Templesinindiainfo

Best Spiritual Website

Sri Padmanabha Shatakam Lyrics in Bengali

Padmanabha Satakam is a beautiful devotional poem directly addressed to Lord Padmanabha, the presiding deity of the kingdom, by Maharaja Swathi Tirunal of Travancore. The significant contribution of the Maharaja to the world of Carnatic music is well-known. In Padmanabha Satakam the poet follows the style of Narayaneeyam composed by another great Sanskrit scholar and poet, Meppathur Narayana Bhattathiri. Bhattathiri has condensed Srimad Bhagavatam in 1000slokas of unsurpassed poetic beauty and depth of devotion. Padmanabha Satakam is a more condensed version of Srimad Bhagavatam (or, we can say, of Narayeneeyam) in 100 slokas of great poetic merit where the poet has poured out his heart to his favorite deity Lord Padmanabha.

The poem is divided into 10 Daskas containing 10 slokas each. The commentator (Sri Guruswamy)has included a brief synopsis of the contents of the Dasaka in a couplet or two which are also included in the text.

Padmanabhashatakam Lyrics in Bengali:

॥ শ্রীপদ্মনাভশতকম্ ॥
মহারাজা স্বাতি তিরুনাল়্ বিরচিতম্
॥ শ্রী গণেশায় নমঃ ॥
॥ শ্রীপদ্মনাভশতকম্ ॥
মহারাজা স্বাতি তিরুনাল়্ বিরচিতম্
য়া তে পাদসরোজধূলিরনিশং ব্রহ্মাদিভির্নিস্পৃহৈঃ
ভক্ত্যা সন্নতকন্ধরৈঃ সকুতুকং সন্ধার্যমাণা হরে ।
য়া বিশ্বং প্রপুনাতি জালমচিরাত্ সংশোষয়ত্যংহসাং
সা মাং হীনগুণং পুনাতু নিতরাং শ্রীপদ্মনাভান্বহম্ ॥ ১ ॥

সত্ত্বৈকপ্রবণাশয়া মুনিবরা বেদৈঃ স্তুবন্তঃ পরৈঃ
ত্বন্মাহাত্ম্যপয়োনিধেরিহপরং নাদ্যাপি পারঙ্গতাঃ ।
এবং সত্যহমল্পবুদ্ধিরবশঃ স্তোতুং কথং শক্নুয়াং
ত্বত্কারুণ্যমৃতে হরে! তরতি কঃ পোতং বিনা সাগরম্ ॥ ২ ॥

তস্মাচ্ছিন্ধি মদীয়মোহমখিলং সংসারবন্ধাবহং
ভক্তিং ত্বত্পদয়োর্দিশ স্থিরতরাং সর্বাপদুন্মীলিনীম্ ।
বাণীং ত্বত্পদবর্ণনে পটুতমাং বিদ্বজ্জনাহ্লাদিনীং
দেহি ত্বত্পদসেবকায় ননু মে কারুণ্যবারাংনিধে ॥ ৩ ॥

য়েনেদং ভুবনং ততং স্ববলতো য়স্যাজ্ঞয়োদেত্যহর্-
নাথো বাত্যনিলো দহত্যপি শিখিঃ সর্বেঽপি য়ন্নির্মিতাঃ ।
য়শ্চেদং সকলং জগত্স্বজঠরে ধত্তে চ কল্পাবধৌ
তত্তাদৃগ্বিভবে ত্বয়ি প্রমুদিতে কিং বা দুরাপং নৃণাম্ ॥ ৪ ॥

ভক্তানামখিলেপ্সিতার্থঘটনে বদ্ধোদ্যমস্ত্বং হরে!
নিত্যং খল্বিতি বোদ্ধ্যমস্তি বহুশো দেব! প্রমাণং মম ।
নো চেদ্ব্যাসবচস্তবৈব বচনং বেদোপগীতং বচো
হা রথ্যাজনবাদবদ্বত ভবেন্মিথ্যা রমাবল্লভ! ॥ ৫ ॥

ইন্দ্রদ্যুম্ননৃপঃ করীন্দ্রজননং প্রাপ্তোঽথ শাপেন বৈ
নক্রাক্রান্তপদো বিমোচনপটুর্নাভূত্সহস্রং সমাঃ ।
ভূয়স্ত্বাময়মর্চয়ন্ সরসিজৈঃ শুণ্ডোদ্ধৃতৈঃ সাদরং
সারূপ্যং সমবাপ দেব ভবতো নক্রোঽপি গন্ধর্বতাম্ ॥ ৬ ॥

পাপঃ কশ্চিদজামিলাখ্যধরণীদেবোঽবসত্সন্ততং
স্বৈরিণ্যা সহ কামমোহিতমতিস্ত্বাং বিস্মরন্ মুক্তিদম্ ।
অন্তে চাহ্বয়দীশ! ভীতহৃদয়ো নারায়ণেত্যাত্মজং
নীতঃ সোঽপি ভবদ্ভটৈস্তবপদং সংরুধ্য য়াম্যান্ ভটান্ ॥ ৭ ॥

পাঞ্চালীং নৃপসন্নিধৌ খলমতির্দুশ্শাসনঃ পুষ্পিণীং
আকর্ষশ্চিকুরেণ দীনবদনাং বাসঃ সমাক্ষিপ্তবান্ ।
য়াবত্সা ভুবনৈকবন্ধুমবশা সস্মার লজ্জাকুলা
ক্রোশন্তী ব্যতনোঃ পটৌঘমমলং তস্যাস্ত্বনন্তং হরে ! ॥ ৮ ॥

য়ামার্ধেন তু পিঙ্গলা তব পদং প্রাপ্তা হি বারাঙ্গনা
বালঃ পঞ্চবয়োয়ুতো ধ্রুবপদং চৌত্তানপাদির্গতঃ ।
য়াতশ্চাপি মৃকণ্ডুমৌনিতনয়ঃ শৌরে! চিরং জীবিতং
নাহং বক্তুমিহ ক্ষমস্তব কৃপালভ্যং শুভং প্রাণিনাম্ ॥ ৯ ॥

এবং ভক্তজনৌঘকল্পকতরুং তং ত্বাং ভজন্তঃ ক্ষণং
পাপিষ্ঠা অপি মুক্তিমার্গমমলং কে কে ন য়াতা বিভো! ।
স ত্বং মামপি তাবকীনচরণে ভক্তং বিধায়ানতং
স্যানন্দূরপুরেশ! পালয় মুদা তাপান্মমাপাকুরু ॥ ১০ ॥

॥ দ্বিতীয়ং দশকম্ ॥
পিবন্তি য়ে ত্বচ্চরিতামৃতৌঘং
স্মরন্তি রূপং তব বিশ্বরম্যম্ ।
হরন্তি কালং চ সহ ত্বদীয়ৈঃ
মন্যেঽত্র তান্ মাধব ধন্যধন্যান্ ॥ ১ ॥

সদা প্রসক্তাং বিষয়েষ্বশান্তাং
মতিং মদীয়াং জগদেকবন্ধো! ।
তবৈব কারুণ্যবশাদিদানীং
সন্মার্গগাং প্রেরয় বাসুদেব! ॥ ২ ॥

দৃশৌ ভবন্মূর্তিবিলোকলোলে
শ্রুতী চ তে চারুকথাপ্রসক্তে ।
করৌ চ তে পূজনবদ্ধতৃষ্ণৌ
বিধেহি নিত্যং মম পঙ্কজাক্ষ ! ॥ ৩ ॥

নৃণাং ভবত্পাদনিষেবণং তু
মহৌষধং সংসৃতিরোগহারী ।
তদেব মে পঙ্কজনাভ ভূয়াত্
ত্বন্মায়য়া মোহিতমানসস্য ॥ ৪ ॥

য়দীহ ভক্তিস্তবপাদপদ্মে
স্থিরা জনানামখিলার্তিহন্ত্রী ।
তদা ভবেন্মুক্তিরহো করস্থা
ধর্মার্থকামাঃ কিমু বর্ণনীয়াঃ ॥ ৫ ॥

বেদোদিতাভির্ব্রতসত্ক্রিয়াভির্-
নশ্যত্যঘৌঘো ন হি বাসনা তু ।
ত্বত্পাদসেবা হরতি দ্বয়ং য়ত্
তস্মাত্স্থিরা সৈব মমাশু ভূয়াত্ ॥ ৬ ॥

ত্বদীয়নামস্মৃতিরপ্যকস্মাদ্
ধুনোতি পাপৌঘমসংশয়ং তত্ ।
য়দ্বদ্গদানৌষধমাশু হন্তি
য়থা কৃশানুর্ভুবি দারুকূটম্ ॥ ৭ ॥

য়দ্যত্স্মরন্ প্রোজ্ঝতি দেহমেতত্
প্রয়াণকালে বিবশোঽত্র দেহী ।
তত্তত্কিলাপ্নোতি য়দন্যভাবে
তস্মাত্তবৈব স্মৃতিরস্তু নিত্যম্ ॥ ৮ ॥

অনেকধর্মান্ প্রচরন্মনুষ্যঃ
নাকে নু ভুঙ্ক্তে সুখমব্যলীকম্ ।
তস্যাবধৌ সম্পততীহভূমৌ
ত্বত্সেবকো জাতু ন বিচ্যুতঃ স্যাত্ ॥ ৯ ॥

তস্মাত্সমস্তার্তিহরং জনানাং
স্বপাদভাজাং শ্রুতিসারমৃগ্যম্ ।
তবাদ্য রূপং পরিপূর্ণসত্বং
রমামনোহারি বিভাতু চিত্তে ॥ ১০ ॥

॥ তৃতীয়ং দশকম্ ॥
দিনমনুপদয়ুগ্মং ভাবয়েয়ং মুরারে
কুলিশশফরমুখ্যৈশ্চিহ্নিতে চারু চিহ্নৈঃ ।
নখমণিবিধুদীপ্ত্যা ধ্বস্তয়োগীন্দ্রচেতো –
গততিমিরসমূহং পাটলাম্ভোজশোভম্ ॥ ১ ॥

য়দুদিতজলধারা পাবনী জহ্নুকন্যা
পুরভিদপি মহাত্মা য়াং বিভর্তি স্বমূর্ধ্না ।
ভুজগশয়ন! তত্তে মঞ্জুমঞ্জীরয়ুক্তং
মুহুরপি হৃদি সেবে পাদপদ্মং মনোজ্ঞম্ ॥ ২ ॥

মুরহর! তব জঙ্ঘে জানুয়ুগ্মং চ সেবে
দুরিতহর তথোরূ মাংসল়ৌ চারুশোভৌ ।
কনকরুচিরচেলেনাবৃতৌ দেব! নিত্যং
ভুবনহৃদয়মোহং সম্যগাশঙ্ক্য নূনম্ ॥ ৩ ॥

মণিগণয়ুতকাঞ্চীদাম সত্কিঙ্কিণীভিঃ
মুখরতমমমেয়ং ভাবয়ে মধ্যদেশম্ ।
নিখিলভুবনবাসস্থানমপ্যদ্য কুক্ষিং
মুহুরজিত! নিষেবে সাদরং পদ্মনাভ! ॥ ৪ ॥

ভবহরণ! তথা শ্রীবত্সয়ুক্তং চ বক্ষো-
বিলসদরুণভাসং কৌস্তুভেনাঙ্গ কণ্ঠম্ ।
মণিবলয়য়ুতং তে বাহুয়ুগ্মং চ সেবে
দনুজকুলবিনাশায়োদ্যতং সন্ততং য়ত্ ॥ ৫ ॥

বরদ জলধিপুত্র্যা সাধু পীতামৃতং তে
ত্বধরমিহ ভজেঽহং চারুবিম্বারুণাভম্ ।
বিমলদশনপঙ্ক্তিং কুন্দসদ্কুড্মলাভাং
মকরনিভবিরাজত্কুণ্ডলোল্লাসি গণ্ডম্ ॥ ৬ ॥

তিলকুসুমসমানাং নাসিকাং চাদ্য সেবে
গরুডগমন! চিল্যৌ দর্পকেষ্বাসতুল্যৌ ।
মৃগমদকৃতপুণ্ড্রং তাবকং ফালদেশং
কুটিলমল়কজালং নাথ নিত্যং নিষেবে ॥ ৭ ॥

সজলজলদনীলং ভাবয়ে কেশজালং
মণিমকুটমুদঞ্চত্কোটিসূর্যপ্রকাশম্ ।
পুনরনঘ! মতিং মে দেব! সঙ্কোচ্য য়ুঞ্জে
তব বদনসরোজে মন্দহাসে মনোজ্ঞে ॥ ৮ ॥

গিরিধর তব রূপং ত্বীদৃশং বিশ্বরম্যং
মম বিহরতু নিত্যং মানসাম্ভোজমধ্যে ।
মনসিজশতকান্তং মঞ্জুমাধুর্যসারং
সততমপি বিচিন্ত্যং য়োগিভিঃ ত্যক্তমোহৈঃ ॥ ৯ ॥

অথ ভুবনপতেঽহং সর্গবৃদ্ধিক্রমং বৈ
কিমপি কিমপি বক্তুং প্রারভে দীনবন্ধো ।
পরপুরুষ! তদর্থং ত্বত্কৃপা সম্পতেন্ম-
য়্যকৃতসুকৃতজালৈর্দুর্লভা পঙ্কজাক্ষ ! ॥ ১০ ॥

॥ চতুর্থং দশকম্ ॥
তাবকনাভিসরোজাত্
জাতো ধাতা সমস্তবেদময়ঃ ।
শংসতি সকলো লোকো
য়ং কিল হিরণ্যগর্ভ ইতি ॥ ১ ॥

তদনু স বিস্মিতচেতাঃ
চতসৃষু দিক্ষু সাধু সম্পশ্যন্ ।
সমগাদচ্যুত তূর্ণং
চতুরাননতামিহাষ্টনয়নয়ুতাম্ ॥ ২ ॥

দৃষ্ট্বা কমলং সোঽয়ং
তন্মূলাং তব তনুং ত্বসম্পশ্যন্ ।
কোঽহং নিশ্শরণোঽজং
কস্মাদজনীতি দেব! চিন্তিতবান্ ॥ ৩ ॥

জ্ঞাতুং তত্বং সোঽয়ং
সরসিজনাল়াধ্বনা ত্বধো গত্বা ।
য়োগবলেন মনোজ্ঞাং
তব তনুমখিলেশ! নাপ্যপশ্যদহো ॥ ৪ ॥

তাবদ্দুখিতহৃদয়ঃ
পুনরপি চ নিবৃত্য পূর্ববজ্জলজে ।
তাবক করুণামিচ্ছন্
চক্রে সমাধিময়ি! ভগবন্ ॥ ৫ ॥

বত্সরশতকস্যান্তে
দৃঢতরতপসা পরিবিধূতহৃদয়মলঃ ।
স বিধিরপশ্যত্স্বান্তে
সূক্ষ্মতয়া তব তনুং তু সুভগতমাম্ ॥ ৬ ॥

পুনরিহ তেন নুতস্ত্বং
শক্তিমদাস্তস্য ভুবননির্মাণে ।
পূর্বং ত্বসৃজত্সোঽয়ং
স্থাবরজঙ্গমময়ং তু সকলজগত্ ॥ ৭ ॥

সনকমুখান্ মুনিবর্যান্
মনসাহ্যসৃজত্তবাঙ্ঘ্রিরতহৃদয়ান্ ।
সৃষ্টৌ তু তে নিয়ুক্তাঃ
জগৃহুর্বাণীং ন বৈধসীং ভূমন্! ॥ ৮ ॥

অঙ্গাদভবংস্তূর্ণং
নারদমুখ্যা মুনীশ্বরাস্তস্য ।
মনুশতরূপাত্মাসৌ
মানুষসৃষ্টিং চকার কমলভবঃ ॥ ৯ ॥

সর্গস্থিতিলয়মূলং
সুরমুনিজালৈরমেয়মহিমানম্ ।
তং ত্বামেব প্রণমন্
মুদমতুলাং পদ্মনাভ! কলয়ামি ॥ ১০ ॥

॥ পঞ্চমং দশকম্ ॥
ভুবো ভারং হর্তুং নিয়তমবতারাংস্তু ভবতো
নিয়ুঙ্ক্তে বক্তুং মামপি জডধিয়ং ভক্তিরধুনা ।
তদর্থং কৃত্বা মামনুপমপটুং পালয় হরে
ভবত্পাদাম্ভোজপ্রবণহৃদয়ং দেব সদয়ম্ ॥ ১ ॥

হয়গ্রীবাখ্যেন ত্রিদশরিপুণা বেদনিবহে
হৃতে নিদ্রাণস্যাম্বুরুহজনুষো হন্ত বদনাত্ ।
নিহন্তুং দুষ্টং তং বিনিহিতমতিস্ত্বং পুরুদয়া-
পয়োধিস্তূর্ণং বৈ দধিত বত মাত্স্যং কিল বপুঃ ॥ ২ ॥

নদীতোয়ে সন্তর্পয়তি কিল সত্যব্রতনৃপে
ভবান্ দৃষ্টো হস্তে পরমতনুবৈসারিণবপুঃ ।
ততো নিন্যে কূপং পুনরপি তটাকং চ তটিনীং
মহাব্ধিং তেনাহো সপদি ববৃধে তাবক বপুঃ ॥ ৩ ॥

ততস্তং ভূপালং প্রলয়সময়ালোকনপরং
মুনীন্দ্রান্ সপ্তাপি ক্ষিতিতরণিমারোপ্য চ ভবান্ ।
সমাকর্ষন্ বদ্ধাং নিজ বিপুলশৃঙ্গে পুনরিমাং
মুদা তেভ্যঃ সন্দর্শিতভুবনভাগঃ সমচরত্ ॥ ৪ ॥

পুনস্সংহৃত্য ত্বং নিজপরুষশৃঙ্গেণ দিতিজং
ক্ষণাদ্বেদান্ প্রাদা মুদিতমনসে দেব বিধয়ে ।
তথাভূতাঽমেয়প্রণতজনসৌভ্যাগ্যদ! হরে!
মুদা পাহি ত্বং মাং সরসিরুহনাভাঽখিলগুরো! ॥ ৫ ॥

বহংস্ত্বং মন্থানং কমঠবপুষা মন্দরগিরিং
দধানঃ পাণিভ্যাং স্বয়মপি বরত্রাং ফণিপতিম্ ।
সুরেভ্যঃ সম্প্রদাস্ত্বমৃতমিহ মথ্নন্ কিল জবাত্
হরে দুগ্ধাম্ভোধেঃ সপদি কমলাঽজায়ত ততঃ ॥ ৬ ॥

ততো নিক্ষিপ্তা বৈ সপদি বরণস্রক্ খলু তয়া
ভবত্কণ্ঠে মাত্রা নিখিলভুবনানাং সকুতুকম্ ।
পপৌ ত্বত্প্রীত্যর্থং সপদি বত হালাহলবিষং
গিরীশঃ প্রাদাস্ত্বং সুরতরুগজাদীনি হরয়ে ॥ ৭ ॥

পুরা তে দ্বাস্থৌ দ্বৌ সনকমুখশাপেন তু গতৌ
হরে! সর্বৈর্নিন্দ্যং খলু দনুজজন্মাতিকঠিনম্ ।
তয়োর্ভ্রাতা দুষ্টো মুরহর কনীয়ান্ বরবলাত্
হিরণ্যাক্ষো নাম ক্ষিতিমিহ জলে মজ্জয়দসৌ ॥ ৮ ॥

মহীং মগ্নাং দৃষ্ট্বা তদনু মনুনা সেবিতপদাত্
বিধের্নাসারন্ধ্রাত্সমভবদহো সূকরশিশুঃ ।
ততো দৈত্যং হত্বা পরমমহিতঃ পীবরতনুঃ
ভবান্ নিন্যে ভূমিং সকলবিনুত প্রাক্তনদশাম্ ॥ ৯ ॥

বধেন স্বভ্রাতুঃ পরমকুপিতো দানববরো
হিরণ্যপ্রারম্ভঃ কশিপুরিহ মোহাকুলমতিঃ ।
বিজেতুং ত্বাং সোঽয়ং নিখিলজগদাধারবপুষং
প্রতিজ্ঞাং চাকার্ষীদ্দনুসুতসভামধ্যনিলয়ঃ ॥ ১০ ॥

॥ ষষ্ঠং দশকম্ ॥
পুত্রোঽস্য বৈ সমজনীহ তবাঙ্ঘ্রিভক্তঃ
প্রহ্লাদ ইত্যভিমতঃ খলু সজ্জনানাম্ ।
তং তত্পিতা পরমদুষ্টমতির্ন্যরৌত্সীত্
ত্বত্সেবিনং কিমিহ দুষ্করমীশ পাপৈঃ ॥ ১ ॥

ভূয়োঽপি সোঽথ জগদীশ্বর! গর্ভবাসে
শ্রীনারদেন মুনিনোক্তভবত্প্রভাবঃ ।
শুশ্রাব নো জনকবাক্যমসৌ তদানীং
তত্প্রেরিতৈর্গুরুজনৈরপি শিক্ষিতশ্চ ॥ ২ ॥

দৃষ্ট্বা পিতাঽস্য নিজপুত্রমতিং ত্বকম্পাং
ত্বত্পাদপদ্ময়ুগল়াদতিরুষ্টচেতাঃ ।
শূলৈশ্চ দিগ্গজগণৈরপি দন্তশূকৈঃ
এনং নিহন্তুমিহ য়ত্নশতং চকার ॥ ৩ ॥

সোঽয়ং দৃঢং তব কৃপাকবচাবৃতাঙ্গঃ
নো কিঞ্চিদাপ কিল দেহরুজামনন্ত ! ।
“কস্তে বলং খল! বদে”ত্যথ দেব ! পৃষ্টো
“লোকত্রয়স্য তু বলং হরি”রিত্যবাদীত্ ॥ ৪ ॥

স্তম্ভে বিঘট্টয়তি কুত্র হরিস্তবেতি
রূপং ততঃ সমভবত্তব ঘোরঘোরম্ ।
নো বা মৃগাত্ম ন নরাত্ম চ সিংহনাদ-
সন্ত্রাসিতাখিলজগন্নিকরান্তরাল়ম্ ॥ ৫ ॥

তূর্ণং প্রগৃহ্য দনুজং প্রণিপাত্য চোরৌ
বক্ষো বিদার্য নখরৈঃ রুধিরং নিপীয় ।
পাদাম্বুজৈকনিরতস্য তু বালকস্য
কায়াধবস্য শিরসি স্বকরং ন্যধাস্ত্বম্ ॥ ৬ ॥

এবং স্বভক্তজনকামিতদানলোল !
নির্লেপ! নির্গুণ! নিরীহ! সমস্তমূল ! ।
মাং পাহি তাবক পদাব্জনিবিষ্টচিত্তং
শ্রীপদ্মনাভ! পরপূরষ! তে নমস্তে ॥ ৭ ॥

দৃষ্টো ভবানদিতিজো বটুরূপধারী
দৈত্যাধিপেন বলিনা নিজ য়জ্ঞগেহে ।
পৃষ্টশ্চ তেন “কিমু বাঞ্ছসি বালকে”তি
পাদত্রয়ী প্রমিতভূমিতলং য়য়াচে ॥ ৮ ॥

য়ুগ্মেন দেব! চরণস্য তু সর্বলোকে
পূর্ণে তৃতীয়চরণং ত্ববশঃ প্রদাতুম্ ।
বদ্ধশ্চ দেহি মম মূর্ধ্নি তৃতীয়পাদং
ইত্যব্রবীদ্গতমদোঽনুগৃহীত এষঃ ॥ ৯ ॥

জাতোঽসি দেব! জমদগ্নিসুতো মহাত্মা
ত্বং রেণুকাজঠর ঈশ্বর! ভার্গবাখ্যঃ ।
শম্ভুপ্রসাদ! সুগৃহীতবরাস্ত্রজালঃ
কৃত্তাখিলারিনিকরোরুকুঠারপাণিঃ ॥ ১০ ॥

॥ সপ্তমং দশকম্ ॥
য়াঞ্চাভিস্ত্বং খলু দিবিষদাং রাবণোপদ্রুতানাং
পুত্রীয়েষ্ট্যা ফলবিলসিতং মানবে দেব! বংশে ।
জাতো রামো দশরথনৃপাল্লক্ষ্মণেনানুজেন
ভ্রাত্রা য়ুক্তো বরদ! ভরতেনাথ শত্রুঘ্ননাম্না ॥ ১ ॥

ধৃত্বা চাপং সহজসহিতঃ পালয়ন্ কৌশিকীয়ং
য়জ্ঞং মারীচমুখসুমহারাক্ষসেভ্যঃ পরং ত্বম্ ।
কৃত্বাঽহল্যাং চরণরজসা গৌতমস্যেশ! পত্নীং
ভিত্বা শৈবং ধনুরথ তদা লব্ধবাংশ্চাপি সীতাম্ ॥ ২ ॥

মধ্যেমার্গাগত ভৃগুপতিং দেব! জিত্বাঽতিরুষ্টং
ভূয়ো গত্বা পরম! নগরীং স্বাময়োধ্যাং বসংস্ত্বম্ ।
কৈকেয়ীবাগ্ভ্রমিতমনসো হন্ত তাতস্য বাচা
ত্যক্ত্বা রাজ্যং বিপিনমগমো দুঃখিতাশেষলোকঃ ॥ ৩ ॥

গত্বাঽরণ্যং সহ দয়িতয়া চাথ সৌমিত্রিণা ত্বং
গঙ্গাং তীর্ত্বা সুসুখমবসচ্চিত্রকূটাখ্যশৈলে ।
তত্র শ্রুত্বা ভরতবচনাত্তাতমৃত্যুং বিষণ্ণঃ
তস্মৈ প্রাদা বরদ! ধরণিং পাদুকাং চাত্মনস্ত্বম্ ॥ ৪ ॥

ভূয়ো হত্বা নিশিচরবরান্ দ্রাগ্বিরাধাদিকাংস্ত্বং
কুম্ভোদ্ভূতেন খলু মুনিনা দত্তদিব্যাস্ত্রজালঃ ।
ভ্রাতৃচ্ছিন্নশ্রবণবিনদচ্ছূর্পণখ্যা বচোভিঃ
ত্বায়াতাংস্তান্ খরমুখমহারাক্ষসান্ প্রাবধীশ্চ ॥ ৫ ॥

মারীচং তং কনকহরিণছদ্মনায়াতমারাত্
জায়াবাক্যাদলমনুগতঃ প্রাবধীঃ সায়কেন ।
তাবদ্ভূমন্! কপটয়তিবেষোঽথ লঙ্কাধিনাথঃ
সীতাদেবীমহরত তদা দুঃখিতাত্মাঽভবস্ত্বম্ ॥ ৬ ॥

দৃষ্ট্বা লঙ্কেশ্বরবিনিহতং তাতমিত্রং জটায়ুং
তস্যাঽথ ত্বং বরদ কৃতবান্ প্রেতকার্যং বিষণ্ণঃ ।
দৃষ্টস্তত্রাঽনুপম! ভবতা মারুতির্ভক্তবর্যঃ
ভূয়স্তুষ্টঃ সরসমকরোঃ সাধু সুগ্রীবসখ্যম্ ॥ ৭ ॥

ছিত্বা সালান্ সরসমিষুণা সপ্তসঙ্খ্যান্ ক্ষণেন
ব্যাজেন ত্বং বত নিহতবান্ বালিনং শক্রসূনুম্ ।
ভূয়োঽন্বেষ্টুং জনকতনয়াং দিক্ষু সম্প্রেষ্য কীশান্
সুগ্রীবোক্তান্ পবনজকরে দত্তবাংশ্চাঙ্গুলীয়ম্ ॥ ৮ ॥

দৃষ্ট্বা সীতাং নিশিচরগৃহে তাবকং দেব! বৃত্তং
কৃত্স্নং তূক্ত্বাপ্যবিদিত ভবতে মারুতির্মৌলিরত্নম্ ।
তুষ্টস্তাবত্কিল জলনিধৌ বাণবিত্রাসিতে ত্বং
সেতুং বদ্ধ্বা নিশিচরপুরং য়াতবান্ পদ্মনাভ! ॥ ৯ ॥

হত্বা য়ুদ্ধে কিল দশমুখং দেব! সামাত্যবন্ধুং
সীতাং গৃহ্ণন্ পরিহৃতমলাং পুষ্পকে রাজমানঃ ।
প্রাপ্যায়োধ্যাং হরিবরনিষাদেন্দ্রয়ুক্তোঽভিষিক্তঃ
ত্রাতাশেষো রহিতদয়িতশ্চাগমোঽন্তে স্বধিষ্ণ্যম্ ॥ ১০ ॥

॥ অষ্টমং দশকম্ ॥
দেব! দুষ্টজনৌঘভরেণ
ব্যাকুলাঽথ বসুধাম্বুজয়োনিম্ ।
প্রাপ্য দেবনিকরৈঃ শ্রিতপাদং
স্বীয়তাপমিহ সম্যগুবাচ ॥ ১ ॥

পদ্মভূরথ নিশম্য চ তাপং
চিন্তয়ন্ সপদি দেব! ভবন্তম্ ।
য়ুষ্মদীয় সকলাধিহরঃ শ্রী
পদ্মনাভ ইতি তানবদত্সঃ ॥ ২ ॥

ভূয় এত্য তব মন্দিরমেতে
হীনপুণ্যনিকরৈরনবাপ্যম্ ।
তুষ্টুবুঃ সবিবুধো দ্রুহিণস্ত্বাং
তাপমাশ্বকথয়দ্বসুধায়াঃ ॥ ৩ ॥

“সংভবামি তরসা য়দুবংশে
য়াদবাঃ কিল ভবন্ত্বিহ দেবাঃ” ।
এবমীশ! কথিতে তব বাক্যে
বেধসা কিল সুরা মুদমাপন্ ॥ ৪ ॥

রোহিণীজঠরতঃ কিল জাতঃ
প্রেরণাত্তব পরং ত্বহিরাজঃ ।
ত্বং চ বিশ্বগতকল্মষহারী
দেবকীজঠরমাশু নিবিষ্টঃ ॥ ৫ ॥

অর্ধরাত্রসময়ে তু ভবন্তং
দেবকী প্রসুষুবেঽধিকধন্যা ।
শঙ্খচক্রকমলোরুগদাভী –
রাজিতাতিরুচিবাহুচতুষ্কম্ ॥ ৬ ॥

তাবদীশ! সকলো বত লোকো
তুষ্টিমাপ তমৃতে কিল কংসম্ ।
অষ্টমঃ কিল সুতোঽথ ভগিন্যা-
স্তদ্বধং কলয়তীতি চ বাক্যাত্ ॥ ৭ ॥

বাষ্পপূর্ণনয়নো বসুদবো
নীতবান্ ব্রজপদেঽথ ভবন্তম্ ।
তত্র নন্দসদনে কিল জাতা –
মম্বিকামনয়দাত্মনিকেতম্ ॥ ৮ ॥

কংস এত্য কিল সূতিগৃহে তে
কন্যকাং তু শয়িতাং স নিশাম্য ।
নূনমেবমজিতস্য তু মায়া
সেয়মিত্যয়মতুষ্টিময়াসীত্ ॥ ৯ ॥

তূর্ণমেষ নিধনে নিরতাংস্তে
পূতনাশকটধেনুকমুখ্যান্ ।
প্রাহিণোদজিত! মন্দমতিস্তান্
দুষ্করং কিমিহ বিস্মৃতপাপৈঃ ॥ ১০ ॥

॥ নবমং দশকম্ ॥
এবং ঘোষে বিরাজত্যয়ি! ভবতি জগন্নেত্রপীয়ূষমূর্তৌ
দুষ্টা কাচিন্নিশাচর্যথ সমধিগতা চারুয়োষিত্স্বরূপা ।
স্তন্যং দাতুং কুচাগ্রং তবমুখজলজে দেব! চিক্ষেপ য়াবত্
তাবত্ক্ষীরং সজীবং কপটশিশুরহো পীতবাংস্ত্বং ক্ষণেন ॥ ১ ॥

ভূয়ঃ শৌরে! ব্রজে বৈ শকটদনুসুত প্রাপ্তবান্ সংহৃতোঽয়ং
বাতাত্মা দানবশ্চ প্রবিতত ধরণীভারনাশেন কৃত্তঃ ।
দৃষ্ট্বৈবং তে মহত্বং দনুজহৃতিচণং তাদৃশীং বাললীলাং
ত্বন্মায়ামোহিতত্বাদয়ি! বত! পশুপা বিস্ময়ং মোদমাপন্ ॥ ২ ॥

নন্দঃ পশ্যন্ কদাচিন্নিজনিলয়গতং য়াদবাচার্যবর্যং
গর্গং তে কারয়ামাস চ বিধিবদসৌ নাম কৃষ্ণেতি তেন ।
রামাখ্যাং সোদরে তে মুনিরথ কলয়ন্ বৈভবং চ ত্বদীয়ং
নন্দাদিভ্যঃ প্রশংসন্ নিজপদমিহ সম্প্রাপ্তবান্ ভক্তবর্যঃ ॥ ৩ ॥

দৃষ্টং মাত্রা সমস্তং জগদিহ বদনে মৃত্তিকাভক্ষণং তে
ব্যাকুর্বন্ত্যা শিশূনামথ বচনবশাত্কিং ত্বিতো হন্ত চিত্রম্ ।
ভূয়স্তূর্ণং ভবান্ মঙ্গল়গুণ! গতবান্দেব! বৃন্দাবনং তত্
য়ুষ্মদ্গাত্রোরুশোভা প্রতুলিত য়মুনাতীরসংস্থং মনোজ্ঞম্ ॥ ৪ ॥

বন্যাশং ত্বয়্যধীশে কলয়তি তরসা শ্রীধরাহো বিরিঞ্চো
গোপান্ বত্সান্ ত্বদীয়ানহরদয়ি! বিভো! তাবদেব স্বরূপম্ ।
সঙ্খ্যাহীনং পরং ত্বামপি কবল়ধরং বীক্ষ্য সম্ভ্রান্তচেতাঃ
ত্বত্পাদাব্জে পতিত্বা মুহুরপি ভগবন্নস্তবীদচ্যুতং ত্বাম্ ॥ ৫ ॥

সর্পং তোয়ে নিমগ্নং পরমসুকুটিলং কাল়িয়ং বীক্ষ্য শৌরে!
নৃত্যন্ নৃত্যন্ ফণে ত্বং তদনু গতমদং চাকরোস্তং গতং চ ।
ভূয়স্ত্বদ্বেণুগানাদজিত! জগদলং মোহিতং সর্বমাসীত্
য়োষিচ্চিত্তাপহারে নিপুণমিদমিতি শ্রীশ! কিং বর্ণনীয়ম্ ॥ ৬ ॥

ধৃত্বা গোবর্ধনং ত্বং গিরিমলমতনোর্বাসবং বীতগর্বং
য়োষিদ্ভিস্ত্বং সলীলং রজনিষু কৃতবান্ রাসকেল়িং মনোজ্ঞাম্ ।
ভক্তাগ্র্যং গান্দিনেয়ং তব খলু নিকটে প্রেষয়ামাস কংসঃ
হত্বেভেন্দ্রং চ মল্লান্ য়দুবর! সবলো মাতুলং চাবধীস্ত্বম্ ॥ ৭ ॥

গত্বা সান্দীপনিং ত্বং কতিপয়দিবসৈঃ জ্ঞাতবান্ সর্ববিদ্যাঃ
কৃত্বা রাজ্যে নরেন্দ্রং বিমলতমগুণং চোগ্রসেনং জবেন ।
রাজানং ধর্মসূনুং চরণরতমবন্ চৈদ্যমুখ্যাদিহন্তা
রুগ্মিণ্যাদ্যষ্টয়োষায়ুতবহুবনিতাশ্চারমো দ্বারকায়াম্ ॥ ৮ ॥

বিপ্রং নিস্স্বং কুচেলং সদনমুপগতং বাল্যকালৈকমিত্রং
পশ্যন্ কারুণ্যলোলঃ পৃথুকমিহ করাত্তস্য সঙ্গৃহ্য তূর্ণম্ ।
লক্ষ্মীসংবারিতোঽপি স্বয়মপরিমিতং বিত্তমস্মৈ দদানঃ
কারুণ্যাম্ভোনিধিস্ত্বং জয় জয় ভগবন্! সর্বলোকাধিনাথ! ॥ ৯ ॥

য়াবদ্বৃদ্ধিঃ কলের্বৈ ভবতি বত তদা কল্কিরূপোঽতিহীনান্
ম্লেচ্ছান্ ধর্মৈকশত্রূন্ ভরিতপুরুরুষা নাশয়িষ্যত্যশান্তান্ ।
স ত্বং সত্বৈকতানাং মম মতিমনিশং দেহি শৌরে! তদর্থং
ত্বত্পাদাব্জে পতিত্বা মুহুরহমবশঃ প্রার্থয়ে পদ্মনাভ! ॥ ১০ ॥

॥ দশমং দশকম্ ॥
ভূষণেষু কিল হেমবজ্জগতি মৃত্তিকাবদথবা ঘটে
তন্তুজালবদহো পটেষ্বপি রাজিতাদ্বয়রসাত্মকম্ ।
সর্বসত্বহৃদয়ৈকসাক্ষিণমিহাতিমায় নিজবৈভবং
ভাবয়ামি হৃদয়ে ভবন্তমিহ পদ্মনাভ! পরিপাহি মাম্ ॥ ১ ॥

চিন্ময়াম্বুনিধিবীচিরূপ! সনকাদিচিন্ত্যবিমলাকৃতে !
জাতিকর্মগুণভেদহীন! সকলাদিমূল! জগতাং গুরো ! ।
ব্রহ্মশঙ্করমুখৈরমেয়বিপুলানুভাব! করুণানিধে!
ভাবয়ামি হৃদয়ে ভবন্তমিহ পদ্মনাভ! পরিপাহি মাম্ ॥ ২ ॥

মায়য়াবৃততনুর্বহিঃ সৃজসি লোকজালমখিলং ভবান্
স্বপ্নসন্নিভমিদং পুনস্সপদি সংহরন্নিজবলাদহো! ।
হন্ত! কূর্ম ইব পাদমাত্মনি তু ধারয়ত্যথ য়দা তদা
দারুণে তমসি বিস্তৃতে বিতিমিরো লসত্যনিশমাত্মনা ॥ ৩ ॥

দেবদেব! তনুবাঙ্মনোভিরিহ য়ত্করোমি সততং হরে!
ত্বয়্যসাবহমর্পয়াম্যখিলমেতদীশ! পরিতুষ্যতাম্ ।
ত্বত্পদৈকমতিরন্ত্যজোঽপি খলু লোকমীশ্বর! পুনাত্যহো!
নো রমেশ! বিমুখাশয়ো ভবতি বিপ্রজাতিরপি কেবলম্ ॥ ৪ ॥
পাপ এষ কিল গূহিতুং নিজ দুশ্চরিত্রমিহ সর্বদা
কৃষ্ণ! রাম! মধুসূদনেত্যনিশমালপত্যহহ! নিষ্ফলম্ ।
এবমীশ! তব সেবকো ভবতি নিন্দিতঃ খলজনৈঃ কলৌ
তাদৃশং ত্বনঘ! মা কৃথা বরদ! মামসীমতমবৈভব! ॥ ৫ ॥

কস্তু লোক ইহ নির্ভয়ো ভবতি তাবকং কিল বিনা পদং
সত্যলোকবসতি স্থিতোঽপি বত ন স্থিরো বসতি পদ্মভূঃ ।
এবমীশ সতি কা কথা পরম! পাপিনাং তু নিরয়াত্মনাং
তন্মদীয় ভববন্ধমোহময়ি! খণ্ডয়াঽনঘ! নমোঽস্তু তে ॥ ৬ ॥

ভাবয়ন্তি হি পরে ভবন্তময়ি! চারু বদ্ধবিমলাসনাঃ
নাসিকাগ্রধৃতলোচনা পরম! পূরকাদিজিতমারুতাঃ ।
উদ্গতাগ্রমথ চিত্তপদ্মময়ি! ভাবয়ন্ত ইহ সাদরং
ভানুসোমশিখিমণ্ডলোপরি তু নীলনীরদসমপ্রভম্ ॥ ৭ ॥

শ্লক্ষ্ণনীলকুটিলাল়কং মকরকুণ্ডলদ্যুতিবিরাজিতং
মন্দহাসহৃতসর্বলোকবিপুলাতিভারমতিমোহনম্ ।
কৌস্তুভেন বনমালয়াপি চ বিরাজিতং মদনসুন্দরং
কাঞ্চনাভবসনং ভবন্তময়ি! ভাবয়ন্তি হৃতকল্মষাঃ ॥ ৮ ॥

জ্ঞানমীশ! বত! কর্ম ভক্তিরপি তত্ত্রয়ং ভবদবাপকং
জ্ঞানয়োগবিষয়েঽধিকার ইহ বৈ বিরক্তজনতাহিতঃ ।
কর্মণীহ তু ভবেন্নৃণামধিকসক্তমানসজুষাং হরে!
য়ে তু নাধিকবিরক্তসক্তহৃদয়া হি ভক্তিরয়ি! তদ্ধিতা ॥ ৯ ॥

দেব! বৈভবমজানতাদ্য তব য়ন্ময়া নিগদিতং হরে!
ক্ষম্যতাং খলু সমস্তমেতদিহ মোদমীশ! কুরু তাবকে ।
দীর্ঘমায়ুরয়ি! দেহসৌখ্যমপি বর্ধতাং ভবদনুগ্রহাত্
পঙ্কজাভনয়নাপদো দলয় পদ্মনাভ! বিজয়ী ভব! ॥ ১০ ॥

॥ ইতি মহারাজা স্বাতি তিরুনাল়্ বিরচিতং পদ্মনাভশতকম্ ॥

Also Read:

Sri Padmanabha Shatakam Lyrics in Hindi | English | Bengali | Gujarati | Punjabi | Kannada | Malayalam | Oriya | Telugu | Tamil

Sri Padmanabha Shatakam Lyrics in Bengali

Leave a Reply

Your email address will not be published. Required fields are marked *

Scroll to top