଂ
ପୀତମପୀତକୁଚେଽମ୍ବ ନ ଵେତ୍ସି ।
ଅଙ୍କଜୁଷା ରମଣେନ ସୁତେନ
ପ୍ରେକ୍ଷ୍ୟ ୟଥେଷ୍ଟମୁରୋରୁହଦୁଗ୍ଧମ୍ ॥ ୨୬.୧୯ ॥

ଜ୍ଞାନରସାହ୍ଵୟମମ୍ବ ନିପୀୟ
ସ୍ତନ୍ୟମସୌ ରମଣୋ ମୁନିରାଟ୍ ତେ ।
ଜ୍ଞାନମୟୋଽଭଵଦୀଶ୍ଵରି ସର୍ଵଃ
ପୁଷ୍ୟତି ୟେନ ତନୁଂ ହି ତଦାତ୍ମା ॥ ୨୬.୨୦ ॥

ପ୍ରୀତିପଦାୟ ପୟୋଧରକୁମ୍ଭାତ୍
ପାର୍ଵତି ଧୀମୟଦୁଗ୍ଧମପୀତାତ୍ ।
ଅସ୍ତୁ ଗୁହାୟ ଶିଵେ ବହୁ ଦତ୍ତଂ
କିଞ୍ଚିଦିଵେଶ୍ଵରି ଧାରୟ ମହ୍ୟମ୍ ॥ ୨୬.୨୧ ॥

ପ୍ରୌଢମିମଂ ୟଦି ଵେତ୍ସି ତନୂଜଂ
ଶୈଲସୁତେ ମଦଵାରି ଦଧାନମ୍ ।
ମାସ୍ତୁପୟୋ ଵିତରାନଘମନ୍ନଂ
ୟେନ ଦଧାନି ମହେଶ୍ଵରି ଶକ୍ତିମ୍ ॥ ୨୬.୨୨ ॥

ସ୍ଵାର୍ଜିତମେଵ ମୟା ୟଦି ଭୋଜ୍ୟଂ
ସମ୍ମଦ ଏଵ ମମାଖିଲମାତଃ ।
ଆଶିଷମଗ୍ର୍ୟତମାମୟି ଦତ୍ତ୍ଵା
ପ୍ରେଷୟ ୟାନି ଜୟାନି ଧରିତ୍ରୀମ୍ ॥ ୨୬.୨୩ ॥

ଵିଦ୍ୟୁତି ଵିଦ୍ୟୁତି ଵୀକ୍ଷ୍ୟଵିଲାସା
ଵୀକ୍ଷିତକର୍ମଣି ଲକ୍ଷ୍ୟରହସ୍ୟା ।
ପାର୍ଵଣଚନ୍ଦ୍ରମୁଖୀ ଲଲିତାଙ୍ଗୀ
ତୈଜସଲିଙ୍ଗସଖୀ ଶରଣଂ ନଃ ॥ ୨୬.୨୪ ॥

ମାତରପୀତକୁଚେଽରୁଣଶୈଲା-
ଧୀଶ୍ଵରଭାମିନି ଭାମହନୀୟେ ।
ସାଧୁ ଵିଧାୟ ସମର୍ପୟତେ ତେ
ଦୋଧକମାଲ୍ୟମିଦଂ ଗଣନାଥଃ ॥ ୨୬.୨୫ ॥ 650

%c07-q3/Sarada.Susarla/uma-c07-q3-itrans.txt medskip

ସପ୍ତଵିଂଶଃ ସ୍ତବକଃ
ପ୍ରଚଣ୍ଡଚଣ୍ଡୀ (ଶିଖରିଣୀଵୃତ୍ତମ୍)

ଵିଧୁନ୍ଵନ୍ଧ୍ଵାନ୍ତାନି ପ୍ରତିଦିଶମଧର୍ମଂ ପରିହରଁ-
ଚ୍ଛ୍ରିୟଂ ଵ୍ୟାତନ୍ଵାନସ୍ସପଦି ଶମୟନ୍ ଦୁଃଖପଟଲମ୍ ।
ସହସ୍ରାରାମ୍ଭୋଜେ ଦ୍ରଵମସଦୃଶଂ ମେ ପ୍ରଜନୟନ୍
ପ୍ରଚଣ୍ଡାୟାଶ୍ଚଣ୍ଡ୍ୟାସ୍ସିତହସିତଲେଶୋ ଵିଜୟତେ ॥ ୨୭.୧ ॥

ଅରୀଣାଂ ଶୀର୍ଷେଷୁ ଜ୍ଵଲିତଦଵକୀଲୀନ୍ଦ୍ରସଦୃଶଂ
ଵିନମ୍ରାଣାଂ ଶୀର୍ଷେଷ୍ଵମୃତକରବିମ୍ବେନ ତୁଲିତମ୍ ।
ଵିରୋଧିଧ୍ଵାନ୍ତାନାଂ ତରୁଣତରଣିପ୍ରାଭଵହରଂ
ପ୍ରଚଣ୍ଡାୟାଶ୍ଚଣ୍ଡ୍ୟାଶ୍ଚରଣମସତାଂ ହନ୍ତୁ ଵିଭଵମ୍ ॥ ୨୭.୨ ॥

ଭଜେ ଭାସାଂ ଶାଲାଂ ନିଖିଲଧିଷଣାନାଂ ଜନିଭୁଵଂ
ବଲାନାମାଧାତ୍ରୀଂ ନିଖିଲଭୁଵନେନ୍ଦ୍ରସ୍ୟ ଦୟିତାମ୍ ।
ଭଜନ୍ତେ ୟାଂ ଗୀତୈର୍ମଧୁସମୟମାଦ୍ୟାତ୍ପିକଵଧୂ-
କଲାଲାପା ହୃଦ୍ୟୈର୍ହୟଵଦନପଙ୍କେରୁହଦୃଶଃ ॥ ୨୭.୩ ॥

ଜ୍ଵଲନ୍ତୀ ତେଜୋଭିର୍ମହିଷମଥନେ ୟା ତଵ ତନୁର୍-
ଲସନ୍ତୀ ଲାଵଣ୍ୟୈର୍ଗିରିଶରମଣେ ୟା ତଵ ତନୁଃ ।
ଵିନା କ୍ରୋଧପ୍ରୀତି ନ କିମପି ତୟୋର୍ଭେଦକମଭୂତ୍
ତୟୋରାଦ୍ୟା ଦୁର୍ଗା ଭଵତି ଲଲିତାଽନ୍ୟା ମୁନିନୁତେ ॥ ୨୭.୪ ॥

ସହସ୍ରଂ ଭାନୂନାଂ ଭଵତି ଦିଵାସାନାମଧିପତେଃ
ସହସ୍ରଂ ଶୀର୍ଷାଣାଂ ଭଵତି ଭୁଜଗାନାମଧିପତେଃ ।
ସହସ୍ରଂ ନେତ୍ରାଣାଂ ଭଵତି ଵିବୁଧାନାମଧିପତେଃ
ସହସ୍ରଂ ବାହୂନାଂ ଭଵତି ସମୟେ ହୈମଵତି ତେ ॥ ୨୭.୫ ॥

ପ୍ରସନ୍ନୋ ଵକ୍ତ୍ରେନ୍ଦୁର୍ନ ଚ ନୟନୟୋଃ କୋଽପ୍ୟରୁଣିମା
ନ କମ୍ପୋ ବିମ୍ବୋଷ୍ଠେ ସ୍ମିତମପି ଲସତ୍କାଶଵିଶଦମ୍ ।
ସରୋଜାଭଃ ପାଣିଃ କିଣଵିରହିତଃ କୋମଲତମୋ
ଜ୍ଵଲଚ୍ଛୂଲଂ ତ୍ଵାସୀଜ୍ଜନନି ତାଵ ଶୁମ୍ଭାୟ ଭୟଦମ୍ ॥ ୨୭.୬ ॥

ଵଧେ ଶୁମ୍ଭସ୍ୟାସୀତ୍ତଵ ଜନନି ୟା କାଚନ ତନୁର୍-
ଦଧାନାଽଗ୍ର୍ୟାଃ ଶକ୍ତୀଃ ଶଶିକିରଣସାରୋପମରୁଚିଃ ।
ଇମାଂ ଧ୍ୟାୟଂ ଧ୍ୟାୟଂ ସ୍ମରହରସଖି ଵ୍ୟାକୁଲମିଦଂ
ମନୋ ମେ ଵିଶ୍ରାନ୍ତିଂ ଭଜତି ଭଜତାଂ କଲ୍ପଲତିକେ ॥ ୨୭.୭ ॥

ୟଦି ତ୍ଵଂ ସଂହାରେ ପଟୁରସି ସଵିତ୍ରି ତ୍ରିଜଗତ-
ସ୍ତଦେତତ୍ତ୍ଵାଂ ୟାଚେ ସରସିରୁହଗର୍ଭାଦିଵିନୁତେ ।
ଇମେ ମେ ପାପ୍ମାନୋ ଭଗଵତି ନଦନ୍ତୋ ବହୁଵିଧା-
ସ୍ତଦେଷୁ ପ୍ରଖ୍ୟାତଂ ପ୍ରତିଭୟତମଂ ଦର୍ଶୟ ବଲମ୍ ॥ ୨୭.୮ ॥

ବିଭେଦୋରଃ କ୍ରୋଧାତ୍କନକକଶିପୋରବ୍ଧିତନୟା-
କୁଚଗ୍ରାଵୋଲ୍ଲୀଢୈରତିଶିତଶିଖୈର୍ୟଃ କିଲ ନଖୈଃ ।
ତ୍ଵୟା ଦତ୍ତା ଶକ୍ତିର୍ନରହରିଶରୀରାୟ ଜଗତାଂ
ଵିନେତ୍ରେ ପୁଂସେଽସ୍ମୈ ଜନନି ରଣରଙ୍ଗସ୍ଥଲରମେ ॥ ୨୭.୯ ॥

ଅଜେୟସ୍ତ୍ରୈଲୋକ୍ୟପ୍ରକଟିତପତାକଃ ପଲଭୁଜାଂ
ବିଡୌଜା ୟତ୍କାରାଗୃହପରିଚୟୀ ପଙ୍କ୍ତିଵଦନଃ ।
ସହସ୍ରାରଂ ସାକ୍ଷାଦ୍ଧୃତନରଶରୀରଂ ତମଜୟତ୍
ତଵୈଵାଵେଶେନ ପ୍ରିୟପରଶୁରମ୍ବ ଦ୍ଵିଜଶିଶୁଃ ॥ ୨୭.୧୦ ॥

ତ୍ଵଦୀୟା ସା ଶକ୍ତିସ୍କକଲଜଗଦନ୍ତେଽପ୍ୟନଲସା
ପୁରା କାର୍ୟସ୍ୟାନ୍ତେ ତନୟମୟି ହିତ୍ଵା ନୃପରିପୁମ୍ ।
ଅଵିକ୍ଷତ୍କାକୁତ୍ସ୍ଥଂ ଦଶମୁଖକୁଲୋନ୍ମାଥଵିଧୟେ
ସହସ୍ରାଂଶୁଂ ହିତ୍ଵା ଶଶିନମିଵ ଘସ୍ରେ ଗଲତି ଭା ॥ ୨୭.୧୧ ॥

ହୃତେ ଲୋକଵ୍ରାତେ ଭଗଵତି ଭଵତ୍ୟୈଵ ସ ପୁରା-
ମରିଃ କୀର୍ତିଂ ଲବ୍ଧୁଂ ଚତୁରମତିରାୟାତି ସମୟେ ।
ତ୍ଵୟା ଲୋକତ୍ରାଣେ ଜନନି ରଚିତେ ରାକ୍ଷସବଧାଦ୍
ୟଶୋଽଵାପ୍ତୁଂ ଵିଷ୍ଣୁର୍ମିଲତି ଚ କୁତୋଽପ୍ୟେଷ ନିପୁଣଃ ॥ ୨୭.୧୨ ॥

ସ୍ଵରୂପଂ ତେ ଵଜ୍ରଂ ଵିୟତି ରଜସାଂ ସୂକ୍ଷ୍ମମହସା-
ମୁପାଧିସ୍ତେ ସ୍ତୋମୋ ଭଵତି ଚପଲା କାଽପି ତନୁଭା ।
ଅରୁଦ୍ଧା ତେ ଵ୍ୟାପ୍ତିର୍ବଲମଖିଲଦତ୍ତଂ ବଲନିଧେଃ
ସହସ୍ରାଂଶଃ ସ୍ଵସ୍ୟ ପ୍ରଭଵସି ସମସ୍ତସ୍ୟ ଚ ଶିଵେ ॥ ୨୭.୧୩ ॥

ୟତଃ କାଲଵ୍ୟାଜାତ୍ପଚସି ଭୁଵନଂ ଵୈଦ୍ୟୁତମହଃ-
ପ୍ରଭାଵାତ୍କାଲୀଂ ତ୍ଵାମୟି ଵିଦୁରତଃ ପଣ୍ଡିତଵରାଃ ।
ପ୍ରଭୋଃ ଶସ୍ତ୍ରଂ ଭୂତ୍ଵା ଦହସି ୟଦରୀନ୍ଵଜ୍ରଵପୁଷା
ପ୍ରଚଣ୍ଡାଂ ଚଣ୍ଡୀଂ ତଦ୍ଭଗଵତି ଭଣନ୍ତ୍ୟକ୍ଷୟବଲେ ॥ ୨୭.୧୪ ॥

ଅୟି ତ୍ଵାମେଵେନ୍ଦ୍ରଂ କଥୟତି ମୁନିଃ କଶ୍ଚିଦଜରେ
ତ୍ଵୟା ଶସ୍ତ୍ରାଢ୍ୟଂ ତଂ ଭଣତି ତୁ ପରସ୍ତତ୍ତ୍ଵଵିଦୃଷିଃ ।
ୟୁଵାଂ ମାତାପୁତ୍ରୌ ଭଗଵତି ଵିଭାଜ୍ୟୌ ନ ଭଵତସ୍-
ତତୋ ଧୀନାଂ ଦ୍ଵେଧା ଵିବୁଧଜନଗୋଷ୍ଠୀଷୁ ଗତୟଃ ॥ ୨୭.୧୫ ॥

ଵିକୁର୍ଵାଣା ଵିଶ୍ଵଂ ଵିଵିଧଗୁଣଭେଦୈଃ ପରିଣମଦ୍
ଵିଧୁନ୍ଵାନା ଭାଵାନ୍ ଭୁଵନଗତିରୋଧାୟ ଭଵତଃ ।
ଵିତନ୍ଵାନା ଶର୍ଵଂ ଚଲଵଦଚଲଂ କାଚିଦଵିତୁଂ
ଵିଚିନ୍ଵାନା ଜନ୍ତୋଃ କୃତଲଵମପୀଶା ଵିଜୟତେ ॥ ୨୭.୧୬ ॥

ପ୍ରଭା ଭାନୋର୍ୟଦ୍ଵଦ୍ଭଵସି ସକଲସ୍ୟାପି ତପନୀ
ପ୍ରଚଣ୍ଡା ଶକ୍ତିଃ ସତ୍ୟଖିଲଭୁଵନେଶସ୍ୟ ତପତଃ ।
ସୁଧାଂଶୋର୍ଜ୍ୟୋତ୍ସ୍ନେଵ ପ୍ରମଦୟସି ଚେତଃ ପ୍ରଵିଶତୋ
ଭଵନ୍ତୀ ଭୂତାଦେର୍ଦହରକୁହରଂ ମୋଦଲହରୀ ॥ ୨୭.୧୭ ॥

ପ୍ରଚଣ୍ଡା ଗୌରୀ ଵା ତ୍ଵମସି ଵସୁରୁଦ୍ରାର୍କଵିନୁତେ
ସ ଭୀମଃ ଶମ୍ଭୁର୍ଵା ଵିଭୁରଭୟଦଃ ପାଦସୁହୃଦାମ୍ ।
ତୟୋରେକଂ ରୂପଂ ତଵ ସହଵିଭୋଃ ଖେଲତି ମହ-
ତ୍ୟମୁଷ୍ମିନ୍ନାକାଶେ ଧଵଲମହସି କ୍ରୀଡତି ପରମ୍ ॥ ୨୭.୧୮ ॥

ଵିଭକ୍ତା ୟା ଦ୍ଵେଧା ତ୍ଵମସି ଗଗନେ ଶୀତମହସ-
ସ୍ତଥା ରମ୍ୟେ ବିମ୍ବେ ଜ୍ଵଲିତଲଲିତସ୍ତ୍ରୀତନୁଵିଧା ।
ତୟୋର୍ବ୍ରୂହୀଶାନେ ଜନନି କତମା ମେ ଜନନଭୂଃ
ପୁରାଜନ୍ମନ୍ୟାସୀଦ୍ଵିକଟମଥଵୋଗ୍ରୈଵ ସୁଷୁଵେ ॥ ୨୭.୧୯ ॥

ଦୃଶୋର୍ଭେଦାଦ୍ ଦୃଷ୍ଟେର୍ନ ଭଵତି ଭିଦା କାଽପି କରୟୋର୍-
ନ ଭେଦାଦ୍ଭିନ୍ନଂ ସ୍ୟାତ୍କୃତମଭିଵିମାନୈକ୍ୟଵଶତଃ ।
ଭିଦା ତନ୍ଵୋରେଵଂ ନ ଭଵତି ଭିଦାୟୈ ତଵ ଶିଵେ
ଵିୟଦ୍ଦେଶେ ଚଣ୍ଡ୍ୟାଂ ସିତମହସି ଗୌର୍ୟାଂ ଚ ଭଵତି ॥ ୨୭.୨୦ ॥

ତଵ ଚ୍ଛିନ୍ନଂ ଶୀର୍ଷଂ ଵିଦୁରଖିଲଧାତ୍ର୍ୟାଗମଵିଦୋ
ମନୁଷ୍ୟାଣାଂ ମସ୍ତେ ବହୁଲତପସା ୟଦ୍ଵିଦଲିତେ ।
ସୁଷୁମ୍ନାୟାଂ ନାଡ୍ୟାଂ ତନୁକରଣସମ୍ପର୍କରହିତା
ବହିଶ୍ଶକ୍ତ୍ୟା ୟୁକ୍ତା ଵିଗତଚିରନିଦ୍ରା ଵିଲସସି ॥ ୨୭.୨୧ ॥

ଉତାହୋ ତନ୍ଵଙ୍ଗ୍ୟାଂ ଭୃଗୁକୁଲଵିଧାତ୍ର୍ୟାଂ ପିତୃଗିରା
ତନୂଜେନଚ୍ଛିନ୍ନେ ଶିରସି ଭୟଲୋଲାକ୍ଷି ନଲିନେ ।
ନ୍ୟଧାସ୍ତେଜୋ ଭୀମଂ ନିଜମୟି ୟଦକ୍ଷୁଦ୍ରମନଘଂ
ତଦାହୁସ୍ତ୍ଵାମମ୍ବ ପ୍ରଥିତଚରିତେ କୃତ୍ତଶିରସମ୍ ॥ ୨୭.୨୨ ॥

ହୁତଂ ଧାରାଜ୍ଵାଲାଜଟିଲଚଟୁଲେ ଶସ୍ତ୍ରଦହନେ
ତପସ୍ଵିନ୍ୟାଃ କାୟଂ ଭଗଵତି ୟଦାଽମ୍ବ ତ୍ଵମଵିଶଃ ।
ତଦା ତସ୍ୟାଃ କଣ୍ଠପ୍ରଗଲଦସୃଜଃ କୃତ୍ତଶିରସଃ
କବନ୍ଧେନ ପ୍ରାପ୍ତୋ ଭୁଵନଵିନୁତଃ କୋଽପି ମହିମା ॥ ୨୭.୨୩ ॥

ନିଧେସ୍ତ୍ଵତ୍ତୋ ହୃତ୍ଵା ଭଗଵତି ନ ଲଜ୍ଜେ ଭୁଵି ସୃଜନ୍
ରସକ୍ଷୋଣୀର୍ଵାଣୀସ୍ତ୍ଵଦମଲୟଶସ୍ସୌରଭଜୁଷଃ ।
ନୃପୋଦ୍ୟାନାତ୍ସୂନୋତ୍କରମପହରନ୍ ଭକ୍ତିନଟନଂ
ଵିତନ୍ଵାନସ୍ତସ୍ମୈ ମୁହୁରୁପହରଁତ୍ସେଵକ ଇଵ ॥ ୨୭.୨୪ ॥

ଦଧାନାସ୍ସନ୍ତୋଷଂ ମନସି ସୁକଵୀନାମତିତରାଂ
ଦଦାନାଃ ପ୍ରତ୍ୟଗ୍ରଂ ଵିବୁଧସଦସେ ଭାଵମଲଘୁମ୍ ।
କୁଲାନାମୁତ୍ସାହଂ ସପଦି ଵିଦଧାନାଶ୍ଶିଵଵଧୂ-
ପରାଣାଂ ଶୋଭନ୍ତାଂ ଜଗତି ଶିଖରିଣ୍ୟୋ ଗଣପତେଃ ॥ ୨୭.୨୫ ॥ 675

%c07-q4/Padmaja Pandalaneni/umasahasramu\_676-700।txt medskip

ଅଷ୍ଟାଵିଂଶଃ ସ୍ତବକଃ
ରେଣୁକାଦିଵର୍ଣନମ୍ (ଵସନ୍ତତିଲକାଵୃତ୍ତମ୍)

ଅନ୍ତର୍ଵଲକ୍ଷପରିଧିଭ୍ରମମାଦଧାନୋ
ଵକ୍ତ୍ରସ୍ୟ ପୂର୍ଣତୁହିନଦ୍ୟୁତିମଣ୍ଡଲସ୍ୟ ।
ହାସଃ କରୋତୁ ଭଵତାଂ ପରମଂ ପ୍ରମୋଦଂ
ଶୁଦ୍ଧାନ୍ତପଙ୍କଜଦୃଶଃ ପ୍ରମଥେଶ୍ଵରସ୍ୟ ॥ ୨୮.୧ ॥

ସମ୍ମୋହନାନି ତୁହିନାଂଶୁକଲାଧରସ୍ୟ
ସଞ୍ଜୀଵନାନି ସରସୀରୁହସାୟକସ୍ୟ ।
ସନ୍ଦୀପନାନି ଵିନତେଷୁ ଜନେଷୁ ଶକ୍ତେଃ
ସଂହର୍ଷଣାନି ମମ ସନ୍ତୁ ଶିଵାସ୍ମିତାନି ॥ ୨୮.୨ ॥

ପାପାନି ମେ ହରତୁ କାଚନ କୃତ୍ତଶୀର୍ଷା
ମାତା ପଦାମ୍ବୁଜଭୁଜିଷ୍ୟଵିତୀର୍ଣହର୍ଷା ।
ୟା ଭକ୍ତଲୋକଵରଦାନଵିଧୌ ଵିନିଦ୍ରା
ଵାସଂ କମଣ୍ଡଲୁଧୁନୀପୁଲିନେ କରୋତି ॥ ୨୮.୩ ॥

ଷଷ୍ଠାଵତାରଜନନାଵନିରେକଵୀରା
ଭୀମା ଧୁନୋତୁ ଦୁରିତାନି ଗଣାଧିପସ୍ୟ ।
ୟା ଭକ୍ତରକ୍ଷଣଵିଧାଵତିଜାଗରୂକା
ପୁଣ୍ୟେ କମଣ୍ଡଲୁଧୁନୀପୁଲିନେ ଚକାସ୍ତି ॥ ୨୮.୪ ॥

ଛେଦାୟ ଚେଦ୍ ଗତରଜା ମୁନିରାଦିଦେଶ
ଚିଚ୍ଛେଦ ଚେଦ୍ବହୁଗୁଣସ୍ତନୟଃ ସଵିତ୍ରୀମ୍ ।
ଦାହ୍ୟଂ ଶରୀରମଖିଲପ୍ରଭୁରୀଶଶକ୍ତିଃ
ୟଦ୍ୟାଵିଵେଶ ଚ କଥା ପରମାଦ୍ଭୁତେୟମ୍ ॥ ୨୮.୫ ॥

ପୁତ୍ରଃ ପ୍ରିୟସ୍ତଵ ଶିରଃ ସହସା ଚକର୍ତ
କୃତ୍ତା ଚ ହର୍ଷଭରିତା ଭଵତୀ ନନର୍ତ ।
ନୋ ତସ୍ୟ ପାପମପି ନୋ ତଵ କାଽପି ହାନିଃ
ନାଶୋଽସ୍ୟ ହା ଭୁଜଭୁଵାମଭଵଦ୍ଵିପାକଃ ॥ ୨୮.୬ ॥

ଅମ୍ବୈଵ ସା ସୁରଭିର୍ଜୁନଭୂପତିର୍ୟାଂ
ଵୀର୍ୟାଜ୍ଜହାର ସ ଚ ଭାର୍ଗଵ ଆଜହାର ।
ତସ୍ୟା ହତେଃ ପରଗୃହସ୍ଥିତିରେଵ ହେତୁଃ
ଗନ୍ଧର୍ଵଦର୍ଶନକଥା ରିପୁକଲ୍ପିତୈଵ ॥ ୨୮.୭ ॥

ଛିନ୍ନାନି ନୋ କତି ଶରୀରଭୃତାଂ ଶିରାଂସି
ତତ୍ପୂଜ୍ୟତେ ଜଗତି ରୈଣୁକମେଵ ଶୀର୍ଷମ୍ ।
କୃତ୍ତାଃ କଲେଵରଵତାଂ କତି ନାଭୟୋ ନ
ଚେତୋ ଧିନୋତି ସୁରଭିର୍ମୃଗନାଭିରେକଃ ॥ ୨୮.୮ ॥

ପ୍ରାଣା ଵସନ୍ତି ଶିରସା ରହିତେ ଶରୀରେ
ଲୀଲାସରୋଜତି ଶିରସ୍ତୁ କରେଽସ୍ୟ କୃତ୍ତମ୍ ।
ତନ୍ନିଘ୍ନମେତଦଖିଲଂ ଚ ଧିୟୈଵ ଧୀରାଃ
ପଶ୍ୟନ୍ତୁ ନନ୍ଦନଗରେ ତଦିଦଂ ଵିଚିତ୍ରମ୍ ॥ ୨୮.୯ ॥

ପ୍ରାଣେଶ୍ଵରୀ ଵିଧିପୁରେ ଲସତଃ ପୁରାରେ-
ରଙ୍ଗୀକରୋତୁ ଶରଣାଗତିମମ୍ବିକା ମେ ।
ଲବ୍ଧଂ ନିପୀୟ ୟଦୁରୋରୁହକୁମ୍ଭଦୁଗ୍ଧଂ
ସମ୍ବନ୍ଧମୂର୍ତିରଭଵତ୍କଵିଚକ୍ରଵର୍ତୀ ॥ ୨୮.୧୦ ॥

ଅପ୍ରାପ୍ୟ ଲୋକରଚନାଵନପାତନେଷୁ
ୟସ୍ୟାସ୍ତ୍ରୟୋଽପି ପୁରୁଷାଃ କରୁଣାକଟାକ୍ଷମ୍ ।
ନୈଵେଶତେ କିମପି ସା ଜଗଦେକମାତା
ଭଦ୍ରା ପରା ପ୍ରକୃତିରସ୍ତ୍ଵଘନାଶିନୀ ନଃ ॥ ୨୮.୧୧ ॥

ରାକା ପ୍ରବୋଧଶଶିନୋ ହୃଦୟୋଦୟସ୍ୟ
ନୌକା ଵିପଜ୍ଜଲନିଧୌ ପତତାଂ ଜନାନାମ୍ ।
ଵେଦଧ୍ଵଜସ୍ୟ ଲଲିତା ତ୍ରିରୁଚିଃ ପତାକା
କାଚିନ୍ମମାସ୍ତୁ ଶରଣଂ ଶିଵମୂଲଟୀକା ॥ ୨୮.୧୨ ॥

ମୌଲୌ ମହେନ୍ଦ୍ରସୁଦୃଶସ୍ସୁମନୋନିକାୟ-
ସଂଶୋଭିତେ ସଦସି ମାନ୍ୟ ଇଵାଭିଜାତଃ ।
ରେଣୁଶ୍ଚ ୟଚ୍ଚରଣଭୂର୍ଲଭତେଽଗ୍ରପୀଠଂ
ତ୍ରାଣାୟ ସା ଭଵତୁ ଭୂତପତେର୍ଵଧୂର୍ନଃ ॥ ୨୮.୧୩ ॥

ଅମ୍ବାଵୃଣୋତି ପରିତୋଽପ୍ୟୟମନ୍ଧକାରୋ
ନାତ୍ମାନମେଵ ମମ କିଂ ତୁ କୁଲଂ ଚ ଦେଶମ୍ ।
ଶୀଘ୍ରଂ ମଦୀୟହୃଦୟୋଦୟପର୍ଵତାଗ୍ରେ
ଶ୍ରୀମାନୁଦେତୁ ତଵ ପାଦମୟୂଖମାଲୀ ॥ ୨୮.୧୪ ॥

କଷ୍ଟଂ ଧୁନୋତୁ ମମ ପର୍ଵତପୁତ୍ରିକାୟାଃ
ପ୍ର୍ତ୍ୟଗ୍ରପଙ୍କରୁହବାନ୍ଧଵକାନ୍ତିକାନ୍ତମ୍ ।
ଅମ୍ଭୋରୁହାସନମୁଖାମରମୌଲିରତ୍ନ-
ଜ୍ୟୋତିର୍ଵିଶେଷିତଗୁଣଂ ଚରଣାରଵିନ୍ଦମ୍ ॥ ୨୮.୧୫ ॥

ଜ୍ୟାଶିଞ୍ଜିତାନି ସମରେ ଗିରିଶଂ ଜିଗୀଷୋଃ
କାମସ୍ୟ ହଂସନିଵହସ୍ୟ ନିମନ୍ତ୍ରଣାନି ।
ଧୁନ୍ଵନ୍ତୁ ମେ ଵିପଦମଦ୍ରିକୁମାରିକାୟାଃ
ପାଦାରଵିନ୍ଦକଟକକ୍ଵଣିତାନି ତାନି ॥ ୨୮.୧୬ ॥

ୟଃ ସର୍ଵଲୋକମଥନଂ ମହିଷଂ ଜିଗାୟ
ୟସ୍ୟୈଵ କର୍ମ ଦମନଂ ଚ ତଦନ୍ତକସ୍ୟ ।
ନାରୀନରାକୃତିଭୃତୋ ମହସସ୍ତମଙ୍ଘ୍ରିଂ
ମଞ୍ଜୀରନାଦମଧୁରଂ ଶରଣଂ ଵ୍ରଜାମି ॥ ୨୮.୧୭ ॥

ଆପନ୍ମହୋଗ୍ରଵିଷରାଶିନିମଗ୍ନମେତଂ
ଦୀନଂ ତ୍ଵଦୀୟଚରଣଂ ଶରଣଂ ପ୍ରପନ୍ନମ୍ ।
ଉଦ୍ଧର୍ତୁମମ୍ବ କରୁଣାପରିପୂର୍ଣଚିତ୍ତେ
ଵିତ୍ତେଶମିତ୍ରକୁଲନାରି ତଵୈଵ ଭାରଃ ॥ ୨୮.୧୮ ॥

ଲୋକାଧିରାଜ୍ଞି ପତିତଂ ଵିପଦନ୍ଧକୂପେ
ସଂରୁଦ୍ଧଦୃଷ୍ଟିମଭିତସ୍ତିମିରଚ୍ଛଟାଭିଃ ।
ମାତଃ ସମୁଦ୍ଧର କୃପାକଲିତେ ମୃଡାନି
ପୁତ୍ରଂ କରେଣ ଜଗତାମଭୟଙ୍କରେଣ ॥ ୨୮.୧୯ ॥

ଅସ୍ୟ ତ୍ଵଦୀୟପଦପଙ୍କଜକିଙ୍କରସ୍ୟ
ଦୁର୍ଭାଗ୍ୟପାକଵିଫଲୀକୃତପୌରୁଷସ୍ୟ ।
ପ୍ରାଣେଶ୍ଵରି ପ୍ରମଥଲୋକପତେରୁପାୟଂ
ଵୀକ୍ଷସ୍ଵ ତାରଣଵିଧୌ ନିପୁଣେ ତ୍ଵମେଵ ॥ ୨୮.୨୦ ॥

ମୃତ୍ୟୁଞ୍ଜୟୋରୁମଣିପୀଠତଟେ ନିଷଣ୍ଣେ
ତାଟଙ୍କକାନ୍ତିବହୁଲୀକୃତଗଣ୍ଡଶୋଭେ ।
ମାଣିକ୍ୟକଙ୍କଣଲସତ୍କରଵାରିଜାତେ
ଜାତେ କୁଲାଚଲପତେର୍ଜହି ପାତକଂ ନଃ ॥ ୨୮.୨୧ ॥

କିଂ ତେ ଵପୁର୍ଜନନି ତପ୍ତସୁଵର୍ଣଗୌରଂ
କାମାରିମୋହିନି କିମିନ୍ଦୁକଲାଵଲକ୍ଷମ୍ ।
ପାକାରିନୀଲମଣିମେଚକକାନ୍ତ୍ୟୁତାହୋ
ବନ୍ଧୂକପୁଷ୍ପକଲିକାରୁଚି ଵା ସ୍ମରାମି ॥ ୨୮.୨୨ ॥

ତ୍ଵଂ ସୁନ୍ଦରୀ ନୃପତିଜାତିଜିତସ୍ତ୍ଵମମ୍ବା
ଧୂମାଵତୀ ତ୍ଵମଜରେ ଭୁଵନେଶ୍ଵରୀ ତ୍ଵମ୍ ।
କାଲୀ ତ୍ଵମୀଶ୍ଵରି ଶୁକାର୍ଭକଧାରିଣୀ ତ୍ଵଂ
ତାରା ତ୍ଵମାଶ୍ରିତଵିପଦ୍ଦଲନାସିଧାରା ॥ ୨୮.୨୩ ॥

ତ୍ଵଂ ଭୈରଵୀ ଭଗଵତୀ ବଗଲାମୁଖୀ ତ୍ଵଂ
ରାମା ଚ ସା କମଲକାନନଚାରିଣୀ ତ୍ଵମ୍ ।
କୈଲାସଵାସିନୟନାମୃତଭାନୁରେଖେ
କୋ ଵେଦ ତେ ଜନନି ଜନ୍ମଵତାଂ ଵିଭୂତୀଃ ॥ ୨୮.୨୪ ॥

ଧୁନ୍ଵନ୍ତୁ ସର୍ଵଵିପଦଃ ସୁକୃତପ୍ରିୟାଣାଂ
ଧୁନ୍ଵନ୍ତୁ ଚାଖିଲସୁଖାନ୍ୟଘଲାଲସାନାମ୍ ।
ଆଵର୍ଜ୍ୟ ଭୂରିକରୁଣଂ ପୁରଜିତ୍ତରୁଣ୍ୟା-
ଶ୍ଚିତ୍ତଂ ଵସନ୍ତତିଲକାଃ କଵିଭର୍ତୁରେତାଃ ॥ ୨୮.୨୫ ॥ 700

॥ ସମାପ୍ତଂ ଚ ସପ୍ତମଂ ଶତକମ୍ ॥

%c08-q1/Sesha.talpasAyi.Vadapalli/c08\_q1\_itrans.txt medskip

ଅଷ୍ଟମଂ ଶତକମ୍
ଏକୋନତ୍ରିଂଶଃ ସ୍ତବକଃ
ନଵଵିଧଭଜନମ୍ (ମଦଲେଖାଵୃତ୍ତମ୍)

ଆୟୁଷ୍ୟା ଭୁଵନାନାଂ ଚକ୍ଷୁଷ୍ୟାସ୍ତ୍ରିପୁରାରେଃ ।
କୁର୍ଵନ୍ତୁ ପ୍ରମଦଂ ନଃ ପାର୍ଵତ୍ୟାଃ ସ୍ମିତଲେଶାଃ ॥ ୨୯.୧ ॥

ନାତ୍ୟର୍ଘାଣି ନିରର୍ଥଂ ନେତଵ୍ୟାନି ଦିନାନି ।
ଅମ୍ବାୟାଶ୍ଚରିତାନି ଶ୍ରୋତଵ୍ୟାନ୍ୟନଘାନି ॥ ୨୯.୨ ॥

ଉଦ୍ୟୋଗଂ କୁରୁ ଜିହ୍ଵେ ସଂହର୍ତୁଂ ଦୁରିତାନି ।
ପୂତାନ୍ୟଦ୍ରିସୁତାୟାଃ କୀର୍ତ୍ୟନ୍ତାଂ ଚରିତାନି ॥ ୨୯.୩ ॥

ଶ୍ରୀସକ୍ତିର୍ଵିନିଵାର୍ୟା ଚିନ୍ତା କାଽପି ନ କାର୍ୟା ।
ନିତ୍ୟଂ ଚେତସି ଧାର୍ୟା ଦୀନାନାଂ ଗତିରାର୍ୟା ॥ ୨୯.୪ ॥

ଜ୍ଞାତୁଂ ୟା ଗଦିତୁଂ ୟା ଶ୍ରୋତୁଂ ୟା ଶ୍ଵସିତୁଂ ୟା ।
ଦ୍ରଷ୍ଟୁଂ ୟାଽନ୍ତରଶକ୍ତିସ୍ତିଷ୍ଠାତ୍ର ସ୍ମୃତିରେଷା ॥ ୨୯.୫ ॥

ଵିଭ୍ରାଜୀନଶତାଭଂ ବିଭ୍ରାଣଂ ଶିରସୀନ୍ଦୁମ୍ ।
ସ୍ମର୍ତଵ୍ୟଂ ଜଗଦମ୍ବାରୂପଂ ଵା ଧୁତପାପମ୍ ॥ ୨୯.୬ ॥

ୟେଷାଂ ସ୍ୟାତ୍ପରିତପ୍ତଂ ପ୍ରାୟଶ୍ଚିତ୍ତମଘେନ ।
ରୁଦ୍ରାଣୀପଦସେଵା ପ୍ରାୟଶ୍ଚିତ୍ତମମୀଷାମ୍ ॥ ୨୯.୭ ॥

ତଦ୍ଦୀପ୍ତଂ ପଦୟୁଗ୍ମଂ ସେଵେ ୟତ୍ର ଭଵନ୍ତି ।
ଅଙ୍ଗୁଲ୍ୟୋ ଦଶ ଭାନୋର୍ଭାନୂନାଂ ଶତକାନି ॥ ୨୯.୮ ॥

ନୋ ଚେତ୍ କୁପ୍ୟସି କିଞ୍ଚିଦ୍ ୟାଚେ ଵାଚମତୀତେ ।
ସେଵାଂ ମାତରୁରୀକୁର୍ଵିଷ୍ଟଂ ମେ କୁରୁ ମା ଵା ॥ ୨୯.୯ ॥

ଶର୍ଵାଣୀଚରଣାର୍ଚାପୀଠଂ ପୀଵରକାଣାମ୍ ।
ଵଧ୍ୟସ୍ଥାନମିଦଂ ସ୍ୟାଦୁଗ୍ରାଣାଂ ଦୁରିତାନାମ୍ ॥ ୨୯.୧୦ ॥

ସ୍କନ୍ଦାମ୍ବାପଦପୀଠସ୍ପୃଷ୍ଟଂ ଚେଦ୍ବଲମାପ୍ତମ୍ ।
ଏକୈକଂ ସୁମମଂହସ୍ଵେକୈକଂ କୁଲିଶଂ ସ୍ୟାତ୍ ॥ ୨୯.୧୧ ॥

ଅମ୍ଭୋଜୋପମମଙ୍ଘ୍ରିଂ ଶମ୍ଭୋଃ ପଟ୍ଟମହିଷ୍ୟାଃ ।
ଅଂହସ୍ସଂହତିମୁଗ୍ରାଂ ସଂହର୍ତୁଂ ପ୍ରଣମାମଃ ॥ ୨୯.୧୨ ॥

ୟେ କାଲୀପଦଵେଷଂ ନାଲୀକଂ ପ୍ରଣମନ୍ତି ।
ନୈଷାଂ କିଞ୍ଚିଦଶକ୍ୟଂ ନାଲୀକଂ ମମ ଵାକ୍ୟମ୍ ॥ ୨୯.୧୩ ॥

ଵାସସ୍ତେଽତ୍ର ସମାପ୍ତଃ ପଙ୍କେତୋ ଵ୍ରଜ ଦୂରମ୍ ।
କାଲୀଂ ଶଙ୍କରନାରୀଂ କାଲେଽସ୍ମିନ୍ ପ୍ରଣମାମଃ ॥ ୨୯.୧୪ ॥

ଆଶା ରେ ତଦଵସ୍ଥା ଭୂଭାଗନଟତସ୍ତେ ।
କାମାନାଂ କ୍ଵ ନୁ ପାରଃ କାମାରେର୍ନମ ନାରୀମ୍ ॥ ୨୯.୧୫ ॥

ଧନ୍ୟାସ୍ତେ ତୁହିନାଦ୍ରେଃ କନ୍ୟାଂ ୟେ ପ୍ରଣମନ୍ତି ।
ଅନ୍ୟାନୁନ୍ନତଶୀର୍ଷାନ୍ ମନ୍ୟେ ଵନ୍ୟଲୁଲାୟାନ୍ ॥ ୨୯.୧୬ ॥

ପାଦାମ୍ଭୋଜମୁମାୟାଃ ପ୍ରାଜ୍ଞାସ୍ସମ୍ପ୍ରଣମନ୍ତଃ ।
ଗୃହ୍ଣନ୍ତି ଶ୍ରିୟମସ୍ମିନ୍ ରାଜନ୍ତୀଂ ନିଜଶକ୍ତ୍ୟା ॥ ୨୯.୧୭ ॥

ମନ୍ଦାରାଦ୍ରିସୁତାଙ୍ଘ୍ରୀ ଦାତାରୌ ସଦୃଶୌ ସ୍ତଃ ।
ଉତ୍କଣ୍ଠୈଃ ଫଲମାଦ୍ୟାଦନ୍ୟସ୍ମାନ୍ନତକଣ୍ଠୈଃ ॥ ୨୯.୧୮ ॥

କାଲସ୍ୟାପି ଵିଜେତୁଃ ଶର୍ଵାଣ୍ୟାଶ୍ଚରଣସ୍ୟ ।
ଏଷୋଽହଂ କଵିଲୋକକ୍ଷ୍ମାପାଲୋଽସ୍ମି ଭୁଜିଷ୍ୟଃ ॥ ୨୯.୧୯ ॥

ରକ୍ତେ ଦର୍ଶୟ ରାଗଃ ରୁଦ୍ରାଣୀପଦପଦ୍ମେ ।
ଚେତଃ ପୁଷ୍ୟତି ଶୋଭାଂ ସାରସ୍ସାରଵତୋଽଗ୍ରେ ॥ ୨୯.୨୦ ॥

ସଂଶୋଧ୍ୟାଗମଜାଲଂ ସାରାଂଶଂ ପ୍ରଵଦାମଃ ।
ସ୍କନ୍ଦାମ୍ବାପଦଭକ୍ତିର୍ଭୁକ୍ତ୍ୟୈ ଚାଥ ଵିମୁକ୍ତ୍ୟୈ ॥ ୨୯.୨୧ ॥

ଵାତ୍ସଲ୍ୟଂ ଗତିହୀନେଷ୍ଵାୟୁଷ୍ୟଂ ସୁକୃତସ୍ୟ ।
ଭୂୟୋଭିଃ ସହ ସଖ୍ୟଂ ଶ୍ରୀହେତୁଷ୍ଵିହ ମୁଖ୍ୟମ୍ ॥ ୨୯.୨୨ ॥

ଶ୍ଲାଘ୍ୟଂ ପୁଷ୍ୟତି କାମଂ ପ୍ରେମା ସ୍ଵପ୍ରମଦାୟାମ୍ ।
ଶର୍ଵାଣୀପଦଭକ୍ତିର୍ନିତ୍ୟାୟ ପ୍ରମଦାୟ ॥ ୨୯.୨୩ ॥

ଏକୈଵଂ ବହୁଭେଦା ଭିନ୍ନତ୍ଵାଦ୍ଵିଷୟାଣାମ୍ ।
ରତ୍ୟାଖ୍ୟା ଦ୍ରୁତିରନ୍ତଃ ସା ସୂତେ ଫଲଭେଦାନ୍ ॥ ୨୯.୨୪ ॥

ହର୍ଷଂ କଞ୍ଚନ ମାତୁର୍ମତ୍ତୋ ଭକ୍ତିଭରେଣ ।
ତନ୍ଵନ୍ନେଷ ଵିଧତ୍ତାଂ ହେରମ୍ବୋ ମଦଲେଖାଃ ॥ ୨୯.୨୫ ॥ 725

%c08-q2/Pattabhi.Nadimpally/enimidava\_satakamu\_dvitiya\_stabakamu\_726\_750।txt medskip

ତ୍ରିଂଶଃ ସ୍ତବକଃ
ମାନସପୂଜା (ପ୍ରମାଣିକାଵୃତ୍ତମ୍)

କୃତେନ ସା ନିସର୍ଗତୋ ଧୃତେନ ନିତ୍ୟମାନନେ ।
ସିତେନ ଶୀତଶୈଲଜା ସ୍ମିତେନ ଶଂ ତନୋତୁ ମେ ॥ ୩୦.୧ ॥

ପ୍ରତିକ୍ଷଣଂ ଵିନଶ୍ଵରାନୟେ ଵିସୃଜ୍ୟ ଗୋଚରାନ୍ ।
ସମର୍ଚୟେଶ୍ଵରୀଂ ମନୋ ଵିଵିଚ୍ୟ ଵିଶ୍ଵଶାୟିନୀମ୍ ॥ ୩୦.୨ ॥

ଵିଶୁଦ୍ଧଦର୍ପଣେନ ଵା ଵିଧାରିତେ ହୃଦାଽମ୍ବ ମେ ।
ଅୟି ପ୍ରୟଚ୍ଛ ସନ୍ନିଧିଂ ନିଜେ ଵପୁଷ୍ୟଗାତ୍ମଜେ ॥ ୩୦.୩ ॥

ପୁରସ୍ୟ ମଧ୍ୟମାଶ୍ରିତଂ ସିତଂ ୟଦସ୍ତି ପଙ୍କଜମ୍ ।
ଅଜାଣ୍ଡମୂଲ୍ୟମସ୍ତୁ ତେ ସୁରାର୍ଚିତେ ତଦାସନମ୍ ॥ ୩୦.୪ ॥

ଅଖଣ୍ଡଧାରୟା ଦ୍ରଵନ୍ନଵେନ୍ଦୁଶେଖରପ୍ରିୟେ ।
ମଦୀୟଭକ୍ତିଜୀଵନଂ ଦଧାତୁ ତେଽମ୍ବ ପାଦ୍ୟତାମ୍ ॥ ୩୦.୫ ॥

ଵିଵାସନୌଘମାନସପ୍ରସାଦତୋୟମମ୍ବ ମେ ।
ସମସ୍ତରାଜ୍ଞି ହସ୍ତୟୋରନର୍ଘମର୍ଘ୍ୟମସ୍ତୁ ତେ ॥ ୩୦.୬ ॥

ମହେନ୍ଦ୍ରୟୋନିଚିନ୍ତନାଦ୍ ଭଵନ୍ଭଵସ୍ୟ ଵଲ୍ଲଭେ ।
ମହାରସୋ ରସସ୍ତ୍ଵୟା ନିପୀୟତାଂ ଵିଶୁଦ୍ଧୟେ ॥ ୩୦.୭ ॥

ସହସ୍ରପତ୍ରପଙ୍କଜଦ୍ରଵତ୍ସୁଧାଜଲେନ ସା ।
ସହସ୍ରପତ୍ରଲୋଚନା ପିନାକିନୋଽଭିଷିଚ୍ୟତେ ॥ ୩୦.୮ ॥

ମମାର୍ଜିତଂ ୟଦିନ୍ଦ୍ରିୟୈଃ ସୁଖଂ ସୁଗାତ୍ରି ପଞ୍ଚଭିଃ ।
ତଦମ୍ବ ତୁଭ୍ୟମର୍ପିତଂ ସୁଧାଖ୍ୟପଞ୍ଚକାୟତାମ୍ ॥ ୩୦.୯ ॥

ଵସିଷ୍ଠଗୋତ୍ରଜନ୍ମନା ଦ୍ଵିଜେନ ନିର୍ମିତଂ ଶିଵେ ।
ଇଦଂ ଶରୀରମେଵ ମେ ତଵାସ୍ତୁ ଦିଵ୍ୟମଂଶୁକମ୍ ॥ ୩୦.୧୦ ॥

ଵିଚିତ୍ରସୂକ୍ଷ୍ମତନ୍ତୁଭୃନ୍ମମେୟମାତ୍ମନାଡିକା ।
ସୁଖପ୍ରବୋଧଵିଗ୍ରହେ ମଖୋପଵୀତମସ୍ତୁ ତେ ॥ ୩୦.୧୧ ॥

ମହଦ୍ଵିଚିନ୍ଵତୋ ମମ ସ୍ଵକୀୟତତ୍ତ୍ଵଵିତ୍ତିଜମ୍ ।
ଇଦଂ ତୁ ଚିତ୍ତସୌରଭଂ ଶିଵେ ତଵାସ୍ତୁ ଚନ୍ଦନମ୍ ॥ ୩୦.୧୨ ॥

ମହେଶନାରିନିଃଶ୍ଵସଁସ୍ତଥାଽୟମୁଚ୍ଛ୍ଵସଁସ୍ତଦା ।
ତଵାନିଶଂ ସମର୍ଚକୋ ମମାସ୍ତୁ ଜୀଵମାରୁତଃ ॥ ୩୦.୧୩ ॥

ଵିପାକକାଲପାଵକପ୍ରଦୀପ୍ତପୁଣ୍ୟଗୁଗ୍ଗୁଲୁଃ ।
ସୁଵାସନାକ୍ୟଧୂପଭୃଦ୍ ଭଵତ୍ଵୟଂ ମମାମ୍ବ ତେ ॥ ୩୦.୧୪ ॥

ଗୁହାଵତାରମୌନିନା ମୟୀଶ୍ଵରି ପ୍ରଦୀପିତା ।
ଇୟଂ ପ୍ରବୋଧଦୀପିକା ପ୍ରମୋଦଦାୟିକାଽସ୍ତୁ ତେ ॥ ୩୦.୧୫ ॥

ଇମାମୟି ପ୍ରିୟାତ୍ପ୍ରିୟାଂ ମହାରସାମହଙ୍କୃତିମ୍ ।
ନିଵେଦୟାମି ଭୁଜ୍ୟତାମିୟଂ ତ୍ଵୟା ନିରାମୟେ ॥ ୩୦.୧୬ ॥

ସରସ୍ଵତୀ ସୁଧାୟତେ ମନୋ ଦଧାତି ପୂଗତାମ୍ ।
ହୃଦେଵ ପତ୍ରମମ୍ବିକେ ତ୍ରୟଂ ସମେତ୍ୟ ତେଽର୍ପ୍ୟତେ ॥ ୩୦.୧୭ ॥

ଵିନୀଲତୋୟଦାନ୍ତରେ ଵିରାଜମାନଵିଗ୍ରହା ।
ନିଜାଵିଭୂତିରସ୍ତୁ ତେ ତଟିଲ୍ଲତା ପ୍ରକାଶିକା ॥ ୩୦.୧୮ ॥

ସ୍ଵରୋଽୟମନ୍ତରମ୍ବିକେ ଦ୍ଵିରେଫଵତ୍ସ୍ଵରଁସ୍ତଦା ।
ମମାଭିମନ୍ତ୍ର୍ୟ ଧୀସୁମଂ ଦଦାତି ଦେଵି ତେଽଙ୍ଘ୍ରୟେ ॥ ୩୦.୧୯ ॥

ତଵାର୍ଚନଂ ନିରନ୍ତରଂ ୟତୋ ଵିଧାତୁମସ୍ମ୍ୟହମ୍ ।
ନ ଵିଶ୍ଵନାଥପତ୍ନି ତେ ଵିସର୍ଜନଂ ଵିଧୀୟତେ ॥ ୩୦.୨୦ ॥

ଵିୟୋଗ ଇନ୍ଦୁଧାରିଣା ନ ଚେହ ଵିଶ୍ଵନାୟିକେ ।
ମଦମ୍ବ ସୋଽତ୍ର ରାଜତେ ତଟିଲ୍ଲତାଶିଖାନ୍ତରେ ॥ ୩୦.୨୧ ॥

ଇଦଂ ଶରୀରମେକକଂ ଵିଭାଵ୍ୟ ନଵ୍ୟମନ୍ଦିରମ୍ ।
ଵିହାରମତ୍ର ସେଶ୍ଵରା ଭଵାନି କର୍ତୁମର୍ହସି ॥ ୩୦.୨୨ ॥

ଜଡେଷ୍ଵିଵାଲସେଷ୍ଵିଵ ପ୍ରୟୋଜନଂ ନ ନିଦ୍ରୟା ।
ଵିହର୍ତୁମେଵ ୟାଚ୍ୟସେ ହୃଦୀଶସଦ୍ମରାଜ୍ଞି ମେ ॥ ୩୦.୨୩ ॥

ଅୟଂ ତଵାଗ୍ରିମଃ ସୁତଃ ଶ୍ରିତୋ ମନୁଷ୍ୟଵିଗ୍ରହମ୍ ।
ତନୂଜଵେଶ୍ମସୌଷ୍ଠଵଂ ମୃଡାନି ପଶ୍ୟ କୀଦୃଶମ୍ ॥ ୩୦.୨୪ ॥

ଗଣେଶିତୁର୍ମହାକଵେରସୌ ପ୍ରମାଣିକାଵଲୀ ।
ମନୋମ୍ବୁଜେ ମହେଶ୍ଵରୀପ୍ରପୂଜନେଷୁ ଶବ୍ଦ୍ୟତାମ୍ ॥ ୩୦.୨୫ ॥ 750

%c08-q3/Sesha.talpasAyi.Vadapalli/c08\_q3\_itrans.txt medskip

ଏକତ୍ରିଂଶଃ ସ୍ତବକଃ
ନାମଵୈଭଵମ୍ (ଉପଜାତିଵୃତ୍ତମ୍)

ଦରସ୍ମିତଶ୍ରୀକପଟା ସୁପର୍ଵ-
ସ୍ରୋତସ୍ଵିନୀ ପର୍ଵତଜାସ୍ୟଜାତା ।
ପଙ୍କଂ ମମ କ୍ଷାଲୟତାଦଶେଷଂ
ସଂସାରମଗ୍ନେ ହୃଦୟେ ଵିଲଗ୍ନମ୍ ॥ ୩୧.୧ ॥

ହରାଟ୍ଟହାସେନ ସମଂ ମିଲିତ୍ଵା
ପିତ୍ରେଵ ପୁତ୍ରୋ ଗୁରୁଣେଵ ଶିଷ୍ୟଃ ।
ଵିଭ୍ରାଜମାନୋ ମମ ଶଂ କରୋତୁ
ହାସାଙ୍କୁରଃ କେସରିଵାହନାୟାଃ ॥ ୩୧.୨ ॥

ନମଶ୍ଶିଵାୟୈ ଭଣତ ଦ୍ଵିପାଦୋ
ୟୁଷ୍ମାକମଗ୍ର୍ୟାଂ ଧିଷଣାଂ ଦଧତ୍ୟୈ ।
ଆଧାରଚକ୍ରେଶିତୁରମ୍ବିକାୟୈ
ବ୍ରହ୍ମାଣ୍ଡଚକ୍ରସ୍ୟ ଵିଧାୟିକାୟୈ ॥ ୩୧.୩ ॥

ନଦନ୍ତି ଗାଵୋଽପି ଵିଶିଷ୍ଟକାଲେ-
ଷ୍ଵମ୍ବେତି ୟୋ ନାହ୍ଵୟତେ ସ କିଂ ନା ।
ଲକ୍ଷ୍ୟଂ ପୁନଃ ପ୍ରାଣଵଦସ୍ତୁ ସର୍ଵଂ
ସର୍ଵସ୍ୟ ଚାନ୍ତର୍ହି ପରାଽସ୍ତି ଶକ୍ତିଃ ॥ ୩୧.୪ ॥

ଆତ୍ମନ୍ୟୁତାନ୍ୟତ୍ର ଵିଧାୟ ଲକ୍ଷ୍ୟଂ
ତାଂ ଶକ୍ତିମାଦ୍ୟାମଖିଲେଷୁ ସୁପ୍ତାମ୍ ।
ୟାଵତ୍ପ୍ରବୋଧଂ ମୁହୁରାହ୍ଵୟସ୍ଵ
ପ୍ରବୁଧ୍ୟତେ ସା ୟଦି କିନ୍ନ୍ଵସାଧ୍ୟମ୍ ॥ ୩୧.୫ ॥

ୟେ ନାମ ଶାନ୍ତିଂ ପରମାଂ ଵହନ୍ତୋ
ନାମାନି ଶୀତାଚଲପୁତ୍ରିକାୟାଃ ।
ସଙ୍କୀର୍ତୟନ୍ତୋ ଵିଜନେ ଵସନ୍ତି
ଜୟନ୍ତତାତାଦପି ତେ ଜୟନ୍ତି ॥ ୩୧.୬ ॥

ନାମାନି ସଙ୍କୀର୍ତୟତାଂ ଜନାନାଂ
କାରୁଣ୍ୟଵତ୍ୟାଃ କରିଵକ୍ତ୍ରମାତୁଃ ।
ପୁନର୍ଜନନ୍ୟା ଜଠରେ ନିଵାସା-
ଦାୟାସଵତ୍ତା ଭଵତୀତି ମିଥ୍ୟା ॥ ୩୧.୭ ॥

ପାପୈସ୍ସମନ୍ତାତ୍ସମଭିଦ୍ରୁତୋଽପି
ଵିଶ୍ଵସ୍ୟ ତେ ଵିକ୍ରମମସ୍ମି ଧୀରଃ ।
ନ ଚେଦ୍ରସଜ୍ଞେ ଭଵତୀ ବ୍ରଵୀତି
ନାମାନି ଶୀତାଂଶୁଭୃତୋ ହତୋଽହମ୍ ॥ ୩୧.୮ ॥

ଦେହୀତି ସମ୍ପଲ୍ଲଵଦର୍ପିତାନାଂ
ଦ୍ଵାରେଷୁ ଘୋଷଂ କୁରୁଷେ ପରେଷାମ୍ ।
ଭଵାନି ଭଦ୍ରେ ଭୁଵନାମ୍ବ ଦୁର୍ଗେ
ପାହୀତି ନାୟାତି କିମମ୍ବ ଜିହ୍ଵେ ॥ ୩୧.୯ ॥

ଵାକ୍ୟାନି ଵକ୍ତୁଂ ୟଦି ତେ ରସଜ୍ଞେ
ରସୋଜ୍ଜ୍ଵଲାନି ଵ୍ୟସନଂ ଗରୀୟଃ ।
କିଂ ଵା ନମୋନ୍ତାନି ସୁଧାଂ କିରନ୍ତି
ନାମାନି ନୋ ସନ୍ତି କୁମାରମାତୁଃ ॥ ୩୧.୧୦ ॥

ୟଦ୍ ଗୀୟତେ ଶୈଲସୁତାଭିଧାନଂ
ତଦେଵ ବୋଧ୍ୟଂ ସୁକୃତଂ ପ୍ରଧାନମ୍ ।
ଅଜ୍ଞାନିଲୋକସ୍ୟ କୃତେ ଭଣନ୍ତି
ୟଜ୍ଞାଦିପୁଣ୍ୟାନି ପରାଣି ଵିଜ୍ଞାଃ ॥ ୩୧.୧୧ ॥

ସାମ୍ନା ପ୍ରୟୁକ୍ତେନ ଜଗଦ୍ଵଶେ ସ୍ୟାତ୍
ନାମ୍ନା ସଦୋକ୍ତେନ ଜଗଦ୍ଵିନେତ୍ରୀ ।
ଵେଦୋଭୟଂ ସମ୍ୟଗିଦଂ କୃତୀ ୟୋ
ଭଵେ ଭୟଂ ତସ୍ୟ କୁତୋଽପି ନ ସ୍ୟାତ୍ ॥ ୩୧.୧୨ ॥

ସଙ୍କୀର୍ତନାତ୍ତୁଷ୍ୟତି ଶର୍ଵୟୋଷା
ତୁଷ୍ଟା ତ୍ଵଭୀଷ୍ଟଂ ନ ଦଦାତି ନୈଷା ।
ଇମଂ ତ୍ଵଵିଜ୍ଞାୟ ଜଗତ୍ୟୁପାୟଂ
ବ୍ରଜନ୍ତ୍ୟପାୟଂ ବହୁଧା ମନୁଷ୍ୟାଃ ॥ ୩୧.୧୩ ॥

ଭାଷେ ଭୁଜଙ୍ଗାଭରଣପ୍ରିୟାୟା
ନାମାନି କାମାନିତରାନ୍ ଵିହାୟ ।
ଅପି ପ୍ରପଞ୍ଚାତିଗଘୋରକୃତ୍ୟଂ
କରୋତୁ କିଂ ମାଂ ତରଣେରପତ୍ୟମ୍ ॥ ୩୧.୧୪ ॥

ୟଜ୍ଞେନ ଦାନୈଃ କଠିନଵ୍ରତୈର୍ଵା
ସିଦ୍ଧିଂ ୟ ଇଚ୍ଛେତ୍ସ ଗ୍ରହୀତୁମିଚ୍ଛେତ୍ ।
ମାତୁଃ ଶୟାନୋଽଙ୍କତଲେ ଶଶାଙ୍କଂ
ମହେଶ୍ଵରୀଂ କୀର୍ତୟତସ୍ତୁ ସିଦ୍ଧିଃ ॥ ୩୧.୧୫ ॥

ରହସ୍ୟତନ୍ତ୍ରାଣି ଵିଵିଚ୍ୟ ଦୂରଂ
ଵ୍ୟାଜଂ ଵିମୁଚ୍ୟ ପ୍ରଵଦାମି ସାରମ୍ ।
ନାମୈଵ କାମାରିପୁରନ୍ଧ୍ରିକାୟାଃ
ସିଦ୍ଧେର୍ନିଦାନଂ ନ ମଖୋ ନ ଦାନମ୍ ॥ ୩୧.୧୬ ॥

ପୀୟୂଷମୀଷନ୍ମଧୁରଂ ଭଣନ୍ତି
ୟେ ନାମ ରାମାଧରପାନଲୋଲାଃ ।
କାମାରିରାମାହ୍ଵୟଗାନଲୋଲାଃ
କଵୀଶ୍ଵରାଃ କାଞ୍ଜିକମାଲପନ୍ତି ॥ ୩୧.୧୭ ॥

ସୁଧାଘଟଃ କୋଽପ୍ୟଧରୋ ଵଧୂନାଂ
କଵିସ୍ସୁଧାତୋୟଧରୋଽଭିଧେୟଃ ।
ଅୟଂ ସୁଧାଵୀଚିଵିତାନମାଲୀ
ନାମପ୍ରଣାଦୋ ନଗକନ୍ୟକାୟାଃ ॥ ୩୧.୧୮ ॥

ସୁରାଲୟେ ଭାତିତରାଂ ସୁଧୈକା
ସୁଧା ପରା ଵାଚି ମହାକଵୀନାମ୍ ।
ବିମ୍ବାଧରେ କଞ୍ଜଦୃଶାଂ ସୁଧାଽନ୍ୟା
ସୁଧେତରା ନାମନି ଲୋକମାତୁଃ ॥ ୩୧.୧୯ ॥

ମାଧୁର୍ୟମାଭାତ୍ୟଧରେ ଵଧୂନାଂ
ଚକୋରବନ୍ଧୋଃ ଶକଲେ ପ୍ରସାଦଃ ।
ତ୍ରିସ୍ରୋତସୋ ଵାରିଣି ପାଵନତ୍ଵଂ
ତ୍ରୟଂ ଚ ନାମ୍ନି ତ୍ରିପୁରାମ୍ବିକାୟାଃ ॥ ୩୧.୨୦ ॥

ୟା ମାଧୁରୀ ପ୍ରେମଭରେଣ ଦଷ୍ଟେ
ଜାଗର୍ତି କାନ୍ତାଵରଦନ୍ତଚେଲେ ।
ସା ଦୃଶ୍ୟତେ ଭକ୍ତିଭରେଣ ଗୀତେ
ଧରାଧରାଧୀଶସୁତାଭିଧାନେ ॥ ୩୧.୨୧ ॥

ୟତ୍ତେ ଜଗଲ୍ଲମ୍ପଟକେଽପି ଵର୍ଣା-
ସ୍ତନ୍ମେଽମୃତଂ ନାମ ନଗାତ୍ମଜାୟାଃ ।
ଲାଲାମୟୋ ୟୋ ମମ ତଂ ବ୍ରଵୀଷି
ସୁଧାମୟଂ ସ୍ତ୍ରୀଦଶନଚ୍ଛଦଂ ତ୍ଵମ୍ ॥ ୩୧.୨୨ ॥

ଉଚ୍ଚାରୟୋଚ୍ଚାଟିତପାତକାନି
ନାମାନି ଜିହ୍ଵେ ଭୁଵନସ୍ୟ ମାତୁଃ ।
ତଦା ଵଦାମୋ ମଧୁଚୂତରମ୍ଭା-
ରାମାଧରାସ୍ତେ ରୁଚୟେ ୟଦି ସ୍ୟୁଃ ॥ ୩୧.୨୩ ॥ ⁠ ⁠ @@773 ⁠ ⁠

ଆକ୍ଷେପମିକ୍ଷୋରଧିକଂ ଵିଧତ୍ତେ
ପୀୟୂଷଦୋଷାନଭିତୋଽଭିଧତ୍ତେ ।
କାନ୍ତାଧରାରବ୍ଧଦୁରନ୍ତଵାଦଃ
କପର୍ଦିକାନ୍ତାଵରନାମନାଦଃ ॥ ୩୧.୨୪ ॥

ଵିଶ୍ଵାସହୀନୈଃ ସୁତରାମବୋଧ୍ୟଂ
ନାମାନୁଭାଵଂ ନଗକନ୍ୟକାୟାଃ ।
ଜୟନ୍ତୁ ସିଦ୍ଧୈରପି ଗୀୟମାନଂ
ଗାୟନ୍ତ୍ୟ ଏତା ଉପଜାତୟୋ ନଃ ॥ ୩୧.୨୫ ॥ 775

%c08-q4/Jayaram.Manda/itrans.txt medskip

ଦ୍ଵାତ୍ରିଂଶଃ ସ୍ତବକଃ
ଭକ୍ତିର୍ୟୋଗଶ୍ଚ (ଆର୍ୟାଗୀତିଵୃତ୍ତମ୍)

ଵିଦଧାତୁ ସମ୍ପଦଂ ମେ
ସକଲଜଗନ୍ନାଥନୟନହାରିଜ़୍ୟୋତ୍ସ୍ନଃ ।
ଶୀତୋଽନ୍ଧକାରହାରୀ
ହାସଶଶୀ କଶ୍ଚିଦଙ୍କରହିତୋ ମାତୁଃ ॥ ୩୨.୧ ॥

କରୁଣାରସାର୍ଦ୍ରହୃଦୟା
ହୃଦୟାନ୍ତରନିର୍ୟଦଚ୍ଛଵୀଚିସ୍ମେରା ।
ପ୍ରମଥେଶ୍ଵରପ୍ରିୟତମା
ପାଦପ୍ରେଷ୍ୟସ୍ୟ ଭଵତୁ କଲ୍ୟାଣୟ ॥ ୩୨.୨ ॥

କାରଣକାର୍ୟଵିଭେଦାଦ୍
ରୂପଦ୍ଵିତୟଂ ତଵାମ୍ବ ୟଦୃଷିପ୍ରୋକ୍ତମ୍ ।
ତତ୍ରୈକଂ ଭର୍ତୁମିଦଂ
ଵିହର୍ତୁମନ୍ୟତ୍ତୁ ଭୁତଭର୍ତୁର୍ଲଲନେ ॥ ୩୨.୩ ॥

ଶ୍ରୋତୁଂ ସ୍ତୋତ୍ରଵିଶେଷଂ
ଭକ୍ତଵିଶେଷଂ ଚ ବୋଦ୍ଧୁମୟମୀଦୃଗିତି ।
ଦାତୁଂ ଚ ଵାଞ୍ଛିତାର୍ଥଂ
ତଵ ମାତଶ୍ଚନ୍ଦ୍ରଲୋକରୂପଂ ଭଵତି ॥ ୩୨.୪ ॥

କୀଶକିଶୋରନ୍ୟାୟାତ୍
କାରଣରୂପଂ ତଵାମ୍ବ ୟୋଗୀ ଧତ୍ତେ ।
ଓତୁକିଶୋରନ୍ୟାୟାଦ୍
ଭକ୍ତଂ ପରିପାସି କାର୍ୟରୂପେଣ ତ୍ଵମ୍ ॥ ୩୨.୫ ॥

ଦୃଢଧାରଣା ନ ଚେତ୍ତ୍ଵ-
ଚ୍ଚ୍ୟଵତେ ୟୋଗୀ ମହେଶନୟନଜ୍ୟୋତ୍ସ୍ନେ ।
ନାୟଂ ମମେତି ଭାଵ-
ସ୍ତଵ ୟଦି ସଦ୍ୟଃ ସଵିତ୍ରି ଭକ୍ତଂ ତ୍ୟଜସି ॥ ୩୨.୬ ॥

ଶିଥିଲଧୃତିର୍ୟୋଗୀ ସ୍ୟାଦ୍
ବାହ୍ୟୈର୍ଵିଷୟୈର୍ନିତାନ୍ତମାକୃଷ୍ଟୋ ୟଃ ।
ସ୍ଵୀୟମତିର୍ଲୁପ୍ୟତି ତେ
ଭକ୍ତେଽହନ୍ତାପ୍ରସାରକଲୁଷେ ମାତଃ ॥ ୩୨.୭ ॥

ସାହଙ୍କୃତିର୍ନ ଭକ୍ତିଃ
ସବାହ୍ୟଵିଷୟା ଧୃତିର୍ନ ସର୍ଵେଶ୍ଵରି ତେ ।
ଅଵିଜାନନ୍ତାଵେତଦ୍
ଭକ୍ତୋ ୟୋଗୀ ଚ ନୈଵ ସିଦ୍ଧୌ ସ୍ୟାତାମ୍ ॥ ୩୨.୮ ॥

ଵ୍ୟକ୍ତିତ୍ଵାଦପି ୟସ୍ୟ
ପ୍ରିୟଂ ତ୍ଵଦୀୟଂ ସଵିତ୍ରି ପାଦାମ୍ଭୋଜମ୍ ।
ସୋଽଦ୍ଭୁତଶକ୍ତିର୍ଭକ୍ତୋ
ଭଗଵତି କିଂ କିଂ କରୋତି ନାସ୍ମିନ୍ ଜଗତି ॥ ୩୨.୯ ॥

ଵ୍ୟକ୍ତିତ୍ଵଲୋଭଵିଵଶେ
ସିଦ୍ଧଃ କାମୋଽପି ଭଵତି ସମଵଚ୍ଛିନ୍ନଃ ।
ପ୍ରାପ୍ତୋଽପି ସଲିଲରାଶିଂ
ସଲିଲାନି ଘଟଃ କିୟନ୍ତି ସଙ୍ଗୃହ୍ଣୀୟାତ୍ ॥ ୩୨.୧୦ ॥

ଜୀଵନ୍ନେଵ ନରୋ ୟଃ
ସାୟୁଜ୍ୟଂ ତେ ପ୍ରୟାତି ଶମ୍ଭୋଃ ପ୍ରମଦେ ।
ସର୍ଵେ କାମାସ୍ତସ୍ୟ
ପ୍ରୟାନ୍ତି ଵଶମାଶୁ ଵୀତଵିଵିଧଭ୍ରାନ୍ତେଃ ॥ ୩୨.୧୧ ॥

ଵ୍ୟକ୍ତିତ୍ଵଂ ତୁଭ୍ୟମିଦଂ
ମନୀଷୟା ମେ ପ୍ରଦତ୍ତମଧିକାରିଣ୍ୟା ।
ବହୁକାଲଭୋଗବଲତୋ
ଵିଵଦତି ଦେହୋ ମଦମ୍ବ କିଂ କରଵାଣି ॥ ୩୨.୧୨ ॥

ସ୍ଥୂଲେନ ଵର୍ଷ୍ମଣା ସହ
ସୂକ୍ଷ୍ମା କଲହଂ ମତିର୍ନ କର୍ତୁଂ ଶକ୍ତା ।
ସୁତରାଂ ବଲଵତି ମାତର୍-
ବଲାଦ୍ ଗୃହାଣ ସ୍ଵୟଂ ତ୍ଵମସ୍ମାତ୍ସ୍ଵୀୟମ୍ ॥ ୩୨.୧୩ ॥

ସର୍ଵେଷାଂ ହୃଦି ୟସ୍ମାତ୍-
ତ୍ଵମସି ପ୍ରାଣାତ୍ମିକାମ୍ବ ହେତୋସ୍ତସ୍ମାତ୍ ।
ଅଖିଲପ୍ରାଣ୍ୟାରାଧନ-
ମାରାଧନନିର୍ଵିଶେଷମଗପୁତ୍ରି ତଵ ॥ ୩୨.୧୪ ॥

ଜୁହ୍ଵତି କେଽପି କୃଶାନୌ
ତସ୍ମାତ୍ପ୍ରାପ୍ତିସ୍ତଵେତି ସମ୍ପଶ୍ୟନ୍ତଃ ।
ଅପରେ ପ୍ରାଣିଷୁ ଜୁହ୍ଵତି
ସାକ୍ଷାତ୍ପ୍ରାଣାତ୍ମିକାଽସି ତେଷ୍ଵନ୍ତରିତି ॥ ୩୨.୧୫ ॥

ପ୍ରାଣିଷ୍ଵପି ୟଃ ପ୍ରାଣଂ
ଭୂତାଦିମନାଦିମାତ୍ମନି ସ୍ଥିତମନଘମ୍ ।
ସତତମୁପାସ୍ତେ ୟୋଗୀ
ତସ୍ମିନ୍ ହୋମେନ ତେଽମ୍ବ ତୃପ୍ତିସ୍ସୁଲଭା ॥ ୩୨.୧୬ ॥

ଆତ୍ମନି ୟୋଽମ୍ବ ଶ୍ରେଷ୍ଠେ
ପ୍ରାଣେ ପ୍ରାଣାନ୍ ଜୁହୋତି ଦହରାଭିମୁଖଃ ।
ତ୍ଵଦ୍ରୂପେ ହତପାପେ
ତେନ ଜିତଂ ସକଲମୀଶଚିତ୍ତାରାମେ ॥ ୩୨.୧୭ ॥

ଉପସଂହୃତମଖିଲେଭ୍ୟୋ
ଵିଷୟେଭ୍ୟୋ ନିର୍ନିମେଷମନ୍ତଃକୃଷ୍ଟମ୍ ।
ହୃଦି ଦୃଢପଦେନ ଚକ୍ଷୁ-
ସ୍ତ୍ଵଦ୍ରୂପେ ହୂୟତେ ମଦମ୍ବ ପ୍ରାଣେ ॥ ୩୨.୧୮ ॥

ଅନ୍ତସ୍ସ୍ଵରଂ ନିଗୂଢଂ
ଶ୍ରେଷ୍ଠପ୍ରାଣସ୍ୟ ଦେଵି ତଵ ଭାଗସ୍ୟ ।
ଶୃଣ୍ଵଦିଵ ପ୍ରଣଵାଖ୍ୟଂ
ଶ୍ରଵଣଂ ତତ୍ରୈଵ ଭଵତି ଜଗଦମ୍ବ ହୁତମ୍ ॥ ୩୨.୧୯ ॥

ସର୍ଵେଷାଂ ମନ୍ତ୍ରାଣାଂ
ସ୍ତୋତ୍ରାଣାଂ ଚେଶଚିତ୍ତନାଥେ ପ୍ରକୃତୌ ।
ଗୂଢଂ ସଦା ସ୍ଵରନ୍ତ୍ୟାଂ
ପ୍ରାଣନ୍ତ୍ୟାଂ ତ୍ଵୟି ଜୁହୋତି ମୌନୀ ଵାଚମ୍ ॥ ୩୨.୨୦ ॥

ଦେହେ ସ୍ଖଲତି ମନଶ୍ଚେତ୍
ଵିଷୟେଷୁ ହୁତଂ ଦଧାତି ଵିଷୟାତ୍ମତ୍ଵମ୍ ।
ଆଵୃତ୍ତଂ ୟଦି ଦେହାଦ୍
ସୂକ୍ଷ୍ମାୟାଂ ତ୍ଵୟି ହୁତଂ ତ୍ଵଦାକୃତି ଭଵତି ॥ ୩୨.୨୧ ॥

ତ୍ଵଗ୍ରସନଘ୍ରାଣାନା-
ମନୁଭୂତୀଃ ପ୍ରାଣଶକ୍ତିସାତ୍କୁର୍ଵାଣଃ ।
କଂ ନାର୍ପୟତେ ଭୋଗଂ
ଭଗଵତି ତେ ସର୍ଵଲୋକପାର୍ଥିଵଵନିତେ ॥ ୩୨.୨୨ ॥

ଗଚ୍ଛନ୍ କୁର୍ଵନ୍ ଵିସୃଜନ୍
ରମମାଣାଶ୍ଚାମ୍ବ ସକଲଲୋକାଧୀଶେ ।
ୟଃ କେଵଲାଂ କ୍ରିୟାମପି
ଚିନ୍ତୟତେ ତେନ ନିତ୍ୟୟଜ୍ଞଃ କ୍ରିୟତେ ॥ ୩୨.୨୩ ॥

ସର୍ଵେଷାମଗ୍ନୀନାଂ
ପ୍ରାଣାଗ୍ନିସ୍ତଵ ଵିଭୂତିରୁକ୍ତଃ ଶ୍ରେଷ୍ଠଃ ।
ତସ୍ମିନ୍ହୁତଂ ତୁ ସୁହୁତଂ
ଦ୍ରଵ୍ୟାଣି ଧିୟଃ କ୍ରିୟାଶ୍ଚ ମନ୍ତ୍ରଃ ପ୍ରଣଵଃ ॥ ୩୨.୨୪ ॥

ଆର୍ୟାଗୀତୀନାମୟ-
ମଧରୀକୃତମଧୁସୁଧାଧିମାଧୁର୍ୟରସଃ ।
ଵର୍ଗୋ ଗଣପତିଵଦନା-
ନ୍ନିଷ୍କ୍ରାନ୍ତୋ ଭଵତୁ ଶର୍ଵସୁଦୃଶଃ ପ୍ରୀତ୍ୟୈ ॥ ୩୨.୨୫ ॥ 800

॥ ସମାପ୍ତଂ ଚ ଅଷ୍ଟମଂ ଶତକମ୍ ॥

%c09-q1/Karthik.Sitaram.Tenneti/c09-q1।txt medskip

ନଵମଂ ଶତକମ୍
ତ୍ରୟସ୍ତ୍ରିଂଶଃ ସ୍ତବକଃ
ଜପୋ ୟୋଗୋଽର୍ପଣଂ ଚ (ଵଂଶସ୍ଥଵୃତ୍ତମ୍)

ସୁଧାଂ କିରନ୍ତୋଽଖିଲତାପହାରିଣୀଂ
ତମୋ ହରନ୍ତଃ ପଟଲେନ ରୋଚିଷାମ୍ ।
ଶ୍ରିୟଂ ଦିଶନ୍ତୋ ଦିଶି ଦିଶ୍ୟସଙ୍କ୍ଷୟାଂ
ଜୟନ୍ତି ଶୀତାଦ୍ରିସୁତାସ୍ମିତାଙ୍କୁରାଃ ॥ ୩୩.୧ ॥

କୃପାକଟାକ୍ଷସ୍ତଵ କେନ ଵାଽଽପ୍ୟତେ
ମହେଶଶୁଦ୍ଧାନ୍ତପୁରନ୍ଧ୍ରି କର୍ମଣା ।
ନିରନ୍ତରଂ ମନ୍ତ୍ରଜପେନ ଵା ମତେର୍-
ଵିଶୋଧନେନୋତ ମନୋର୍ପଣେନ ଵା ॥ ୩୩.୨ ॥

ଵିଶୋଧନାଦ୍ଦେଵି ମତେଃ ପ୍ରଗୃହ୍ୟସେ
ମନୋର୍ପଣେନେଶଵଧୁ ପ୍ରସୀଦସି ।
ଜପେନ ମନ୍ତ୍ରସ୍ୟ ଶୁଭସ୍ୟ ଵର୍ଧସେ
ଜଗତ୍ତ୍ରୟୀଧାତ୍ରି କଲେବରାନ୍ତରେ ॥ ୩୩.୩ ॥

ମନଃପ୍ରତାପସ୍ୟ ଭଵତ୍ୟସଂଶୟଂ
ପ୍ରଵର୍ଧନଂ ଵୈଦିକମନ୍ତ୍ରଚିନ୍ତନମ୍ ।
ପ୍ରଶସ୍ୟତେ ପ୍ରାଣମହଃପ୍ରଦୀପନେ
ଦୟାନ୍ଵିତେ ତାନ୍ତ୍ରିକମନ୍ତ୍ରସେଵିତା ॥ ୩୩.୪ ॥

ତଵାମ୍ବିକେ ତାନ୍ତ୍ରିକମନ୍ତ୍ରମୁତ୍ତମଂ
ସ୍ତଵାତିଗଂ ୟଃ କନକାଙ୍ଗି ସେଵତେ ।
ଵିଚିତ୍ରୟନ୍ତ୍ରାଦିଵ ଵୈଦ୍ୟୁତଂ ମହ-
ସ୍ତତୋ ଵିନିର୍ୟଦ୍ ଭୁଵନଂ ଵିଗାହତେ ॥ ୩୩.୫ ॥

ନ ତସ୍ୟ ଚେତୋ ଵିକୃତେର୍ଵଶେ ଭଵେ-
ନ୍ନ ତସ୍ୟ ଦୃଷ୍ଟିର୍ଵିଷୟୈର୍ଵିକୃଷ୍ୟତେ ।
ନ ତସ୍ୟ ରୋଗୈରପକୃଷ୍ୟତେ ଵପୁଃ
ସଵିତ୍ରି ୟସ୍ତେ ଭଜତେ ମହାମନୁମ୍ ॥ ୩୩.୬ ॥

ସ୍ମରନ୍ତି ମାୟାଂ ଗଗନାଗ୍ନିଶାନ୍ତିଭିଃ
ସହାଚ୍ଛଭାସା ସହିତାଭିରମ୍ବିକେ ।
ତଥା ରସଜ୍ଞାଂ ଦ୍ରୁହିଣାଗ୍ନିଶାନ୍ତିଭିର୍-
ଭଣନ୍ତି ଦୋଗ୍ଧ୍ରୀଂ ତୁ ଖଷଷ୍ଠବିନ୍ଦୁଭିଃ ॥ ୩୩.୭ ॥

ଅଭଣ୍ୟତାଦ୍ୟା ଭୁଵନେଶ୍ଵରୀ ବୁଧୈର୍-
ଅନନ୍ତରା ମାତରଗାଦି କାଲିକା ।
ପ୍ରଚଣ୍ଡଚଣ୍ଡୀ ପରିକୀର୍ତିତା ପରା
ତ୍ରୟୋଽପ୍ୟମୀ ତେ ମନଵୋ ମହାଫଲାଃ ॥ ୩୩.୮ ॥

ଉପାଧିଭୂତଂ ଶୁଚି ନାଭସଂ ରଜୋ
ଦଧାତି ସାକ୍ଷାଦ୍ ଭୁଵନେଶ୍ଵରୀପଦମ୍ ।
ତଦାଶ୍ରୟା ଵ୍ୟାପକଶକ୍ତିରଦ୍ଭୁତା
ମନସ୍ଵିନୀ କାଚନ କାଲିକେରିତା ॥ ୩୩.୯ ॥

ଅମର୍ତ୍ୟସାମ୍ରାଜ୍ୟଭୃତଃ ପ୍ରଵର୍ତିକା
ଵିଶାଲଲୋକତ୍ରୟରଙ୍ଗନର୍ତିକା ।
ପରାକ୍ରମାଣାମଧିନାୟିକୋଚ୍ୟତେ
ପ୍ରଚଣ୍ଡଚଣ୍ଡୀତି କଲା ସଵିତ୍ରି ତେ ॥ ୩୩.୧୦ ॥

ସ୍ମରନ୍ମନୁଂ ରୋଦିତି ଭକ୍ତିମାଂସ୍ତଵ
ପ୍ରଗୃହ୍ୟ ପାଦଂ ମୁନିରମ୍ବ ଲମ୍ବତେ ।
ଫଲଂ ଚିରାୟ ପ୍ରଥମଃ ସମାପ୍ନୁୟାତ୍
ପରୋ ମରନ୍ଦଂ ପଦ ଏଵ ଵିନ୍ଦତି ॥ ୩୩.୧୧ ॥

ପଦଂ ତଵାନ୍ଵିଷ୍ଟମନେକଦା ମୁଦା
ହୃଦନ୍ତରେ ସ୍ପୃଷ୍ଟମିଵେଦମମ୍ବିକେ ।
ପଲାୟତେଽଧୋଽହମନନ୍ତରଂ ଶୁଚା
ପରାତ୍ପରେ ରୋଦିମି ମନ୍ତ୍ରଶବ୍ଦତଃ ॥ ୩୩.୧୨ ॥

ଭଣନ୍ତି ସନ୍ତୋ ମରୁତାଂ ସଵିତ୍ରି ତେ
ମହାମନୁଂ ତ୍ଵତ୍ପଦଭାସ୍କରାତପମ୍ ।
ତତୋ ହି ମୂଲାତ୍ସ୍ଵର ଏଷ ନିର୍ଗତ-
ସ୍ତପତ୍ୟଘୌଘଂ ଜରୟନ୍ମହୋମୟଃ ॥ ୩୩.୧୩ ॥

ସଵିତ୍ରି ସାକ୍ଷାଚ୍ଚରଣସ୍ୟ ତେ ପ୍ରଭାଂ
ଵିଧାରୟଁସ୍ତଜ୍ଜନିମୂଲମାର୍ଗଣେ ।
ମୁହୁର୍ମୁହୁସ୍ସୋଽହମଜେ ଧୃତୋଦ୍ୟମଃ
ପଥା ମହର୍ଷୀ ରମଣୋ ବଭାଣ ୟମ୍ ॥ ୩୩.୧୪ ॥

ଅହମ୍ପଦାର୍ଥୋ ୟଦି ଚିଲ୍ଲତା ତତା
କିମେଷ ଦୋଗ୍ଧ୍ରୀମନୁଭାଵତୋଽପରଃ ।
ଅହଂ ୟଦି ପ୍ରାଣନିନାଦଵୈଖରୀ
ନ କୂର୍ଚ ଆଖ୍ୟାତୁମସେତି ଶକ୍ୟତେ ॥ ୩୩.୧୫ ॥

ପରେ ତୁ ୟାଂ ଚେତନଶକ୍ତିମାମନ-
ନ୍ତ୍ୟଭାଣି ସା କୁଣ୍ଡଲିନୀତି ତାନ୍ତ୍ରିକୈଃ ।
ଵିଲକ୍ଷଣା ନାମ ଚମତ୍କୃତିର୍ଜଡାନ୍
ପ୍ରତାରୟତ୍ୟାଗମସାରଦୂରଗାନ୍ ॥ ୩୩.୧୬ ॥

ଭଵତ୍ୟଖଣ୍ଡାନୁଭଵଃ ପ୍ରବୋଧିନା-
ମତୀଵ ସୂକ୍ଷ୍ମାନୁଭଵଶ୍ଚ ୟୋଗିନାମ୍ ।
କରଂ ଗତାସ୍ସର୍ଵଵିଧାଶ୍ଚ ଶେରତେ
ମହେଶ୍ଵରୀମନ୍ତ୍ରପରସ୍ୟ ସିଦ୍ଧୟଃ ॥ ୩୩.୧୭ ॥

ସହସ୍ରସଙ୍ଖ୍ୟାନି ଜନୂଂଷି ଵା ମମ
ପ୍ରିୟାଣି ଭକ୍ତିସ୍ତଵ ଚେଦ୍ଭଵେ ଭଵେ ।
ତଵ ସ୍ମୃତିଂ ଚେଦ୍ ଗଲୟେନ୍ନ ସମ୍ମଦଂ
କରୋତି ମୋକ୍ଷୋଽପି ମମେଶଵଲ୍ଲଭେ ॥ ୩୩.୧୮ ॥

ଵିନୈଵ ଦୃଷ୍ଟିଂ ୟଦି ସତ୍ପ୍ରଶିଷ୍ୟତେ
ନ ସତ୍ତୟାଽର୍ଥଃ ଫଲହୀନୟା ତୟା ।
ଇଦଂ ତୁ ସତ୍ କିନ୍ନ୍ଵସତୋ ଵିଶିଷ୍ୟତେ
ନ ତାତ ମୁକ୍ତୋପଲୟୋସ୍ତଦା ଭିଦା ॥ ୩୩.୧୯ ॥

ଶୁଚାଂ ନିଵୃତ୍ତିର୍ୟଦି ମୁକ୍ତିରିଷ୍ୟତେ
ସୁଖପ୍ରଵୃତ୍ତିର୍ୟଦି ନାତ୍ର ଵିଦ୍ୟତେ ।
ସଦେଵ ଚେତ୍ତତ୍ର ମତିର୍ନ ଭାସତେ
ଜଡଂ ଵିମୁକ୍ତାଦ୍ଵଚସୈଵ ଭିଦ୍ୟତେ ॥ ୩୩.୨୦ ॥

ମତିଃ ପରାଚୀ ଵ୍ୟଵହାରକାରଣଂ
ଭଵେତ୍ପ୍ରତୀଚୀ ପରମାର୍ଥସମ୍ପଦି ।
ଉଭେ ଦିଶୌ ୟସ୍ୟ ମତିର୍ଵିଗାହତେ
ପଦା ଚ ମୂର୍ଧ୍ନା ଚ ସ ସିଦ୍ଧ ଇଷ୍ୟତେ ॥ ୩୩.୨୧ ॥

ଦୃଢଂ ପଦଂ ୟସ୍ୟ ମତେଃ ସଦାଽନ୍ତରେ
ସ ନା ଧିୟୋଽଗ୍ରେଣ ବହିଶ୍ଚରନ୍ନପି ।
ସଵିତ୍ରି ମଗ୍ନସ୍ତ୍ଵୟି ସମ୍ପ୍ରକୀର୍ତ୍ୟତେ
ନ ତସ୍ୟ ଭୀଃ ସଞ୍ଚରତୋଽପି ସଂସୃତେଃ ॥ ୩୩.୨୨ ॥

ଵିଚିନ୍ତନେ ଚିନ୍ତନଶକ୍ତିମଦ୍ଭୁତାଂ
ଵିଲୋକନେ ଲୋକନଶକ୍ତିମୁଜ୍ଜ୍ଵଲାମ୍ ।
ପ୍ରଭାଷଣେ ଭାଷଣଶକ୍ତିମୁତ୍ତମାଂ
ନିଭାଲୟଂସ୍ତ୍ଵାଂ ଵିଷୟୈର୍ନ ଜୀୟତେ ॥ ୩୩.୨୩ ॥

ଵିଲୋକମାନସ୍ୟ ଵିଲୋକନଂ କଵେର୍-
ଵିଲୋକ୍ୟମାନେଷୁ ଵିହାୟ ସକ୍ତତାମ୍ ।
ଵିଲୋଚନେ ସନ୍ନିହିତା ନିରନ୍ତରଂ
ଵିଧୂତଭୀତିର୍ଵିବୁଧସ୍ତୁତା ଶିଵା ॥ ୩୩.୨୪ ॥

ଅୟଂ ଭୟାନାଂ ପରିମାର୍ଜକସ୍ସତାଂ
ସମସ୍ତପାପୌଘନିଵାରଣକ୍ଷମଃ ।
ମନୋଜ୍ଞଵଂଶସ୍ଥଗଣୋ ଗଣେଶିତୁର୍-
ମନୋ ମହେଶାବ୍ଜଦୃଶୋ ଧିନୋତ୍ଵଲମ୍ ॥ ୩୩.୨୫ ॥ 825

%c09-q2/Muralidhar.Kalavacharla/uma\_sahasram\_chap9-q2।txt medskip

ଚତୁସ୍ତ୍ରିଂଶଃ ସ୍ତବକଃ
ପ୍ରାର୍ଥନା (ହରିଣୀଵୄତ୍ତମ୍)

ଵିଦିତମହିମା ଵିଶ୍ଵାଧାନାଦନେକଵିଧାଦ୍ଭୁତାତ୍
ପ୍ରଥିତଚରିତଃ ଶର୍ଵାଲୋକପ୍ରତାପଵିଵର୍ଧନାତ୍ ।
ପ୍ରକଟିତଗୁଣଃ ପାପଧ୍ଵାନ୍ତପ୍ରସାରନିରୋଧନାତ୍
ପ୍ରଦିଶତୁ ଶିଵାହାସୋ ଭାସାଂ ନିଧିଃ କୁଶଲାନି ମେ ॥ ୩୪.୧ ॥

ହୃଦି କରୁଣୟା ପୂର୍ଣା ବାହ୍ଵୋର୍ବଲେନ ମହୀୟସା
ପଦକମଲୟୋର୍ଲକ୍ଷ୍ମ୍ୟା ଭକ୍ତୈର୍ଜନୈରୁପଜୀଵ୍ୟୟା ।
ମୁଖସିତକରେ ଲାଵଣ୍ୟେନ ତ୍ରିଣେତ୍ରଦୃଶାଂ ବଲଂ
ବହୁ ଵିଦଧତା କାଲୀ ମାତାଽଵତାତ୍ପଦସେଵିନମ୍ ॥ ୩୪.୨ ॥

ଜଗଦଧିପୟା ସିଦ୍ଧଂ ଦୋଗ୍ଧ୍ର୍ୟାଽଥଵୋତ ରସଜ୍ଞୟା
ମୁନିଜନନୁତଂ ଦେଵୀମନ୍ତ୍ରଂ ଜପେଦ୍ୟଦି ମାନଵଃ ।
ଅମୃତଜଲଦୀଭୂତଃ ପୂତଃ ଵିୟୋଗଵିଶେଷଵିତ୍
ସ ଇହ ଵସୁଧାଲୋକେ ଧାରା ଗିରାମଭିଵର୍ଷତି ॥ ୩୪.୩ ॥

ଇମମଭିମୁଖୀଭୂତା ଶାତୋଦରୀ କମଲାଲୟା
ହୟଗଜଘଟାପୂର୍ଣାଽଭ୍ୟର୍ଣଂ ସମେତ୍ୟ ନିଷେଵତେ ।
ସଵିବୁଧମିଦଂ ଵିଶ୍ଵଂ ତସ୍ୟ ପ୍ରୟାତି ପୁନର୍ଵଶଂ
ପ୍ରଥିତୟଶସାଂ ସିଦ୍ଧୀନାଂ ଚାପ୍ୟମୁଂ ଭଜତେଽଷ୍ଟକମ୍ ॥ ୩୪.୪ ॥

ସୁଵିମଲଧିୟସ୍ତସ୍ୟ କ୍ରୋଧାଦ୍ ଦୃଗମ୍ବୁଧୁତଦ୍ୟୁତୀ
ରିପୁଜନଵଧୂଗଣ୍ଡାଭୋଗୋ ଭଵେଦୁତ ପାଣ୍ଡୁରଃ ।
ସପଦି ଭୁଵନଵ୍ୟାପ୍ତଂ ଚାପ୍ତୈଃ ପ୍ରମାଣପୁରସ୍ସରଂ
ଭଣିତମଜରଂ ଭଦ୍ରଂ ଜ୍ୟୋତିଃ ପରଂ ହୃଦି ଭାସତେ ॥ ୩୪.୫ ॥

ଅଦୟମରିଭିଃ କ୍ରାନ୍ତେ ରାଷ୍ଟ୍ରେ ତ୍ଵମୀଶ୍ଵରି ରକ୍ଷିକା
ସୁମଶରମୁଖୈର୍ଧୂତେ ଚିତ୍ତେ ତ୍ଵମୀଶ୍ଵରି ରକ୍ଷିକା ।
ପ୍ରବଲଦୁରିତୈର୍ଗ୍ରସ୍ତେ ଵଂଶେ ତ୍ଵମୀଶ୍ଵରି ରକ୍ଷିକା-
ଽପ୍ୟସୃଜତି ଜଲଂ ମେଘେ ମୋଘେ ତ୍ଵମୀଶ୍ଵରି ରକ୍ଷିକା ॥ ୩୪.୬ ॥

ଭଗଵତି ନିଜୌ ସାକ୍ଷାତ୍ପୁତ୍ରୌ ବୃହସ୍ପତିପାଵକୌ
ଗଣପତିଗୁହାଵେତୌ ଵେଷାନ୍ତରଵ୍ୟଵହାରତଃ ।
ଭରତଧରଣୀଖଣ୍ଡେ ହେତୋଃ କୁତଃ କୃତସମ୍ଭଵୌ
କଲକଲୟୁତେ କାଲୀ ଦେଵି ଵ୍ୟଧାଃ କଥୟ ଦ୍ରୁତମ୍ ॥ ୩୪.୭ ॥

ସମୟମୟି ତେ ଧୃତ୍ଵା ପାଦାମ୍ବୁଜଂ ରମଣଃ ସୁତୋ
ଗିରିଵରଗୁହାସ୍ଵନ୍ତଃ ଶାନ୍ତୋ ନୟେଦ୍ୟଦି ନାଦ୍ଭୁତମ୍ ।
ସ୍ଥଲଵିରହତଃ ସ୍ଵୀୟସ୍ଥାନେ କିମତ୍ର ସମାଗତୋ
ନ ଵଦସି କୁତଃ କାର୍ୟଂ ତସ୍ମୈ କୁଲାଚଲକନ୍ୟକେ ॥ ୩୪.୮ ॥

ପରିଭଣତି ଚେଚ୍ଛିଷ୍ୟଵ୍ୟୂହେ ମହାଦ୍ଭୁତସଙ୍ଗତୀର୍-
ଜନନି ରମଣୋ ୟୋଗୀଶାନସ୍ତତୋ ବହୁ ନୋ ଫଲମ୍ ।
ଅମିତତମୟା ଦୃଷ୍ଟେଃ ଶକ୍ତ୍ୟା କଦା ସରଣିଂ ନୟେ-
ଦପଥପତିତଂ ଧାତ୍ରୀଲୋକଂ ତଦେଵ ଵଦାମ୍ବିକେ ॥ ୩୪.୯ ॥

ଅହମିହ କୁତୋ ହେତୋର୍ଜାତୋ ଵିଷଣ୍ଣତମେ ସ୍ଥଲେ
ଚରଣକମଲଚ୍ଛାୟାଂ ମାୟାଧିରାଜ୍ଞି ଵିହାୟ ତେ ।
ପରମକରୁଣୋ ଘୋରଃ ଶାପଃ କିମେଷ ସଵିତ୍ରି ତେ
କିମପି ଭୁଵି ଵା କାର୍ୟଂ କର୍ତୁଂ ନିୟୋଜିତଵତ୍ୟସି ॥ ୩୪.୧୦ ॥

ଵ୍ରଜତି ଵିଲୟଂ ସ୍ନେହୋ ଦୂରପ୍ରଵାସଵଶାଦିତି
ପ୍ରଵଦତି ବୁଧଃ କଶ୍ଚିତ୍ସତ୍ୟଂ ପ୍ରଭାତି ତଦମ୍ବିକେ ।
ଭଗଵତି ନିଜେ କୁକ୍ଷୌ ଜାତଂ ଦିଵୋ ଧରଣୀଗତଂ
ସ୍ମୃତିସରଣିତୋ ଦୂରେ ହା ହା କରୋଷି ରୁଷା ୟଥା ॥ ୩୪.୧୧ ॥

ମମ ତୁ ଵିମଲା ହୃଦ୍ୟା ଵିଦ୍ୟା ମହେଶ୍ଵରି ୟାଽଭଵ-
ନ୍ମନସି ଚ ପରା ଚିତ୍ରା ଶକ୍ତିଶ୍ଚିରନ୍ତନି ୟାଽଭଵତ୍ ।
ଵଚସି ଚ ମହଦ୍ଭାଗ୍ୟଂ ଶ୍ଲାଘ୍ୟଂ ୟଦୀଡ୍ୟତମେଽଭଵତ୍
ତଦୟି ଗଲିତଂ ମତ୍ତୋ ଵିତ୍ତତ୍ରୟଂ ଭଵତୋ ଭୁଵି ॥ ୩୪.୧୨ ॥

କୃତମୟି ମୟା ପାପଂ ଘୋରଂ ସୁକର୍ମସୁ ସଙ୍ଗିନାଂ
ୟଦହମଦୟୋ ଵିଘ୍ନଂ ନୄଣାଂ ମୁହୁର୍ମୁହୁରାଚରମ୍ ।
ଅତିକଟୁ ଫଲଂ ତସ୍ୟାଶ୍ନାମି ଶ୍ରିତୋ ନରଵିଗ୍ରହଂ
ପ୍ରମଥନୃପତେର୍ଜାୟେ ମାୟେ ଜନନ୍ୟଵ ମାମିମମ୍ ॥ ୩୪.୧୩ ॥

ନ ଭଵସି ଦୃଶୋର୍ମାର୍ଗେ ଲୋକାଧିରାଜ୍ଞି କୁତୋ ଗିରୋ
ନ ଚ ବହୁକୃପେ ସ୍ଵପ୍ନେ ଵା ତ୍ଵଂ ପ୍ରୟଚ୍ଛସି ଦର୍ଶନମ୍ ।
ଅପନୟସି ନୋ ସନ୍ଦେହଂ ଵା ପରୋକ୍ଷକୃପାଵଶା-
ଦପି ସୁରନୁତେ ଲଗ୍ନା କାର୍ୟାନ୍ତରେ କିମୁତାଦୟା ॥ ୩୪.୧୪ ॥

ନିରଵଧିଶିଵେ ମାହାତ୍ମ୍ୟଂ ତେ ଭଣନ୍ତି ମହର୍ଷୟୋ
ମନସି କରୁଣା ନ ନ୍ୟୂନା ତେ ୟଥା ପ୍ରଥିତାଃ କଥାଃ ।
ତଦିଦମଖିଲଂ ମିଥ୍ୟା ସ୍ୟାଦିତ୍ୟସାଧ୍ୟମୁଦୀରିତୁଂ
ୟଦସି ଵିମୁଖୀ ପୁତ୍ରେ କିଂ ଵା ଭଵେଦିହ କାରଣମ୍ ॥ ୩୪.୧୫ ॥

ଭୁଵନଭରଣଂ ନାଲ୍ପଂ କାର୍ୟଂ ନ ଦେଵି ତଵ କ୍ଷଣୋ
ଗୁରୁ ଚ ବହୁଲଂ କୃତ୍ୟଂ ନିତ୍ୟଂ ତଵାସ୍ତି ନ ତନ୍ମୃଷା ।
ନ ତଵ କଠିନଂ ମୌନଂ ନିନ୍ଦ୍ୟଂ ତଥାପି ନ ପାର୍ଵତି
ସ୍ମର ସକୃଦିମଂ ଦୀନଂ ପୁତ୍ରଂ ତଦେଵ ମମାଧିକମ୍ ॥ ୩୪.୧୬ ॥

ନ ଭଵତି ସୁଧାଧାରାଵର୍ଷାଦୟଂ ମୁଦିତସ୍ତନୌ
ମଧୁମଦମୁଷାଂ ଵାଚାଂ ସର୍ଗାନ୍ନ ଚାପ୍ୟୟମୁଦ୍ଧତଃ ।
ତଵ ପଦୟୁଗେ ନିଷ୍ଠାଲାଭାନ୍ନ ତୃପ୍ୟତି ଚାପ୍ୟୟଂ
ଭଗଵତି ଚିରାତ୍ ସନ୍ଦେଶଂ ତେ ସୁତଃ ପ୍ରତିଵୀକ୍ଷତେ ॥ ୩୪.୧୭ ॥

କିମିହ ଭୁଵନେ କର୍ତଵ୍ୟଂ ମେ କିମର୍ଥମିହାଗତୋ-
ଽସ୍ମ୍ୟଵନି ଜଗତାଂ କଂ ଵୋପାୟଂ ଶ୍ରୟେ ନିଜଶକ୍ତୟେ ।
କିମପି କିମପି ସ୍ଵାନ୍ତେ ଧ୍ଵାନ୍ତେ ୟଥା ପରିଦୃଶ୍ୟତେ
ସ୍ଫୁଟମଭୟଦେ ଵକ୍ତୁଂ କିଞ୍ଚିଚ୍ଛ୍ରମଂ ତ୍ଵମୁରୀକୁରୁ ॥ ୩୪.୧୮ ॥

ନ ମମ ପରମେ ମୁକ୍ତାଵାଶା ନ ଵା ଵିଭଵାଷ୍ଟକେ
ନ ଚ ଗଜଘଟାପୂର୍ଣାୟାଂ ଵା ମହେଶ୍ଵରି ସମ୍ପଦି ।
ନ ଚ ମଧୁମୁଚାଂ ଵାଚାଂ ସର୍ଗେ ନିରର୍ଗଲଵୈଭଵେ
ମୁନିଭୁଵି କୁତୋ ଜାତଃ ସୋଽହଂ ତଦେଵ ସମୀର୍ୟତାମ୍ ॥ ୩୪.୧୯ ॥

ପ୍ରଥମମନଘଂ ଵାଞ୍ଛାମ୍ୟନ୍ନଂ ସଦାରସୁତାତିଥେର୍-
ଭଗଵତି ତତଃ ପାଦଦ୍ଵନ୍ଦ୍ଵେ ତଵାଵିଚଲାଂ ସ୍ଥିତିମ୍ ।
ଅଥ ସୁରଜଗଦ୍ଵାର୍ତାଜ୍ଞାନଂ ସଵିତ୍ରି ତତଃ ପରଂ
ମୁନିଭୁଵି ଭଵେ ହେତୁଂ ଜ୍ଞାତୁଂ ମୃଗାକ୍ଷି ପୁରଦ୍ଵିଷଃ ॥ ୩୪.୨୦ ॥

ୟଦି ତଵ କୃପା ପୁତ୍ରେ ଭକ୍ତେ ପଦାଂବୁଜଵନ୍ଦିନି
ଵ୍ରତଶତକୃଶେ ଶୀର୍ଷାମ୍ଭୋଜାମୃତଂ ତ୍ଵୟି ଜୁହ୍ଵତି ।
ଭରତଧରଣୀସେଵାଲୋଲେ ଭଵପ୍ରିୟଭାମିନି
ସ୍ଵୟମୁପଦିଶାମୁଷ୍ମୈ ୟୋଗ୍ୟଂ ଵିଧାନମନାଵିଲମ୍ ॥ ୩୪.୨୧ ॥

ଜନନି ଜଗତାଂ ସ୍ଵଲ୍ପେ କାମେଽପ୍ୟୟଂ ତ୍ଵୟି ଲମ୍ବତେ
ପୁରଭିଦବଲେ ମଧ୍ୟେ କାମେଽପ୍ୟୟଂ ତ୍ଵୟି ଲମ୍ବତେ ।
ବହୁଲକରୁଣେ ଶ୍ରେଷ୍ଠେ କାମେଽପ୍ୟୟଂ ତ୍ଵୟି ଲମ୍ବତେ
ଭଗଵତି ପରେ ଵୀତେ କାମେଽପ୍ୟୟଂ ତ୍ଵୟି ଲମ୍ବତେ ॥ ୩୪.୨୨ ॥

ତନୁଭୁଵି ମୟି ପ୍ରୀତ୍ୟା ଵାଽମ୍ବ ତ୍ରିଲୋକଵିଧାୟିକେ
ପଦୟୁଗରତେ ଵାତ୍ସଲ୍ୟାଦ୍ଵା ପୁରାରିପୁରନ୍ଧ୍ରିକେ ।
ସ୍ଵଵିମଲୟଶୋଗାନାସକ୍ତେ କୃପାଵଶତୋଽଥଵା
ପରୁଷମଜରେ ମୌନଂ ତ୍ୟକ୍ତ୍ଵା ସ୍ଫୁଟୀକୁରୁ ମେ ଗତିମ୍ ॥ ୩୪.୨୩ ॥

ଜୟତୁ ଭରତକ୍ଷୋଣୀଖଣ୍ଡଂ ଵିଷାଦଵିଵର୍ଜିତଂ
ଜୟତୁ ଗଣପସ୍ତସ୍ୟ କ୍ଷେମଂ ଵିଧାତୁମନା ମୁନିଃ ।
ଜୟତୁ ରମଣସ୍ତସ୍ୟାଚାର୍ୟୋ ମହର୍ଷିକୁଲାଚଲୋ
ଜୟତୁ ଚ ତୟୋର୍ମାତା ପୂତା ମହେଶଵିଲାସିନୀ ॥ ୩୪.୨୪ ॥

ଗଣପତିମୁନେରେଷା ଭାଷାଵିଦାଂ ହୃଦୟଙ୍ଗମା
ସୁକଵିସୁହୃଦଃ ଶବ୍ଦୈରତ୍ୟୁଜ୍ଜ୍ଵଲା ହରିଣୀତତିଃ ।
ଲଲିତଚତୁରୈର୍ଭାଵୈର୍ୟାନ୍ତୀ ସୁରୂପଵନାନ୍ତରଂ
ମଦୟତୁ ମନଃ କାମାରାତେର୍ନିଶାନ୍ତମୃଗୀଦୃଶଃ ॥ ୩୪.୨୫ ॥ 850

%c09-q3/Sai.Susarla/uma-c09-q3।txt medskip

ପଞ୍ଚତ୍ରିଂଶଃ ସ୍ତବକଃ
ପ୍ରାର୍ଥନା (ଇନ୍ଦୁଵଦନାଵୃତ୍ତମ୍)

ଅନ୍ଧତମସଂ ଶଶିଵିଭାମଭିଦଧାନା
କାନ୍ତିମଲମାସ୍ୟକମଲସ୍ୟ ଵିଦଧାନା ।
ଅନ୍ଧକଵିରୋଧିଦୟିତାସ୍ମିତଲଵଶ୍ରୀର୍-
ଭାତୁ ଭୁଵନସ୍ୟ ସକଲସ୍ୟ କୁଶଲାୟ ॥ ୩୫.୧ ॥

ଭାହି ଵିଵିଧା କୃତିମତୀ ଦ୍ଵିଜସମୂହେ
ପାହି ଗତିହୀନମଖିଲେଶ୍ଵରି କୁଲଂ ନଃ ।
ଦେହି ବହୁକାଲଭଜକାୟ ଵରମେତଂ
ୟାହି ନଗନନ୍ଦିନି ୟଶଃ ଶଶିଵଲକ୍ଷମ୍ ॥ ୩୫.୨ ॥

ଵାରୟତି ଘୋରତରପାତକସମୂହଂ
ଵର୍ଧୟତି ଧର୍ମମପି ଶର୍ମକରମନ୍ତେ ।
କିଙ୍କରଜନସ୍ୟ ନ କିମାଵହତି ଭଵ୍ୟଂ
ଶଙ୍କରପୁରନ୍ଧ୍ରି ତଵ ପାଦପରିଚର୍ୟା ॥ ୩୫.୩ ॥

ୟସ୍ୟ ମନୁଜସ୍ୟ ହୃଦୟେଽସ୍ତି ସଦୟେ ତେ
ନାକଚରସେଵ୍ୟମୟି ପାଦସରସୀଜମ୍ ।
ତଂ ଭଜତି ପଦ୍ମମୁଖି ପଦ୍ମଵନଵାସା
ଲାଭଭଵନେ ଭଵତୁ ନାମରପୁରୋଧାଃ ॥ ୩୫.୪ ॥

ୟଦ୍ୟଖିଲମୌନିଗଣଗୀତଗୁଣଜାଲଂ
କାଲଭୟହାରିକରୁଣାରସମରନ୍ଦମ୍ ।
ଅଦ୍ରିତନୟାଙ୍ଘ୍ରିଜଲଜନ୍ମ ହୃଦୟେ ସ୍ୟା-
ଦଷ୍ଟମଗତୋଽପି ଵିଦଧାତୁ ରଵିଜଃ କିମ୍ ॥ ୩୫.୫ ॥

ଲେଖଲଲନାକଚସୁମୈଃ କୃତବଲିଂ ତେ
ୟୋ ଭଜତି ପାଦଘୃଣିମାଲିନମନନ୍ତେ ।
ନିସ୍ତରତି ନୂନମୟମସ୍ତମିତମୋହଃ
ଶୋକତିମିରଂ ସକଲଲୋକଗଣମାତଃ ॥ ୩୫.୬ ॥

ଶୀତକରଦର୍ପହରଵକ୍ତ୍ରଜଲଜାତେ
ଶୀତଗିରିନନ୍ଦିନି ତଵାଙ୍ଘ୍ରିଜଲଜାତମ୍ ।
ୟଃ ସ୍ମରତି ଦେଵି ହୃଦି ଵିସ୍ମରତି ସୋଽୟଂ
ଵିଷ୍ଟପମଶେଷମପି କଷ୍ଟତତିମୁକ୍ତଃ ॥ ୩୫.୭ ॥

ସକ୍ତିରୟି ୟସ୍ୟ ତଵ ପାଦସରସୀଜେ
ଶକ୍ତିଧରମାତରନଲାକ୍ଷଗୃହନାଥେ ।
ପୂର୍ଣଶଶିଜୈତ୍ରମୁଖି ପୁଣ୍ୟପୁରୁଷୋଽସୌ
ସ୍ଵର୍ଣଶିଖରୀଵ ବୁଧଲୋକଶରଣଂ ସ୍ୟାତ୍ ॥ ୩୫.୮ ॥

ଵୈରିଗଣନିର୍ଦଲନଖଡ୍ଗଵରପାଣେ
ଵାସସି ପଦୋର୍ଦଶନଵାସସି ଚ ଶୋଣେ ।
ନେତ୍ରମିଷପାଵକଵିଶେଷିତଲଲାଟେ
ପାପମଖିଲଂ ଜହି ମୃଗାଧିପତିଘୋଟେ ॥ ୩୫.୯ ॥

ଵେଦଚୟଵେଦିଜନଵାଦଵିଷୟସ୍ୟ
ପ୍ରତିୟୁତଲୋକତତିଶୋକଶମନସ୍ୟ ।
ଵେତନଵିଵର୍ଜିତଭଟୋଽୟମହମଙ୍ଘ୍ରେଃ
ଶୀତକରପୋତଧରପୁଣ୍ୟଵନିତେ ତେ ॥ ୩୫.୧୦ ॥

କାର୍ୟମୟି ମେ କିମପି କାର୍ୟପଟୁବୁଦ୍ଧେଃ
ପାଦସରସୀଜୟୁଗଲୀପରିଜନସ୍ୟ ।
ଅମ୍ବ ଵଦ ଜମ୍ଭରିପୁଗୀତଗୁଣଜାଲେ
ଶୁମ୍ଭକୁଲନାଶକରି ଶମ୍ଭୁକୁଲୟୋଷେ ॥ ୩୫.୧୧ ॥

ତ୍ଵଂ ୟଦି ଶିଲାଵଦୟି ନୋ ଵଦସି କୃତ୍ୟଂ
ନାସ୍ତି ତଵ ରାଜ୍ୟପଟୁବୁଦ୍ଧିରିତି ସତ୍ୟମ୍ ।
ଆଦିଶ ୟଥାର୍ହକରଣୀୟକୃତିନିତ୍ୟଂ
ରାଜ୍ଞି ଭୁଵନସ୍ୟ ଚରଣାମ୍ବୁରୁହଭୃତ୍ୟମ୍ ॥ ୩୫.୧୨ ॥

ପଞ୍ଚସୁ ଵିହାୟ ମନସଃ କମପି ସଙ୍ଗଂ
ପୁତ୍ରଧନମିତ୍ରଜନବାନ୍ଧଵଵଧୂଷୁ ।
ଏଷ ଭଜତେ ଜନନି ପାଦଜଲଜଂ ତେ
ପାଲୟ ନୁ ମୁଞ୍ଚ ନୁ ତଵୋପରି ସ ଭାରଃ ॥ ୩୫.୧୩ ॥

ଵଜ୍ରଧରମୁଖ୍ୟସୁରସଞ୍ଚୟକିରୀଟ-
ସ୍ଥାପିତମହାର୍ଘମଣିରଞ୍ଜିତନଖାୟ ।
ଜୀଵିତମଦାୟି ଜଗଦୀଶ୍ଵରି ମଦୀୟଂ
ପାଦଜଲଜାୟ ତଵ ପାଲୟ ନୁ ମା ଵା ॥ ୩୫.୧୪ ॥

ଦେହି ଜଗଦୀଶ୍ଵରି ନ ଵା ମଦଭିଲାଷଂ
ପାହି କରୁଣାଵତି ନ ଵା କୁଲମିଦଂ ନଃ ।
ଶୂଲଧରକାମିନି ସୁରାସୁରନିଷେଵ୍ୟଂ
ପାଦକମଲଂ ତଵ ପରେ ନ ଵିଜହାମି ॥ ୩୫.୧୫ ॥

ପାସି କିଲ ପାଦୟୁଗକିଙ୍କରସମୂହଂ
ହଂସି କିଲ ପାପତତିମାପଦି ନୁତା ତ୍ଵମ୍ ।
ଦନ୍ତିଵଦନପ୍ରସୁ ଵଦନ୍ତି ମତିମନ୍ତୋ
ନାନୃତମିଦଂ ଭଵତୁ ନାକିଜନଵର୍ଣ୍ୟେ ॥ ୩୫.୧୬ ॥

ଶକ୍ରମୁଖଦେଵତତିଵନ୍ଦିତଵିସୃଷ୍ଟେ
ଵକ୍ରଘନକେଶି ଚରଣେ ତଵ ଲୁଠନ୍ତମ୍ ।
ଆପଦି ନିମଗ୍ନମିମମାଶ୍ରିତମନାଥଂ
ନନ୍ଦିହୟସୁନ୍ଦରି ନ ପାଲୟସି କେନ ॥ ୩୫.୧୭ ॥

ଘୋଷମୟମମ୍ବ ଵିଦଧାତି ପଦଲଗ୍ନୋ
ନାଵସି ପୁରାଣି କିମୁ ନାରି ବଧିରାଽସି ।
ଵନ୍ଦିସୁରବୃନ୍ଦନୁତିଭାଷିତହୃତଂ ଵା
କର୍ଣୟୁଗଲଂ ତଵ କପାଲିକୁଲୟୋଷେ ॥ ୩୫.୧୮ ॥

ଅମ୍ବ ଭଵ ବିମ୍ବଫଲକଲ୍ପରଦଚେଲେ
ଶମ୍ବରସପତ୍ନବଲକାରିବହୁଲୀଲେ ।
ପ୍ରାଗମୃତଭାନୁମୁକୁଟସ୍ୟ ମଦୟିତ୍ରୀ
ତଂ କୁରୁ ତତଃ ପରମୁରୀକୃତମଦର୍ଥମ୍ ॥ ୩୫.୧୯ ॥

ନିର୍ମଲସୁଧାକରକଲାକଲିତମସ୍ତେ
ଧର୍ମରତପାଲିନି ଦୟାଵତି ନମସ୍ତେ ।
ଏତମଵ ଦେଵି ଚରଣାମ୍ବୁରୁହବନ୍ଧୁଂ
ଶୀତଧରଣୀଧରସୁତେ ଗମୟ ନାନ୍ଧୁମ୍ ॥ ୩୫.୨୦ ॥

ଅଦ୍ରିକୁଲପାଲକକୁଲଧ୍ଵଜପତାକେ
ଭଦ୍ରଗଜଗାମିନି ଦରିଦ୍ରମୟି ମତ୍ୟା ।
କ୍ଷୁଦ୍ରମିଵ ଶୋଚ୍ୟମିମମଙ୍ଘ୍ରିଜଲଜାପ୍ତଂ
ରୁଦ୍ରଦୟିତେ ଜନନି ପାହି ନ ଜହୀହି ॥ ୩୫.୨୧ ॥

ଅସ୍ତୁ ତଵ ପାଦକମଲେ ସ୍ଥିତିରଜସ୍ରଂ
ନାସ୍ତି ପରଦୁଃଖଵିଵଶେ ହୃଦି ତୁ ଶାନ୍ତିଃ ।
ଅସ୍ତୁ କରୁଣେଽୟମସ୍ତୁ ମତିଲୋପଃ
କଷ୍ଟମିଦମମ୍ବ ମମ ଭୂରି ପରିଶିଷ୍ଟମ୍ ॥ ୩୫.୨୨ ॥

ଦୁଃଖସୁଖଭେଦରହିତା ନ ମତିରାସୀତ୍
ସାଧୁଖଲଭେଦରହିତା ନ ମତିରାସୀତ୍ ।
ଭାଗ୍ୟମିତିମାନ୍ୟମଥଵା ମମ ତଦେତନ୍-
ମାତରିହ ସଙ୍ଘଭଜନେ ୟଦଵକାଶଃ ॥ ୩୫.୨୩ ॥

ଅସ୍ତୁ ମମ ଭେଦମତିରସ୍ତୁ ମମ ପକ୍ଷୋ
ୟତ୍ନପରତାଽସ୍ତୁ ମମ ମାସ୍ତୁ ଚ ଵିମୋକ୍ଷଃ ।
ମୋକ୍ଷମୟି ଵେଦ୍ମି କୁଲକଷ୍ଟତତିମୋକ୍ଷଂ
ପ୍ରେଷୟ ସକୃତ୍ତଵ ମହେଶ୍ଵରି କଟାକ୍ଷମ୍ ॥ ୩୫.୨୪ ॥

ଶାକ୍ଵରଗଣେନ ମୁଖରେଽତ୍ର ଗଣନାଥେ
ଵିଷ୍ଣୁୟଶସୀଶଵଧୁ ଜିଷ୍ଣୁମୁଖଵନ୍ଦ୍ୟେ ।
ଅମ୍ବ କରୁଣାଂ କୁରୁ ଶିଵଙ୍କରି ନିରଙ୍କ-
ସ୍ଵଚ୍ଛକିରଣାର୍ଭକଵିଭୂଷିତଲଲାଟେ ॥ ୩୫.୨୫ ॥ 875

%c09-q4/Krishnashankavaram/devi\_itranstxt medskip

ଷଟ୍ତ୍ରିଂଶଃ ସ୍ତବକଃ
ପ୍ରକୀର୍ଣକମ୍ (ତୂଣକଵୃତ୍ତମ୍)

ଉନ୍ନତସ୍ତନସ୍ଥଲୀଵିଲୋଲହାରମୌକ୍ତିକ-
ଵ୍ରାତଦୀଧିତିପ୍ରତାନବଦ୍ଧସୌହୃଦା ସଦା ।
ଅନ୍ଧକାରିକାମିନୀଦରସ୍ମିତଦ୍ୟୁତିର୍ଧୁନୋ-
ତ୍ଵନ୍ଧକାରମନ୍ତରଙ୍ଗଵାସିନଂ ଘନଂ ମମ ॥ ୩୬.୧ ॥

ଅମ୍ବରସ୍ଥଲେ ପୁରା ପୁରନ୍ଦରୋ ଦଦର୍ଶ ୟାଂ
ୟାଂ ଵଦନ୍ତି ପର୍ଵତପ୍ରସୂତିମୈତିହାସିକାଃ ।
ସା ପରା ପୁରାମରେଃ ପୁରନ୍ଧ୍ରିକାଽଖିଲାମ୍ବିକା
ପୁତ୍ରକାୟ ମଜ୍ଜତେ ଦଦାତୁ ଦକ୍ଷିଣଂ କରମ୍ ॥ ୩୬.୨ ॥

ପାଦପଙ୍କଜେ ଧୃତା ନରୈରବାହ୍ୟଭକ୍ତିଭିଃ
ପାଣିପଙ୍କଜେ ଧୃତା ନଵେନ୍ଦୁଖଣ୍ଡଧାରିଣା ।
ଚାରୁହେମହଂସକା ମନୋଜ୍ଞରତ୍ନକଙ୍କଣା
ଲୋକଜାଲପାଲିନୀ ପୁନାତୁ ମାଂ ଵିଲାସିନୀ ॥ ୩୬.୩ ॥

ଉକ୍ଷରାଜଵାହନସ୍ୟ ଜୀଵିତାଦ୍ ଗରୀୟସୀ
ପକ୍ଷିରାଜଵାହନାଦିଵର୍ଣ୍ୟମାନଵୈଭଵା ।
କେକିଲୋକଚକ୍ରଵର୍ତିଵାହନେନ ପୁତ୍ତ୍ରିଣୀ
ଵାରଣାରିସାର୍ଵଭୌମଵାହନା ଗତିର୍ମମ ॥ ୩୬.୪ ॥

ବାଲକୁନ୍ଦକୁଟ୍ମଲାଲିକାନ୍ତଦନ୍ତପଙ୍କ୍ତିକା
କୁଣ୍ଡଲାନୁବିମ୍ବଶୋଭିଶୁଦ୍ଧଗଣ୍ଡମଣ୍ଡଲା ।
ବିଭ୍ରତୀ ରତୀଶଵେତ୍ରଵିଭ୍ରମଂ ଭ୍ରୁଵୋର୍ୟୁଗଂ
ଶୁଭ୍ରଭାନୁଶେଖରସ୍ୟ ସୁନ୍ଦରୀ ପ୍ରଣମ୍ୟତେ ॥ ୩୬.୫ ॥

ଆଜିଦକ୍ଷଵାହଵୈରିୟାତୁଧାନବାଧିତଂ
ୟା ରରକ୍ଷ ଦେଵବୃନ୍ଦମିନ୍ଦିରାଦିଵନ୍ଦିତା ।
ସା କଟାକ୍ଷପାତଧୂତଭକ୍ତଲୋକପାତକା
ପାଵକାକ୍ଷସୁନ୍ଦରୀ ପରାତ୍ପରା ଗତିର୍ମମ ॥ ୩୬.୬ ॥

ତାରକାଧିନାଥଚୂଡଚିତ୍ତରଙ୍ଗନର୍ତକୀ
ମନ୍ଦହାସସୁନ୍ଦରାସ୍ୟପଙ୍କଜା ନଗାତ୍ମଜା ।
ଦୀନପୋଷକୃତ୍ୟନିତ୍ୟବୁଦ୍ଧବୁଦ୍ଧିରଵ୍ୟୟା
ଗୃହ୍ୟତେ ଗଣାଧିପେନ ସର୍ଵତୋ ନୃଣାଂ ପଦେ ॥ ୩୬.୭ ॥

ଅଷ୍ଟମୀଶଶାଙ୍କଖଣ୍ଡଦର୍ପଭଞ୍ଜନାଲିକା
ଵିଷ୍ଟପତ୍ରୟାଧିନାଥମାନସସ୍ୟ ଡୋଲିକା ।
ପାପପୁଞ୍ଜନାଶକାରିପାଦକଞ୍ଜଧୂଲିକା
ଶ୍ରେୟସେ ମମାସ୍ତୁ ଶୈଲଲୋକପାଲବାଲିକା ॥ ୩୬.୮ ॥

ସାନୁମତ୍କୁଲାଧିନାଥବାଲିକାଲିକୁନ୍ତଲା
ଜଙ୍ଗମେଵ କାଽପି ତପ୍ତହେମସାଲଭଞ୍ଜିକା ।
ଭକ୍ତିୟୁକ୍ତଲୋକଶୋକଵାରଣାୟ ଦୀକ୍ଷିତା
ଶୀତଶୀତଵୀକ୍ଷିତା ଲଘୁ ସ୍ୟତାଦଘଂ ମମ ॥ ୩୬.୯ ॥

ପୁଣ୍ୟନାମସଂହତିଃ ପୁରାରିଚିତ୍ତମୋହିନୀ
ପୁଷ୍ପବାଣଚାପଚାରୁଝିଲ୍ଲିକାଽଖିଲାମ୍ବିକା ।
ପୁଣ୍ୟଵୈରିପୁଷ୍ଟଦୁଷ୍ଟଦୈତ୍ୟଵଂଶନାଶିନୀ
ପୁତ୍ରକସ୍ୟ ରକ୍ଷଣଂ ପୁରାତନୀ କରୋତୁ ମେ ॥ ୩୬.୧୦ ॥

କ୍ଷାମମଧ୍ୟମସ୍ଥଲୀ ସୁଧାଘଟୋପମସ୍ତନୀ
କୃଷ୍ଣସାରଲୋଚନା କୁମୁଦ୍ଵତୀପ୍ରିୟାନନା ।
ଭ୍ରୂଵିଲାସଧୂତଧୈର୍ୟକାଞ୍ଚନାଦ୍ରିକାର୍ମୁକା
କାଚିଦିକ୍ଷୁକାର୍ମୁକସ୍ୟ ଜୀଵିକା ଜୟତ୍ୟୁମା ॥ ୩୬.୧୧ ॥

ଲୋହିତାଚଲେଶ୍ଵରସ୍ୟ ଲୋଚନତ୍ରୟୀହିତା
ଲୋହିତପ୍ରଭାନିମଜ୍ଜଦବ୍ଜଜାଣ୍ଡକନ୍ଦରା ।
ହାସକାନ୍ତିଵର୍ଧ୍ୟମାନସାରସାରିମଣ୍ଡଲା
ଵାସମତ୍ର ମେ କରୋତୁ ମାନସେ ମହେଶ୍ଵରୀ ॥ ୩୬.୧୨ ॥

ଦକ୍ଷିଣେକ୍ଷଣପ୍ରଭାଵିଜୃମ୍ଭିତାମ୍ବୁସମ୍ଭଵା
କାମମିତ୍ରଵାମନେତ୍ରଧାମତୃପ୍ତକୈରଵା ।
ଏକତଃ ପରଃ ପୁମାନ୍ପରା ଵରାଙ୍ଗନାଽନ୍ୟତଃ
ଶୁଭ୍ରକୀର୍ତିରେକମୂର୍ତିରାଦଧାତୁ ନଶ୍ଶିଵମ୍ ॥ ୩୬.୧୩ ॥

ଶୁମ୍ଭଦୈତ୍ୟମାରିଣୀ ସୁପର୍ଵହର୍ଷକାରିଣୀ
ଶମ୍ଭୁଚିତ୍ତହାରିଣୀ ମୁନୀନ୍ଦ୍ରଚିତ୍ତଚାରିଣୀ ।
କାମିତାର୍ଥଦାୟିନୀ କରିପ୍ରକାଣ୍ଡଗାମିନୀ
ଵୀତକଲ୍କମାଦଧାତୁ ଵିଘ୍ନରାଜମମ୍ବିକା ॥ ୩୬.୧୪ ॥

ଦେଵତାସପତ୍ନଵଂଶକାନନାନଲଚ୍ଛଟା
ଵାରଣାରିସାର୍ଵଭୌମଵାହନା ଘନାଲକା ।
ନନ୍ଦିଵାହନସ୍ୟ କାଽପି ନେତ୍ରନନ୍ଦିନୀ ସୁଧା
ନେତ୍ରଲାଞ୍ଛିତାଲିକା ସୁତଂ ପୁନାତୁ କାଲିକା ॥ ୩୬.୧୫ ॥

ରାଜସୁନ୍ଦରାନନା ମରାଲରାଜଗାମିନୀ
ରାଜମୌଲିଵଲ୍ଲଭା ମୃଗାଧିରାଜମଧ୍ୟମା ।
ରାଜମାନଵିଗ୍ରହା ଵିରାଜମାନସଦ୍ଗୁଣା
ରାଜତେ ମହୀଧରେ ମଦମ୍ବିକା ଵିରାଜତେ ॥ ୩୬.୧୬ ॥

ପର୍ଵଚନ୍ଦ୍ରମଣ୍ଡଲପ୍ରଭାଵିଡମ୍ବନାନନା
ପର୍ଵତାଧିନାଥଵଂଶପାଵନୀ ସନାତନୀ ।
ଗର୍ଵଗନ୍ଧନାଶିନୀ ଵିଭାଵରୀଵିଚାରିଣାଂ
ଶର୍ଵଚିତ୍ତନାୟିକା କରୋତୁ ମଙ୍ଗଲଂ ମମ ॥ ୩୬.୧୭ ॥

ଓଜସଶ୍ଚ ତେଜସଶ୍ଚ ଜନ୍ମଭୂମିରଚ୍ୟୁତା
ନୀଲକଞ୍ଜବନ୍ଧୁବଦ୍ଧମୌଲିରାଗମସ୍ତୁତା ।
ଵୀତରାଗପାଶଜାଲନାଶବଦ୍ଧକଙ୍କଣା
ଵିଶ୍ଵପାଲିନୀ ମୟା ମହେଶ୍ଵରୀ ଵିଚିନ୍ତ୍ୟତେ ॥ ୩୬.୧୮ ॥

ଅଣ୍ଡମଣ୍ଡଲଂ ୟୟା ନିରନ୍ତରଂ ଚ ପଚ୍ୟତେ
ସଂସ୍ଫୁରତ୍ୟଶେଷଭୂତହାର୍ଦପୀଠିକାସୁ ୟା ।
ଶ୍ଵାସଦୃଷ୍ଟିସଂଵିଦୂଷ୍ମନାଦଵାରିଵର୍ତ୍ମଭିର୍-
ୟାମୁପାସତେ ଵିଦୋ ନମାମି ତାଂ ପରାତ୍ପରାମ୍ ॥ ୩୬.୧୯ ॥

ପଞ୍ଚୟୁଗ୍ମଵେଷଭୃତ୍ପରାତ୍ପରା ସୁରାର୍ଚିତା
ପଞ୍ଚଵକ୍ତ୍ରଵକ୍ତ୍ରପଦ୍ମଚଞ୍ଚରୀକଲୋକନା ।
ଵଞ୍ଚକାନ୍ତରଙ୍ଗଶତ୍ରୁସଞ୍ଚୟପ୍ରଣାଶିନୀ
ପ୍ରେତମଞ୍ଚଶାୟିନୀ କୁଲଂ ଚିରାୟ ପାତୁ ମେ ॥ ୩୬.୨୦ ॥

କର୍ମଣା ୟଥାଵିଧି ଦ୍ଵିଜାତୟୋ ୟଜନ୍ତି ୟାଂ
ବ୍ରହ୍ମଣା ୟଥାଶ୍ରୁତଂ ସ୍ତୁଵନ୍ତି ୟାମଧୀତିନଃ ।
ଚେତସା ୟଥା ଗୁରୂକ୍ତି ଚିନ୍ତୟନ୍ତି ୟାଂ ଵିଦଃ
ସା ପରା ଜଗତ୍ତ୍ରୟୀଜନନ୍ୟଜା ଜୟତ୍ୟୁମା ॥ ୩୬.୨୧ ॥

ଵାସୁଦେଵଜାୟୟା ଵିନମ୍ରୟା ନିଷେଵିତା
ଵାମଦେଵଚାଟୁଚିତ୍ରଵାକ୍ୟବନ୍ଧଲାଲିତା ।
ଵାସଵାଦିଦେଵତାଜୟପ୍ରଣାଦହର୍ଷିତା
ଵାରୟତ୍ଵଘାନି ମେ ଵସୁନ୍ଧରାଭୃତସ୍ସୁତା ॥ ୩୬.୨୨ ॥

ପୂର୍ଣିମାସୁଧାମରୀଚିସୁନ୍ଦରାସ୍ୟମଣ୍ଡଲା
ଫୁଲ୍ଲପଦ୍ମପତ୍ରଦୀର୍ଘସମ୍ପ୍ରସନ୍ନଲୋଚନା ।
ପୁଣ୍ୟଭୂନିଷେଵଣାୟ ପୁତ୍ରମେତମୁଦ୍ୟତଂ
ପୂର୍ଣକାମମାଦଧାତୁ ପାଦଲଗ୍ନମମ୍ବିକା ॥ ୩୬.୨୩ ॥

ଲାଲୟନ୍ତି ବାଲକଂ ଵତଂସଶୀତଦୀଧିତିଂ
ଶୀଲୟନ୍ତି ସୂକ୍ଷ୍ମତାଂ ମନାଂସି ୟୋଗିନାମିଵ ।
କାଲୟନ୍ତୁ ପାପିନାଂ କୁଲାନି ସଂହତୀସ୍ସତାଂ
ପାଲୟନ୍ତୁ ଚ ସ୍ମିତାନି ୟୋଷିତଃ ପୁରଦ୍ଵିଷଃ ॥ ୩୬.୨୪ ॥

ପାଦସେଵିନଃ କଵେର୍ମନୋହରାତିଶକ୍ଵରୀ-
ଵର୍ଗ ଏଷ ନାଟ୍ୟକାରିନିର୍ଜରୀଗଣୋ ୟଥା ।
ଲୋକଜାଲଚକ୍ରଵର୍ତିପୁଣ୍ୟୟୋଷିତୋ ମନ-
ସ୍ସମ୍ମଦାୟ ସାଧୁକଷ୍ଟଵାରଣାୟ କଲ୍ପତାମ୍ ॥ ୩୬.୨୫ ॥ 900

॥ ସମାପ୍ତଂ ଚ ନଵମଂ ଶତକମ୍ ॥

%c10-q1/Jayanth.Ganapathiraju/c10-q1।txt medskip

ଦଶମଂ ଶତକମ୍
ସପ୍ତତ୍ରିଂଶଃ ସ୍ତବକଃ
ତତ୍ତ୍ଵଵିଚାରଃ (ଅନୁଷ୍ଟୁବ୍ଵୃତ୍ତମ୍)

ଉଦ୍ଦୀପୟତୁ ନଶ୍ଶକ୍ତିମାଦିଶକ୍ତେର୍ଦରସ୍ମିତମ୍ ।
ତତ୍ତ୍ଵଂ ୟସ୍ୟ ମହସ୍ସୂକ୍ଷ୍ମମାନନ୍ଦୋ ଵେତି ସଂଶୟଃ ॥ ୩୭.୧ ॥

ପୂର୍ଣଂ ପ୍ରଜ୍ଞାତୃ ସଦ୍ବ୍ରହ୍ମ ତସ୍ୟ ଜ୍ଞାନଂ ମହେଶ୍ଵରୀ ।
ମହିମା ତେଜ ଆହୋସ୍ଵିଚ୍ଛକ୍ତିର୍ଵା ପ୍ରାଣ ଏଵ ଵା ॥ ୩୭.୨ ॥

ପ୍ରଚକ୍ଷତେ ଚିଦାତ୍ମତ୍ଵଂ ଜ୍ଞାତୁର୍ଜ୍ଞାନସ୍ୟ ଚୋଭୟୋଃ ।
ପ୍ରଦୀପସ୍ୟ ପ୍ରଭାୟାଶ୍ଚ ଜ୍ୟୋତିରାକୃତିତାଂ ୟଥା ॥ ୩୭.୩ ॥

ଚିତ ଏକପଦାର୍ଥତ୍ଵାଚ୍ଚିଚ୍ଚିତା ନ ଵିଶିଷ୍ୟତେ ।
ତସ୍ମାଦ୍ ଗୁଣତ୍ଵଂ ଜ୍ଞାନସ୍ୟ ଶଙ୍କରେଣ ନିରାକୃତମ୍ ॥ ୩୭.୪ ॥

ଜ୍ଞାତୁର୍ଜ୍ଞାନଂ ସ୍ଵରୂପଂ ସ୍ୟାନ୍ନ ଗୁଣୋ ନାପି ଚ କ୍ରିୟା ।
ୟଦି ସ୍ଵସ୍ୟ ସ୍ଵରୂପେଣ ଵୈଶିଷ୍ଟ୍ୟମନଵସ୍ଥିତିଃ ॥ ୩୭.୫ ॥

ଵାଚୈଵ ଶକ୍ୟତେ କର୍ତୁଂ ଵିଭାଗସ୍ସ୍ଵସ୍ଵରୂପୟୋଃ ।
ନାନୁଭୂତ୍ୟା ତତୋ ଦ୍ଵୈତଂ ସଚ୍ଛକ୍ତ୍ୟୋର୍ଵ୍ୟାଵହାରିକମ୍ ॥ ୩୭.୬ ॥

ବ୍ରହ୍ମଜ୍ଞାନସ୍ୟ ପୂର୍ଣସ୍ୟ ଵିଷୟୋ ଦ୍ୟୌରୁଦୀର୍ୟତେ ।
ସା ବ୍ରହ୍ମଣୋ ଵ୍ୟାପକତ୍ଵାଦ୍ଵସ୍ତୁତୋ ନାତିରିଚ୍ୟତେ ॥ ୩୭.୭ ॥

ଵିକାସାଦପି ସଙ୍କୋଚାତ୍ ସର୍ଗପ୍ରଲୟୟୋର୍ଦ୍ଵୟୋଃ ।
ପ୍ରଜ୍ଞାନସ୍ୟ ବୁଧୈରୁକ୍ତୌ ଜନ୍ମନାଶାଵୁଭୌ ଦିଵଃ ॥ ୩୭.୮ ॥

ଧର୍ମଭୂତଂ ପରସ୍ୟେଦଂ ନ କାର୍ୟଂ ପରମଂ ନଭଃ ।
ଅଖଣ୍ଡତ୍ଵାନ୍ନ ଵିକୃତିର୍ଵିଶ୍ଵସ୍ମିନ୍ନପ୍ରକୃତିତ୍ଵତଃ ॥ ୩୭.୯ ॥

ଆକାଶେ ପରମେ ଦୀପ୍ୟତ୍ ପ୍ରଜ୍ଞାନଂ ପରମାତ୍ମନଃ ।
ଏକାଗ୍ରତ୍ଵାତ୍ପ୍ରଵୃଦ୍ଧୋଷ୍ମଗଭୀରମଭଵନ୍ମହଃ ॥ ୩୭.୧୦ ॥

ତ୍ରିଧୈଵଂ ଧର୍ମଭୂତସ୍ୟ ଜ୍ଞାନସ୍ୟ ଵିକୃତିଂ ଵିନା ।
ଶୁଦ୍ଧତ୍ଵଵିଷୟତ୍ଵାଭ୍ୟାଂ ମହସ୍ତ୍ଵାଚ୍ଚ ଦଶାତ୍ରୟମ୍ ॥ ୩୭.୧୧ ॥

ଵିଜ୍ଞାନେ ଭାତି ୟେ ଭାନ୍ତି ଭାଵା ଦ୍ରଵ୍ୟଗୁଣାଦୟଃ ।
ନ କିଞ୍ଚିଦନୁଭୂୟନ୍ତେ ଵିଜ୍ଞାନୋପରମେ ତୁ ତେ ॥ ୩୭.୧୨ ॥

ଏଵଂ ସ୍ଵତଃ ପ୍ରକାଶତ୍ଵଂ ଵିଷୟାଣାଂ ନ ଦୃଶ୍ୟତେ ।
ସିଦ୍ଧିଶ୍ଚ ପରତୋ ନ ସ୍ୟାତ୍ ସମ୍ବନ୍ଧଂ କଞ୍ଚିଦନ୍ତରା ॥ ୩୭.୧୩ ॥

ଦୃଶ୍ୟତେ ଵିଷୟାକାରା ଗ୍ରହଣେ ସ୍ମରଣେ ଚ ଧୀଃ ।
ପ୍ରଜ୍ଞାଵିଷୟତାଦାତ୍ମ୍ୟମେଵଂ ସାକ୍ଷାତ୍ପ୍ରଦୃଶ୍ୟତେ ॥ ୩୭.୧୪ ॥

ନ ଚେତ୍ସମଷ୍ଟିଵିଜ୍ଞାନଵିଭୂତିରଖିଲଂ ଜଗତ୍ ।
ଵିଷୟଵ୍ୟଷ୍ଟିଵିଜ୍ଞାନତାଦାତ୍ମ୍ୟଂ ନୋପପଦ୍ୟତେ ॥ ୩୭.୧୫ ॥

ୟଥାଽସ୍ମଦାଦିଵିଜ୍ଞାନେ ଧ୍ୟେୟଂ ବୁଦ୍ଧିରିତି ଦ୍ଵୟମ୍ ।
ପୂର୍ଣେ ସମଷ୍ଟିଵିଜ୍ଞାନେ ଵିକୃତିଃ ପ୍ରକୃତିସ୍ତଥା ॥ ୩୭.୧୬ ॥

ପରିଣାମୋ ୟଥା ସ୍ଵପ୍ନଃ ସୂକ୍ଷ୍ମସ୍ୟ ସ୍ଥୂଲରୂପତଃ ।
ଜାଗ୍ରତ୍ପ୍ରପଞ୍ଚ ଏଷ ସ୍ୟାତ୍ତଥେଶ୍ଵରମହାଚିତଃ ॥ ୩୭.୧୭ ॥

ଵିକୃତିସ୍ସର୍ଵଭୂତାନି ପ୍ରକୃତିଃ ପରଦେଵତା ।
ସତଃ ପାଦସ୍ତୟୋରାଦ୍ୟା ତ୍ରିପାଦୀ ଗୀୟତେ ପରା ॥ ୩୭.୧୮ ॥

କବଲୀକୃତ୍ୟ ସଙ୍କଲ୍ପାନେକାଽପି ସ୍ୟାଦ୍ୟଥା ମତିଃ ।
ଭୂତାନି କବଲୀକୃତ୍ୟ ଦେଵତାଽପି ତଥା ପରା ॥ ୩୭.୧୯ ॥

ଭୂତାନାମାତ୍ମାନସ୍ସର୍ଗେ ସଂହୃତୌ ଚ ତଥାଽଽତ୍ମନି ।
ପ୍ରଭଵେଦ୍ଦେଵତା ଶ୍ରେଷ୍ଠା ସଙ୍କଲ୍ପାନାଂ ୟଥା ମତିଃ ॥ ୩୭.୨୦ ॥

ଅନୁଭୂତ୍ୟାତ୍ମିକା ସେୟମୀଶଶକ୍ତିଃ ପରାତ୍ପରା ।
ଆଧାରଚକ୍ରେ ପିଣ୍ଡେଷୁ ଵିରାଜତି ଵିଭିନ୍ନଵତ୍ ॥ ୩୭.୨୧ ॥

ସୂକ୍ଷ୍ମସ୍ଥୂଲେ ତତଃ ଶାଖେ ଵିଦ୍ୟୁଚ୍ଛକ୍ତିସମୀରଵତ୍ ।
ତତ୍ରାଦ୍ୟା ଜ୍ଞାନଶକ୍ତିସ୍ସ୍ୟାତ୍ କ୍ରିୟାଶକ୍ତିରନନ୍ତରା ॥ ୩୭.୨୨ ॥

ଜ୍ଞାନେନ୍ଦ୍ରିୟାଣି ପ୍ରଥମା ଵିଭୂତିର୍ମନସା ସହ ।
କର୍ମେନ୍ଦ୍ରିୟାଣି ତ୍ଵପରା ଵିଭୂତିସ୍ସହସା ସହ ॥ ୩୭.୨୩ ॥

କ୍ରିୟାମୂଲମୁତ ଜ୍ଞାନମୂଲଂ କିମିତି ଚିନ୍ତୟନ୍ ।
ଆତ୍ମଶକ୍ତିମିତୋ ଵିଦ୍ଵାନମୃତତ୍ଵାୟ କଲ୍ପତେ ॥ ୩୭.୨୪ ॥

ଗଭୀରାସ୍ସୁତରାମେତାଃ କାଲିକାତତ୍ତ୍ଵକାରିକାଃ ।
ଧିୟୋ ଭାସୋ ଗଣପତେର୍ଭଵନ୍ତୁ ଵିଦୁଷାଂ ମୁଦେ ॥ ୩୭.୨୫ ॥ 925

%c10-q2/Bhavani.Mallajosyula/uma\_c10\_q2\_1-25।txt medskip

ଅଷ୍ଟତ୍ରିଂଶଃ ସ୍ତବକଃ
ଦଶମହାଵିଦ୍ୟାଃ (ପାଦାକୁଲକଵୃତ୍ତମ୍)

ଦୂରୀକୁରୁତାଦ୍ ଦୁଃଖଂ ନିଖିଲଂ ଦୁର୍ଗାୟାସ୍ତଦ୍ଦରହସିତଂ ନଃ ।
ରଚିତାସ୍ୟାମ୍ଭୋମୃଦ୍ଭ୍ୟାଂ ୟଦଭୁଲ୍ଲେପନମମଲଂ ବ୍ରହ୍ମାଣ୍ଡସ୍ୟ ॥ ୩୮.୧ ॥

ଜନ୍ତୌ ଜନ୍ତୌ ଭୁଵି ଖେଲନ୍ତି ଭୂତେ ଭୂତେ ନଭସି ଲସନ୍ତୀ ।
ଦେଵେ ଦେଵେ ଦିଵି ଦୀପ୍ୟନ୍ତୀ ପୃଥଗିଵ ପୂର୍ଣା ସଂଵିଜ୍ଜୟତି ॥ ୩୮.୨ ॥

ଦହରସରୋଜାଦ୍ ଦ୍ଵିଦଲସରୋଜଂ ଦ୍ଵିଦଲସରୋଜାଦ୍ଦଶଶତପତ୍ରମ୍
ଦଶଶତପତ୍ରାଦ୍ଦେହଂ ଦେହାତ୍ ସକଲଂ ଵିଷୟଂ ସଂଵିଦ୍ ଵ୍ରଜତି ॥ ୩୮.୩ ॥

ଵହ୍ନିଜ୍ଵାଲା ସମିଧମିଵୈଷା ସକଲଂ ଦେହଂ ସଂଵିତ୍ପ୍ରାପ୍ତା ।
ପୃଥଗିଵ ଭୂତା ଵ୍ୟପଗତଵୀର୍ୟା ଭଵତି ସଧୂମା ସଂସାରାୟ ॥ ୩୮.୪ ॥

ଅତ୍ରାନୁଭଵସ୍ସୁଖଦୁଃଖାନାମତ୍ରାହଙ୍କୃତିରନୃତା ଭଵତି ।
ଅତ୍ରୈଵେଦଂ ସକଲଂ ଭିନ୍ନଂ ପ୍ରତିଭାସେତ ପ୍ରଜ୍ଞାସ୍ଖଲନେ ॥ ୩୮.୫ ॥

ଦଶଶତପତ୍ରାଦ୍ ଦ୍ଵିଦଲସରୋଜଂ ଦ୍ଵିଦଲସରୋଜାଦ୍ଦହରସରୋଜମ୍ ।
ଅଵତରତୀଶା ୟେଷାମେଷା ତେଷାମନ୍ତର୍ନିତ୍ୟା ନିଷ୍ଠା ॥ ୩୮.୬ ॥

ଅଥଵା ଦେହାଦାଵୃତ୍ତସ୍ସନ୍ନନ୍ୟତମସ୍ୟାମାସୁ ସ୍ଥଲ୍ୟାମ୍ ।
ଆଧାରସ୍ଥେ କୁଲକୁଣ୍ଡେ ଵା ସ୍ଥିତଧୀର୍ନିତ୍ୟାଂ ନିଷ୍ଠାଂ ଲଭତେ ॥ ୩୮.୭ ॥

ଦଶଶତପତ୍ରେ ଶକ୍ତିର୍ଲଲିତା ଵଜ୍ରଵତୀ ସା ଦ୍ଵିଦଲସରୋଜେ ।
ଦହାରାମ୍ବୁରୁହେ ଭଦ୍ରା କାଲୀ ମୂଲାଧାରେ ଭୈରଵ୍ୟାଖ୍ୟା ॥ ୩୮.୮ ॥

ଖେଲତି ଲଲିତା ଦ୍ରଵତି ସ୍ଥାନେ ଛିନ୍ନଗ୍ରନ୍ଥିନି ରାଜତ୍ୟୈନ୍ଦ୍ରୀ ।
ବଦ୍ଧକଵାଟେ ଭଦ୍ରା କାଲୀ ତପସା ଜ୍ଵଲିତେ ଭୈରଵ୍ୟାଖ୍ୟା ॥ ୩୮.୯ ॥

ୟଦ୍ୟପି କାଲୀଵଜ୍ରେଶ୍ଵର୍ୟୌ ସ୍ୟାତାଂ ଭିନ୍ନେ ଇଵ ପିଣ୍ଡେଷୁ ।
ଓଜସ୍ତତ୍ତ୍ଵସ୍ୟୈକ୍ୟାଦଣ୍ଡେ ନ ଦ୍ଵୌ ଶକ୍ତେର୍ଭେଦୌ ଭଵତଃ ॥ ୩୮.୧୦ ॥

ଏଵମଭେଦୋ ୟଦ୍ୟପି କର୍ମଦ୍ଵୈଧାତ୍ ଦ୍ଵୈଧଂ ତତ୍ରାପି ସ୍ୟାତ୍ ।
ସୈଵ ପଚନ୍ତୀ ଭୁଵନଂ କାଲୀ ସୈଵ ଦହନ୍ତୀ ଶତ୍ରୂନୈନ୍ଦ୍ରୀ ॥ ୩୮.୧୧ ॥

ପିଣ୍ଡେ ଚାଣ୍ଡେ ଜଙ୍ଗମସାରଃ ଶୁଦ୍ଧା ପ୍ରଜ୍ଞା ସୁନ୍ଦର୍ୟୁକ୍ତା ।
ଵିଷୟଦଶାୟାଂ ଦେଶୀଭୂତା ସେୟଂ ଭୁଵନେଶ୍ଵର୍ୟାଖ୍ୟାତା ॥ ୩୮.୧୨ ॥

ଶୂନ୍ୟପ୍ରଖ୍ୟା ୟା ଚିଲ୍ଲୀନା ପ୍ରଲୟେ ବ୍ରହ୍ମଣି ଜନ୍ମିଷୁ ସୁପ୍ତୌ
କବଲିତସକଲବ୍ରହ୍ମାଣ୍ଡାଂ ତାଂ କଵୟଃ ଶ୍ରେଷ୍ଠାଂ ଜ୍ୟେଷ୍ଠାମାହୁଃ ॥ ୩୮.୧୩ ॥

ନିଦ୍ରାଵିସ୍ମୃତିମୋହାଲସ୍ୟପ୍ରଵିଭେଦୈସ୍ସା ଭଵମଗ୍ନେଷୁ ।
ଏଷୈଵ ସ୍ୟାଦ୍ୟୁଞ୍ଜାନେଷୁ ଧ୍ଵସ୍ତଵିକଲ୍ପଃ କୋଽପି ସମାଧିଃ ॥ ୩୮.୧୪ ॥

ଐନ୍ଦ୍ରୀ ଶକ୍ତିର୍ଵ୍ୟକ୍ତବଲା ଚେଦ୍ ଭିନ୍ନେ ସ୍ୟାତାଂ ଶୀର୍ଷକପାଲେ ।
ତସ୍ମାଦେତାଂ ଚତୁରଵଚସ୍କାଃ ପରିଭାଷନ୍ତେ ଛିନ୍ନଶିରସ୍କାମ୍ ॥ ୩୮.୧୫ ॥

ଭଵତି ପରା ଵାଗ୍ଭୈରଵ୍ୟାଖ୍ୟା ପଶ୍ୟନ୍ତୀ ସା କଥିତା ତାରା ।
ରସନିଧିମାପ୍ତା ଜିହ୍ଵାରଙ୍ଗଂ ମାତଙ୍ଗୀତି ପ୍ରଥିତା ସେୟମ୍ ॥ ୩୮.୧୬ ॥

ପିଣ୍ଡେ ଚାଣ୍ଡେ ସ୍ତମ୍ଭନଶକ୍ତିର୍ବଗଲା ମାତ୍ରସ୍ତଵ ମହିମୈକଃ ।
ସର୍ଵେ ଵ୍ୟକ୍ତାଃ କିରଣାଃ କମଲା ବାହ୍ୟୋ ମହିମା ଭୁଵନାମ୍ବ ତଵ ॥ ୩୮.୧୭ ॥

ବୋଧେ ବୋଧେ ବୋଦ୍ଧୁଶ୍ଶକ୍ତିଂ ସଙ୍କଲ୍ପାନାଂ ପଶ୍ଚାଦ୍ଭାନ୍ତୀମ୍ ।
ଅଵିମୁଞ୍ଚନ୍ୟୋ ମନୁତେ ଧୀରୋ ୟତ୍କିଞ୍ଚିଦ୍ଵା ଲଲିତାଽଵତି ତମ୍ ॥ ୩୮.୧୮ ॥

ଦୃଷ୍ଟୌ ଦୃଷ୍ଟୌ ଦ୍ରଷ୍ଟୁଶ୍ଶକ୍ତିଂ ଲୋଚନମଣ୍ଡଲମଧ୍ୟେ ଭାନ୍ତୀମ୍ ।
ଅଵିମୁଞ୍ଚନ୍ୟଃ ପଶ୍ୟତି ଧୀରୋ ୟତ୍କିଞ୍ଚିଦ୍ଵା ତମଵତ୍ୟୈନ୍ଦ୍ରୀ ॥ ୩୮.୧୯ ॥

ପ୍ରାଣସମୀରଂ ଵିଦଧାନମିମଂ ନିତ୍ୟାଂ ୟାତ୍ରାମତ୍ର ଶରୀରେ ।
ଚରଣେ ଚରଣେ ପରିଶୀଲୟତି ସ୍ଥିରଦୃଷ୍ଟିର୍ୟସ୍ତମଵତି କାଲୀ ॥ ୩୮.୨୦ ॥

ସ୍ଥୂଲଵିକାରାନ୍ ପରିମୁଞ୍ଚନ୍ତ୍ୟା ନିର୍ମଲନଭସି ସ୍ଥିତୟା ଦୃଷ୍ଟ୍ୟା ।
ମଜ୍ଜନ୍ତ୍ୟା ଵା ଦହରାକାଶେ ଲୋକେଶ୍ଵର୍ୟାଃ କରୁଣାଂ ଲଭତେ ॥ ୩୮.୨୧ ॥

ସର୍ଵଵିକଲ୍ପାନ୍ ପରିଭୂୟାନ୍ତର୍ଵିମଲଂ ମୌନଂ ମହଦଵଲମ୍ବ୍ୟ ।
କେଵଲମେକସ୍ତିଷ୍ଠତି ୟୋଽନ୍ତସ୍ତଂ ସା ଜ୍ୟେଷ୍ଠା କୁରୁତେ ମୁକ୍ତମ୍ ॥ ୩୮.୨୨ ॥

ମୂଲେ ସ୍ଥିତ୍ୟା ଭୈରଵ୍ୟାଖ୍ୟାଂ ତାରାଂ ଦେଵୀମୁଦ୍ଗୀଥେନ ।
ସେଵେତାର୍ୟୋ ଵିଦିତରହସ୍ୟୋ ମାତଙ୍ଗୀଂ ତାଂ ଗୁଣଗାନେନ ॥ ୩୮.୨୩ ॥

ଆସନବନ୍ଧାଦଚଲୋ ଭୂତ୍ଵା ରୁଦ୍ଧପ୍ରାଣୋ ବଗଲାଂ ଭଜତେ ।
ଅଭିତୋ ଵ୍ୟାପ୍ତଂ ଵ୍ୟକ୍ତଂ ତେଜଃ କଲୟନ୍ କମଲାକରୁଣାଂ ଲଭତେ ॥ ୩୮.୨୪ ॥

ଏକଵିଧାଦୌ ବହୁଭେଦାଽଥୋ ଶକ୍ତିରନନ୍ତା ପରମେଶସ୍ୟ ।
ସଭଜନମାର୍ଗଂ ଗଣପତିମୁନିନା ପାଦାକୁଲକୈରେଵଂ ଵିଵୃତା ॥ ୩୮.୨୫ ॥ 950

%c10-q3/Sarada.Susarla/uma-c10-q3-itrans.txt medskip

ଏକୋନଚତ୍ଵାରିଂଶଃ ସ୍ତବକଃ
ପ୍ରାୟୋ ଵ୍ୟୋମଶରୀରା (ଇନ୍ଦ୍ରଵଜ୍ରାଵୃତ୍ତମ୍)

ଵ୍ୟାପ୍ୟେଦମିନ୍ଦୋର୍ଭୁଵନଂ ୟ ୟେଵ
ପ୍ରାୟେଣ ତସ୍ୟାମଲଚନ୍ଦ୍ରିକାଽଭୂତ୍ ।
ମନ୍ଦସ୍ତଵାର୍ତିଂ ସ ଧୁନୋତୁ ହାସୋ
ନିଃଶେଷଲୋକେଶ୍ଵରଵଲ୍ଲଭାୟାଃ ॥ ୩୯.୧ ॥

ପୂର୍ଣେ ଵିୟତ୍ୟେକତଟିଜ୍ଜ୍ଵଲନ୍ତୀ
ଲୋକାନଶେଷାନନିଶଂ ପଚନ୍ତୀ ।
ମେଘେ କଦାଚିନ୍ମହସା ସ୍ଫୁରନ୍ତୀ
ଚଣ୍ଡୀ ପ୍ରଚଣ୍ଡା ହରତାଦଘଂ ନଃ ॥ ୩୯.୨ ॥

ଗୋଲାନି କାନ୍ୟପ୍ୟଧୁନୋଦ୍ଭଵନ୍ତି
ଜୀର୍ୟନ୍ତି କାନ୍ୟପ୍ୟଖିଲେଶକାନ୍ତେ
ୟାନ୍ତ୍ୟମ୍ବିକେ କାନ୍ୟପି ଵୃଦ୍ଧିମତ୍ର
ପାକେ ଭଵତ୍ୟାଃ ପରିତଃ ପ୍ରଵୃତ୍ତେ ॥ ୩୯.୩ ॥

ଭାସାଂ ଵିନେତ୍ରା ମହତା ଗ୍ରହୈଶ୍ଚ
ଭୂରିପ୍ରମାଣୈର୍ୟୁତମୀଶକାନ୍ତେ ।
ଏକୈକମଣ୍ଡଂ ତଵ ଲୋମଵଚ୍ଚେତ୍
କସ୍ତେ ମହଦ୍ଭାଗ୍ୟମିହ ବ୍ରଵୀତୁ ॥ ୩୯.୪ ॥

ନାଥସ୍ୟ ତେ ରୂପମଣୋରଣୀୟୋ
ମାତସ୍ତ୍ଵଦୀୟଂ ମହତୋ ମହୀୟଃ ।
ଜନାତି ୟୋ ଦେଵି ରହସ୍ୟମେତଦ୍
ଵ୍ୟାଖ୍ୟାତୁମେଷ ପ୍ରଭଵତ୍ୟଶେଷମ୍ ॥ ୩୯.୫ ॥

ୟଦ୍ ଗର୍ଜିତଂ ଵାରିଦଘର୍ଷଣେଷୁ
ଶବ୍ଦସ୍ତଵାୟଂ ସୁଗଭୀରଘୋଷଃ ।
ୟଲ୍ଲୋକରାଜ୍ଞି ସ୍ଫୁରିତଂ ତଦେତ-
ଦୁଜ୍ଜୃମ୍ଭିତଂ କିଞ୍ଚନ କାନ୍ତିଵୀଚେଃ ॥ ୩୯.୬ ॥

ଇନ୍ଦ୍ରସ୍ୟ ଵଜ୍ରଂ ଜ୍ଵଲିତଂ କୃଶାନୋର୍-
ଜ୍ୟୋତିସ୍ସହସ୍ରଚ୍ଛଦବାନ୍ଧଵସ୍ୟ ।
ପୀୟୂଷଭାନୋର୍ହସିତଂ ଵିସାରି
ଜୀଵସ୍ୟ ଚକ୍ଷୁର୍ମମ ତାତ ଦୈଵମ୍ ॥ ୩୯.୭ ॥

ୟସ୍ୟୈଵ ତେଜଃ ପ୍ରଵିଭକ୍ତମର୍କ-
ଵିଦ୍ୟୁଚ୍ଛଶାଙ୍କାନଲଲୋଚନେଷୁ ।
ଗୂଢଂ ତଦାକାଶଗୃହେ ସମନ୍ତା-
ଦନ୍ତାନଭିଜ୍ଞଂ ପ୍ରଣମାମି ଦୈଵମ୍ ॥ ୩୯.୮ ॥

ଜାଗ୍ରତ୍ସୁ ବୁଦ୍ଧିର୍ନିମିଷତ୍ସୁ ନିଦ୍ରା
ଶୁଷ୍କେଷୁ ପକ୍ତିସ୍ତରୁଣେଷୁ ଵୃଦ୍ଧିଃ ।
ଧୀରେଷୁ ନିଷ୍ଠା ଚପଲେଷୁ ଚେଷ୍ଟା
ଦେଵୀ ମମାପତ୍ତିମପାକରୋତୁ ॥ ୩୯.୯ ॥

ଵିଦ୍ୟାଵତୋ ଵାଦଵିଧାନଶକ୍ତିର୍-
ଵୀରସ୍ୟ ସଙ୍ଗ୍ରାମଵିଧାନଶକ୍ତିଃ ।
ନାରୀମଣେର୍ମୋହଵିଧାନଶକ୍ତିର୍-
ଲେଶତ୍ରୟଂ କିଞ୍ଚିଦାପାରଶକ୍ତେଃ ॥ ୩୯.୧୦ ॥

ଉତ୍ସାହୟନ୍ତୀ ତପତାଂ ମନାଂସି
ସଞ୍ଚୋଦୟନ୍ତୀ ଚ ମହାକ୍ରିୟାସୁ ।
ସଙ୍କ୍ଷୋଭୟନ୍ତୀ ହୃଦୟଂ ଖଲାନାଂ
ସମ୍ମୋହୟନ୍ତୀ ଚ ପରାଽଵତାନ୍ନଃ ॥ ୩୯.୧୧ ॥

ସଞ୍ଚାଲୟନ୍ତୀ ସକଲସ୍ୟ ଦେହଂ
ଵ୍ୟାନସ୍ୟ ଶକ୍ତ୍ୟା ପରିତୋ ଲସନ୍ତ୍ୟା ।
ଜେତୁଃ ପ୍ରତାପେଽସ୍ତି ପଲାୟନେଽସ୍ତି
ଭୀତସ୍ୟ ଚେୟଂ ନିଖିଲେଶଶକ୍ତିଃ ॥ ୩୯.୧୨ ॥

ଏକଂ ସ୍ଵରୂପଂ ବହୁଚିତ୍ରୟୋଗାତ୍
ସନ୍ଦର୍ଶୟନ୍ତୀ ଵିଵିଧଂ ଜନେଭ୍ୟଃ ।
ସମ୍ୟଗ୍ଦୃଶେ ସ୍ଵଂ ଵିଭୁମର୍ପୟନ୍ତୀ
ସର୍ଵାଦିମାୟୈଵ ମହେଶଜାୟା ॥ ୩୯.୧୩ ॥

ୟସ୍ସଂଶ୍ରୟେତାଖିଲସଙ୍ଗତିସ୍ତ୍ଵାଂ
ଧ୍ୟାନେନ ମନ୍ତ୍ରେଣ ଗୁଣସ୍ତଵୈର୍ଵା ।
ତ୍ରୈଲୋକ୍ୟସାମ୍ରାଜ୍ୟଧୁରନ୍ଧରସ୍ୟ
ଶୁଦ୍ଧାନ୍ତକାନ୍ତେ ସ କୃତୀ ମନୁଷ୍ୟଃ ॥ ୩୯.୧୪ ॥

ମୂଲାଗ୍ନିମୁଦ୍ଦୀପ୍ୟ ଶିରଶ୍ଶଶାଙ୍କଂ
ସନ୍ଦ୍ରାଵ୍ୟ ୟସ୍ତର୍ପୟତେ କୃତୀ ତ୍ଵାମ୍ ।
ତସ୍ମିନ୍ନଗାଧୀଶ୍ଵରକନ୍ୟକେ ତ୍ଵଂ
ପ୍ରାଦୁର୍ଭଵନ୍ତୀ ନ କିମାଦଧାସି ॥ ୩୯.୧୫ ॥

ୟସ୍ତ୍ଵାଂ ସହସ୍ରାରସରୋଜମଧ୍ୟେ
ସୋମସ୍ଵରୂପାଂ ଭଜତେଽମ୍ବ ୟୋଗୀ ।
ତସ୍ୟାନ୍ତରଃ ଶାନ୍ତିମୁପୈତି ତାପୋ
ବାହ୍ୟସ୍ୟ କା ନାମ କଥାଽଲ୍ପକସ୍ୟ ॥ ୩୯.୧୬ ॥

ଦଣ୍ଡେନ ୟୋଽନ୍ତର୍ଦହରେଽଵତୀର୍ଣଃ
ପ୍ରାଣେନ ଵାଚା ମହସା ଧିୟା ଵା ।
ପ୍ରାପ୍ନୋତି ସୋଽୟଂ ପୁରମଦ୍ଵିତୀୟଂ
ୟତ୍ର ତ୍ଵମୀଶା ସହ ଚିତ୍ରଲୀଲା ॥ ୩୯.୧୭ ॥

ତନ୍ତ୍ରୋଦିତଂ ଵିଶ୍ଵଵିନେତ୍ରି ମନ୍ତ୍ରଂ
ୟସ୍ତେ ନରଃ ସଂୟମଵାନୁପାସ୍ତେ ।
ରୁଦ୍ରାଣି ସାନ୍ଦ୍ରାମ୍ବୁଦକେଶପାଶେ
ପାଶୈର୍ଵିମୁକ୍ତଃ ସ ଜୟତ୍ୟଶେଷମ୍ ॥ ୩୯.୧୮ ॥

ପଦ୍ମାସନୋ ଦ୍ଵାଦଶଵର୍ଣଶାନ୍ତୀ
ଦମ୍ଭୋଲିପାଣିର୍ଭୁଵନାଧିନାଥା ।
ଗୀର୍ଵାଣମାର୍ଗୋ ଭୃଗୁରବ୍ଜୟୋନିର୍-
ଅନ୍ତେ ତଥାଗ୍ରେ ଚ ହଲାଂ ଵିରାଜୀ ॥ ୩୯.୧୯ ॥

ଜମ୍ଭସ୍ୟ ହନ୍ତାଽନଲଶାନ୍ତିଚନ୍ଦ୍ରୈଃ
ସଂୟୁକ୍ତ ଊଷ୍ମା ଗଲଦେଶଜନ୍ମା ।
ଦନ୍ତସ୍ଥଲୀସମ୍ଭଵ ଊଷ୍ମଵର୍ଣୋ
ଵାଣୀପତିର୍ଵଜ୍ରଧରଶ୍ଚ ଲଜ୍ଜା ॥ ୩୯.୨୦ ॥

ଵିଦ୍ୟା ତ୍ଵିୟଂ ପଞ୍ଚଦଶାକ୍ଷରାଢ୍ୟା
ସାକ୍ଷାନ୍ମହାମୌନଗୁରୂପଦିଷ୍ଟା ।
ଗୋପ୍ୟାସୁ ଗୋପ୍ୟା ସୁକୃତୈରଵାପ୍ୟା
ଶ୍ରେଷ୍ଠା ଵିନୁତ୍ୟା ପରମେଷ୍ଠିନାଽପି ॥ ୩୯.୨୧ ॥

ଦେହେଷ୍ଵିୟଂ କୁଣ୍ଡଲିନୀ ନ୍ୟଗାଦି
ଭୂତେଷୁ ଵିଦ୍ୟୁଦ୍ ଭୁଵନେଷୁ ଚାଭ୍ରମ୍ ।
ଦେଵାଙ୍ଗନାମସ୍ତକଲାଲିତାଙ୍ଘ୍ରିର୍-
ଦେଵୀ ଭଵାନୀ ଖଲୁ ଦେଵତାସୁ ॥ ୩୯.୨୨ ॥

ଚକ୍ଷୁର୍ଵିଧାୟାଚଲମନ୍ତରେଣ
ପ୍ରାଣଂ ପ୍ରପଶ୍ୟନ୍ ମନୁଵର୍ଣରୂପମ୍ ।
ସଂସେଵତେ ଚେତ୍ସକଲସ୍ୟ ଧାତ୍ରୀଂ
ସର୍ଵେଷ୍ଟଲାଭୋ ଵିଦୁଷଃ କରସ୍ଥଃ ॥ ୩୯.୨୩ ॥

ଏକାକ୍ଷରୀଃ ପଞ୍ଚଦଶାକ୍ଷରୀଂ ଵା
ଵିଦ୍ୟାଃ ପ୍ରକୃଷ୍ଟାଃ ସକଲେଶଶକ୍ତେଃ ।
ୟୋ ଭକ୍ତିୟୁକ୍ତଃ ପ୍ରଜପେଦମୁଷ୍ୟ
ପ୍ରାଣୋ ଵଶେ ନିସ୍ତୁଲସିଦ୍ଧିୟୋନିଃ ॥ ୩୯.୨୪ ॥

ଏତାଃ କଵୀନାଂ ପଦକିଙ୍କରସ୍ୟ
ପୂତାଃ ପ୍ରମୋଦଂ ପରମାଵହନ୍ତୁ ।
ଗୀତାସ୍ସଭକ୍ତିଦ୍ରଵମିନ୍ଦ୍ରଵଜ୍ରାଃ
ଶ୍ଵେତାଚଲାଧୀଶ୍ଵରଵଲ୍ଲଭାୟାଃ ॥ ୩୯.୨୫ ॥ 975

%c10-q4/Sai.Susarla/c10-q4।txt medskip

ଚତ୍ଵାରିଂଶଃ ସ୍ତବକଃ
ଦୈଵଗୀତମ୍ (ପାଦାକୁଲକଵୃତ୍ତମ୍)

ଶମୟତୁ ପାପଂ ଦମୟତୁ ଦୁଃଖଂ ହରତୁ ଵିମୋହଂ ସ୍ଫୁଟୟତୁ ବୋଧମ୍ ।
ପ୍ରଥୟତୁ ଶକ୍ତିଂ ମନ୍ଦଂ ହସିତଂ ମନସିଜଶାସନକୁଲସୁଦୃଶୋ ନଃ ॥ ୪୦.୧ ॥

ଆର୍ଦ୍ରା ଦୟୟା ପୂର୍ଣା ଶକ୍ତ୍ୟା ଦୃଷ୍ଟିଵଶଂଵଦଵିଷ୍ଟପରାଜା ।
ଅଖିଲପୁରନ୍ଧ୍ରୀପୂଜ୍ୟା ନାରୀ ମମ ନିଶ୍ଶେଷାଂ ଵିପଦଂ ହରତୁ ॥ ୪୦.୨ ॥

ଶୁଦ୍ଧବ୍ରହ୍ମଣି ମୋଦୋ ଦୈଵଂ ତତ୍ର ସିସୃକ୍ଷତି କାମୋ ଦୈଵମ୍ ।
ସୃଜତି ପଦାର୍ଥାନ୍ ଦୃଷ୍ଟିର୍ଦୈଵଂ ତାନ୍ ବିଭ୍ରାଣେ ମହିମା ଦୈଵମ୍ ॥ ୪୦.୩ ॥

ଵିକୃତୌ ଵିକୃତୌ ପ୍ରକୃତିର୍ଦୈଵଂ ଵିଷୟେ ଵିଷୟେ ସତ୍ତା ଦୈଵମ୍ ।
ଦୃଷ୍ଟୌ ଦୃଷ୍ଟୌ ପ୍ରମିତିର୍ଦୈଵଂ ଧ୍ୟାନେ ଧ୍ୟାନେ ନିଷ୍ଠା ଦୈଵମ୍ ॥ ୪୦.୪ ॥

ସ୍ଫୂର୍ତୌ ସ୍ଫୂର୍ତୌ ମାୟା ଦୈଵଂ ଚଲନେ ଚଲନେ ଶକ୍ତିର୍ଦୈଵମ୍ ।
ତେଜସି ତେଜସି ଲକ୍ଷ୍ମୀର୍ଦୈଵଂ ଶବ୍ଦେ ଶବ୍ଦେ ଵାଣୀ ଦୈଵମ୍ ॥ ୪୦.୫ ॥

ହୃଦୟେ ହୃଦୟେ ଜୀଵଦ୍ଦୈଵଂ ଶୀର୍ଷେ ଶୀର୍ଷେ ଧ୍ୟାୟଦ୍ଦୈଵମ୍ ।
ଚକ୍ଷୁଷି ଚକ୍ଷୁଷି ରାଜଦ୍ଦୈଵଂ ମୂଲେ ମୂଲେ ପ୍ରତପଦ୍ଦୈଵମ୍ ॥ ୪୦.୬ ॥

ଅଭିତୋ ଗଗନେ ପ୍ରସରଦ୍ଦୈଵଂ ପୃଥିଵୀଲୋକେ ରୋହଦ୍ଦୈଵମ୍ ।
ଦିନକରବିମ୍ବେ ଦୀପ୍ୟଦ୍ଦୈଵଂ ସିତକରବିମ୍ବେ ସିଞ୍ଚଦ୍ଦୈଵମ୍ ॥ ୪୦.୭ ॥

ଶ୍ରାଵଂ ଶ୍ରାଵଂ ଵେଦ୍ୟଂ ଦୈଵଂ ନାମଂ ନାମଂ ରାଧ୍ୟଂ ଦୈଵମ୍ ।
ସ୍ମାରଂ ସ୍ମାରଂ ଧାର୍ୟଂ ଦୈଵଂ ଵାରଂ ଵାରଂ ସ୍ତୁତ୍ୟଂ ଦୈଵମ୍ ॥ ୪୦.୮ ॥

ଶ୍ରୁତିଷୁ ଵଟୂନାଂ ଗ୍ରାହ୍ୟଂ ଦୈଵଂ ଗୃହିଣାମଗ୍ନୌ ତର୍ପ୍ୟଂ ଦୈଵମ୍ ।
ତପତାଂ ଶୀର୍ଷେ ପୁଷ୍ଟଂ ଦୈଵଂ ୟତିନାଂ ହୃଦୟେ ଶିଷ୍ଟଂ ଦୈଵମ୍ ॥ ୪୦.୯ ॥

ନମତା ପୁଷ୍ପୈଃ ପୂଜ୍ୟଂ ଦୈଵଂ କଵିନା ପଦ୍ୟାରାଧ୍ୟଂ ଦୈଵମ୍ ।
ମୁନିନା ମନସା ଧ୍ୟେୟଂ ଦୈଵଂ ୟତିନା ସ୍ଵାତ୍ମନି ଶୋଧ୍ୟଂ ଦୈଵମ୍ ॥ ୪୦.୧୦ ॥

ସ୍ତୁଵତାଂ ଵାଚୋ ଵିଦଧଦ୍ଦୈଵଂ ସ୍ମରତାଂ ଚେତଃ ସ୍ଫୁଟୟଦ୍ଦୈଵମ୍ ।
ଜପତାଂ ଶକ୍ତିଂ ପ୍ରଥୟଦ୍ଦୈଵଂ ନମତାଂ ଦୁରିତଂ ଦମୟଦ୍ଦୈଵମ୍ ॥ ୪୦.୧୧ ॥

ଵାଚୋ ଵିନୟଦ୍ଵହ୍ନୌ ଦୈଵଂ ପ୍ରାଣାନ୍ ଵିନୟଦ୍ଵିଦ୍ୟୁତି ଦୈଵମ୍ ।
କାମାନ୍ ଵିନୟଚ୍ଚନ୍ଦ୍ରେ ଦୈଵଂ ବୁଦ୍ଧୀର୍ଵିନୟତ୍ସୂର୍ୟେ ଦୈଵମ୍ ॥ ୪୦.୧୨ ॥

ହୃଦୟେ ନିଵସଦ୍ ଗୃହ୍ଣଦ୍ଦୈଵଂ ଵସ୍ତୌ ନିଵସଦ୍ଵିସୃଜଦ୍ଦୈଵମ୍ ।
କଣ୍ଠେ ନିଵସତ୍ପ୍ରଵଦଦ୍ଦୈଵଂ କୁକ୍ଷୌ ନିଵସତ୍ପ୍ରପଚଦ୍ଦୈଵମ୍ ॥ ୪୦.୧୩ ॥

ଦେହେ ନିଵସଦ୍ଵିଲଚଦ୍ଦୈଵଂ ପଞ୍ଚପ୍ରାଣାକାରଂ ଦୈଵମ୍ ।
ଭାଗି ସମସ୍ତସ୍ୟାନ୍ନେ ଦୈଵଂ ସ୍ଵାହାକାରେ ତୃପ୍ୟଦ୍ଦୈଵମ୍ ॥ ୪୦.୧୪ ॥

ବିଭ୍ରନ୍ନାରୀଵେଷଂ ଦୈଵଂ ଶୁଭ୍ରଦରସ୍ମିତଵିଭ୍ରାଡ୍ ଦୈଵମ୍ ।
ଅଭ୍ରମଦାପହଚିକୁରଂ ଦୈଵଂ ଵିଭ୍ରମଵାସସ୍ଥାନଂ ଦୈଵମ୍ ॥ ୪୦.୧୫ ॥

ଶୀତଜ୍ୟୋତିର୍ଵଦନଂ ଦୈଵଂ ରୁଚିବିନ୍ଦୂପମରଦନଂ ଦୈଵମ୍ ।
ଲାଵଣ୍ୟାମୃତସଦନଂ ଦୈଵଂ ସ୍ମରରିପୁଲୋଚନମଦନଂ ଦୈଵମ୍ ॥ ୪୦.୧୬ ॥

ଲକ୍ଷ୍ମୀଵୀଚିମଦଲିକଂ ଦୈଵଂ ପ୍ରଜ୍ଞାଵୀଚିମଦୀକ୍ଷଂ ଦୈଵମ୍ ।
ତେଜୋଵୀଚିମଦଧରଂ ଦୈଵଂ ସମ୍ମଦଵୀଚିମଦାସ୍ୟଂ ଦୈଵମ୍ ॥ ୪୦.୧୭ ॥

କରୁଣୋଲ୍ଲୋଲିତନେତ୍ରଂ ଦୈଵଂ ଶ୍ରୀକାରାଭଶ୍ରୋତ୍ରଂ ଦୈଵମ୍ ।
କୁସୁମସୁକୋମଲଗାତ୍ରଂ ଦୈଵଂ କଵିଵାଗ୍ଵୈଭଵପାତ୍ରଂ ଦୈଵମ୍ ॥ ୪୦.୧୮ ॥

ହିମଵତି ଶୈଲେ ଵ୍ୟକ୍ତଂ ଦୈଵଂ ସିତଗିରିଶିଖରେ କ୍ରୀଡଦ୍ଦୈଵମ୍ ।
ତୁମ୍ବୁରୁନାରଦଗୀତଂ ଦୈଵଂ ସୁରମୁନିସିଦ୍ଧଧ୍ୟାତଂ ଦୈଵମ୍ ॥ ୪୦.୧୯ ॥

କ୍ଵଚିଦପି ରତିଶତଲଲିତଂ ଦୈଵଂ କ୍ଵଚିଦପି ସୁତରାଂ ଚଣ୍ଡଂ ଦୈଵମ୍ ।
ଭକ୍ତମନୋନୁଗଵେଷଂ ଦୈଵଂ ୟୋଗିମନୋନୁଗଵିଭଵଂ ଦୈଵମ୍ ॥ ୪୦.୨୦ ॥

ଚରିତେ ମଧୁରଂ ସ୍ତୁଵତାଂ ଦୈଵଂ ଚରଣେ ମଧୁରଂ ନମତାଂ ଦୈଵମ୍ ।
ଅଧରେ ମଧୁରଂ ଶମ୍ଭୋର୍ଦୈଵଂ ମମ ତୁ ସ୍ତନ୍ୟେ ମଧୁରଂ ଦୈଵମ୍ ॥ ୪୦.୨୧ ॥

ଭୁଜଭୃତଵିଷ୍ଟପଭାରଂ ଦୈଵଂ ପଦଧୃତସମ୍ପତ୍ସାରଂ ଦୈଵମ୍ ।
ଲାଲିତନିର୍ଜରଵୀରଂ ଦୈଵଂ ରକ୍ଷିତସାତ୍ତ୍ଵିକଧୀରଂ ଦୈଵମ୍ ॥ ୪୦.୨୨ ॥

ଚିଚ୍ଛକ୍ତ୍ୟାତ୍ମକମଧିତନୁ ଦୈଵଂ ତଟିଦାକୃତ୍ୟଧିଭୂତଂ ଦୈଵମ୍ ।
ଶ୍ରୁତିଷୁ ଶିଵେତି ପ୍ରଥିତଂ ଦୈଵଂ ଜୟତି ଜଗତ୍ତ୍ରୟଵିନୁତଂ ଦୈଵମ୍ ॥ ୪୦.୨୩ ॥

ରମଣମହର୍ଷେରନ୍ତେଵାସୀ ମଧ୍ୟମପୁତ୍ରୋ ନରସିଂହସ୍ୟ ।
ଵାସିଷ୍ଠୋଽୟଂ ମରୁତାଂ ମାତୁର୍ଗଣପତିରଙ୍ଘ୍ରିଂ ଶରଣମୁପୈତି ॥ ୪୦.୨୪ ॥

ତ୍ରିଭୁଵନଭର୍ତୁଃ ପରମା ଶକ୍ତିସ୍ସକଲସଵିତ୍ରୀ ଗୌରୀ ଜୟତି ।
ତନ୍ନୁତିରେଷା ଗଣପତିରଚିତା ପାଦାକୁଲକପ୍ରାନ୍ତା ଜୟତି ॥ ୪୦.୨୫ ॥ 1000

॥ ସମାପ୍ତଂ ଚ ଦଶମଂ ଶତକମ୍ ॥

॥ ଇତି ଶ୍ରୀଭଗଵନ୍ମହର୍ଷିରମଣାନ୍ତେଵାସିନୋ ଵାସିଷ୍ଠସ୍ୟ ନରସିଂହସୂନୋଃ ॥

ଗଣପତେଃ କୃତିଃ ଉମାସହସ୍ରଂ ସମାପ୍ତମ୍ ॥

Also Read 1000 Names of Uma Sahasram :

1000 Names of Umasahasram | Sahasranama Stotram in Hindi | English | Bengali | Gujarati | Punjabi | Kannada | Malayalam | Oriya | Telugu | Tamil