Templesinindiainfo

Best Spiritual Website

Siva Gitimala – Shiva Ashtapadi or Lyrics in Telugu

About Shiva Gitimala !! Shiva Ashtapadi:

Shiva Gitimala was composed by Jagadguru Sri Chandra Sekharendra Saraswathi the 62nd seer of Sri Kanchi Kamakoti Peedam, composed of 20 exciting verses known as Ashtapadi, praising the pleasing moments of Lord Ekamreshwarar and the goddess Sri Kamakshi Devi. This beautiful composition represents the despair, devotion and dedication of the individual soul / Jeevathma, to achieve union with the supreme soul / Paramathma to attain eternal happiness. Shiva Ashtapadi / Shiva Gitimala begins with the veneration of Lord Ganesha. The entire verses illustrate the miserable state of separation of the goddess Parvathi from Lord Shiva. The goddess Sri Parvati underwent severe penance on the banks of the Kampa River to unite with Lord Shiva. The divine couple suffers an unbearable pain of separation; Lord Shiva descended to Earth and resides under a mango tree where the goddess Sri Parvati undertaking penance was observed by a faithful companion of the goddess and was duly informed. The state of remorse, abandonment, guilt and the messages exchanged through the companion of the goddess Sri Parvati, etc. They are beautifully represented in the Ashtapadi. Finally, Lord Shiva appears before the goddess Sri Parvati and apologizes profusely, after a first hardness between the couple and a happy union.

Lord Siva Gitimala and Ashtapadi Lyrics in Telugu:

॥ ప్రథమః సర్గః ॥
ధ్యానశ్లోకాః –
సకలవిఘ్ననివర్తక శఙ్కరప్రియసుత ప్రణతార్తిహర ప్రభో ॥

మమ హృదమ్బుజమధ్యలసన్మణీరచితమణ్డపవాసరతో భవ ॥ ౧ ॥

విధివదనసరోజావాసమాధ్వీకధారా
వివిధనిగమవృన్దస్తూయమానాపదానా ।
సమసమయవిరాజచ్చన్ద్రకోటిప్రకాశా
మమ వదనసరోజే శారదా సన్నిధత్తామ్ ॥ ౨ ॥

యదనుభవసుధోర్మీమాధురీపారవశ్యం
విశదయతి మునీనాత్మనస్తాణ్డవేన ।
కనకసదసి రమ్యే సాక్షిణీవీక్ష్యమాణః
ప్రదిశతు స సుఖం మే సోమరేఖావతంసః ॥ ౩ ॥

శర్వాణి పర్వతకుమారి శరణ్యపాదే
నిర్వాపయాస్మదఘసన్తతిమన్తరాయమ్ ।
ఇచ్ఛామి పఙ్గురివ గాఙ్గజలావగాహ-
మిచ్ఛామిమాం కలయితుం శివగీతిమాలామ్ ॥ ౪ ॥

శివచరణసరోజధ్యానయోగామృతాబ్ధౌ
జలవిహరణవాఞ్ఛాసఙ్గతం యస్య చేతః ।
నిఖిలదురితమభఙ్గవ్యాపృతం వా మనోజ్ఞం
పరశివచరితాఖ్యం గానమాకర్ణనీయమ్ ॥ ౫ ॥

॥ ప్రథమాష్టపదీ ॥

మాలవీరాగేణ ఆదితాలేన గీయతే
(ప్రలయపయోధిజలే ఇతివత్)

కనకసభాసదనే వదనే దరహాసం
నటసి విధాయ సుధాకరభాసం
శఙ్కర ధృతతాపసరూప జయ భవతాపహర ॥ ౧ ॥

జలధిమథనసమయే గరలానలశైలం
వహసి గలస్థముదిత్వరకీలం
శఙ్కర ధృతనీలగలాఖ్య జయ భవతాపహర ॥ ౨ ॥

విధురవిరథచరణే నివసన్నవనిరథే
పురమిషుణా హృతవానితయోధే
శఙ్కర వర వీరమహేశ జయ భవతాపహర ॥ ౩ ॥

కుసుమశరాసకరం పురతో విచరన్తం
గిరిశ నిహింసితవానచిరం తం
శఙ్కర మదనారిపదాఖ్య జయ భవతాపహర ॥ ౪ ॥

వటతరుతలమహితే నివసన్మణిపీఠే
దిశసి పరాత్మకలామతిగాఢే
శఙ్కర ధృతమౌన గభీర జయ భవతాపహర ॥ ౫ ॥

జలనిధిసేతుతటే జనపావనయోగే
రఘుకులతిలకయశః ప్రవిభాగే
శఙ్కర రఘురామమహేశ జయ భవతాపహర ॥ ౬ ॥

తను భృదవనకృతే వరకాశీనగరే
తారకముపదిశసి స్థలసారే
శఙ్కర శివ విశ్వమహేశ జయ భవతాపహర ॥ ౭ ॥

నిగమరసాలతలే నిరవధిబోధఘన
శ్రీకామక్షికుచకలశాఙ్కన
శఙ్కర సహకారమహేశ జయ భవతాపహర ॥ ౮ ॥

కచ్ఛపతనుహరిణా నిస్తులభక్తియుజా
సన్తతపూజితచరణసరోజ
శఙ్కర శివ కచ్ఛప లిఙ్గ జయ భవతాపహర ॥ ౯ ॥

శఙ్కరవరగురుణా పరిపూజితపాద
కాఞ్చిపురే వివృతాఖిలవేద
శఙ్కర విధుమౌలిమహేశ జయ భవతాపహర ॥ ౧౦ ॥

శ్రీవిధుమౌలియతేరిదముదితముదారం
శ్రృణు కరుణాభరణాఖిలసారం
శఙ్కరారుణశైలమహేశ జయ భవతాపహర ॥ ౧౧ ॥

శ్లోకః
కనకసభానటాయ హరినీలగళాయ నమ-
స్త్రిపురహరాయ మారరిపవే మునిమోహభిదే ।
రఘుకృతసేతవే విమలకాశిజుషే భవతే
నిగమరసాల కూర్మహరిపూజిత చన్ద్రధర ॥ ॥ ౬ ॥

పాపం వారయతే పరం ఘటయతే కాలం పరాకుర్వతే
మోహం దూరయతే మదం శమయతే మత్తాసురాన్ హింసతే ।
మారం మారయతే మహామునిగణానానన్దినః కుర్వతే
పార్వత్యా సహితాయ సర్వనిధయే శర్వాయ తుభ్యం నమః ॥ ౭ ॥

॥ ద్వితీయాష్టపదీ ॥

భైరవీరాగేణ త్రిపుటతాలేన గీయతే
(శ్రితకమలాకుచ ఇతివత్)
కలిహరచరితవిభూషణ శ్రుతిభాషణ
కరతలవిలసితశూల జయ భవతాపహర ॥ ౧ ॥

దినమణినియుతవిభాసుర విజితాసుర
నలిననయనకృతపూజ జయ భవతాపహర ॥ ౨ ॥

నిర్జితకుసుమశరాసన పురశాసన
నిటిలతిలకశిఖికీల జయ భవతాపహర ॥ ౩ ॥

పదయుగవినతాఖణ్డల ఫణికుణ్డల
త్రిభువనపావన పాద జయ భవతాపహర ॥ ౪ ॥

అన్ధకదానవదారణ భవతారణ
స్మరతనుభసితవిలేప జయ భవతాపహర ॥ ౫ ॥

హిమకరశకలవతంసక ఫణిహంసక
గగనధునీధృతశీల జయ భవతాపహర ॥ ౬ ॥

పరమతపోధనభావిత సురసేవిత
నిఖిలభువనజనపాల జయ భవతాపహర ॥ ౭ ॥

కరిముఖశరభవనన్దన కృతవన్దన
శ్రృణుశశిధరయతిగీతం జయ భవతాపహర ॥ ౮ ॥

శ్లోకః
తుహినగిరికుమారీ తుఙ్గవక్షోజకుమ్భ-
స్ఫుటదృఢపరిరమ్భశ్లిష్ట దివ్యాఙ్గరాగమ్ ।
ఉదితమదనఖేదస్వేదమంసాన్తరం మాం
అవతు పరశుపాణేర్వ్యక్త గాఢానురాగమ్ ॥ ౮ ॥

వాసన్తికాకుసుమకోమలదర్శనీయైః
అఙ్గైరనఙ్గవిహితజ్వరపారవశ్యాత్ ।
కమ్పాతటోపవనసీమని విభ్రమన్తీం
గౌరిమిదం సరసమాహ సఖీ రహస్యమ్ ॥ ౯ ॥

॥ తృతీయాష్టపదీ ॥

వసన్తరాగేణ ఆదితాలేన గీయతే
(లలితలవఙ్గలతా ఇతివత్)
వికసదమలకుసుమానుసమాగమశీతలమృదులసమీరే
అతికులకలరవసమ్భృతఘనమదపరభృతఘోషగభీరే
విలసతి సురతరుసదసి నిశాన్తే
వరయువతిజనమోహనతనురిహ శుభదతి వితతవసన్తే విలసతి ॥ ౧ ॥

కుసుమశరాసనశబరనిషూదితకుపితవధూధృతమానే
ధనరసకుఙ్కుమపఙ్కవిలేపనవిటజనకుతుకవిధానే విలసతి ॥ ౨ ॥

కుసుమితబాలరసాలమనోహరకిసలయమదనకృపాణే
మధుకరమిథునపరస్పరమధురసపాననియోగధురీణే విలసతి ॥ ౩ ॥

మదనమహీపతిశుభకరమన్త్రజపాయితమధుకరఘోషే
అవిరలకుసుమమరన్దకృతాభినిషేచనతరుమునిపోషే విలసతి ॥ ౪ ॥

మదననిదేశనివృత్తకలేబరమర్దనమలయసమీరే
తుషితమధువ్రతసఞ్చలదతిథిసుపూజనమధురసపూరే విలసతి ॥ ౫ ॥

సుచిరకృతవ్రతమౌనవనప్రియమునిజనవాగనుకూలే
లలితలతాగృహవిహృతికృతశ్రమయువతిసుఖానిలశీలే విలసతి ॥ ౬ ॥

విషమశరావనిపాలరథాయితమృదులసమీరణజాలే
విరహిజనాశయమోహనభసితపరాగవిజృమ్భణకాలే విలసతి ॥ ౭ ॥

శ్రీశివపూజనయతమతి చన్ద్రశిఖామణియతివరగీతం
శ్రీశివచరణయుగస్మృతిసాధకముదయతు వన్యవసన్తం విలసతి ॥ ౮ ॥

శ్లోకః
వికచకమలకమ్పాశైవలిన్యాస్తరఙ్గైః
అవిరలపరిరమ్భః సమ్భ్రమన్ మఞ్జరీణామ్ ।
పరిసరరసరాగైర్వ్యాప్తగాత్రానులేపో
విచరతి కితవోఽయం మన్దమన్దం సమీరః ॥ ౯ ॥

॥ ద్వితీయః సర్గః ॥
శ్లోకః
ప్రగల్భతరభామినీ శివచరిత్ర గానామృత-
ప్రభూతనవమఞ్జరీసురభిగన్ధిమన్దానిలే ।
రసాలతరుమూలగస్ఫురితమాధవీ మణ్డపే
మహేశముపదర్శయన్త్యసకృదాహ గౌరీమసౌ ॥

॥ చతుర్థాష్టపదీ ॥

రామక్రియారాగేణ ఆదితాలేన గీయతే
(చన్దనచర్చిత ఇతివత్)
అవిరల కుఙ్కుమపఙ్కకరమ్బితమృగమదచన్ద్రవిలేపం
నిటిల విశేషకభాసురవహ్నివిలోచన కృతపురతాపం
శశిముఖి శైలవధూతనయే విలోకయ హరమథ కేలిమయే శశిముఖి ॥ ౧ ॥

యువతిజనాశయమదనశరాయితశుభతరనయన విలాసం
భువనవిజృమ్భితఘనతరతిమిరనిషూదననిజతను భాసం శశిముఖి ॥ ౨ ॥

పాణి సరోజమృగీపరిశఙ్కితబాలతృణాలిగలాభం
యౌవతహృదయవిదారణపటుతరదరహసితామితశోభం శశిముఖి ॥ ౩ ॥

చరణసరోజలసన్మణినూపురఘోషవివృతపదజాతం
గగనధునీసమతనురుచిసంహతికారితభువనవిభాతం శశిముఖి ॥ ౪ ॥

నిఖిలవధూజనహృదయసమాహృతిపటుతరమోహనరూపం
మునివరనికరవిముక్తివిధాయకబోధవిభావనదీపం శశిముఖి ॥ ౫ ॥

వికచసరోరుహలోచనసకృదవలోకనకృతశుభజాతం
భుజగశిరోమణిశోణరుచా పరిభీతమృగీసముపేతం శశిముఖి ॥ ౬ ॥

రజతమహీధరసదృశమహావృషదృష్టపురోవనిభాగం
సనకసనన్దనమునిపరిశోభితదక్షిణతదితరభాగం శశిముఖి ॥ ౭ ॥

శ్రీశివపరిచరణవ్రతచన్ద్రశిఖామణి నియమధనేన
శివచరితం శుభగీతమిదం కృతముదయతు బోధఘనేన శశిముఖి ॥ ౮ ॥

శ్లోకః
మదనకదనశాన్త్యై ఫుల్లమల్లీ ప్రసూనైః
విరచితవరశయ్యామాప్నువన్నిన్దుమౌలిః ।
మృదుమలయసమీరం మన్యమానః స్ఫులిఙ్గాన్
కలయతి హృదయే త్వామన్వహం శైల కన్యే ॥ ౧౨ ॥

ఇతి సహచరీవాణీమాకర్ణ్య సాపి సుధాఝరీం
అచలదుహితా నేతుః శ్రుత్వాభిరూప్యగుణోదయమ్ ।
విరహజనితామార్తిం దూరీచకార హృది స్థితాం
దయితనిహితప్రేమా కామం జగాద మిథః సఖీమ్ ॥ ౧౩ ॥

॥ పఞ్చమాష్టపదీ ॥

తోడిరాగేణ చాపుతాలేన గీయతే
(సఞ్చరదధర ఇతివత్)
జలరుహశిఖరవిరాజితహిమకరశఙ్కితకరనఖరాభం
రుచిరరదనకిరణామరసరిదివ శోణనదాధర శోభం
సేవే నిగమరసాలనివాసం – యువతిమనోహరవివిధవిలాసం సేవే ॥ ౧ ॥

శుభతనుసౌరభలోభవిభూషణకైతవమహిత భుజఙ్గం
ముకుటవిరాజితహిమకరశకలవినిర్గలదమృతసితాఙ్గం సేవే ॥ ౨ ॥

మకుటపరిభ్రమదమరధునీనఖవిక్షతశఙ్కిత చన్ద్రం
ఉరసి విలేపితమలయజపఙ్కవిమర్దితశుభతరచన్ద్రం సేవే ॥ ౩ ॥

పన్నగకర్ణవిభూషణమౌలిగమణిరుచి శోణకపోలం
అగణితసరసిజసమ్భవమౌలికపాలనివేదిత కాలం సేవే ॥ ౪ ॥

హరిదనుపాలసురేశపదోన్నతిముపనమతో వితరన్తం
అనవధిమహిమచిరన్తనమునిహృదయేషు సదా విహరన్తం సేవే ॥ ౫ ॥

నారదపర్వతవరమునికిన్నరసన్నుత వైభవ జాతం
అన్ధకసురరిపుగన్ధసిన్ధుర విభఙ్గమృగాదిపరీతం సేవే ॥ ౬ ॥

విషయవిరతవిమలాశయకోశమహాధనచరణసరోజం
ఘనతరనిజతనుమఞ్జులతాపరి నిర్జితనియుత మనోజం సేవే ॥ ౭ ॥

శ్రీశివ భజన మనోరథచన్ద్రశిఖామణియతివరగీతం
శ్రోతుముదఞ్చితకౌతుకమవిరతమమరవధూపరి గీతం సేవే ॥ ౮ ॥

శ్లోకః
సహచరి ముఖం చేతః ప్రాతః ప్రఫుల్లసరోరుహ-
ప్రతిమమనఘం కాన్తం కాన్తస్య చన్ద్రశిఖామణేః ।
స్మరతి పరితోదృష్టిస్తుష్టా తదాకృతిమాధురీ-
గతివిషయిణీ వాణీ తస్య బ్రవీతి గుణోదయమ్ ॥ ౧౪ ॥

॥ షష్టాష్టపదీ ॥

కామ్భోజిరాగేణ త్రిపుటతాలేన గీయతే
(నిభృతనికుఞ్జ ఇతివత్)
నిఖిలచరాచరనిర్మితికౌశలభరితచరిత్ర విలోలం
లలితరసాలనిబద్ధలతాగృహవిహరణ కౌతుక శీలం
కలయే కాలమథనమధీశం
ఘటయ మయా సహ ఘనతరకుచపరిరమ్భణ కేలికృతాశం కలయే ॥ ౧ ॥

కువలయసౌరభవదనసమీరణవసితనిఖిలదిగన్తం
చరణసరోజవిలోకనతోఽఖిలతాపరుజం శమయన్తం కలయే ॥ ౨ ॥

పటుతరచాటువచోమృతశిశిరనివారితమనసిజతాపం
తరుణవనప్రియభాషణయా సహ సాదరవిహితసులాపం కలయే ॥ ౩ ॥

చలితదృగఞ్చలమసమశరానివ యువతిజనే నిదధానం
రహసి రసాలగృహం గతయా సహ సరసవిహారవిధానం కలయే ॥ ౪ ॥

దరహసితద్యుతిచన్ద్రికయా గతఖేద వికారచకోరం
లసదరుణాధరవదనవశీకృతయువతిజనాశయచోరం కలయే ॥ ౫ ॥

మలయజపఙ్కవిలేపనమురుతరకుచయుగమాకలయన్తం
కృతకరుషో మమ సుతనులతాపరిరమ్భణకేళిమయన్తం కలయే ॥ ౬ ॥

సురతరుకుసుమసుమాలికయా పరిమణ్డితచికురనికాయం
అలఘుపులకకటసీమని మృగమదపత్రవిలేఖవిధేయం కలయే ॥ ౭ ॥

శ్రీశివసేవనచన్ద్రశిఖామణియతివరగీతముదారం
సుఖయతు శైలజయా కథితం శివచరితవిశేషితసారం కలయే ॥ ౮ ॥

శ్లోకః
లీలాప్రసూనశరపాశసృణిప్రకాణ్డ-
పుణ్డ్రేక్షుభాసికరపల్లవమమ్బుజాక్షమ్ ।
ఆలోక్య సస్మితముఖేన్దుకమిన్దుమౌలిం
ఉత్కణ్ఠతే హృదయమీక్షితుమేవ భూయః ॥ ౧౫ ॥

॥ తృతీయః సర్గః ॥
శ్లోకః
ఇతి బహు కథయన్తీమాలిమాలోక్య బాలాం
అలఘువిరహదైన్యామద్రిజామీక్షమాణః ।
సపది మదనఖిన్నః సోమరేఖావతంసః
కిమపి విరహశాన్త్యై చిన్తయామాస ధీరః ॥ ౧౬ ॥

॥ సప్తమాష్టపదీ ॥

భూపాలరాగేణ త్రిపుటతాలేన గీయతే
(మామియం చలితా ఇతివత్)
శ్లోకః
లీలయా కలహే గతా కపటక్రుధా వనితేయం
మానినీ మదనేన మామపి సన్తనోతి విధేయమ్ ॥

శివ శివ కులాచలసుతా ॥ ౧ ॥

తాపితో మదనజ్వరేణ తనూనపాదధికేన
యాపయమి కతం ను తద్విరహం క్షణం కుతుకేన శివ శివ ॥ ౨ ॥

యత్సమాగమసమ్మదేన సుఖీ చిరం విహరామి ।
యద్వియోగరుజా న జాతు మనోహితం వితనోమి శివ శివ ॥ ౩ ॥

లీలయా కుపితా యదా మయి తామథానుచరామి ।
భూయసా సమయేన తామనునీయ సంవిహరామి శివ శివ ॥ ౪ ॥

అర్పితం శిరసి క్రుధా మమ హా యదఙ్ఘ్రిసరోజం
పాణినా పరిపూజితం బత జృమ్భమాణమనోజం శివ శివ ॥ ౫ ॥

దృశ్యసే పురతోఽపి గౌరి న దృశ్యసే చపలేవ ।
నాపరాధకథా మయి ప్రణతం జనం కృపయావ శివ శివ ॥ ౬ ॥

నీలనీరదవేణి కిం తవ మత్కృతేఽనునయేన ।
సన్నిధేహి న గన్తుమర్హసి మాదృశే దయనేన శివ శివ ॥ ౭ ॥

వర్ణితం శివదాసచన్ద్రశిఖామణిశ్రమణేన ।
వృత్తమేతదుదేతు సన్తతం ఈశితుః ప్రవణేన శివ శివ ॥ ౮ ॥

శ్లోకః
భువనవిజయీ విక్రాన్తేషు త్వమేవ న చేతరః
తవ న కృపణే యుక్తం మాదృగ్విధే శరవర్షణమ్ ।
మదన యది తే వైరం నిర్యాతు భో నియతం పురా
విహితమహితో నాహం నిత్యం తవాస్మి నిదేశగః ॥ ౧౭ ॥

మధుకరమయజ్యాఘోషేణ ప్రకమ్పయసే మనః
పరభృతవధూగానే కర్ణజ్వరం తనుషేతరామ్ ।
కుసుమరజసాం బృన్దైరుత్మాదయస్యచిరాదితః
స్మర విజయసే విశ్వం చిత్రీయతే కృతిరీదృశీ ॥ ౧౮ ॥

చలితలలితాపాఙ్గ శ్రేణీప్రసారణకైతవాత్
దరవికసితస్వచ్ఛచ్ఛాయాసితోత్పలవర్షణైః ।
విరహశిఖినా దూనం దీనం న మామభిరక్షితుం
యది న మనుషే జానాసి త్వం మదీయదశాం తతః ॥ ౧౯ ॥

శుభదతి విచరావః శుభ్రకమ్పాతటిన్యాస్తట
భువి రమణీయోద్యానకేళిం భజావః ।
ప్రతిముహురితి చిన్తావిహ్వలః శైలకన్యామభి
శుభతరవాదః పాతు చన్ద్రార్ధమౌలేః ॥ ౨౦ ॥

॥ చతుర్థః సర్గః ॥
శ్లోకః
కమ్పాతీరప్రచురరుచిరోద్యానవిద్యోతమాన-
శ్రీమాకన్దద్రుమపరిసర మాధవీక్లృప్తశాలామ్ ।
అధ్యాసీనం రహసి విరహశ్రాన్తమశ్రాన్తకేలిం
వాచం గౌరీప్రియసహచరీ ప్రాహ చన్ద్రావతంసమ్ ॥ ౨౧ ॥

॥ అష్టమాష్టపదీ ॥

సౌరాష్ట్రరాగేణ ఆదితాలేన గీయతే
(నిన్దతి చన్దనం ఇతివత్)
యా హి పురా హర కుతుకవతీ పరిహాసకథాసు విరాగిణీ
అసితకుటిల చికురావళి మణ్డనశుభతరదామ నిరోధినీ
శఙ్కర శరణముపైతి శివామతిహన్తి స శమ్బరవైరీ
శివ విరహకృశా తవ గౌరీ ॥ ౧ ॥

కుసుమ శయనముపగమ్య సపది మదనశరవిసరపరిదూనా
మలయజరజసి మహనలతతిమివ కలయతి మతిమతిదీనా
శివ విరహకృశా తవ గౌరీ ॥ ౨ ॥

ఉరసిరుచిరమణిహారలతాగతబలభిదుపలతతినీలా
మఞ్జువచనగృహపఞ్జరశుకపరిభాషణపరిహృతలీలా
శివ విరహకృశా తవ గౌరీ ॥ ౩ ॥

భృశకృతభవదనుభావనయేక్షిత భవతి విహితపరివాదా
సపది విహిత విరహానుగమనాదనుసమ్భృతహృదయ విషాదా
శివ విరహకృశా తవ గౌరీ ॥ ౪ ॥

బాలహరిణపరిలీఢపదా తదనాదరవిగత వినోదా
ఉన్మదపరభృతవిరుతాకర్ణనకర్ణశల్యకృతబాధా
శివ విరహకృశా తవ గౌరీ ॥ ౫ ॥

కోకమిథునబహుకేళివిలోకనజృమ్భితమదన వికారా
శఙ్కరహిమకరశేఖర పాలయ మామితి వదతి న ధీరా
శివ విరహకృశా తవ గౌరీ ॥ ౬ ॥

దూషితమృగమదరుచిరవిశేషక నిటిలభసికృతరేఖా
అతనుతనుజ్వరకారితయా పరివర్జితచన్ద్రమయూఖా
శివ విరహకృశా తవ గౌరీ ॥ ౭ ॥

శ్రీశివచరణనిషేవణచన్ద్రశిఖామణియతివరగీతం
శ్రీగిరిజావిరహక్రమవర్ణనముదయతు వినయసమేతం
శివ విరహకృశా తవ గౌరీ ॥ ౮ ॥

శ్లోకః
ఆవాసమన్దిరమిదం మనుతే మృడానీ ఘోరాటవీసదృశమాప్తసఖీజనేన ।
నా భాషణాని తనుతే నలినాయతాక్షీ దేవ త్వయా విరహితా హరిణాఙ్కమౌలే ॥

॥ నవమాష్టపదీ ॥

బిలహరిరాగేణ త్రిపుటతాలేన గీయతే
(స్తనవినిహత ఇతివత్)
హిమకరమణిమయదామనికాయ కలయతి వహ్నిశిఖామురసీయం
శైలజా శివ శైలజా విరహే తవ శఙ్కర శైలజా ॥ ౧ ॥

వపుషి పతితఘనహిమకరపూరం సన్తనుతే హృది దివి దురితారం శైలజా ॥ ౨ ॥

ఉరసి నిహితమృదు వితతమృణాలం పశ్యతి సపది విలసదళినీలం శైలజా ॥ ౩ ॥

సహచరయువతిషు నయనమనీలం నమితముఖీ వితనోతి విశాలం శైలజా ॥ ౪ ॥

రుష్యతి ఖిద్యతి ముహురనిదానం న ప్రతివక్తి సఖీమపి దీనం శైలజా ॥ ౫ ॥

శివ ఇతి శివ ఇతి వదతి సకామం పశ్యతి పశురివ కిమపి లలామం శైలజా ॥ ౬ ॥

సురతరువివిధఫలామృతసారం పశ్యతి విషమివ భృశమతిఘోరం శైలజా ॥ ౭ ॥

యతివరచన్ద్రశిఖామణిగీతం సుఖయతు సాధుజనం శుభగీతం శైలజా ॥ ౮ ॥

శ్లోకః
త్వద్భావనైకరసికాం త్వదధీనవృత్తిం
త్వన్నామసంస్మరణసంయుతచిత్తవృత్తిమ్ ।
బాలామిమాం విరహిణీం కృపణైకబన్ధో
నోపేక్షసే యది తదా తవ శఙ్కరాఖ్యా ॥ ౨౩ ॥

వస్తూని నిస్తులగుణాని నిరాకృతాని
కస్తూరికారుచిరచిత్రకపత్రజాతమ్ ।
ఈదృగ్విధం విరహిణీ తనుతే మృడానీ
తామాద్రియస్వ కరుణాభరితైరపాఙ్గైః ॥ ౨౪ ॥

॥ పఞ్చమః సర్గః ॥
శ్లోకః
ఏకామ్రమూలవిలసన్నవమఞ్జరీక
శ్రీమాధవీరుచిరకుఞ్జగృహేవసామి ।
తామానయానునయ మద్వచనేన గౌరీమిత్థం
శివేన పునరాహ సఖీ నియుక్తా ॥

॥ దశమాష్టపదీ ॥

ఆనన్దభైరవీరాగేణ ఆదితాలేన గీయతే
(వహతి మలయసమీరే ఇతివత్)
జయతి మదననృపాలే శివే కుపితపథిక జాలం
భ్రమరమిథున జాలే శివే పిబతి మధు సలీలం
విరహరుజా పురవైరీ పరిఖిద్యతి గౌరీ శివవిరహరుజా ॥ ౧ ॥

మలయమరుతి వలమానే శివే విరహ విఘటనాయ
సతి చ మధుపగానే శివే సరసవిహరణాయ శివ విరహరుజా ॥ ౨ ॥

కుసుమభరితసాలే శివే వితతసుమధుకాలే
కృపణవిరహిజాలే శివే కితవహృదనుకూలే శివవిరహరుజా ॥ ౩ ॥

మదనవిజయనిగమం శివే జపతి పికసమూహే
చతురకితవసఙ్గ (శివే) కుటిలరవదురూహే శివవిరహరుజా ॥ ౪ ॥

కుసుమరజసి భరితే శివే కితవమృదుళమరుతా
దిశి చ విదిశి వితతే శివే విరహివపుషి చరతా శివవిరహరుజా ॥ ౫ ॥

విమలతుహినకిరణే శివే వికిరతి కరజాలం
విహృతివిరతిహరణే శివే వియతి దిశి విశాలం శివవిరహరుజా ॥ ౬ ॥

మృదులకుసుమశయనే శివే వపుషి విరహదూనే
భ్రమతి లుఠతి దీనే శివే సుహితశరణహీనే శివవిరహరుజా ॥ ౭ ॥

జయతి గిరిశమతినా శివే గిరిశవిరహకథనం
చన్ద్రమకుటయతినా శివే నిఖిలకలుషమథనం శివవిరహరుజా ॥ ౮ ॥

శ్లోకః
యత్రత్వామనురఞ్జయన్నతితరామారబ్ధకామాగమం
వ్యాపారైరచలాధిరాజతనయే కేలీవిశేషైర్యుతః ।
తత్ర త్వామనుచిన్తయన్నథ భవన్నామైకతన్త్రం జపన్
భూయస్తత్పరితమ్భసమ్భ్రమసుఖం ప్రాణేశ్వరః కాఙ్క్షతి ॥ ౨౬ ॥

॥ ఏకాదశాష్టపదీ ॥

కేదారగౌళరాగేణ ఆదితాలేన గీయతే
(రతిసుఖసారే గతమభిసారే ఇతివత్)
హిమగిరితనయే గురుతరవినయే నియుతమదనశుభరూపం
నిటిలనయనమనురఞ్జయ సతి తవ విరహజనితఘనతాపమ్ ।
మలయజపవనే కమ్పానువనే వసతి సుదతి పురవైరీ
యువతిహృదయమదమర్దనకుశలీ సమ్భృత కేలివిహారీ । మలయజపవనే ॥ ౧ ॥

వద మృదు దయితే మమ హృది నియతే బహిరివ చరసి సమీపం
వదతి ముహుర్ముహురితి హర మామకదేహమదనఘనతాపమ్ । మలయజపవనే ॥ ౨ ॥

ఉరుఘన సారం హిమజల పూరం వపుషి పతితమతిఘోరం
సపది న మృష్యతి శపతి మనోభవమతిమృదుమలయ సమీరమ్ ।
మలయజపవనే ॥ ౩ ॥

విలిఖతి చిత్రం తవ చ విచిత్రం పశ్యతి సపది సమోదం
వదతి ఝటితి బహు మామితి శమ్బరరిపురతికలయతి ఖేదమ్ ।
మలయజపవనే ॥ ౪ ॥

అర్పయనీలం మయి ధృతలీలం నయనకుసుమమతిలోలం
విరహతరుణి విరహాతురమనుభజ మామిహ (తి) విలపతి సా (సోఽ) లమ్ ।
మలయజపవనే ॥ ౫ ॥

లసదపరాధం మనసిజబాధం విమృశ వినేతుముపాయం
గురుతరతుఙ్గపయోధరదుర్గమపానయ హరమనపాయమ్ । మలయజపవనే ॥ ౬ ॥

అతిధృతమానే పరభృతగానే కిఞ్చిదుదఞ్చయ గానం
జహి జహి మానమనూనగుణై రమయాశు విరహచిరదీనమ్ । మలయజపవనే ॥ ౭ ॥

ఇతి శివవిరహం ఘనతరమోహం భణతి నియమిజనధీరే
చన్ద్రశిఖామణినామని కుశలముపనయ గజవరచీరే । మలయజపవనే ॥ ౮ ॥

శ్లోకః
విమల సలిలోదఞ్చత్కమ్పాసరోరుహధోరణీ-
పరిమలరజః పాలీసఙ్క్రాన్తమన్దసమీరణే ।
వితపతి వియద్గఙ్గామఙ్గీచకార శిరః స్థితాం
తవ హి విరహాక్రాన్తః కాన్తః నతోఽపి న వేదితః ॥ ౨౭ ॥

అనుభవతి మృగాక్షీ త్వద్వియోగక్షణానాం
లవమివ యుగకల్పం స్వల్పమాత్మాపరాధమ్ ।
త్వయి విహితమనల్పం మన్యమానః కథఞ్చిత్
నయతి సమయమేనం దేవి తస్మిన్ప్రసీద ॥ ౨౮ ॥

ఇతి సహచరీవాణీమేణాఙ్కమౌళిమనోభవ-
వ్యథనకథనీమేనామాకర్ణ్య కర్ణసుధాఝరీమ్ ।
సపది ముదితా విన్యస్యన్తీ పదాని శనైః శనైః
జయతి జగతాం మాతా నేతుః ప్రవిశ్య లతాగృహమ్ ॥ ౨౯ ॥

సా దక్షదేవనవిహారజయానుషఙ్గలీలాహవే భవతి శైలజయా శివస్య ।
చేతః ప్రసాదమనయోస్తరసా విధాయ దేవ్యా కృతం కథయతి స్మ సఖీ రహస్యమ్ ॥ ౩౦ ॥

॥ ద్వాదశాష్టపదీ ॥

శఙ్కరాభరణరాగేణ త్రిపుటతాలేన గీయతే
(పశ్యతి దిశి దిశి ఇతివత్)
కలయతి కలయతి మనసి చరన్తం
కుచకలశస్పృశమయతి భవన్తమ్ ।
పాహి విభో శివ పాహి విభో
నివసతి గౌరీ కేళివనే పాహి విభో ॥ ౧ ॥

జపతి జపతి తవ నామ సుమన్త్రం
ప్రతి ముహురుదితసుమాయుధతన్త్రం పాహి ॥ ౨ ॥

ఉపచితకుసుమసుదామవహన్తీ
భవదనుచిన్తనమాకలయన్తీ పాహి ॥ ౩ ॥

మలయజరజసి నిరాకృతరాగా
వపుషి భసిత ధృతిసంయతయోగా పాహి ॥ ౪ ॥

పరిహృతవేణి జటాకచ భారా
నిజపతిఘటకజనాశయధారా పాహి ॥ ౫ ॥

అవిధృతమణిముకుటాదిలలామా
బిసవలయాదివిధారణకామా పాహి ॥ ౬ ॥

ముహురవలోకిత కిసలయశయనా
బహిరుపసఙ్గత సులలిత నయనా పాహి ॥ ౭ ॥

ఇతి శివ భజనగుణేన విభాన్తం
చన్ద్రశిఖామణినా శుభగీతమ్ ॥ పాహి ॥ ౮ ॥

శ్లోకః
సా వీక్షతే సహచరీం మదనేన లజ్జా-
భారేణ నోత్తరవచో వదతి ప్రగల్భా ।
వ్యాధూన్వతి శ్వసితకోష్ణసమీరణేన
తుఙ్గస్తనోత్తరపటం గిరిజా వియుక్తా ॥ ౩౧ ॥

॥ షష్ఠః సర్గః ॥
శ్లోకః
అథ విరహిణీమర్మచ్ఛేదానుసమ్భృతపాతక-
శ్రిత ఇవ నిశానాథః సఙ్క్రాన్తనీలగుణాన్తరః ।
కిరణనికరైరఞ్చత్కమ్పాసరిత్తటరమ్యభూ-
వలయమభితో వ్యాప్త్యా విభ్రాజయన్పరిజృమ్భతే ॥ ౩౨ ॥

వికిరతి నిజకరజాలం హిమకరబిమ్బేఽపి నాగతే కాన్తే ।
అకృతకమనీయరూపా స్వాత్మగతం కిమపి వదతి గిరికన్యా ॥ ౩౩ ॥

॥ త్రయోదశాష్టపదీ ॥

ఆహిరిరాగేణ ఝమ్పతాలేన గీయతే
(కథితసమయేఽపి ఇతివత్)
సుచిరవిరహాపనయ సుకృతభికామితం
సఫలయతి కిమిహ విధిరుత న విభవామితం
కామినీ కిమిహ కలయే సహచరీవఞ్చితాహం కామినీ ॥ ౧ ॥

యదనుభజనేన మమ సుఖమఖిలమాయతం
తమనుకలయే కిమిహ నయనపథమాగతం కామినీ ॥ ౨ ॥

యేన మలయజరేణునికరమిదమీరితం
న చ వహతి కుచయుగలమురు తదవధీరితుం కామినీ ॥ ౩ ॥

యచ్చరణపరిచరణమఖిలఫలదాయకం
న స్పృశతి మనసి మమ హా తదుపనాయకం కామినీ ॥ ౪ ॥

నిగమశిరసి స్ఫురతి యతిమనసి యత్పదమ్ ।
వితతసుఖదం తదపి హృది న మే కిమిదం కామినీ ॥ ౫ ॥

విరహసమయేషు కిల హృది యదనుచిన్తనమ్ ।
న స భజతి నయనపథమఖిలభయ కృన్తనం కామినీ ॥ ౬ ॥

కుచయుగలమభిమృశతి స యది రతసూచితమ్ ।
సఫలమిహ నిఖిలగుణసహితమపి జీవితం కామినీ ॥ ౭ ॥

నియమధనవిధుమౌళిఫణితమిదమఞ్చితమ్ ।
బహుజనిషు కలుషభయమపనయతు సఞ్చితం కామినీ ॥ ౮ ॥

శ్లోకః
ఆజగ్ముషీం సహచరీం హరమన్తరేణ
చిన్తావిజృమ్భితవిషాదభరేణ దీనా ।
ఆలోక్య లోకజననీ హృది సన్దిహానా
కాన్తం కయాభిరమితం నిజగాద వాక్యమ్ ॥ ౩౪ ॥

॥ చతుర్దశాష్టపదీ ॥

సారఙ్గరాగేణ త్రిపుటతాలేన గీయతే
(స్మరసమరోచిత ఇతివత్)
కుసుమశరాహవసముచితరూపా ప్రియపరిరమ్భణపరిహృతతాపా
కాపి పురరిపుణా రమయతి హృదయమమితగుణా కాపి ॥ ౧ ॥

ఘనతరకుచయుగమృగమదలేపా
దయితవిహితరతినవ్యసులాపా ॥ కాపి ॥ ౨ ॥

రమణరచితకటపత్రవిశేషా
ఉరసిలులితమణిహారవిభూషా ॥ కాపి ॥ ౩ ॥

దయితనిపీతసుధాధరసీమా
గలితవసనకటిపరిహృతదామా ॥ కాపి ॥ ౪ ॥

అధిగతమృదుతరకిసలయశయనా
దరపరిమీలితచాలితనయనా ॥ కాపి ॥ ౫ ॥

విహితమధురరతికూజితభేదా
దృఢపరిరమ్భణహతమేతి భేదా ॥ కాపి ॥ ౬ ॥

మహిత మహోరసి సరభసపతితా
లులితకుసుమకుటిలాలకముదితా ॥ కాపి ॥ ౭ ॥

చన్ద్రశిఖామణియతివరభణితమ్ ।
సుఖయతు సాధుజనం శివచరితమ్ ॥ కాపి ॥ ౮ ॥

॥ సప్తమః సర్గః ॥
శ్లోకః
చకోరాణాం ప్రీతిం కలయసి మయూఖైర్నిజకలా-
ప్రదానైర్దేవానమపి దయితభాజాం మృగదృశామ్ ।
న కోకానాం రాకాహిమకిరణ మాదృగ్విరహిణీ-
జనానాం యుక్తం తే కిమిదమసమం హన్త చరితమ్ ॥ ౩౫ ॥

గఙ్గామఙ్గనిషఙ్గిపఙ్కజరజోగన్ధావహామఙ్గనాం
ఆశ్లిష్యన్నిభృతం నిరఙ్కుశరహః కేళీవిశేషైరలమ్ ।
విభ్రాన్తః కిమదభ్రరాగభరితస్తస్యాముత స్యాదయం
కాన్తోఽశ్రాన్తమనఙ్గనాగవిహతో నాభ్యాశమభ్యాగతః ॥ ౩౬ ॥

సన్తాపయన్నఖిలగాత్రమమిత్రభావాత్
సన్దృశ్యతే జడధియామిహ శీతభానుః ।
దోషాకరో వపుషి సఙ్గతరాజయక్ష్మా
ఘోరాకృతిర్హి శివదూతి నిశాచరాణామ్ ॥ ౩౭ ॥

॥ పఞ్చదశాష్టపదీ ॥

సావేరిరాగేణ ఆదితాలేన గీయతే
(సముదితవదనే ఇతివత్)
విరహితశరణే రమణీచరణే విజితారుణపఙ్కజే
అరుణిమరుచిరం కలయతి సుచిరం మతిమివ వపుషి నిజే
రమతే కమ్పామహితవనే విజయీ పురారిజనే ॥ రమతే ॥ ౧ ॥

అలికులవలితే పరిమళలలితే యువతికుటిలాలకే
కలయతి కుసుమం విలసితసుషుమం సుమశరపరిపాలకే ॥ రమతే ॥ ౨ ॥

కుచగిరియుగలే నిజమతినిగలే మృగమదరచనాకరే
మణిసరనికరం విలసితముకురం ఘటయతి సుమనోహరే ॥ రమతే ॥ ౩ ॥

విలసితరదనే తరుణీవదనే కిసలయరుచిరాధరే
రచయతి పత్రం మకరవిచిత్రం స్మితరుచిపరిభాసురే ॥ రమతే ॥ ౪ ॥

కటితటభాగే మనసిజయోగే విగళితకనకామ్బరే
మణిమయరశనం రవిరచివసనం ఘటయతి తుహినకరే ॥ రమతే ॥ ౫ ॥

అధరసుధాళిం రుచిరరదాలిం పిబతి సుముఖశఙ్కరే
విదధతి మధురం హసతి చ విధురం రతినిధినిహితాదరే ॥ రమతే ॥ ౬ ॥

మృదులసమీరే వలతి గభీరే విలసతి తుహినకరే
ఉదితమనోజం వికసదురోజం శివరతివిహితాదరే ॥ రమతే ॥ ౭ ॥

ఇతి రసవచనే శివనతి రచనే పురహరభజనాదరే
బహుజనికలుషం నిరసతు పరుషం యతివరవిధుశేఖరే ॥ రమతే ॥ ౮ ॥

శ్లోకః
ఆయాతవానిహ న ఖేదపరానుషఙ్గ-
వాఞ్ఛాభరేణ వివశస్తరుణేన్దుమౌలిః ।
స్వచ్ఛ్న్దమేవ రమతాం తవ కోఽత్ర దోషః
పశ్యాచిరేణ దయితం మదుపాశ్రయస్థమ్ ॥ ౩౮ ॥

॥ అష్టమః సర్గః ॥
శ్లోకః
మత్ప్రాణనేతురసహాయరసాలమూల-
లీలాగృహస్య మయి చేదనురాగబన్ధః ।
అన్యాకథానుభవినః ప్రణయానుబన్ధో
దూతి ప్రసీదతి మమైష మహానుభావః ॥

॥ షోడశాష్టపదీ ॥

పున్నాగవరాలీ రాగేణ ఆదితాలేన గీయతే
(అనిలతరలకువలయనయనేన ఇతివత్)
అరుణకమలశుభతరచరణేన సపది గతా న హి భవతరణేన ।
యా విహృతా పురవైరిణా ॥ ౧ ॥

స్మితరుచిహిమకరశుభవదనేన నిహితగుణా విలసితసదనేన ।
యా విహృతా పురవైరిణా ॥ ౨ ॥

సరసవచనజితకుసుమరసేన హృది వినిహితరతికృతరభసేన ।
యా విహృతా పురవైరిణా ॥ ౩ ॥

విహిత వివిధకుసుమశరవిహృతే నానాగతరసా నయగుణ విహితేన ।
యా విహృతా పురవైరిణా ॥ ౪ ॥

ఉదితజలజరుచిరగళేన స్ఫుటితమనా న యువతినిగళేన ।
యా విహృతా పురవైరిణా ॥ ౫ ॥

కనకరుచిరసుజటాపటలేనానుహతసుఖాసతిలకనిటిలేన ।
యా విహృతా పురవైరిణా ॥ ౬ ॥

నిఖిలయువతిమదనోదయనేన జ్వరితమానా న విరహదహనేన ।
యా విహృతా పురవైరిణా ॥ ౭ ॥

తుహినకిరణధరయతిరచనేన సుఖయతు మాం శివహితవచనేన ।
యా విహృతా పురవైరిణా ॥ ౮ ॥

శ్లోకః
అయి మలయసమీర క్రూర భావోరగాణాం
శ్వసితజనిత కిం తే మాదృశీహింసనేన ।
క్షణమివ సహకారాదీశగాత్రానుషఙ్గ-
ఉపహృతపరిమలాత్మా సన్నిధేహి ప్రసన్నః ॥ ౪౦ ॥

॥ నవమః సర్గః ॥
శ్లోకః
ఇత్థం రుషా సహచరీం పరుషం వదన్తీ
శైలాధిరాజతనుజా తనుజాతకార్శ్యా ।
నీత్వా కథం కథమపి క్షణదాం మహేశః
మాగః ప్రశాన్తి వినతం కుటిలం బభాషే ॥ ౪౧ ॥

॥ సప్తదశాష్టపదీ ॥

ఆరభీరాగేణ త్రిపుటతాలేన గీయతే
(రజనిజనితగురు ఇతివత్)
చతురయువతిసురతాదర జాగరితారుణమధృతవిలాసం
నిటిలనయన నయనద్వితయం తవ కథయతి తదభినివేశమ్ ।
పాహి తామిహ ఫాలలోచన యా తవ దిశతి విహారం
గరళమిలితధవలామృతమివ హరమాగమవచనమసారం పాహి ॥

గురుతరకుచపరిరమ్భణసమ్భృతకుఙ్కుమపఙ్కిలహారం
స్మరతి విశాలమురో విశదం తవ రతిరభసాదనురాగం పాహి ॥ ౨ ॥

రతిపతిసమరవినిర్మిత నిశితనఖక్షతచిహ్నితరేఖం
వపురిదమళికవిలోచన లసదివ రతిభరకృతజయరేఖం పాహి ॥ ౩ ॥

రదనవసనమరుణమిదం తవ పురహర భజతి విరాగం
విగలితహిమకరశకలముదఞ్చితదర్శితరతిభరవేగం పాహి ॥ ౪ ॥

యువతిపదస్థితయావకరసపరిచిన్తితరతికమనీయం
విలసతి వపురిదమలఘుబహిర్గతమయతి విరాగమమేయం పాహి ॥ ౫ ॥

యువతికృతవ్రణమధరగతం తవ కలయతి మమ హృది రోషం
ప్రియవచనావసరేఽపి మయా సహ స్ఫుటయతి తత్పరితోషం పాహి ॥ ౬ ॥

సురతరుసుమదామనికాయనిబద్ధజటావలివలయముదారం
కితవమనోభవసఙ్గరశిథిలితమనుకథయతి సువిహారం పాహి ॥ ౭ ॥

ఇతి హిమగిరికులదీపికయా కృతశివపరివదనవిధానం
సుఖయతు బుధజనమీశనిషేవణయతివరవిధుశేఖరగానం పాహి ॥ ౮ ॥

శ్లోకః
ఈదృగ్విధాని సుబహూని తవ ప్రియాయాం
గాఢానురాగకృతసఙ్గమలాఞ్ఛితాని ।
సాక్షదవేక్షితవతీమిహ మాముపేత్య
కిం భాషసే కితవశేఖర చన్ద్రమౌళే ॥ ౪౨

॥ దశమః సర్గః ॥
శ్లోకః
తాముద్యతప్రసవబాణవికారఖిన్నాం
సఞ్చిన్త్యమానశశిమౌలిచరిత్రలీలామ్ ।
బాలాం తుషారగిరిజాం రతికేలిభిన్నాం
ఆళిః ప్రియాథ కలహాన్తరితామువాచ ॥ ౪౩ ॥

॥ అష్టాదశాష్టపదీ ॥

యదుకులకామ్భోజిరాగేణ ఆదితాలేన గీయతే
(హరిరభిసరతి ఇతివత్)
పురరిపురభిరతిమతి హృది తనుతే
భవదుపగూహనమిహ బహు మనుతే ।
శఙ్కరే హే శఙ్కరి మా భజ
మానిని పరిమానముమే శఙ్కరే ॥ ౧ ॥

మృగమదరసమయ గురుకుచయుగలే
కలయతి పురరిపురథ మతి నిగలే ॥ శఙ్కరే ॥ ౨ ॥

సుచిరవిరహభవమపహర కలుషం
భవదధరామృతముపహర నిమిషం ॥ శఙ్కరే ॥ ౩ ॥

సరస నిటిలకృతచిత్రకరుచిరం
తవ వదనం స చ కలయతి సుచిరం ॥ శఙ్కరే ॥ ౪ ॥

విభురయమేష్యతి శుభతరమనసా
తదురసి కుచయుగముపకురు సహసా ॥ శఙ్కరే ॥ ౫ ॥

సకుసుమనికరముదఞ్చయ చికురం
సుదతి విలోకయ మణిమయ ముకురం ॥ శఙ్కరే ॥ ౬ ॥

శ్రృణు సఖి శుభదతి మమ హితవచనం
ఘటయ జఘనమపి విగలితరశనం ॥ శఙ్కరే ॥ ౭ ॥

శ్రీవిధుశేఖరయతివరఫణితం
సుఖయతు సాధుజనం శివచరితం ॥ శఙ్కరే ॥ ౮ ॥

మహాదేవే తస్మిన్ప్రణమతి నిజాగః శమయితుం
తదీయం మూర్ధానం ప్రహరసి పదాభ్యాం గిరిసుతే ।
స ఏష క్రుద్ధశ్చేత్తుహినకిరణం స్థాపయతి చేత్
మృదూన్యఙ్గాన్యఙ్గారక ఇవ తనోత్యేష పవనః ॥ ౪౪ ॥

॥ ఏకాదశః సర్గః ॥
ఇత్థం ప్రియాం సహచరీం గిరముద్గిరన్తీం
చిన్తాభరేణ చిరమీక్షితుమప్యధీరా ।
గౌరీ కథఞ్చిదభిమానవతీ దదర్శ
కాన్తం ప్రియానునయవాక్య ముదీరయన్తమ్ ॥ ౪౫ ॥

బాలే కులాచలకుమారి విముఞ్చ రోషం
దోషం చ మయ్యధిగతం హృదయే న కుర్యాః ।
శక్ష్యామి నైవ భవితుం భవతీం వినాహం
వక్ష్యామి కిం తవ పురః ప్రియమన్యదస్మాత్ ॥ ౪౬ ॥

॥ ఏకోనవింశాష్టపదీ ॥

ముఖారి రాగేణ ఝమ్పతాలేన గీయతే
(వదసి యది కిఞ్చిదపి ఇతివత్)
భజసి యది మయి రోషమరుణవారిరుహాక్షి
కిమిహ మమ శరణమభిజాతం
శరణముపయాయతవతి కలుషపరిభావనం
న వరమితి సతి సుజనగీతం శివే శైలకన్యే
పఞ్చశరతపనమిహ జాతం
హరకమలశీతలం సరసనయనాఞ్చలం
మయి కలయ రతిషు కమనీయం శివే శైలకన్యే ॥ ౧ ॥

స్పృశసి యది వపురరుణకమలసమపాణినా
న స్పృశసి తపనమనివారం
దరహసితచన్ద్రకరనికరమనుషఞ్జయసి
యది మమ చ హృదయమతిధీరం శివే శైలకన్యే ॥ ౨ ॥

కుసుమదామచయేన మమ జటావలిజూటనిచయమయి సుదతి సవిలాసం
సపది కలయామి వలయాకృతిసరోజవనసురసరితముపహసితభాసమ్
శివే శైలకన్యే ॥ ౩ ॥

అమలమణిహారనికరేణ పరిభూషయసి
పృథుల కుచయుగల మతిభారమ్ ।
తుహినగరిశిఖరానుగళితసురనిమ్నగా
సుగళసమభావసుగభీరమ్ శివే శైలకన్యే ॥ ౪ ॥

వికసదసితామ్బురుహవిమలనయనా-
ఞ్చలైరుపచరసి విరహపరిదూనమ్ ।
సఫలమిహ జీవితం మమ సుదతి కోపనే
విసృజ మయి సఫలమతిమానమ్ శివే శైలకన్యే ॥ ౫ ॥

భవదధర మధు వితర విషమశరవికృతి-
హరమయి వితర రతినియతభానం
స్ఫుయమదపరాధశతమగణనీయమిహ
విమృశ భవదనుసృతివిధానం శివే శైలకన్యే ॥ ౬ ॥

కుపితహృదయాసి మయి కలయ భుజబన్ధనే
కురు నిశితరదనపరిపాతం
ఉచితమిదమఖిలం తు నాయికే సుదతి మమ
శిక్షణం స్వకుచగిరిపాతం శివే శైలకన్యే ॥ ౭ ॥

ఇతి వివిధవచనమపి చతురపురవైరిణా
హిమశిఖరిజనుషమభిరామం
శివభజననియతమతియతిచన్ద్రమౌలినా
ఫణితమపి జయతు భువి కామం శివే శైలకన్యే ॥ ౮ ॥

శ్లోకః
సుచిర విరహాక్రాన్తం విభ్రాన్తచిత్తమితస్తతః
స్మరపరవశం దీనం నోపేక్షసే యది మాం ప్రియే ।
అహమిహ చిరం జీవన్భావత్కసేవనమాద్రియే
యదపకరణం సర్వం క్షన్తవ్యమద్రికుమారికే ॥ ౪౭ ॥

॥ ద్వాదశః సర్గః ॥
శ్లోకః
ఇతి విరహితామేనాం చేతః ప్రసాదవతీం శివాం
అనునయగిరాం గుమ్ఫైః సమ్భావయన్నిజపాణినా ।
ఝటితి ఘటయన్మన్దస్మేరస్తదీయకరామ్బుజం
హిమకరకలామౌలిః సంప్రాప కేలిలతాగృహమ్ ॥ ౪౮ ॥

సంప్రాప్య కేళీగృహమిన్దుమౌలిః ఇన్దీవరాక్షీమనువీక్షమాణః ।
జహౌ రహః కేలికుతూహలేన వియోగజార్తిం పునరాబభాషే ॥ ౪౯ ॥

॥ వింశాష్టపదీ ॥

ఘణ్టారాగేణ ఝమ్పతాలేన గీయతే
(మఞ్జుతరకుఞ్జతల ఇతివత్)
పృథులతరలలితకుచయుగలమయి తే
మృగమదరసేన కలయామి దయితే ।
రమయ బాలే భవదనుగమేనం ॥ రమయ బాలే ॥ ౧ ॥

విధుశకలరుచిరమిదమలికమయి తే
శుభతిలకమభిలసతు కేలినియతే ॥ రమయ బాలే ॥ ౨ ॥

ఇహ విహర తరుణి నవ కుసుమశయనే
భవదధరమధు వితర మకరనయనే ॥ రమయ బాలే ॥ ౩ ॥

అయి సుచిరవిరహరుజమపహర శివే
సరసమభిలప రమణి పరభృతరవే ॥ రమయ బాలే ॥ ౪ ॥

కలయ మలయజపఙ్కమురసి మమ తే
కఠినకుచయుగమతను ఘటయ లలితే ॥ రమయ బాలే ॥ ౫ ॥

ఇదమమరతరుకుసుమనికరమయి తే
ఘనచికురముపచరతు సపది వనితే ॥ రమయ బాలే ॥ ౬ ॥

దరహసితవిధుకరముదఞ్చయ మనో-
భవతపనమపనుదతు విలసితఘనే ॥ రమయ బాలే ॥ ౭ ॥

శివచరణపరిచరణయతవిచారే
ఫణతి హిమకరమౌళినియమిధీరే ॥ రమయ బాలే ॥ ౮ ॥

శ్లోకః
ఈదృగ్విధైశ్చటులచాటువచోవిలాసైః
గాఢోపగూహనముఖామ్బుజచుమ్భనాద్యైః ।
ఆహ్లాదయన్ గిరిసుతామధికాఞ్చి నిత్యం
ఏకామ్రమూలవసతిర్జయతి ప్రసన్నః ॥ ౫౦ ॥

విద్యావినీతజయదేవకవేరుదార-
గీతిప్రబన్ధసరణిప్రణిధానమాత్రాత్ ।
ఏషా మయా విరచితా శివగీతిమాలా
మోదం కరోతు శివయోః పదయోజనీయా ॥ ౫౧ ॥

అవ్యక్తవర్ణముదితేన యథార్భకస్య
వాక్యేన మోదభరితం హృదయం హి పిత్రోః ।
ఏకామ్రనాథ భవదఙ్ఘ్రిసమర్పితేయం
మోదం కరోతు భవతః శివగీతిమాలా ॥ ౫౨ ॥

గుణానుస్యూతిరహితా దోషగ్రన్థివిదూషితా ।
తథాపి శివగీతిర్నో మాలికా చిత్రమీదృశీ ॥ ౫౩ ॥

ఓం నమః శివాయై చ నమః శివాయ

ఇతి శ్రీచన్ద్రశేఖరేన్ద్రసరస్వతీవిరచితా శివగీతిమాలా
అథవా శివాష్టపదీ సమాప్తా ।

॥ శుభమస్తు ॥

Also Read:

Siva Gitimala – Shiva Ashtapadi Lyrics in Hindi | English | Bengali | Gujarati | Punjabi | Kannada | Malayalam | Oriya | Telugu | Tamil

Siva Gitimala – Shiva Ashtapadi or Lyrics in Telugu

Leave a Reply

Your email address will not be published. Required fields are marked *

Scroll to top