Narayaniyam Sadasititamadasakam in Telugu:

॥ నారాయణీయం సప్తాశీతితమదశకమ్ ॥

సప్తాశీతితమదశకమ్ (౮౭) – కుచేలోపాఖ్యానమ్ |

కుచేలనామా భవతః సతీర్థ్యతాం
గతః స సాన్దీపనిమన్దిరే ద్విజః |
త్వదేకరాగేణ ధనాదినిఃస్పృహో
దినాని నిన్యే ప్రశమీ గృహాశ్రమీ || ౮౭-౧ ||

సమానశీలాఽపి తదీయవల్లభా
తథైవ నో చిత్తజయం సమేయుషీ |
కదాచిదూచే బత వృత్తిలబ్ధయే
రమాపతిః కిం న సఖా నిషేవ్యతే || ౮౭-౨ ||

ఇతీరితోఽయం ప్రియయా క్షుధార్తయా
జుగుప్సమానోఽపి ధనే మదావహే |
తదా త్వదాలోకనకౌతుకాద్యయౌ
వహన్పటాన్తే పృథుకానుపాయనమ్ || ౮౭-౩ ||

గతోఽయమాశ్చర్యమయీం భవత్పూరీం
గృహేషు శైబ్యాభవనం సమేయివాన్ |
ప్రవిశ్య వైకుణ్ఠమివాప నిర్వృతిం
తవాతిసంభావనయా తు కిం పునః || ౮౭-౪ ||

ప్రపూజితం తం ప్రియయా చ వీజితం
కరే గృహీత్వాఽకథయః పురాకృతమ్ |
యదిన్ధనార్థం గురుదారచోదితై-
రపర్తువర్షం తదమర్షి కాననే || ౮౭-౫ ||

త్రపాజుషోఽస్మాత్పృథుకం బలాదథ
ప్రగృహ్య ముష్టౌ సకృదాశితే త్వయా |
కృతం కృతం నన్వియతేతి సంభ్రమా-
ద్రమా కిలోపేత్య కరం రురోధ తే || ౮౭-౬ ||

భక్తేషు భక్తేన స మానితస్త్వయా
పురీం వసన్నేకనిశాం మహాసుఖమ్ |
బతాపరేద్యుర్ద్రవిణం వినా యయౌ
విచిత్రరూపస్తవ ఖల్వనుగ్రహః || ౮౭-౭ ||

యది హ్యయాచిష్యమదాస్యదచ్యుతో
వదామి భార్యాం కిమితి వ్రజన్నసౌ |
త్వదుక్తిలీలాస్మితమగ్నధీః పునః
క్రమాదపశ్యన్మణిదీప్రమాలయమ్ || ౮౭-౮ ||

కిం మార్గవిభ్రంశ ఇతి భ్రమన్క్షణం
గృహం ప్రవిష్టః స దదర్శ వల్లభామ్ |
సఖీపరీతాం మణిహేమభూషితాం
బుబోధ చ త్వత్కరుణాం మహాద్భుతామ్ || ౮౭-౯ ||

స రత్నశాలాసు వసన్నపి స్వయం
సమున్నమద్భక్తిభరోఽమృతం యయౌ |
త్వమేవమాపూరితభక్తవాఞ్ఛితో
మరుత్పురాధీశ హరస్వ మే గదాన్ || ౮౭-౧౦ ||

ఇతి షడశీతితమదశకం సమాప్తం

Also Read:

Narayaneeyam Sadasititamadasakam Lyrics in English | Kannada | Telugu | Tamil