Gitarahasyam According to Shri Shankaracharya in Bengali:
॥ જગદ્ગુરુશ્રીશઙ્કરાચાર્યાભિમતં ગીતારહસ્યમ્ ॥
লেখকঃ – ডাে শ্রীধরভাস্করবর্ণেকরঃ, নাগপুরম্
জগদ্গুরুশ্রীশঙ্করাচার্যচরণৈঃ
শ্রীমদ্ভগবদ্গীতোপনিষদ্ভাষ্যস্য প্রথমাধ্যায়ারম্ভে তথা
দ্বিতীয়াধ্যায়স্য “অশোচ্যানন্বশোচস্ত্বম্” ইত্যস্মান্ শ্লোকাৎ প্রাক্
স্বাভিমতং গীতারহস্যং যুক্তিয়ুক্তৈর্বচোভিঃ প্রতিপাদিতম্ । “তস্মাদ্
গীতাসু কেবলাদ্ এব তত্ত্বজ্ঞানাৎ মোক্ষপ্রাপ্তিঃ, ন কর্মসমুচিতাদিতি
নিশ্চিতোঽর্থঃ ।” (অধ্যায় ২) “তস্মাৎ কেবলাদেব জ্ঞানান্মোক্ষ
ইত্যেষোঽর্থো নিশ্চিতো গীতাসু সর্বোপনিষৎসু চ ।” (অধ্যায় ৩)
ইত্যেতদ্ গীতারহস্যং সুনিশ্চিতং প্রতিপাদ্য তদেব সর্বত্র গীতাসু
প্রকরণশো বিভজ্য তত্র তত্র দর্শিতম্ ।
তদিদং জগদ্গুরুসম্মতং গীতারহস্যমস্মাভিঃ ৪৪ কারিকাসু সংক্ষেপত
উপনিবদ্ধম্ । জগদ্গুরুসম্মতং গীতারহস্যং সম্যক্ স্মৃতিগতং
কর্তুমিমাঃ কারিকা অতীবোপকারিণ্যো ভবেয়ুরিত্যাশাস্মহে ॥
বেদোক্তো দ্বিবিধো ধর্মো গীতাসু প্রতিপাদিতঃ ।
প্রবৃত্তিলক্ষণো হ্যেকশ্চান্যো নির্বৃত্তিলক্ষণঃ ॥ ১ ॥
ধর্মস্য দ্বিবিধো হেতুর্জগতঃ সংস্থিতিস্তথা ।
প্রাণিনোঽভ্যুদয়শ্চান্যো নিঃশ্রেয়সসমন্বিতঃ ॥ ২ ॥
ক্ষীণে বিবেকবিজ্ঞানে বিদুষাং কামবর্ধনে ।
গ্লানিমাপদ্যতে ধর্মো হ্যধর্মঃ কামবর্ধনে ॥ ৩ ॥
ব্রাহ্মণ্যাধীনমেবেহ বর্ণাশ্রমবিভাজনম্ ।
ব্রাহ্মণ্যে রক্ষিতে ধর্মো বৈদিকঃ স্যাৎ সুরক্ষিতঃ ॥ ৪ ॥
ব্রাহ্মণৎবং বিজানীয়াদ্ ভৌমং ব্রহ্ম সনাতনম্ ।
তদ্রক্ষণার্থং কৃষ্ণৎবং প্রাপ নারায়ণঃ স্বয়ম্ ॥ ৫ ॥
শোকমোহাব্ধিনির্মগ্নং পার্থং প্রত্যাহ কেশবঃ ।
দ্বিবিধং বৈদিকং ধর্মং সর্বলোকাদ্দিধীর্ষয়া ।
প্রচীয়তে হি ধর্মোঽসৌ পাল্যতে যো গুণাধিকৈঃ ॥ ৬ ॥
সঙ্গ্রহঃ সর্ববেদার্থসারাণামীশ্বরোদিতঃ ।
ব্যাসঃ সপ্তশতশ্লোকৈস্তমেবোপনিবদ্ধবান্ ॥ ৭ ॥
নিঃশ্রেয়সং পরং জ্ঞেয়ং গীতাশাস্ত্রপ্রয়োজনম্ ।
সহেতুকস্য সংসারস্যাত্যন্তোপরমো হি তৎ ॥ ৮ ॥
নিঃশ্রেয়সং তদাধ্যাত্মজ্ঞাননিষ্ঠাস্বরূপিণঃ ।
প্রাপ্যতে ধর্মতঃ সর্বকর্মসংন্যাসাপূর্বকাৎ ॥ ৯ ॥
ভগবাননুগীতাসু গীতাধর্মপ্রয়োজনম্ ।
সমস্তকর্ম সংন্যাসাপরমিত্যব্রবীৎ স্বয়ম্ ॥ ১০ ॥
বর্ণানামাশ্রমাণাং যোঽভ্যুদয়ৈকপ্রয়োজনঃ ।
প্রবৃত্তিলক্ষণো ধর্মঃ স স্বর্গপ্রাপ্তিসাধনম্ ॥ ১১ ॥
ফলাভিসন্ধিরহিতো ব্রহ্মার্পণধিয়া তথা ।
প্রবৃত্তিলক্ষণো ধর্মোঽনুষ্ঠেয়ঃ সৎবশুদ্ধয়ে ॥ ১২ ॥
সত্ত্বশুদ্ধতয়া জ্ঞাননিষ্ঠাপাত্রৎবমাপ্তবান্ ।
বিন্দতে পরম জ্ঞানং নিঃশ্রেয়সফলপ্রদম্ ॥ ১৩ ॥
প্রবৃত্তিলক্ষণো ধর্মো গীতাসু প্রতিপাদিতঃ ।
জ্ঞানোৎপত্তিনিদানৎবান্নিঃশ্রেয়সপরো হি সঃ ॥ ১৪ ॥
যোগিনঃ কর্ম কুর্বন্তি সঙ্গং ত্যক্ত্বাঽঽত্মশুদ্ধয়ে ।
হেতুঃ প্রবৃত্তিধর্মস্য গীতাবাক্যেঽত্র দৃশ্যতে ॥ ১৫ ॥
তং শাশ্বতং বৈদিকমেব ধর্ম
দ্বিধা হি নিঃশ্রেয়সমাত্রহেতুম্ ।
তথা পরং ব্রহ্ম চ কেশবাখ্যং
গীতামহাশাস্ত্রমভিব্যনক্তি ॥ ১৬ ॥
যো হি সম্যগ বিজানীতে গীতাশাস্ত্রার্থমান্তরম্ ॥
সমস্তপুরুষার্থানাং স সিদ্ধিমধিগচ্ছতি ॥ ১৭ ॥
(গীতা-দ্বিতীয়াধ্যায়প্রাস্তাবিকম্)
শোকমোহাদয়ো দোষাঃ সংসারোৎপত্তিহেতবঃ ।
বিষাদয়োগো বোদ্ধব্যস্তদুৎপত্তিপ্রবুদ্ধয়ে ॥ ১৮ ॥
বিবেকঃ শোকমোহাভ্যাং বিজ্ঞানং চাভিভূয়তে ।
ততঃ স্বধর্মং সন্ত্যজ্য প্রতিষিদ্ধে প্রবর্ততে ॥ ১৯ ॥
যথা স্বয়ং প্রবৃত্তোঽপি ক্ষাত্রধর্ম নিজেঽর্জুনঃ ।
উপরম্য ততো মেনে পরধর্মং হিতাবহম্ ॥ ২০ ॥
স্বধর্মেঽপি প্রবৃত্তানাং প্রবৃত্তিঃ প্রায়শো নৃণাম্ ।
ফলাভিসন্ধিসহিতা সাহঙ্কারা চ দৃশ্যতে ।
ফলাভিলাষাঽহঙ্কারৌ ধর্মদোষকরাবুভৌ ॥ ২১ ॥
সকামকর্মতো বুদ্ধির্জায়তে পাপপুণ্যযোঃ ।
তত এব হি সংসারে জীবোঽয়ং পরিবর্ততে ॥ ২২ ॥
ইষ্টজন্মসুখানিষ্টজন্মদুঃখাপ্তিলক্ষণঃ
সংসারঃ পরিহর্তব্যঃ শোকমোহসমুদ্ভবঃ ॥ ২৩ ॥
সমস্তকর্মসংন্যাসাপূর্বকাদতিনির্মলাৎ ।
আত্মজ্ঞানাদৃতে নৈব নিবৃত্তিঃ শোকমোহয়োঃ ॥ ২৪ ॥
নিমিত্তীকৃত্য তৎ পার্থং শোকমোহসমাকুলম্ ।
ভগবানদিশদ্ গীতাং সর্বানুগ্রহহেতবে ॥ ২৫ ॥
(পূর্বপক্ষঃ)
কুরু কর্মেতি ব্রুবতোঽভিপ্রায়ঃ শ্রীহরেঃ স্ফুটো নূনম্ ।
জ্ঞানাদ্ধি কর্মসহিতাৎ কৈবল্যপ্রাপ্তিরিতি বদন্ত্যেকে ॥ ২৬ ॥
ধর্ম্যং যুদ্ধমকৃৎবা পাপং স্যাদিতি নিবেদয়ন্ কৃষ্ণঃ ।
শ্রৌতং স্মার্তং হিংসাক্রূরং কর্মাপি মুক্তয়ে প্রাহ ॥ ২৭ ॥
(উত্তরপক্ষঃ)
কৈবল্যপ্রাপ্তয়ে জ্ঞান-কর্ময়োগসমুচ্চয়ম্ ।
যে দর্শয়ন্তি গীতাসু তেষাং হি তদ্সন্মতম্ ॥ ২৮ ॥
সাঙ্খ্য-যোগাভিধং বুদ্ধিদ্বয়ং লোকেষু বর্ততে ।
জ্ঞান-কর্মাভিধা দ্বেধা নিষ্ঠা গীতোদিতা ততঃ ॥ ২৯ ॥
ষড্বিক্রিয়াবিহীনৎবাদকর্তাত্মৈতি যা মতিঃ ।
সা সাঙ্খ্যবুদ্ধিঃ সাঙ্খ্যাখ্যজ্ঞানিনামুচিতা মম ॥ ৩০ ॥
প্রায়েণ সাঙ্খ্যবুদ্ধেঃ প্রাগ্ যোগবুদ্ধিঃ প্রজায়তে ।
যয়াত্মা দেহসম্ভিন্নঃ কর্তা ভোক্তেতি ভাসতে ॥ ৩১ ॥
ধর্মাধর্মবিবেকেন মোক্ষসাধনকর্মণাম্ ।
নিরন্তরমনুষ্ঠানং তদ্ যোগ ইতি কথ্যতে ॥ ৩২ ॥
যোগবুদ্ধি সমাশ্রিত্য যেঽন্তঃকরণশুদ্ধয়ে ॥
যোগাখ্যং কর্ম কুর্বন্তি তে যোগিন ইতি স্মৃতাঃ ॥ ৩৩ ॥
জ্ঞান-কর্মামিধং নিষ্ঠাদ্বয়ং প্রাহেশ্বরঃ পৃথক্ ।
পশ্যন্নেকত্র পুরুষে বৃদ্ধিদ্বয়মসম্ভবম্ ॥ ৩৪ ॥
বৃহদারণ্যকেঽপ্যেতদ্ নিষ্ঠাদ্বয়মুদীরিতম্ ।
যত্রাকামস্য সংন্যাসাঃ প্রোক্তং কর্ম চ কাম্যতঃ ॥ ৩৫ ॥
যদি স্যাৎ সম্মতঃ শ্রৌতকর্মজ্ঞানসমুচ্চয়ঃ ।
গীতাসু নোপপদ্যেত বিভাগবচনং তদা ।
জ্যায়সী চেদিতি প্রশ্নঃ পার্থস্যাপি ন যুজ্যতে ॥ ৩৬ ॥
অসম্ভবমনুষ্ঠানমেকেন জ্ঞানকর্মণোঃ ।
ন চেদিদং হরেরুক্তং শ্রৃণুয়াদর্জুনঃ কথম্ ॥ ৩৭ ॥
অশ্রুতং চ কথং বুদ্ধের্জ্যায়স্ত্বং কর্মণোঽর্জুনঃ ।
জ্যায়সীত্যাদিভির্বাক্যৈর্মৃষাঽধ্যারোপয়েৎ প্রভৌ ॥ ৩৮ ॥
উক্তঃ স্যাদ্ যদি সর্বেষাং জ্ঞানকর্মসমুচ্চয়ঃ ।
পার্থস্যাপি কৃতে তর্হি স এব হি নিবেদিতঃ ॥ ৩৯ ॥
উভয়োরুপদেশেঽপি প্রশ্নোত্তরসমাশ্রিতঃ ॥
‘যচ্ছ্রেয় এতয়োরেক”মিতি নৈবোপপদ্যতে ॥ ৪০ ॥
শীতং চ মধুরং চান্নং ভোক্তব্যং পিত্তশান্তয়ে ।
ইত্যুক্তেঽন্যতরশ্রেয়োজিজ্ঞাসা নোপপদ্যতে ॥ ৪১ ॥
পার্থপ্রশ্নোঽথ কল্প্যেত কৃষ্ণোক্তানবধারণাৎ ।
তদুত্তরে কথং নোক্তো বুদ্ধি-কর্ম-সমুচ্চয়ঃ ॥ ৪২ ॥
লোকেঽস্মিন্ দ্বিবিধা নিষ্ঠা পুরা প্রোক্তেতি চোত্তরম্ ।
পৃষ্টাদননুরূপং তন্নেশ্বরস্যোপপদ্যতে ॥ ৪৩ ॥
সমুচ্চয়স্তথা বুদ্ধেঃ শ্রৌতবৎ স্মার্তকর্মণা ।
নাভিপ্রেতোঽন্যথা সর্ব বিভাগবচনং বৃথা ॥ ৪৪ ॥
যুদ্ধ কর্ম ক্ষত্রিয়স্য স্মার্ত মিত্যপি জাননঃ ।
উপালম্ভো বৃথা ‘ঘোরে কর্মণী’ত্যর্জুনস্য চ ॥ ৪৫ ॥
তস্মাদ্ গীতাসু নৈবেষন্মাত্রেণাপি প্রদর্শ্যতাম্ ।
কর্মণা দ্বিবিধেনাত্মজ্ঞানস্য হি সমুচ্চয়ঃ ॥ ৪৬ ॥
কর্মণ্যভিপ্রবৃত্তস্যাজ্ঞানরাগাদিদোষতঃ ।
সৎবশুদ্ধতয়া জ্ঞানং সর্বং ব্রহ্মেতি জায়তে ॥ ৪৭ ॥
নিবৃত্তং জ্ঞান্নতো যস্য কর্ম বা তৎপ্রয়োজনম্ ।
স হি কর্ম প্রবৃত্তশ্চেল্লোকসঙ্গ্রহহেতবে ।
তস্মিন্নপি ন সম্ভাব্যো জ্ঞানকর্মসমুচ্চয়ঃ ॥ ৪৮ ॥
যথা ভগবতি ক্ষাত্রকর্মজ্ঞানসমুচ্চয়ঃ ।
ন সম্ভবতি নিষ্কামে তথা তাদৃশি পণ্ডিতে ॥ ৪৯ ॥
ন করোমীতি তত্ত্বজ্ঞো মন্যতে ভগবৎসমঃ ।
ফলং চ নাভিসন্ধত্তে ক্রিয়মাণস্য কর্মণঃ ॥ ৫০ ॥
কাম্যে যজ্ঞে প্রবৃত্তস্য কামে সামিকৃতে হতে ।
ক্রিয়মাণঃ পুনর্যজ্ঞো নিষ্কামঃ খলু জায়তে ।
প্রমাণং ভগবদ্বাক্য- “কুর্বন্নপি ন লিপ্যতে” ॥ ৫১ ॥
“কর্মণৈব হি সংসিদ্ধিমাস্থিতা জনকাদয়ঃ” ।
বাক্যমেবংবিধং জ্ঞেয়ং প্রবিভজ্যৈব তত্ত্বতঃ ॥ ৫২ ॥
অথ চেজ্জনকাদ্যাস্তে নৈব তত্ত্ববিদো মতাঃ ।
কর্মণা চিত্তশুদ্ধিং তে প্রাপ্তা ইত্যবগম্যতাম্ ॥ ৫৩ ॥
“যোগিনঃ কর্ম কুর্বন্তি সঙ্গং ত্যক্ত্বাঽঽত্মশুদ্ধয়ে” ।
ইত্যস্মিন্ ভগবদ্বাক্যে জ্ঞেয়ং কর্মপ্রয়োজনম্ ॥ ৫৪ ॥
ন হি নিঃশ্রেয়সপ্রাপ্তির্জ্ঞান-কর্মসমুচ্চয়াৎ ।
অভিপ্রায়েণ গীতায়াস্তত্ত্বজ্ঞানাত্তু কেবলাৎ ॥ ৫৫ ॥
ইতি শ্রীশ্রীধরভাস্করবর্ণেকরঃ বিরচিতং
জগদ্গুরুশ্রীশঙ্করাচার্যাভিমতং গীতারহস্যং সম্পূর্ণম্ ।
Also Read:
Sri Shankaracharya’s Gitarahasyam Lyrics in
Hindi | English | Bengali | Gujarati | Kannada | Malayalam | Oriya | Telugu | Tamil
