Ambika Trishati Lyrics in Bengali:
॥ অম্বিকাত্রিশতী ॥
গঙ্গাধরমখিবিরচিতা ।
পরমাভরণং শংভোঃ পর্বতনাথস্য পুণ্যপরিপাকঃ ।
নিজলোচনবীক্ষণতো রক্ষিতলোকত্রয়ং চ তদ্রত্নম্ ॥ ১ ॥
নিগমান্তপরমবিদ্যা দদ্যাদদ্য প্রমোদমিহ নমতাম্ ।
নিখিলচরাচরচিন্ময়রূপং রক্ষাকরং চ লোকানাম্ ॥ ২ ॥
আদৃতশিববামান্তামার্যামার্যাভিমান্যমহিমানম্ ।
আগমমৌলিবতংসাং বন্দে চিদ্রূপকন্দলাং জননীম্ ॥ ৩ ॥
পরমশিবভাগধেয়ং সুরমুনিমনুজাদিভিঃ সদা ধ্যেয়ম্ ।
য়ন্নাম কর্ণপেয়ং পাতু সদা বেদমৌলিকামেয়ম্ ॥ ৪ ॥
জয়তি তবাম্ব কটাক্ষে কো বা সেবেত কল্পভূমিরুহম্ ।
কামাদিহানিদোঽসৌ নমতাং সংপত্প্রদানকৃতদীক্ষঃ ॥ ৫ ॥
ভুবনজননী পুরারেঃ মহিষী ভূষায়িতামৃতময়ূখা ।
কলিকলুষিতজনমেনং পাতু সুধাকারমঞ্জুলাপাঙ্গৈঃ ॥ ৬ ॥
নিখিলনিগমান্তবেদ্যা বিদ্যা পরমা পুরারিসর্বস্বম্ ।
য়মপাশভীতমেনং রক্ষতু জনমেনমদ্রিপতিকন্যা ॥ ৭ ॥
ধুতপদনতজনপাপা পরচিদ্রূপাপ্রেময়নিজরূপা ।
শশিমৌলিভাগধেয়ং জয়তি নগেশানকন্যকা মান্যা ॥ ৮ ॥
তব ভূধরেন্দ্রতনয়ে পাদাব্জং নিগমদীর্ঘিকাফুল্লম্ ।
উত্তংসয়ন্তি পুরুষা ধন্যাঃ কেচিত্ ত এব সুরমান্যাঃ ॥ ৯ ॥
শতমখনীলমণীনাং প্রভয়াচ্ছুরিতা তবাক্ষিয়ুগলশ্রীঃ ।
তারকবিভেদিবাহং নৃত্তোন্মুখমাতনোতি শরদি পথি ॥ ১০ ॥
কুবলয়সংপত্প্রদমিহ বিলোচনং মাতরচলতনয়ে তে ।
মম মানসং তু চন্দ্রং কলয়তি তাপপ্রশান্তিদং সময়ে ॥ ১১ ॥
নিজগতিজিতকাদম্বামম্বামম্ভোজলোচনাং বন্দে ।
সংভাবয়তি মহেশো য়াং কিল কালেষু হৃদ্যনব্যরসৈঃ ॥ ১২ ॥
ললিতগুণরত্নভূষাপেটী শুকমান্যনৈজবাগ্ধাটী ।
আশ্রিতকদম্ববাটী জয়তি পরানন্দজাতপরিপাটী ॥ ১৩ ॥
কুসুমশরবৈরিকান্তা কান্তালকভারললিতাফালান্তা ।
নিখিলনিগমান্তসারা সা রজতি শংভুভাগ্যধারা হি ॥ ১৪ ॥
করকমলকলিতচাপে পরমানন্দৈককন্দলে শংভোঃ ।
কনকমণিললিতকণ্ঠে ত্বামেবাহং ভজামি পরবৃত্ত্যৈ ॥ ১৫ ॥
চিন্তিতফলদে পুংসাং প্রবলতরামোদকন্দলে শংভোঃ ।
পুণ্যানাং পরিপাকং ত্বত্পদপদ্মং প্রফুল্লমিহ চিত্তে ॥ ১৬ ॥
নিজমৌলিলসনশশিকরবিলাসিধম্মিল্লকুবলয়ামোদৈঃ ।
ততমধুকরগীতীনাং দম্ভাদম্ব ত্বদীয়বাগ্রক্ষা ॥ ১৭ ॥
ললিতকুটিলালকান্তা কান্তা শংভোরমেয়বিভবান্তা ।
সংপদমিহ নস্তনুতে কুলভূধরনাথভাগ্যপরিণামঃ ॥ ১৮ ॥
জনতাচিরতরবিরচিতসুচরিতপরিপাকরূপমমরেড্যম্ ।
কুসুমশরবৈরিভাগ্যং লসতু কলিক্ষোভহানয়ে মনসি ॥ ১৯ ॥
বিনতালিবিভবদা তে কটাক্ষধারা বিভাতি লোকাম্ব ।
কুসুমশরশাস্ত্রসিদ্ধিপ্রদা গিরীশস্য য়োগিহৃদ্দীপা ॥ ২০ ॥
নিত্যকুমারী কালে কাপি পয়োজাসনাদিনুতিতুষ্টা ।
শিতিকণ্ঠভাগ্যরক্ষাসূত্রং তনুতে স্ববৈভবৈর্হৃদ্যৈঃ ॥ ২১ ॥
নিখিলনিগমান্তসারং য়াবদ্রূপং মদম্ব পশ্যামি ।
সা তু নিয়মিতদূতগণো দূরে য়াত্যমিতকোপকোপকোঽপি য়মঃ ॥ ২২ ॥
শিববামভাগভূষা কাচিদ্ য়োষা নতালিকৃতভাষা ।
তাটঙ্করত্নভূষারুচিভরকাষায়িতাত্মমুখবেষা ॥ ২৩ ॥
বাণীশবিনুতমহিমা পরমা চ কলা সতাং সমারাধ্যা ।
হিমভূধরবরকন্যা কৃতভূসুরসৌখ্যসংপদারান্মে ॥ ২৪ ॥
শিথিলিতভবভীতিততিং ভূধরকন্যামহং সদোপাস্যাম্ ।
আনন্দাদ্বৈতকলাং ভজে কলিক্ষোভহানয়ে নিভৃতম্ ॥ ২৫ ॥
নবরত্নখচিতভূষাততিভানীরাজিতাখিলাঙ্গীং তাম্ ।
কামপি কলামুপাসে সততানন্দৈককন্দলীং জননীং ॥ ২৬ ॥
মম হৃদয়কেলিভবনে বিলসতি তদ্রূপমিষ্টদং পুংসাম্ ।
য়দিহাদরেণ শংভুর্লোকত্রয়রক্ষণায় চকমে চ ॥ ২৭ ॥
গঙ্গাধরবরভূষা ভঙ্গায়াস্মাকমখিলদুরিতানাম্ ।
শৃঙ্গারসারবেষা তুঙ্গানন্দপ্রদাস্তু জগদম্বা ॥ ২৮ ॥
তেন বয়ং পরতন্ত্রাঃ য়চ্ছশিশেখরমনশ্বরৈশ্বর্যম্ ।
শংভোরিহ লোকানাং চিন্তামণিরাদিমঃ সুলভ্যশ্চ ॥ ২৯ ॥
নয়নাঞ্জনকলিকেয়ং শংভোরম্ভোজলোচনা চপলা ।
শ্রুতিসুদতীসূত্রকলা মম হৃদি ভবনে বিকাসমুপয়াতি ॥ ৩০ ॥
কুচকুম্ভাঙ্কিতশংভুং করপদ্মাদৃতপয়োজমণিমালাম্ ।
নতজনভরণাসক্তামম্বামম্ভোজলোচনাং নৌমি ॥ ৩১ ॥
বালমরালীলীলাং বালাং বলিবৈরিবাসবাদিনুতাম্ ।
জগদম্বামালম্বাং নিবিডনিতম্বাং হিতার্থমবলম্বে ॥ ৩২ ॥
ধ্যানৈর্বেদ্যং তত্ত্বং মীনধ্বজবৈরিমহিতভাগ্যং তত্ ।
ভূধরকন্যারূপং বিহরতি মম মানসে হততমস্কে ॥ ৩৩ ॥
মুনিজনমান্যচরিত্রা নানাদেশেষু লসিতবহুপীঠা ।
সর্বস্বসংপ্রদায়ঃ শংভোরম্বা মমাঞ্জলিপ্রীতা ॥ ৩৪ ॥
বাচামগোচরং তত্ পুরাতনীনামপীহ নতসুলভম্ ।
গিরিজারূপং তেজো ভাতু গিরীশার্ধমাদরাদক্ষ্ণোঃ ॥ ৩৫ ॥
মন্দস্মিতেন মধুরা মধুরাপীঠস্থিতা চ হরভাগ্যম্ ।
শীতলনয়নাসারৈঃ সিঞ্চতি মামঞ্জসা জগন্মাতা ॥ ৩৬ ॥
ভাতি পুরন্ধ্রী শংভোরিহ পুরতোঽস্মাকমাত্তসুমবাণা ।
সুমবাণবৈরিচিত্তাকর্ষণকুলিকা চ চিন্ময়ী পরমা ॥ ৩৭ ॥
লোচনপাতে শীতা পাতা পাদাম্বুজাত্তচিত্তানাম্ ।
শ্বেতা চ মন্দহসিতে শ্বেতারণ্যস্থিরপ্রদীপকলা ॥ ৩৮ ॥
পুরমথনমহিষি চিত্তে কুরু পদবিন্যাসমাত্তকুতুকা ত্বম্ ।
তেনৈবাহং ধন্যঃ কুরবৈ পুরবৈরিপাদপূজাং চ ॥ ৩৯ ॥
শতমখমুখসুরবন্দ্যে কান্তাশ্লেষেণ পুলকিতাঙ্গি ত্বাম্ ।
মনসা স্মরামি দয়সে তেনৈবাহং কলৌ য়ুগে ধন্যঃ ॥ ৪০ ॥
পুরমথনস্যাপি বপুঃ পুনতীমম্বাং নিজাক্রমণশক্ত্যা ।
চিরপুণ্যদর্শনীয়াং স্মরামি মনসা পরাং সুতামদ্রেঃ ॥ ৪১ ॥
কুঙ্কুমকণলসিতাঙ্গীং কুবলয়দৃশমব্জলোচনাং বন্দে ।
লোচনজিতসারঙ্গীং ভবমহিষীমর্ধচন্দ্রশেখরিণীম্ ॥ ৪২ ॥
নানালীলাখেলাং হররতিলোলাং হিতৈকপরিশীলাম্ ।
বন্দে বালাং ভূমিধরপতিকন্যাং সুরেশবহুমান্যাম্ ॥ ৪৩ ॥
সরসিজমৃদুলপদাব্জং পদাব্জবিন্যাসধন্যভূভাগম্ ।
মনসি নয়নে চ বাচি স্ফুরতু মহেশানমান্যসাম্রাজ্যম্ ॥ ৪৪ ।
শংভোঃ কুটুম্বিনী সা মধুকরমালালসত্স্বধম্মিল্লা ।
সৌভাগ্যদা সদা মে লসতু কৃপাপূরলালিতাপাঙ্গা ॥ ৪৫ ॥
ঊরীকৃতপুরমথনা দূরীকৃতদুষ্টরাক্ষসাদিগণা ।
নারী পরমা সৈষা ভেরীভাস্বত্করোরুহা ভাতি ॥ ৪৬ ॥
নিখিলোপনিষদ্বিদ্যাসারং সংসারবন্ধমোহহরম্ ।
হরমান্যং তত্ তেজো ভাতি সুরেশাদিরক্ষণোপায়ম্ ॥ ৪৭ ॥
শংভোরুত্সবধারা নবনবহারা সমাশ্রিতাধারা ।
সংবিদ্রূপারূপা কোপার্দিতদুর্জনা চ সা জয়তি ॥ ৪৮ ॥
পুণ্যসমুদায়সরণিং পুরহূতমুখৈরভিষ্টুতামম্বাম্ ।
ভজ মানস ভো নিত্যং নিত্যানন্দাদ্বয়াত্মিকাং দেবীম্ ॥ ৪৯ ॥
জীবিতসর্বস্বমিদং শংভোরম্ভোজলোচনং রত্নম্ ।
য়চ্চিন্তনেন ধন্যা বৈমানিকবন্যকলিতবিশ্রামাঃ ॥ ৫০ ॥
অন্তস্তমোনিহন্ত্রী সংধ্যাপূর্বা বিভাতি গিরিতনয়া ।
উদয়ে য়স্যা বিদুষাং বিলসন্তি করাম্বুজানি নক্তমপি ॥ ৫১ ॥
কুলগিরিনাথনূজে লোকাম্ব ত্বত্পদাম্বুজং জন্তুঃ ।
ভক্ত্যা স্মরতি হৃদি স্বে তত্পদয়ুগলং বহন্তি শিরসান্যে ॥ ৫২ ॥
মহিষাসুরমর্দনি তে ভীমং রূপং তদস্তু রিপুনেত্রে ।
সাদরকটাক্ষাপাতং পুরতো মম ভাতু সৌম্যরূপং তে ॥ ৫৩ ॥
আদৃতশুকাদিবাণী বাণীশসুরেশহরিমুখৈঃ স্তুত্যা ।
সুমলসিতমৃদুলবেণী বিলসতি কৈলাসপীঠিকামধ্যে ॥ ৫৪ ॥
দয়মানমানসং তত্ স্ময়মানমুখং নিরীক্ষ্য তত্তেজঃ ।
নিয়মাদিবিধুতপাপা বয়মানন্দাশ্রুঝরপরীতাঙ্গাঃ ॥ ৫৫ ॥
ললিতগতিং সুরবিনুতিং লসিতমতিং কিংচ য়তিমনোজুষ্টাম্ ।
তব মূর্তিমম্ব পার্বতি কদা নু পশ্যন্ নয়ামি কলিকালম্ ॥ ৫৬ ॥
কুরুতে মনসি মদীয়ে বিহারলীলাং নগেন্দ্রবরকন্যা ।
তাবদ্ বিলসতি চিন্ময়তত্ত্বং তত্ত্বার্থিভিঃ সমারাধ্যম্ ॥ ৫৭ ॥
শংকরমিশ্রিতদেহং শ্রুতিসুদতীমৌলিভূষণং তেজঃ ।
মুখজিতচন্দ্রং তন্মে প্রসীদতু ক্ষিপ্রনম্রপাপহরম্ ॥ ৫৮ ॥
বিধুমৌলিবিভ্রমশ্রীর্বিদ্রুমরুচিসোদরাত্মতনুকান্তিঃ ।
সিঞ্চত্যমৃতমিহাক্ষ্ণোশ্চিরপুণ্যবশাদিহাসেব্যম্ ॥ ৫৯ ॥
পরকৈবল্যানন্দপ্রাপ্তিস্তেষাং ধ্রুবং হি তনুভজাম্ ।
য়েষাং চিত্তে বিত্তাধিপমুখসেব্যা বিহারভাগ্ গৌরী ॥ ৬০ ॥
গৌরি তব পাদপদ্মং শশধরকলয়াঙ্কিতাত্মমৌলিতলে ।
মম চান্তিমপ্রয়াণে বিলসতু নেত্রে স্মৃতৌ চ হৃদি বাচি ॥ ৬১ ॥
শংকরসুকৃতসমূহা কিংকরদেবাদিরঙ্কবীণা চ ।
শঙ্কাদিমোহহন্ত্রী লসতু মমাক্ষ্ণোঃ শশাঙ্কমৌলিতলা ॥ ৬২ ॥
কুচকুম্ভাশ্লেষবশাদাহৃতহরচিত্তবৃত্তিরমরাণাম্ ।
মনুজানামপি নিত্যং দৈবতমেষা চকাস্তি গিরিকন্যা ॥ ৬৩ ॥
পরিতুষ্টা হরভজনে নিজগলকলগীতিবিজিতপরপুষ্টা ।
সূচিতসুররিপুকষ্টা পরমকলত্রং হরস্য তজ্জয়তি ॥ ৬৪ ॥
সততালোলিতদয়য়া দৃশাম্ব মাং পশ্য সরসিজাতরুচা ।
পরমশিবে নির্বৃত্তিমহমবাপ্য তেনৈব তাবকো ভক্তঃ ॥ ৬৫ ॥
সরসকবিতা চ সংপচ্চাক্ষোভ্যং মণ্ডলাধিপত্যং চ ।
ননু জায়তে নৃণাং কিল তব বীক্ষাবৈভবেন ভবকান্তে ॥ ৬৬ ॥
ত্বন্মৌলিচন্দ্রবিসৃমরকরধারাভিঃ কৃতাভিষেকা ত্বম্ ।
দ্বিগুণিতদয়ার্দ্রহৃদয়া পরিপুষ্যসি মঙ্গলানি ভক্তানাম্ ॥ ৬৭ ॥
গৌরি নগাধিপতনয়ে শশিশেখরদিব্যমহিষি মাং পাহি ।
ইতি কিল কলিতাঞ্জলয়ঃ সেবন্তে সুরনরাদয়ো নিত্যম্ ॥ ৬৮ ॥
পরমেশ্বরদয়িতে ত্বত্পদপদ্ময়ুগার্চনারতাঃ সন্তঃ ।
কলয়ন্তি গাঙ্গসলিলং পুষ্পাণ্যপি ভক্তিভারসংপন্নাঃ ॥ ৬৯ ॥
শৃঙ্গারাগমসারা তব লীলা জয়তি চেতসি ভবস্য ।
অত এব স্বাঙ্গে ত্বামারোপয়দাশু বিজিতকামোঽপি ॥ ৭০ ॥
ননু মাতরম্ব মন্দস্মিতলীলাদিকমুদীক্ষ্য শশিমৌলিঃ ।
বিরহাসহিষ্ণুরনিশং বহতি ত্বাং নৈজবপুষি সানন্দম্ ॥ ৭১ ॥
তব শংকরি ভূষোরগলসদুরুমণিদম্ভতঃ শিবঃ কালে ।
নীরাজনমাতনুতে ভক্তহিতার্থী সুমঙ্গলাবাপ্ত্যৈ ॥ ৭২ ॥
তব পাদভক্তিরম্ব ক্ষিতিধরতনয়ে তনোতি কবিসূক্তিম্ ।
অমরশ্রিয়মথ সহসা ধরাধিপত্যাদিকং নৃণাম্ ॥ ৭৩ ॥
আলোকনেন মাতস্তব মনুজানাং হৃদি স্থিতং চ তমঃ ।
গলতি হঠাত্ পাপালিঃ সহসামরলোকসংপদাভাতি ॥ ৭৪ ॥
য়ঃ সূক্তিমালিকাভিস্তব পাদয়ুগং সমর্চয়তি জন্তুঃ ।
তত্পদয়ুগ্মং তু সুরাঃ কল্পমহীরুহসুমৈশ্চ গাঙ্গজলৈঃ ॥ ৭৫ ॥
পার্বতি তব মুখকমলালোকনতো গলিতসংশয়াঃ সন্তঃ ।
কৈবল্যরূপকন্দলমাসাদ্য বিধানতো জনা ভান্তি ॥ ৭৬ ॥
নন্বদ্রিসুতে মন্দস্মিতকান্তিমিষাত্ ত্বদীয়কীর্তিঝরী ।
দিক্সৌধাঞ্চলভাগে বিলসতি নতরক্ষণোত্থিতা জগতি ॥ ৭৭ ॥
করণবিহীনান্ মূঢান্ নরান্ সুরান্ পাসি য়োগিনোঽপি তথা ।
লোকাম্ব ভাবনাদ্যৈঃ কালে কালে নগেন্দ্রতনয়ে ত্বম্ ॥ ৭৮ ॥
নগরাজবংশসংপদ্ দিব্যা কাচিদ্ বিভাতি হরমান্যা ।
গণপতিময়ূরবাহৌ য়ত্তনয়ৌ লোকসংপদে জয়তঃ ॥ ৭৯ ॥
প্রতিদিনকলিতামেনামঞ্জলিকলিকামগাধিপতনূজে ।
অঙ্গীকুরুষ্ব দয়য়া তেনৈব বয়ং কৃতার্থাঃ স্মঃ ॥ ৮০ ॥
কল্যাণকেলিভাজনমিহ শর্বস্যাপ্রেময়তুষ্টিকলা ।
চন্দ্রকলাবিলসিতনিজমৌলিতলা ভাতু মানসে কাপি ॥ ৮১ ॥
বিনতজনবন্ধহারিণি কল্যাণি পুরারিসুকৃতপরিপাকে ।
বধ্নীমো বয়মঞ্জলিমনুদিনমমিতাত্মচিত্সুখাবাপ্ত্যৈ ॥ ৮২ ॥
কংদর্পাগমসারা লসদুরুহারা চ মঙ্গলাকারা ।
তারাধিপবাসলসন্মৌলিতলা ভাতু মানসে দেবী ॥ ৮৩ ॥
নতহংসাবলিরেষা গতিজিতহংসাবলী চ গিরিতনয়া ।
শিশিরীকরোতি লোচনমালামালাপবিজিতশুকবাণী ॥ ৮৪ ॥
শুকবাণীসদৃশীয়ং মম বাণী হরকুটুম্বিনীনিকটম্ ।
ন খলু করোতি প্রাপ্তা মুদমস্যা মধুরমন্দহাসজুষঃ ॥ ৮৫ ॥
শশিশকলকলিতমৌলিস্ত্রিলোচনা কুঙ্কুমচ্ছায়া ।
পাতি জননী জনানাং কিংনরয়ক্ষাদিগেয়মাহাত্ম্যা ॥ ৮৬ ॥
নিজতনুতেজঃপ্রসরৌরিন্দুকলোত্তংসলসিতমৌলিতলা ।
পূরয়তি লোকমাতা ত্রিভুবনমিদমাত্তকৌতুকা পীঠে ॥ ৮৭ ॥
তব মাতরঙ্ঘ্রিসরসিজভক্তিবিশেষাত্তবৈভবা হি নরাঃ ।
বৈমানিকপদবীষ্বপ্যাশারহিতা বিশন্তি তে ধাম ॥ ৮৮ ॥
তব হারমণিপ্রভয়া পার্শ্বস্থিতশংভুচন্দ্রমৌলিকলা ।
সংপ্রাপ্তপূর্ণমণ্ডলশোভা সততং বিরাজতে মাতঃ ॥ ৮৯ ॥
অর্ধাঙ্গশংভুভূষণফণামণিপ্রচুরকান্তিবীচীভিঃ ।
তব হস্তহরিণপোতঃ শশ্বদ্ ধাবতি নবীনতৃণবুদ্ধ্যা ॥ ৯০ ॥
নাথকলানুগুণং তে রূপং জগদম্ব সর্ববুধবন্দ্যম্ ।
পর্বতরাজসুতে নঃ শ্রেয়ঃশ্রেণ্যৈ তদস্তু কলিতদয়ম্ ॥ ৯১ ॥
কৈরাতো বেষো বা ভিক্ষাটনরূপমন্যদপি শংভোঃ ।
সর্বং তত্ ত্বত্কলয়া লসিতং ভাত্যত্র ভূধরেন্দ্রসুতে ॥ ৯২ ॥
ত্রিপুরবিজয়শ্চ মাতস্ত্বত্কোপাদরিষু চন্দ্রমৌলেস্তু ।
আসীত্ সুলভকলঃ কিল তে কীর্তিঃ কীর্তিতা দিশাং বলয়ে ॥ ৯৩ ॥
তব পাদাম্বুজসেবাদরেণ মাতস্তব স্তুত্যাম্ ।
য়ৈঃ কলিতা মতিরেষাং চরণৌ পূজ্যৌ হি নাকিনাং বৃন্দৈঃ ॥ ৯৪ ॥
তব পাদভক্তিভূম্না পাণ্ডিত্যং সর্বসংমান্যম্ ।
কীর্তিং চ সুখং লভতে ভক্তস্তে মাতরচলসুতে ॥ ৯৫ ॥
পরিফুল্লকমলসুষমাসংমান্যৈস্তে কটাক্ষৈর্যঃ ।
ভাত্যঙ্কিতো ধরণ্যাং স তু ধনদো বা মহেন্দ্রো বা ॥ ৯৬ ॥
কমলাক্ষমুখৈর্দেবৈঃ ফক্কৃতগীর্ভিস্তব স্তুতৌ মাতঃ ।
কথমম্ব মানুষোঽহং স্তোতুং ত্বাং শক্নুয়াং মন্দঃ ॥ ৯৭ ॥
তব পাদপদ্মভক্তির্ধরণিধরেন্দ্রস্য কন্যকে কালে ।
বাচালীকুরুতে মাং মন্দমপি স্তোতুমাদরাজ্জননি ॥ ৯৮ ॥
জননি বিনা পুণ্যানাং খণ্ডং ত্বামীক্ষিতুং নয়নৈঃ ।
শক্তা নৈব হি মনুজাস্তে রূপং তত্ পরং জয়তি ॥ ৯৯ ॥
নাকিনগরাম্বুজাক্ষীনিটিলসুমামোদবাসিতং মাতঃ ।
তব চরণপঙ্কজং মে কৃন্ততি মোহাদিকং হৃদয়ে ॥ ১০০ ॥
পরমেশ্বরস্য দয়িতাপাদপয়োজাতপাংসবো ধন্যাঃ ।
কৃতপুণ্যানাং মূর্তিষু ভাসন্তে সর্বশুদ্ধয়ে হ্যেতে ॥ ১০১ ॥
তব পাদজলজরেণুস্পর্শনসংজাতবৈভবা মনুজাঃ ।
ধিক্কৃতনাকেশপদাস্তব সারূপ্যাদিসংপদুল্লসিতাঃ ॥ ১০২ ॥
জননি তবালকরত্নপ্রভাপ্ররোহৈর্গিরীশশিরসি কলা ।
চান্দ্রমসী সা ভজতে জপাপ্রভালেপনং রম্যম্ ॥ ১০৩ ॥
কাঞ্চ্যাং বা কৈলাসে মেরৌ বা ভক্তমানসাম্ভোজে ।
পরমশিববামভাগে রাজতি কালেঽম্বিকা খ্যাতা ॥ ১০৪ ॥
ধ্যানপরীবাহাঙ্কুরকলিতং তে কুসুমকোমলং হি বপুঃ ।
য়োগিহৃদয়াম্বুজান্তর্জননি বিভাতি স্ফুটাকারম্ ॥ ১০৫ ॥
য়েষামঞ্জলিকলিকালসিতং করয়ুগমিদং কালে ।
ন প্রেরয়তি কৃতান্তো নিজদূতান্ তেষু তে পরং গুরবঃ ॥ ১০৬ ॥
কারুণ্যাকুলিতহৃদা তয়াম্বয়া ভক্তপাপালিঃ ।
ন হি গণ্যতে গিরীশোঽপ্যস্মিন্ সততং কৃতপ্রসাদশ্চ ॥ ১০৭ ॥
জগতঃ পিতরাবেতৌ রক্ষাহেতোর্নিজাঙ্ঘ্রিভক্তানাম্ ।
রাজত ইহ বহুরূপৌ জনদৃক্দৃশ্যৌ চ দেববন্দ্যৌ চ ॥ ১০৮ ॥
সা ভগবতী পুরস্তাদাস্তাং নঃ শাংকরী জননী ।
য়দ্বীক্ষালবহীনাঃ পীড্যন্তে তপ্তগাত্রাশ্চ ॥ ১০৯ ॥
জাতপরাক্রমকলিকা দিশি দিশি কিংনরসুগীতনিজয়শসঃ ।
ধন্যা ভান্তি হি মনুজা য়দ্বীক্ষালববিশেষতঃ কালে ॥ ১১০ ॥
বাচাং সনাতনীনাং বিশ্রান্তিস্থানকং হি য়ত্ স্থানম্ ।
করুণাপালিতলোকত্রিতয়ং তদ্ ভাতি সুকৃতিহৃদয়তটে ॥ ১১১ ॥
শ্রুতিমৌলিভূষণং তে পদারবিন্দং জনঃ কালে ।
ভক্ত্যা প্রণম্য বহুজননগরে সিংহাসনে লসতি ॥ ১১২ ॥
শ্যামা চন্দ্রকলোজ্জ্বলমৌলিরিয়ং শাংকরী কালে ।
ধ্যানজপাদৌ পুণ্যাত্মনাং হৃদি প্রস্ফুরত্যমলে ॥ ১১৩ ॥
ত্রিভুবনরক্ষাহেতোরঙ্গীকৃতগিরিশদেহয়ষ্টিরিয়ম্ ।
রাজতি রাজতপীঠে ত্রিভুবনসুন্দররুচাত্তবহুকোণে ॥ ১১৪ ॥
নিশ্চলদীপকলা সা রক্ষিতমরুদৌষ্ণ্যহীননিজরূপা ।
শূলিস্নেহোল্লসিতা জনহৃত্তমসাং নিহন্ত্রী চ ॥ ১১৫ ॥
নিগমান্তমধ্যবীথীমহামণিঃ সর্বমূল্যা চ ।
ভক্তিক্রয়া চ কালে কেয়ূরমণিশ্চ শূলিনো জয়তি ॥ ১১৬ ॥
কল্যাণসংততের্যা কলিতা জন্মস্থলীতি বিবুধেশৈঃ ।
নঃ কল্যাণায় স্যাত্ সা গৌরী মেদুরা দয়য়া ॥ ১১৭ ॥
তব কেশকান্তিবিসরৈ রাহোঃ শঙ্কা শিরঃস্থেন্দোঃ ।
গ্রসনাদিদৈন্যহারিপ্রভাবমালোচ্য তে সৌম্যঃ ॥ ১১৮ ॥
মন্দস্মিতরুচিভরিতে পুরঃস্থলে তেঽর্চনাহেতোঃ ।
ন্যস্তানি হি পুষ্পাণি ভ্রমরাক্ষেপাত্ স্ফুটং ভান্তি ॥ ১১৯ ॥
ক্ষীরসহোদরমন্দস্মিতরুচিনিরসিতনতালিহৃত্তিমিরা ।
সা জয়তি শাংকরী কিল শংকরসংস্তূয়মানবিভবা চ ॥ ১২০ ॥
মন্দানামপি মঞ্জুলকবিত্বরসদায়িনী জননী ।
কাপি করুণাময়ী সা লসতু পুরস্তাত্ সদাস্মাকম্ ॥ ১২১ ॥
তাপহরসবিবর্ষণকৃতকুতুকা কাপি নীলনলিনরুচিঃ ।
কাদম্বিনী পুরস্তাদাস্তাং নঃ সংততং জননী ॥ ১২২ ॥
করুণাকটাক্ষলহরী কামায়াস্তু প্রকামকৃতরক্ষা ।
গৌর্যা গিরিপতিমান্যা সত্সুখদানে ভৃশং খ্যাতা ॥ ১২৩ ॥
ঐক্যমনীয়ত নিতরাং য়দাদরেণেন্দুমৌলিনা পূর্বম্ ।
তত্ তেজো হৃদি লসতু স্থিরে চ নিষ্কল্মষেঽস্মাকম্ ॥ ১২৪ ॥
য়ত্পদরেখা মান্যা লেখাদীনাং শুভোদয়ে নিভৃতম্ ।
সা লোচনে পুরস্তাদাস্তাং নঃ শশিকলোল্লসন্মৌলিঃ ॥ ১২৫ ॥
য়স্যাবির্ভাববশান্মান্যোঽভূদ্ ভূধরেন্দ্রোঽপি ।
তত্ পার্বতীতি সংজ্ঞং গৌরী দাক্ষায়ণী চ লোকাম্বা ॥ ১২৬ ॥
মারারাতিমনোহরলাবণ্যা কুসুমমৃদুশরীরেয়ম্ ।
নিজকরুণাপাঙ্গসুধাপূরণকৃতবৈভবা ভাতি ॥ ১২৭ ॥
ধনধান্যকীর্তিকবিতাললনাসুতহর্ম্যমুখ্যকামপরৈঃ ।
তৈর্নূনমর্চিতাচলসুতাঙ্ঘ্রিজলজৈস্তথাভূতৈঃ ॥ ১২৮ ॥
গিরিশ্শরীরবিহারি ত্রাতজগত্ তত্ পরং জ্যোতিঃ ।
শারদসরসিজনয়নং মম গৌরীরূপমাবিরস্তু হৃদি ॥ ১২৯ ॥
অচলসুতয়া সনাথা বয়মেতে ধূতপাপকলাঃ ।
শশিশিখরং চর্মধরং গঙ্গাধরমীক্ষ্য মোদন্তে ॥ ১৩০ ॥
প্রৌঢান্ধকারনিরসনচণমেতত্ পার্বতীরূপম্ ।
পরমং জ্যোতির্লসতি স্ফুটং চ সদ্গণসমাবৃতং হৃদয়ে ॥ ১৩১ ॥
দহরাকাশবিহারি জ্যোত্স্নালসদুত্তমাঙ্গমিদমাদ্যম্ ।
চিন্তারত্নং গিরিশপ্রকামভাগ্যং চ লোকদীপকলা ॥ ১৩২ ॥
পুণ্যাঙ্কুরবৃদ্ধিকরং গৌরীরূপং সদা ধ্যায়ে ।
য়চ্ছিবনেত্রমহোত্সবনিভৃতং রক্ষিতজগত্ত্রিতয়ম্ ॥ ১৩৩ ॥
সূর্যসুতাকল্লোলোল্ললনদশারম্যনেত্রলহরীভিঃ ।
শ্রেয়ঃসংততিমচিরাত্ তরঙ্গয়তি নঃ সদা দেবী ॥ ১৩৪ ॥
ভূধরকন্যা সেয়ং সাদরদত্তার্হণাদিবহুতোষা ।
বাদরসবিজয়দাঃ নঃ পাদরসাসক্তকলিতবহুভাষা ॥ ১৩৫ ॥
প্রৌঢতমালবনালীরুচিভরকমনীয়নেত্রবিস্ফারৈঃ ।
দিশি দিশি কলিতা সংপদ্ য়য়া তয়া নঃ কুলং জয়তি ॥ ১৩৬ ॥
নিজতারুণ্যবিহারৈর্মোহকরং শূলিনোঽপি য়ত্ তেজঃ ।
তত্ কুমুদিনীশখণ্ডস্ফুরচ্ছিরঃকরলসদ্ধনুর্বর্যম্ ॥ ১৩৭ ॥
শংকরপুণ্যাঙ্কুরকৃতরূপং পাথোজনয়নং চ ।
পৃথুজঘনকুচয়ুগং চ ত্রাতজগত্ দগ্ধদৈত্যচয়ম্ ॥ ১৩৮ ॥
নীলনলিনীসুমালীললিতকচং শংকরার্হললিতকুচম্ ।
কৈলাসপীঠমধ্যে ভাতি সদা ধ্যেয়মারাধ্যম্ ॥ ১৩৯ ॥
স্মরণদশয়াপি কাপি প্রদীপিকা নাশিনী তমসাম্ ।
নিগমততিসৌধবলভীপ্রকাশিনী নিত্যতেজস্কা ॥ ১৪০ ॥
পুরারিপুবামাঙ্কতলোদ্ভাসিতগাত্রং মহঃ কিমপি ।
হৃদি লসতু সংততং মে নিরস্তসংসৃতিতমোরাশি ॥ ১৪১ ॥
নিগমান্তমধ্যপঞ্জরশুকী শুকাদ্যৈঃ সমারাধ্যা ।
করধৃতপুণ্ড্রেক্ষুকলা শ্রেয়ঃসংতানদায়িনী নমতাম্ ॥ ১৪২ ॥
তব পাদপদ্মশোভাচ্ছুরিতং পুরতঃ স্থলং গৌর্যাঃ ।
কৃতপল্লবসংস্তরণং মত্বা তূষ্ণীং বভূব তে দাসঃ ॥ ১৪৩ ॥
নবজলধরনীলরুচা সংমান্যৈস্তে কটাক্ষকান্তিভরৈঃ ।
সংকলিতনিত্যতোরণশোভং তে মণ্টপাস্থানম্ ॥ ১৪৪ ॥
রাকাচন্দ্রনিভাস্যা সা কাশ্যাদিষু কৃতাত্মবহুপীঠা ।
নাকাদিরাজবিনুতা শোকাদিহরপ্রভাবজন্মকলা ॥ ১৪৫ ॥
পারাবারসুতাদ্যৈরারাত্কলনীয়নৈজবিভবা সা ।
বীরাঢ্যনৈজরূপা দারাঃ কৈলাসবাসিনো জয়তি ॥ ১৪৬ ॥
ধীরাত্মহৃদয়কমলে ধারাধরনীলচিকুরভারবতী ।
ক্ষীরাদিহৃদ্যবাণী ধারা সা ভাতি পার্বতীরূপা ॥ ১৪৭ ॥
পরমশিবভাগ্যধাটী কাঞ্চনশাটী মমাস্তু হৃদি সততম্ ।
পরিমলিতবক্ত্রবীটী কৃতনতিঘোটী গজাদিপরিপাটী ॥ ১৪৮ ॥
সন্মানসকাসারে কৃতপরমানন্দসংততির্জননী ।
শংকরতত্ত্বোন্মেষং কল্যতি কালে দয়াসারাত্ ॥ ১৪৯ ॥
এণাঙ্কলসিতমৌলিঃ ক্ষীণানাং রক্ষিণী পরমা ।
পাণাবাদৃতহরিণা বীণানুতিলালিতা চ সা জয়তি ॥ ১৫০ ॥
মূকাদীনাং পুরহরমৌল্যান্দোলনকরোজ্জ্বলা বাচঃ ।
য়ত্কারুণ্যাত্ কালে সমুল্লসন্তীহ সা মদীয়ধনম্ ॥ ১৫১ ॥
সর্বেষাং দেবানামপি মর্ত্যানাং তথা গিরীশস্য ।
একা পুণ্যশ্রেণী গৌরীরূপা হি সর্বদা জয়তি ॥ ১৫২ ॥
পশুপতিপুণ্যশ্রেণীপরিপাকং পার্বতীরূপম্ ।
নিজদৃগ্রক্ষিতলোকত্রয়মিদমারাদ্ বিরাজতে তেজঃ ॥ ১৫৩ ॥
শীতলভূধরজনিতা দয়য়া চ পুনস্তথা শীতা ।
শীতলললয়কটাক্ষা সা জননী নঃ সদা জয়তি ॥ ১৫৪ ॥
স্মৃতিমাত্রতাপহান্যৈ কলিতপ্তানাং জনানাং সা ।
কৃতসংকল্পানল্পাভরণা ভরণায় হৃদি লসতি ॥ ১৫৫ ॥
সুকৃতিজনদৃশ্যরূপং দুষ্কৃতিজনদূরগং চ তত্ তেজঃ ।
কারুণ্যপূর্ণহৃদয়ং তদ্ভাবনতাং তথা জয়তি ॥ ১৫৬ ॥
তাপিঞ্ছস্তবকরুচির্জননী সা শাংকরী ভজতাম্ ।
নিজদৃক্পাতপ্রশমিতদারিদ্র্যাদির্লসতি পীঠে ॥ ১৫৭ ॥
পরমশিবাস্থানতলে নিত্যং খেলনকৃতাদরং তেজঃ
তদ্ রাজতে মুনীনাং হৃদয়ে নিগমান্তসৌধে চ ॥ ১৫৮ ॥
নিশ্চলভাবভৃতাং তন্নিশ্চলরূপং বিরাজতে তেজঃ ।
হংসীব মানসে মে মঞ্জুলগতিদায়িনী সুদৃশাম্ ॥ ১৫৯ ॥
মাধুর্যং বচসি গতৌ গাম্ভীর্যং নেত্রয়োস্তৈক্ষণ্যম্ ।
শৈতল্যং হৃদি চ সদা য়ত্র হি দৃশ্যং তদেব জননী নঃ ॥ ১৬০॥
নিজশোভাজিতকন্দুককুচয়ুগলশ্রীজিতেশহৃদয়া সা ।
মনসি মম সংনিধত্তাং দত্তাত্রেয়াদিভির্বন্দ্যা ॥ ১৬১ ॥
নিজমৌলিচন্দ্রকিরণপ্রসারণেঽপ্যুল্লসত্সরোজয়ুগম্ ।
দধতী শ্রবসোরেষা চকাস্তি হৃদয়ে পরা দেবী ॥ ১৬২ ॥
মুখজিততারানাথা মখভুগ্গণসেব্যচরণজলজাতা ।
নখকান্তিপটলদম্ভাদ্ গতিজিতহংসাবলী বিভাতু হৃদি ॥ ১৬৩ ॥
কবিতাভাগ্যবিধাত্রী পরিমলসংক্রান্তমধুপগণকেশা ।
মম নয়নয়োঃ কদা বা কর্ণেজপলোচনং দিব্যম্ ॥ ১৬৪ ॥
শশিখণ্ডবতংসশ্রীঃ পশুপতিভাগ্যং চ তত্ তেজঃ ।
মম নয়নয়োঃ কদা বা কর্ণেজপলোচনং দিব্যম্ ॥ ১৬৫ ॥
তত্ তেজঃ শাশ্বতমিহ সামান্যং ভূনিবাসকৃতাম্ ।
দ্যুসদামপি জয়তি কৃতাদরং তদস্তু শ্রিয়ৈ কালে ॥ ১৬৬ ॥
শতমখনীলমণীনাং প্রভাবিসারপ্রলোভতনুকান্ত্যা ।
শ্রুতিমৌলিসৌধদীপশ্রিয়া তয়া নাথবানহং কালে ॥ ১৬৭ ॥
কবিকুলসূক্তিশ্রেণীশ্রবণানন্দোল্লসদ্বতংসসুমা ।
সা দেবী মম হৃদয়ে কৃতসাংনিধ্যা কৃতত্রাণা ॥ ১৬৮ ॥
পুষ্পেষ্বাগমসারা পুরভিন্মানসবিভেদিনিজকেলিঃ ।
বিশ্ববিমোহনমূর্তিঃ সা দেবী শাংকরী জয়তি ॥ ১৬৯ ॥
কাশীকাঞ্চ্যাদিতটস্থিরাসনা মেখলাভিরামকটিঃ ।
মুগ্ধস্মেরমুখী সা য়া গৌরী সংপদাং জননী ॥ ১৭০ ॥
মুখবিজিতচন্দ্রমণ্ডলমিদমম্ভোরুহবিলোচনং তেজঃ ।
ধ্যানে জপে চ জপতাং চকাস্তি হৃদয়ে কবীশ্বরাণাং চ ॥ ১৭১ ॥
মঞ্জুলকবিতাসংততিবীজাঙ্কুরদায়িনী রসালোকা ।
জননি তবাপাঙ্গশ্রীর্জয়তি জগত্ত্রাণকলিতদীক্ষেয়ম্ ॥ ১৭২ ॥
অম্ব তবাপাঙ্গশ্রীরপাঙ্গকেলীশতানি জনয়ন্তী ।
পুরহন্তুর্হৃদি জয়তি ব্রীডামদমোহকামসারকরী ॥ ১৭৩ ॥
দিনকরসুতাতরঙ্গাবলিশোভাকৃতকচাকচিশ্রীশ্চ ।
শশিখণ্ডবতংসশিরাঃ সা দেবী শরণমর্থিনাং পরমম্ ॥ ১৭৪ ॥
কলকলনিনদত্কাঞ্চী কাঞ্চ্যাদিতলস্থিরাসনা দেবী ।
পুরহরভূষণমূর্তিঃ সা দেবী শরণমস্মাকম্ ॥ ১৭৫ ॥
পুরহরসহধর্মচরীং কচভারলসন্নিশীথিনীশকলাম্ ।
কবিকুলমান্যচরিত্রাং পবিত্রিতক্ষোণিভৃত্কুলাং বন্দে ॥ ১৭৬ ॥
ভক্তজনাবলিকথিতস্তুতিশতদত্তাদরামিমাং দেবীম্ ।
সরসকবনপ্রদাত্রীং ভূষিতশিববামভাগরেখান্তাম্ ॥ ১৭৭ ॥
মঙ্গলমূর্তিং কিংনরকীর্তিতনিজকীর্তিবল্লরীং জননীম্ ।
মূর্তিমতীং কামকলাং শংভোরম্ভোজলোচনাং নৌমি ॥ ১৭৮ ॥
জিতমন্মথমারকলাদাত্রীং শিবগাত্রদিব্যভূষাং তাম্ ।
ত্রিজগত্সুখজনয়িত্রীমম্বামম্বুদমনোজ্ঞতনুমূর্তিম্ ॥ ১৭৯ ॥
খণ্ডিতসুরবৈরিগণাং চণ্ডকরাদ্যৈঃ সুরৈশ্চ নুতসদনাম্ ।
মণ্ডিতপুরহরদেহাং তাণ্ডবিনঃ সর্বমঙ্গলাং দেবীম্ ॥ ১৮০ ॥
নিজলোচনকৃতসংপদমজকমলেক্ষণশচীশসুরবন্দ্যাম্ ।
ভজনকৃদন্তর্জ্যোতিষমজতনয়াদ্যৈশ্চ নিত্যসেব্যকলাম্ ॥ ১৮১ ॥
ভরিতভুবনামপর্ণাং সরিদুরুবীচীবিলোলিতাত্মকচাম্ ।
গিরিশকৃতনিত্যলীলাং বরিবস্যাদানতুষ্টনিজহৃদয়াম্ ॥ ১৮২ ॥
জননুতনিত্যবিভূতিং কনদুরুভূষাবলীলসিতদেহাম্ ।
মনসাপ্যগণ্যতত্ত্বাং বনবাসিধ্যানগোচরাত্মকলাম্ ॥ ১৮৩ ॥
নীলাম্বুজকান্তিমুষং বালার্কনিভাত্মকর্ণপূরবতীম্ ।
মালালংকৃতকণ্ঠাং বালাং স্কন্দস্য মাতরং বন্দে ॥ ১৮৪ ॥
শরণাগতজনরক্ষণকৃতদীক্ষাবীক্ষণেন জিতশংভুঃ ।
কুলভূধরবরতপসাং পরিপাকঃ কোঽপি বিজয়তে লোকে ॥ ১৮৫ ॥
কুসুমশরমথনমনসাপ্যাদরণীয়াত্মকামকেলিরিয়ম্ ।
জননী কল্যাণততিং ভজতাং নঃ সাদরাত্ তরঙ্গয়তি ॥ ১৮৬ ॥
মত্তগজমান্যগমনা মধুরালাপা চ মান্যচরিতা সা ।
মন্দস্মেরমুখাব্জা গৌরী মম হৃদয়সারসে লসতু ॥ ১৮৭ ॥
পুরহরনেত্রমহোত্সবতারুণ্যশ্রীর্নিরস্তনতশত্রুঃ ।
ললিতলিকুচাভকুচভরয়ুগলা দৃগ্বিজিতহরিণসংদোহা ॥ ১৮৮ ॥
কারুণ্যপূর্ণনয়না কলিকল্মষহারিণী চ সা গৌরী ।
মুখজিতশারদকমলা বক্ত্রাম্ভোজে সদা স্ফুরতু কালে ॥ ১৮৯ ॥
শূলিমনোরথপাত্রং সংতপ্তস্বর্ণকাম্যনিজগাত্রম্ ।
আশ্রিতহিমবদ্গোত্রং রক্ষিতনতবাহুজচ্ছাত্রম্ ॥ ১৯০ ॥
কবিকুলজিহ্বালোলং শশিশেখরকলিতরম্যবহুলীলম্ ।
নিরসিতনতদুষ্কালং বন্দে তেজঃ সদালিনুতশীলম্ ॥ ১৯১ ॥
কমলসুষমানিবাসস্থানকটাক্ষং চিরায় কৃতরক্ষম্ ।
রক্ষোগণভীতিকরং তেজো ভাতি প্রকামমিহ মনসি ॥ ১৯২ ॥
কুমুদবনীশক্রীডাস্থানায়িতকেশভারায়ৈ ।
নম উক্তিরস্তু মাত্রে বাগ্জিতপীয়ূষধারায়ৈ ॥ ১৯৩ ॥
বালকুরঙ্গবিলোচনধাটীরক্ষিতসুরাদিমনুজান্তম্ ।
নয়নয়ুগাসেব্যং তদ্ ভাতীহ ধরাতলে নিয়তম্ ॥ ১৯৪ ॥
কুশলবিধয়ে তদস্তু প্রসূনবিশিখারিকৃতলীলম্ ।
কবলিতপদনতদৈন্যং তরুণাম্বুদমেচকং ধাম ॥ ১৯৫ ॥
জননি কদা বা নেষ্যাম্যহমারাদর্চিতত্বদীয়পদঃ ।
নিমিষমিব হন্ত দিবসান্ দৃষ্ট্বা ত্বামাদরেণ কল্যাণীম্ ॥ ১৯৬ ॥
কবিবাগ্বাসন্তীনাং বসন্তলক্ষ্মীঃ পুরারিদয়িতা নঃ ।
পরমাং মুদং বিধত্তে কালে কালে মহাভূত্যৈ ॥ ১৯৭ ॥
ত্রিভুবনসুন্দররূপং তেজস্তদ্ ভক্তিতঃ সমভ্যর্চ্য ।
গরুডেন য়াতি কুতুকাদথবা হংসেন সুরসেব্যঃ ॥ ১৯৮ ॥
তব পদপদ্মে ভক্তির্ন মে তথাপি তবদীয়কৃপয়াহম্ ।
ধ্যায়াম্যন্বহমম্ব ত্বামারাদাদরাত্ সিদ্ধ্যৈ ॥ ১৯৯ ॥
য়ো দেব্যাঃ পদসরসিজনতিভাক্ তস্যেহ সিধ্যন্তি ।
স্থিরবিভুতা সত্সঙ্গঃ সায়ুজ্যং চাপি কালেন ॥ ২০০ ॥
হিমগিরিতপঃফলং তন্মুনিজনহৃদয়াব্জনিত্যকৃতনৃত্তম্ ।
করুণালোলাপাঙ্গং তত্ তেজো ভাতু নিঃসমং বদনে ॥ ২০১ ॥
জননি তরঙ্গয় নয়নে ময়ি দীনে তে দয়াস্নিগ্ধে ।
তেন বয়ং তু কৃতার্থা নাতঃ পরমস্তি নঃ প্রার্থ্যম্ ॥ ২০২ ॥
মুনিহৃদয়পদ্মহংসী শিবকেলীসদনরত্নদীপকলা ।
হিমবত্পুত্রী কৃপয়া মামবতি মহৌষধী কলিব্যাধেঃ ॥ ২০৩ ॥
প্রতিফলতু ভাবনায়ামস্মাকং সা স্ফুরত্কৃপাধারা ।
পুরহরদৃক্সাফল্যং কৈলাসে কিমপি নিশ্চিতং তেজঃ ॥ ২০৪ ॥
সজ্জনমানসধাম্নে নম উক্তির্মে শ্রুতীড্যনিজভূম্নে ।
শিববামভাগধাম্নে মহাবিভূত্যৈ হি শংকরীনাম্নে ॥ ২০৫ ॥
দেশিকমানসবিহরণকলাজুষে ভক্তিরস্তু মে তস্মৈ ।
য়চ্চন্দ্রমৌলিলোচনচাপল্যং রক্ষিতস্বভক্তৌঘম্ ॥ ২০৬ ॥
নিজলোচনকেলিকলাবশীকৃতপ্রসবাণরিপুহৃদয়ম্ ।
দয়য়া লোলিতহৃদয়ং তদস্তু তেজঃ পুরোঽস্মাকম্ ॥ ২০৭ ॥
সততং বদ্ধাঞ্জলিপুটমুপাস্মহে তচ্ছুভপ্রদং তেজঃ ।
য়ন্মরকতকান্তিলসত্ প্রসূনশরবৈরিপুণ্যপরিপাকম্ ॥ ২০৮ ॥
তীরং সংসৃতিজলধেঃ পূরং শংকরবিলোচনপ্রীতেঃ ।
সারং নিগমান্তানাং দূরং দুর্জনততের্হি তত্ তেজঃ ॥ ২০৯ ॥
নগরাজকন্যকা সা লসতু পুরোঽস্মাকমাদরকৃতশ্রীঃ ।
য়ত্প্রণমনাজ্জনানাং কবিতোন্মেষঃ সদীডিতো লসতি ॥ ২১০ ॥
সন্নয়নসারসালীপূষা ভূষা চ হরশরীরস্য ।
হিমগিরিতনয়া য়োষা ভাষাস্তোত্রপ্রিয়া চ সা ভাতি ॥ ২১১ ॥
সফলয়তু নেত্রয়ুগলং হতনতদুরিতা হি সা পরা দেবী ।
ধরণিধরনায়কপ্রিয়সুতা চ সোমার্ধভূষিতাত্মকচা ॥ ২১২ ॥
সুমনোবাঞ্ছাদানে কৃতাবধানং ধনং শংভোঃ ।
ধিষণাজাড্যাদিহরং য়দ্বীক্ষণমামনন্তি জগতি বুধাঃ ॥ ২১৩ ॥
কো বা ন শ্রয়তি বুধঃ শ্রেয়োঽর্থী তামিমামম্বাম্ ।
য়ামর্ধচন্দ্রশেখরসধর্মিণীমর্চয়ন্তি সুরনাথাঃ ॥ ২১৪ ॥
শমিতনতদুরিতসংঘা হরায় নিজনেত্রকল্পিতানঙ্গা ।
কৃতসুরশাত্রবভঙ্গা সা দেবী মঙ্গলৈস্তুঙ্গা ॥ ২১৫ ॥
কবিতারসপরিমলিতং করোতি বদনং নতানাং য়া ।
স্তোতুং তামহমারাত্ সা দেবী সুপ্রসন্নাস্তু ॥ ২১৬ ॥
পুরহরবামোত্সঙ্গে ভজামি লসিতং তু তত্ তেজঃ ।
সৃষ্টিস্থিতিলয়কার্যং য়জ্জনয়তি কালভেদেন ॥ ২১৭ ॥
কল্যাণদানকলনাত্ খ্যাতা সা শাংকরী লোকে ।
তদ্বৈভবকীর্তনতো বয়মত্রাসাঃ পরানন্দাঃ ॥ ২১৮ ॥
মন্দহসিতৈর্বশীকৃতশাংকরহৃদয়া হি ভক্তানাম্ ।
রক্ষণকার্যায় পরং সাম্বা কুম্ভোদ্ভবাদিভির্বন্দ্যা ॥ ২১৯ ॥
নিজমৌলিচন্দ্রকিরণপ্রসারণাদ্গাঙ্গবীচিকাপবনৈঃ ।
তত্ক্ষণনিরসিতসুরতশ্রমা ভবানীহ রাজতে ভূত্যৈ ॥ ২২০ ॥
মম গাহতে হি হৃদয়ং নয়নয়ুগং ত্রিপুরদময়িতুর্ভাগ্যম্ ।
য়দকৃত্রিমবাগ্গুম্ভৈঃ স্তুত্যং ধ্যেয় সদাভ্যর্চ্যম্ ॥ ২২১ ॥
করধৃতশূলাদ্যায়ুধজালনিরস্তাখিলারিবৃন্দেয়ম্ ।
কুন্দাভদন্তবদনানন্দায়াস্তু প্রকামমিহ নমতাম্ ॥ ২২২ ॥
কুচভারনম্রগাত্রং নিজজনিপরিপূতজনকবরগোত্রম্ ।
সুরবৈরিকলিতকোপং গৌরীরূপং তদস্তু হততাপম্ ॥ ২২৩ ॥
নিটিলাত্তবহ্নিনেত্রং লোলালকমেতদাদৃতং তেজঃ ।
নিজকেল্যধীনশংকরমস্মাকং চাক্ষয়ং স্থানম্ ॥ ২২৪ ॥
তব মন্দস্মিতলহরীবিশেষিতরুচির্গিরীশশশিশকলঃ ।
তব রূপং গিরিশস্য স্বরূপমপি ভাতি য়োগিনাং হৃদয়ে ॥ ২২৫ ॥
নীলারবিন্দলোচনয়ুগলামম্বামহং নৌমি ।
কালারিচিত্তহরণে য়ল্লীলাঃ পাটবং নীতাঃ ॥ ২২৬ ॥
শশধরভূষিতমকুটী কবিকুলবাগব্জশরদিয়ং দেবী ।
আর্তত্রাণপরায়ণবিলোচনা হিমবতঃ পুত্রী ॥ ২২৭ ॥
শ্রুতিপঞ্জরকেলিশুকী শংকরপরিরম্ভণোত্সুকা মাতা ।
বহিরপ্যন্তয়র্মিনাং চকাস্তি লোকাম্বিকা কৃতত্রাণা ॥ ২২৮ ॥
চিন্তিতবস্তুবিধাত্রী সংততমপি লোকরক্ষণৈকরতা ।
সংদানিতনাকিলসত্সংতানসুমপ্রগল্ভধম্মিল্লা ॥ ২২৯ ॥
কলিতত্রিবর্গপদবীমপবর্গদকল্যসেবনামম্বাম্ ।
গাঙ্গজলৈর্নলিনদলৈরারগ্বধপত্রজালকৈরর্চ্যাম্ ॥ ২৩০ ॥
শশিশেখরসর্বস্বং পূর্বাচার্যৈঃ পুরস্কৃতং তেজঃ ।
মামকচক্ষুর্বিষয়ং কদা নু কৈলাসকলিতচঙ্ক্রমণম্ ॥ ২৩১ ॥
মোহিতভুবনা দেবী সা হিতকরনিত্যচিন্তনা ভজতাম্ ।
তাডিতরিপুজনমান্যা পীডিতনিজভক্তভবভয়া জয়তি ॥ ২৩২ ॥
প্রত্যঙ্গলসিতভূষা সত্যং মাতা হি শরণমস্মাকম্ ।
ক্ক্ত্যং য়মভয়মস্যাঃ স্তুত্যং জগতীহ বৈভবং মনুজৈঃ ॥ ২৩৩ ॥
অম্ব ত্বমেব কমলাসনাদিবৈভববিধাত্রী চ ।
তাং ত্বাং শরণং প্রাপ্তাঃ লোকেঽমুষ্মিন্ কিমাশাস্যম্ ॥ ২৩৪ ॥
কুঙ্কুমরুচিলসিতাঙ্গং কমলাসনমাত্তকমলং চ ।
হস্তাম্বুজধৃতপুস্তকরুদ্রাক্ষাদি চ তথা রূপম্ ॥ ২৩৫ ॥
জিতমন্মথবরিবস্যাসক্তং রূপং চ তে মাতঃ ।
কালানুকূলকলিতং পরতত্ববিদাং চকাস্তি হৃদয়তটে ॥ ২৩৬ ॥
হিমবন্নগেন্দ্রকন্যে ভূসুরকৃতবহুলপূজয়া ধন্যে ।
মান্যে সুমনঃসংঘৈস্ত্বাং কলয়ে হৃদি সদা হি কটিশূন্যে ॥ ২৩৭ ॥
নিরসিতনিষ্কংচনজনদৈন্যা কন্যা ধরাধরেশস্য ।
দৃক্কান্তিবিজিতহরিণা হরিণারাধ্যা চ সা জয়তি ॥ ২৩৮ ॥
বিনতজনিতাপবর্গা সর্গাদিকরী চ সা দেবী ।
নিজলীলাহৃতভর্গা দুর্গাদিশ্রেয়সাং জননী ॥ ২৩৯ ॥
কবনকৃতাং তোষকৃতে জগদবনাদিক্রিয়াপেষু ভবতু ।
শাংকরিরূপায় পরং নম উক্তির্জ্যোতিষেঽস্মাকম্ ॥ ২৪০ ॥
ফণিপতিভূষিতদেহা হরভজনানন্দসংদোহা ।
তত্ত্বৈর্হতসংদেহা চকাস্তু হৃদয়ে বিধূতজনমোহা ॥ ২৪১ ॥
জয়তি জননি ত্বদীয়ং রূপং রবিকোটিতুলিতমিদম্ ।
এতন্নানাকারং কালে কৃতরক্ষণং চ ভুবনেড্যম্ ॥ ২৪২ ॥
মদনারিকণ্ঠসুষমাসাক্ষীভূতস্ববাহুয়ুগলা সা ।
কুঙ্কুমপঙ্কাঙ্কিততনুরেষা দেবী চকাস্তি বহুরূপা ॥ ২৪৩ ॥
কাঞ্চীমণিলসিতকটিঃ কাঞ্চীপুরভূষণং চ তদ্ধাম ।
য়ন্মন্মথরিপুমান্যং নিজলীলাকলিতবহুরূপম্ ॥ ২৪৪ ॥
করপঙ্কজধৃতমালা সৃষ্টিস্থিত্যাদিবহুলীলা ।
বীটীবিলসিতবদনা বিরচিতনতহর্ম্যবরসদনা ॥ ২৪৫ ॥
বিসৃমরতানুকম্পা তং পাতকিবর্গমাদরাদম্বা ।
রক্ষতি তনুজিতশম্পা সা নঃ শরণং পুরঃ স্ফুরতু ॥ ২৪৬ ॥
শূলিনি সুরজনপালিনি কাত্যায়নি দেবি মাং পাহি ।
সুরলোককুসুমমালিনি শিবখেলিনি চণ্ডিকে পাহি ॥ ২৪৭ ॥
ভারতি ভৈরবি শাংকরি কপালিনি নমোঽস্তু তে নিত্যম্ ।
স্তুত্বৈবমম্ব বাচা মনসারাধ্যং নমামি তে পাদম্ ॥ ২৪৮ ॥
কুটিলকচং লিকুচকুচং মৃদুবাহুলতং চ কঙ্কুমচ্ছায়ম্ ।
বিলসতি শশধরমৌলেঃ সর্বস্বং সুকৃতপরিপাকঃ ॥ ২৪৯ ॥
উন্মূলয়তি শুভেতরবার্তামপ্যম্ব তে নাম ।
ভজনাদপি কীর্তনতঃ কিং বা ভাগ্যং ত্বদীয়ভক্তানাম্। ॥ ২৫০ ॥
পরমশিবপুণ্যকোটী নিজগতিজিতসন্মরালগতিধাটী ।
কৃতনিত্যকামকোটী কোটীরোল্লসিতচন্দ্রপরিপাটী ॥ ২৫১ ॥
চন্দ্রাভরণবতংসা কংসারিমুখৈঃ সুরৈশ্চ নুতচরিতা ।
গজমুখষণ্মুখজননী সাস্মাকং মানসে কৃতাস্থানা ॥ ২৫২ ॥
পরমশিবদিব্যজায়া মায়ামোহিতসুরাসুরা জননী ।
কুঙ্কুমবিলসিতকায়াপায়ান্মাং রক্ষতীহ কবিগেয়া ॥ ২৫৩ ॥
ভূষিতরত্নাভরণা শরণর্থিজনালিকল্পিতাভরণা ।
মুদিতনিজান্তঃকরণা মরণাদিধ্বংসিনী সদাবরণা ॥ ২৫৪ ॥
শ্রুতিসুদতীস্তবকায়িতচরণাম্ভোজা চ ভোজাদ্যৈঃ ।
কৃতপরিচরণা বিস্তৃতকরুণাম্বা শৈলরাজবরতনয়া ॥ ২৫৫ ॥
অধরে লসিতারুণ্যং তনৌ তু হরমান্যপূর্ণতারুণ্যম্ ।
লোচনধৃতকারুণ্যং করে কুসুম্ভাদিসংভৃতারুণ্যম্ ॥ ২৫৬ ॥
তত্তেজো লসতি হৃদি স্মরারিসংমান্যবহুলীলম্ ।
সৃণিপাশাঙ্কুশহস্তং প্রশস্তমস্তোদয়াদিহীনং চ ॥ ২৫৭ ॥
কলিতচরাচররক্ষণমক্ষীণোদ্দামবৈভবং কিমপি ।
নিখিলাগময়ন্ত্রকলাসারং তল্লসতি পুরভিদা মান্যম্ ॥ ২৫৮ ॥
ভবচিত্তরাজহংসী ভবভয়মোহাদিভেদিনী শরণম্ ।
সবরক্ষণকৃতদীক্ষা শিববামাঙ্গোল্লসিতমূর্তিঃ ॥ ২৫৯ ॥
তব চরণন্যাসবশাত্ পরিপূতা ভূরিয়ং ভূত্যৈ ।
দেবেশমৌলিসেব্যা তাং ত্বামারাধয়ামি গিরিতনয়ে ॥ ২৬০ ॥
ক্ষণমিহ মাতর্দূরে স্যাদ্ য়দি দৃষ্টিঃ শুভংকরী মান্যা ।
অষ্টৈশ্বর্যোঽপি তদা বিনষ্টশোভো বিকল্যশ্চ ॥ ২৬১ ॥
অত এব হি কারুণ্যাল্লোকাম্ব ত্বং সদাদৃতভবাঙ্গা ।
ক্রীডসি রক্ষসি কালে জনয়সি মোহাদিকানথবা ॥ ২৬২ ॥
পরমশিবকেলিরসিকে য়ঃ কোঽপি জনস্তব স্তবং কুর্বন্ ।
নিরসিতনাকেশপদস্তব সারূপ্যং ক্রমাদ্ ভজতি ॥ ২৬৩ ॥
তব পাদপদ্মবিসৃমরকান্তিঝরীং মনসি কলয়ংস্তু ।
নিরসিতনরকাদিভয়ো বিরাজতে নাকিসদসি সুরবন্দ্যঃ ॥ ২৬৪ ॥
বালমরালীগত্যৈ সুরগিরিধানুষ্কমহিতকলগীত্যৈ ।
বিরচিতনানানীত্যৈ চেতো মে স্পৃহয়তে বহুলকীর্ত্যৈ ॥ ২৬৫ ॥
বিতরণকলাপ্রসক্তৌ চিন্তামণিকামধেনুসুরবৃক্ষাঃ ।
তে দূরে তাং ত্বামহমারাধয়িতুং কৃতপ্রয়ত্নোঽস্মি ॥ ২৬৬ ॥
বিনমদমরেশসুদতীকচসুমমকরন্দধারয়া স্নিগ্ধম্ ।
তব পাদপদ্মমেতত্ কদা নু মম মূর্ধ্নি ভূষণং জননি ॥ ২৬৭ ॥
তব হরপুরংধ্রি মাতশ্চরণপয়োজং ক্রমার্চিতং য়েন ।
তেনৈন্দ্রপদমপি দ্রাগ্ বিরাজতে তত্ সমাক্রান্তম্ ॥ ২৬৮ ॥
তব পদসরোজপাংসুন্যাসাদ্ধন্যোত্তমাঙ্গলসিতাশ্চ ।
গায়ন্তি চ নৃত্যন্তি প্রমোদকৃতনুতিচয়াশ্চ রাজন্তে ॥ ২৬৯ ॥
য়ত্প্রণয়কলহবার্তাভীতো নিরসিতসিমেষুরপি বিনয়ী ।
মদনং তমপি বসন্তং মানয়িতুং সংপ্রবৃত্তহৃদয়োঽভূত্ ॥ ২৭০ ॥
কুসুমৈর্গাঙ্গৈর্বারিভিরনুনয়বাগ্ভিশ্চ নম্রমুখঃ ।
সা পুরহরভূষা নো মনসি বিহরতাং কিরীটলসদিন্দুঃ ॥ ২৭১ ॥
পুরহরপরতন্ত্রং তদ্ গততন্দ্রং বস্তু নিস্তুলমুপাসে ।
তেনৈবাহং ধন্যো মদ্বংশ্যা নিরসিতাত্মতাপভরাঃ ॥ ২৭২ ॥
মুখসুষমাজিতপদ্মং পদ্মজহরিবাসবাদিবুধসেব্যম্ ।
কাব্যার্থসারমেতদ্ গৌরীরূপ হি বিজয়তে তেজঃ ॥ ২৭৩ ॥
য়স্যাঃ পদসরসিজয়োর্বিবুধকিরীটাবলির্গৌর্যাঃ ।
নীরাজনবিধিকলিতা সা মে কুলদৈবতং লসতু ॥ ২৭৪ ॥
কবিহৃত্কৈরবিকসনচন্দ্রিকয়া শমিততাপভরাঃ ।
মন্দস্মিতশ্রিয়া কিল য়স্যাঃ সা ভাতি হিমবতঃ পুত্রী ॥ ২৭৫ ॥
নিরসিততমঃপ্রচারা পূর্বা সংধ্যেব নগপতেস্তনয়া ।
দ্বিজসংঘোদয়কলনা সা মে কুলদৈবতং লসতু ॥ ২৭৬ ॥
রচয়ামি নমংসি ভৃশং শংকরমণ্ডিতনিজাঙ্কবল্লর্যৈ ।
পুণ্যাত্মনে পুরারেঃ পর্বতকুলরাজতনয়ায়ৈ ॥ ২৭৭ ॥
পুরমথনভাগ্যধাটী কবিলোকসমীড্যসূক্তিরসধাটী ।
মুখলসিতসারবীটী বিহরতু হৃদি মে কৃপৌঘপরিপাটী ॥ ২৭৮ ॥
অম্ব তব করুণয়াহং রক্ষিতসংতানবৈভবো নিত্যম্ ।
এতাদৃশী তুমহতী কীর্তিস্তে জৃম্ভতে প্রতিদিশং হি ॥ ২৭৯ ॥
মদনপরিপন্থিমহিষী মম মানসকল্পিতাসনা জয়তি ।
শ্রুতিমৌলিবিহিতচরণা য়োগিহৃদম্ভোজলালিতাপি মুহুঃ ॥ ২৮০ ॥
পশুপতিপুরংধ্রি মাতস্তব পাদয়ুগং প্রণম্য জন্তুরিহ ।
বিধুতয়মদূতভীতিস্ত্রিদিশৈরপি মান্যতে কলিতসেবঃ ॥ ২৮১ ॥
সুরসুদতীলোলালকমকরন্দরসবাসিতং তব পদাব্জম্ ।
মম মানসে তু ফুল্লং ভবতু হি কালে বয়ং তু ধন্যাঃ স্মঃ ॥ ২৮২ ॥
তব নাম য়স্য বক্ত্রে ফালে চ পদাব্জকুঙ্কুমচ্ছায়া ।
স ভবতি মান্যস্ত্রিদশৈরপি ধুতসমস্তদুরিতজালঃ সন্ ॥ ২৮৩ ॥
আস্তাং হি মে পুরস্তাত্ পুরজয়িনঃ পুণ্যপরিমলোল্লাসি ।
জননীরূপং সংততমাশ্রিতরক্ষৈকক্লৃপ্তদীক্ষং তত্ ॥ ২৮৪ ॥
হরিণাঙ্কমৌলিদয়িতে য়দি তে দৃষ্টিস্তদাদরাত্ কবিতা ।
আলিঙ্গ্য মোদতি চিরং তেন হি সর্বজ্ঞতা লোকে ॥ ২৮৫ ॥
ডম্ভাদিদুর্গুণৌঘো ধাবতি দূরে ত্বদীয়পদভক্তম্ ।
ত্যক্ত্বা য়দি তে দৃষ্টিস্তেন হি সর্বাঃ শ্রিয়ঃ কালে ॥ ২৮৬ ॥
তব মাতর্মুনিমান্যং পদমারাধ্য প্রসূনৌঘৈঃ ।
লভতে সহস্রনয়নান্যথবাষ্টৌ পুণ্যসংবৃতঃ পুরুষঃ ॥ ২৮৭ ॥
নির্ধূততমঃকন্দে মুকুন্দপদ্মাসনাদিসেব্যপদে ।
ভক্তির্মম হি সদা স্যাত্ তেনাহং ধন্যচরিতোঽস্মি ॥ ২৮৮ ॥
নূপুরমনিগণরঞ্জিতপাদাব্জং মাতরম্বিকে হৃদয়ে ।
মম লসতু তব কটাক্ষান্নাতঃ পরমর্থনীয়ং হি ॥ ২৮৯ ॥
মুক্তামণিভূষিতয়া কোকিলশুকমান্যবাগ্বিভূষিতয়া ।
হিমগিরিসুতয়াহং কিল সনায়কো ধূতপাপাদিঃ ॥ ২৯০ ॥
নির্ধূততমসি রূপং তব মাতর্মামকে হৃদয়ে ।
স্ফুরতি তবৈব হি দয়য়া ন মামকৈঃ কর্মভিশ্চ ব্রতগুম্ভৈঃ ॥ ২৯১ ॥
নিগমান্তবেদ্যবৈভবমেতত্ তে রূপমম্বিকে মাতঃ ।
স্ফুরতি মম নয়নয়োরিহ তত্র তু হেতুস্ত্বদীয়করুণা হি ॥ ২৯২ ॥
ত্রিণয়নসাম্রাজ্যমিদং তব রূপং নিখিলদেবতোপাস্যম্ ।
ননু মাতঃ স্ফুরতু সদা নাতঃ পরমর্থনীয়ং হি ॥ ২৯৩ ॥
হরিণাঙ্কমৌল্যধীনা কাপিপরা শক্তিরম্বিকা ক্ষেত্রে ।
মৌলৌ চ নিত্যবচসাং মম চিত্তে ভজতু নিত্যলীলাদিম্ ॥ ২৯৪ ॥
পরিসরনতবিবুধালীকিরীটমণিকান্তিবল্লরীবিসরৈঃ ।
কৃতনীরাজনবিধি তে মম তু শিরোভূষণং পদসরোজম্ ॥ ২৯৫ ॥
ভাগীরথীব বাণী তব নুতিরূপা বিরাজতে পরমা ।
ইহ মাতর্যদ্ভজনং সর্বেষাং সর্বসংপদাং হেতুঃ ॥ ২৯৬ ॥
নগপতিতনয়ে মাতঃ শাংকরি মাহেস্বরীতি নামানি ।
নিত্যং জপন্নহং তু ত্বদীয়দাসোঽস্মি মুক্তয়ে সিদ্ধঃ ॥ ২৯৭ ॥
নিখিলচরাচররক্ষাং বিতন্বতী শাংকরী দয়য়া ।
মম কুলদৈবতমেষা জয়তি সদারাধ্যমান্যপদকমলা ॥ ২৯৮ ॥
সর্বজনৈঃ সংসেব্যে সংততমপি বাঞ্ছিতপ্রদে দেবি ।
অম্ব ত্বমেব শরণং তেনাহং প্রাপ্তসর্বকার্যার্থঃ ॥ ২৯৯ ॥
শাংকরি কথং নু বর্ণ্যস্তব মহিমা বেদমৌলিগণবেদ্যঃ ।
ইতি নিশ্চিত্য পদাব্জং তব বন্দে মোক্ষকামোঽহম্ ॥ ৩০০ ॥
ত্বামম্ব বালিশোঽহং ত্বচমত্কারৈর্গিরাং গুম্ভৈঃ ।
অয়থায়থক্রমং হি স্তুবন্নপি প্রাপ্তজন্মসাফল্যঃ ॥ ৩০১ ॥
ইতি অম্বিকাত্রিশতী সমাপ্তা
Also Read 300 Names of Ambika Trishati:
Ambika Trishati Lyrics in Hindi | 300 Names of Goddess Ambika in Hindi | English | Bengali | Gujarati | Punjabi | Kannada | Malayalam | Oriya | Telugu | Tamil