Premendusagara Stotram Lyrics in Bengali:
প্রেমেন্দুসাগরস্তোত্রম্
শ্রীপ্রেমেন্দুসাগরসংজ্ঞকশ্রীকৃষ্ণাষ্টোত্তরশতনামমালিকা ।
কলহান্তরিতাবৃত্তা কাচিদ্ বল্লবসুন্দরী ।
বিরহোত্তাপখিন্নাঙ্গী সখীং সোত্কণ্ঠমব্রবীত্ ॥ ১ ॥
হন্ত গৌরি স কিং গন্তা পন্থানং মম নেত্রয়োঃ ।
শ্রীকৃষ্ণঃ করুণাসিন্ধুঃ কৃষ্ণো গোকুলবল্লভঃ ॥ ২ ॥
গোবিন্দঃ পরমানন্দো নন্দমন্দিরমঙ্গলম্ ।
য়শোদাখনিমাণিক্যং গোপেন্দ্রাম্ভোধিচন্দ্রমাঃ ॥ ৩ ॥
নবাম্ভোধরসংরম্ভবিডম্বিরুচিডম্বরঃ ।
ক্ষিপ্তহাটকশৌটীর্যপট্টপীতাম্বরাবৃতঃ ॥ ৪ ॥
কন্দর্পরূপসন্দর্পহারিপাদনখদ্যুতিঃ ।
ধ্বজাম্ভোরুহদম্ভোলি য়বাঙ্কুশলসত্পদঃ ॥ ৫ ॥
পদপঞ্জরসিঞ্জানমঞ্জুমঞ্জীরখঞ্জনঃ ।
মসারসম্পুটাকারধারি জানুয়ুগোজ্জ্বলঃ ॥ ৬ ॥
শৌণ্ডস্তম্বেরমোদ্দণ্ডশুণ্ডারম্যোরুসৌষ্ঠবঃ ।
মণিকিঙ্কিণিসঙ্কীর্ণবিশঙ্কটকটিস্থলঃ ॥ ৭ ॥
মধ্যমাধুর্যবিধ্বস্তদিব্যসিংহমদোদ্ধতিঃ ।
গারুত্মতগিরিগ্রাবগরিষ্ঠোরস্তটান্তরঃ ॥ ৮ ॥
কম্বুকণ্ঠস্থলালম্বিমণিসম্রাড্ অলঙ্কৃতিঃ ।
আখণ্ডলমণিস্তম্ভস্পর্ধিদোর্দণ্ডচণ্ডিমা ॥ ৯ ॥
খণ্ডিতাখণ্ডকোটীন্দুসৌন্দর্যমুখমণ্ডলঃ ।
লাবণ্যলহরীসিন্ধুঃ সিন্দূরতুলিতাধরঃ ॥ ১০ ॥
ফুল্লারবিন্দসৌন্দর্য কন্দলীতুন্দিলেক্ষণঃ ।
গণ্ডান্ততাণ্ডবক্রীডাহিণ্ডন্মকরকুণ্ডলঃ ॥ ১১ ॥
নবীনয়ৌবনারম্ভজৃম্ভিতোজ্জ্বলবিগ্রহঃ ।
অপাঙ্গতুঙ্গিতানঙ্গকোটিকোদণ্ডবিক্রমঃ ॥ ১২ ॥
সুধানির্যাসমাধুর্যধুরীণোদারভাষিতঃ ।
সান্দ্রবৃন্দাটবীকুঞ্জকন্দরাগন্ধসিন্ধুরঃ ॥ ১৩ ॥
ধন্যগোবর্ধনোত্তুঙ্গশৃঙ্গোত্সঙ্গনবাম্বুধঃ ।
কলিন্দনন্দিনীকেলিকল্যাণকলহংসকঃ ॥ ১৪ ॥
নন্দীশ্বরধৃতানন্দো ভাণ্ডীরতটতাণ্ডবী ।
শঙ্খচূডহরঃ ক্রীদাগেণ্ডূকৃতগিরীশ্বরঃ ॥ ১৫ ॥
বারীন্দ্রার্বুধগম্ভীরঃ পারীন্দ্রার্বুদবিক্রমী ।
রোহিণীনন্দনানন্দী শ্রীদামোদ্দামসৌহৃদঃ ॥ ১৬ ॥
সুবলপ্রেমদয়িতঃ সুহৃদাং হৃদয়ঙ্গমঃ ।
নন্দব্রজজনানন্দসন্দীপনমহাব্রতী ॥ ১৭ ॥
শৃঙ্গিনীসঙ্ঘসঙ্গ্রাহিবেণুসঙ্গীতমণ্ডলঃ ।
উত্তুঙ্গপুঙ্গবারব্ধসঙ্গরাসঙ্গকৌতুকী ॥ ১৮ ॥
বিস্ফুরদ্বন্যশৃঙ্গারঃ শৃঙ্গারাভীষ্টদৈবতম্ ।
উদঞ্চত্পিঞ্ছবিঞ্ছোলীলাঞ্ছিতোজ্জ্বলবিগ্রহঃ ॥ ১৯ ॥
সঞ্চরচ্চঞ্চরীকালিপঞ্চবর্ণস্রগঞ্চিতঃ ।
সুরঙ্গরঙ্গণস্বর্ণয়ূথিগ্রথিতমেখলঃ ॥ ২০ ॥
ধাতুচিত্রবিচিত্রাঙ্গলাবণ্যলহরীভরঃ ।
গুঞ্জাপুঞ্জকৃতাকল্পঃ কেলিতল্পিতপল্লবঃ ॥ ২১ ॥
বপুরামোদমাধ্বীকবর্ধিতপ্রমদামদঃ ।
বৃন্দাবনারবিন্দাক্ষীবৃন্দকন্দর্পদীপনঃ ॥ ২২ ॥
মীনাঙ্কসঙ্কুলাভীরীকুচকুঙ্কুমপঙ্কিলঃ ।
মুখেন্দুমাধুরীধারারুদ্ধসাধ্বীবিলোচনঃ ॥ ২৩ ॥
কুমারীপটলুণ্ঠাকঃ প্রৌঢনর্মোক্তিকর্মঠঃ ।
অমন্দমুগ্ধবৈদগ্ধীদিগ্ধরাধাসুধাম্বুধি ॥ ২৪ ॥
চারুচন্দ্রাবলীবুদ্ধিকৌমুদীশরদাগমঃ ।
ধীরলালিত্যলক্ষ্মীবান্ কন্দর্পানন্দবন্ধুরঃ ॥ ২৫ ॥
চন্দ্রাবলীচকোরেন্দ্রো রাধিকামাধবীমধুঃ ।
ললিতাকেলিললিতো বিশাখোডুনিশাকরঃ ॥ ২৬ ॥
পদ্মাবদনপদ্মালিঃ শৈব্যাসেব্যপদাম্বুজঃ ।
ভদ্রাহৃদয়নিদ্রালুঃ শ্যামলাকামলালসঃ ॥ ২৭ ॥
লোকোত্তরচমত্কারলীলামঞ্জরিনিষ্কুটঃ ।
প্রেমসম্পদয়স্কান্তকান্তকৃতকৃষ্ণায়সব্রতঃ ॥ ২৮ ॥
মুরলীচৌরগৌরাঙ্গীকুচকঞ্চুকলুঞ্চনঃ ।
রাধাভিসারসর্বস্বঃ স্ফারনাগরতাগুরুঃ ॥ ২৯ ॥
রাধানর্মোক্তিশুশ্রূষাবীরুন্নীরুদ্ধবিগ্রহঃ ।
কদম্বমঞ্জরীহারিরাধিকারোধনোদ্ধুরঃ ॥ ৩০ ॥
কুডুঙ্গক্রোডসঙ্গূঢরাধাসঙ্গমরঙ্গবান্ ।
ক্রীডোড্ডামরধীরাধাতাডঙ্কোত্পলতাডিতঃ ॥ ৩১ ॥
অনঙ্গসঙ্গরোদ্গারিক্ষুণ্ণকুঙ্কুমকঙ্কটঃ ।
ত্রিভঙ্গিলঙ্গিমাকারো বেণুসঙ্গমিতাধরঃ ॥ ৩২ ॥
বেণুবিস্তৃতগান্ধর্বসারসন্দর্ভসৌষ্ঠবঃ ।
গোপীয়ূথসহস্রেন্দ্রঃ সান্দ্ররাসরসোন্মদঃ ॥ ৩৩ ॥
স্মরপঞ্চশরীকোটিক্ষোভকারিদৃগঞ্চলঃ ।
চণ্ডাংশুনন্দিনীতীরমণ্ডলারব্ধতাণ্ডবঃ ॥ ৩৪ ॥
বৃষভানুসুতাভৃঙ্গীকামধুক্কমলাকরঃ ।
গূঢাকূতপরীহাসরাধিকাজনিতস্মিতঃ ॥ ৩৫ ॥
নারীবেশনিগূঢাত্মা ব্যূঢচিত্তচমত্কৃতিঃ ।
কর্পূরালম্বিতাম্বূলকরম্বিতমুখাম্বুজঃ ॥ ৩৬ ॥
মানিচন্দ্রাবলীদূতীকৢপ্তসন্ধানকৌশলঃ ।
ছদ্মঘট্টতটীরুদ্ধরাধাভ্রূকুটিঘট্টিতঃ ॥ ৩৭ ॥
দক্ষরাধাসখীহাসব্যাজোপালম্ভলজ্জিতঃ ।
মূর্তিমদ্বল্লবীপ্রেমা ক্ষেমানন্দরসাকৃতিঃ ॥ ৩৮ ॥
অভিসারোল্লসদ্ভদ্রাকিঙ্কিণীনিনদোন্মুখঃ ।
বাসসজ্জীভবত্পদ্মাপ্রেক্ষ্যমাণাগ্রপদ্ধতিঃ ॥ ৩৯ ॥
উত্কণ্ঠিতার্তললিতাবিতর্কপদবীং গতঃ ।
বিপ্রলব্ধবিশাখোরুবিলাপভরবর্ধনঃ ॥ ৪০ ॥
কলহান্তরিতাশ্যামামৃগ্যমাণমুখেক্ষণঃ ।
খণ্ডিতোচ্চণ্ডধীশৈব্যারোষোক্তিরসিকান্তরঃ ॥ ৪১ ॥
বিশ্লেষবিক্লবচ্চন্দ্রাবলীসন্দেশনন্দিতঃ ।
স্বাধীনভর্তৃকোত্ফুল্লরাধামণ্ডনপণ্ডিতঃ ॥ ৪২ ॥
চুম্ববেণুগ্লহদ্যুতিজয়িরাধাধৃতাঞ্চলঃ ।
রাধাপ্রেমরসাবর্তবিভ্রমভ্রমিতান্তরঃ ॥ ৪৩ ॥
ইত্যেষোন্মত্তধীঃ প্রেম্না শংসন্তী কংসমর্দনম্ ।
স্ফুরন্তং পুরতঃ প্রেক্ষ্য প্রৌঢানন্দোত্সবং য়য়ৌ ॥ ৪৪ ॥
প্রেমেন্দুসাগরাখ্যেঽস্মিন্নাম্নামষ্টোত্তরে শতে ।
বিগাহয়ন্তু বিবুধাঃ প্রীত্যা রসনমন্দরম্ ॥ ৪৫ ॥
ইতি শ্রীরূপগোস্বামিবিরচিতস্তবমালায়াং প্রেমেন্দুসাগরস্তোত্রং
অথবা শ্রীকৃষ্ণাষ্টোত্তরশতনামং সম্পূর্ণম্ ।
Also Read:
Premendu Sagara Stotram in Hindi | English | Bengali | Gujarati | Punjabi | Kannada | Malayalam | Oriya | Telugu | Tamil
